बुधवार 18 जनवरी 2023 की दैनिक मुरली

18-01-2023 praatahmurli om shanti "baapdaada"' madhuban

pitaashri ji ke punya smriti divas par sunaane ke liye baapdaada ke madhur mahaavaakya

prashn:- bhavishya ke liye bachchon ne baap se kaun sa sauda kiya hai? us saude se sangam par kaun sa phaayda hai?

uttar:- deh sahit, jo bhi kuchh kakhpan hai, woh sab kuchh baap ko arpan karke baba ko kehte ho ki baba ham aapse phir vahaan (bhavishya mein) sab kuchh lenge, yeh hai sabse achha sauda। isse tumhaara baba ki tijori mein sab kuchh safe ho jaata hai aur apaar khushi rehti hai ki abhi yahaan ham thoda samay hai, phir apni raajdhaani mein honge। tumko koi poochhe to bolo vaah! ham to behad ke baap se behad sukh ka varsa le rahe hain। abhi ham ever healthy, ever wealthy bante hain।

om shanti। roohaani baap roohaani bachchon ko samjhaate hain meethe bachche, jab yahaan aakar baithte ho to aatma-abhimaani ho baap ki yaad mein baitho। yeh attention tumhaare liye for-ever hai। jab tak jeete ho, baap ko yaad karte raho। yaad nahin karenge to janma-janmaantar ke paap bhi nahin katenge। rachayita aur rachna ke aadi madhya ant ka saara svadarshan chakra tumhaari buddhi mein phirna chaahiye। tum light house ho na। ek okh mein hai shantidham, doosri okh mein hai sukhdhaam। uthte-baithte, chalte phirte apne ko light house samjho। apne ko light house samajhne se apna bhi kalyaan karte ho aur doosron ka bhi kalyaan karte ho। baba bhinna-bhinna yuktiyaan batlaate hain। jab koi raaste mein mile to unko bataana hai yeh duhkhadhaam hai - shantidham, sukhdhaam chalne chaahte ho! ishaara dena hai। light house bhi ishaara dete hain na, raasta dikhaate hain। tumko bhi sukhdhaam shantidham ka raasta bataana hai। din-raat yahi dhun honi chaahiye। yog ki taakat se tum kisko thoda bhi samjhaayenge to unko jhat teer lag jaayega। jisko teer lagta hai to ekdam ghaayal ho jaate hain। pahle ghaayal hote hain phir baba ke bante hain। baap ko pyaar se tum bachche yaad karte ho to baap ko bhi kashish hoti hai। kai to bilkul yaad hi nahin karte hain to baap ko taras padta hai। phir bhi kehte hain meethe bachche, unnati ko paate raho। purushaartha kar aage number mein jaao। patit-paavan sadgati daata ek hi baap hai, us ek baap ko hi yaad karna hai। sirf baap ko nahin saath-saath sweet hom ko bhi yaad karna hai। sirf sweet hom bhi nahin, milkiyat bhi chaahiye isliye svargadhaam ko bhi yaad karna hai।

baap aaye hain meethe-meethe bachchon ko perfect banaane। to imaandaar ban, sachchaai se apni jaanch karni hai ki ham kahaan tak perfect bane hain? perfect banne ki yukti bhi baap bataate rehte hain। mukhya khaami hai hi deh-abhimaan ki। deh-abhimaan hi avastha ko aage badhne nahin deta hai isliye deh ko bhi bhoolna hai। baap ka bachchon mein kitna lav rehta hai। baap bachchon ko dekh harshit hote hain। to bachchon ko bhi itni khushi mein rehna chaahiye। baap ko yaad kar andar gadgad hona chaahiye। din-pratidin khushi ka paara chadha rehna chaahiye। paara chadhega yaad ki yaatra se। woh aahiste-aahiste chadhega। haar jeet hote-hote phir nambarvaar purushaartha anusaar kalpa pahle misal apna-apna pad pa lenge। baapdaada bachchon ki avastha ko saakshi ho dekhte rehte hain aur samjhaani bhi dete rehte hain। baapdaada donon ka bachchon par bahut lav hai kyonki kalpa-kalpa lovely service karte hain aur bahut pyaar se karte hain। parantu bachche agar shreemat par nahin chalte to baap kar hi kya sakte hain। baap ko taras to bahut padta hai। maaya hara deti hai, baap phir khada kar dete hain। sabse meethe te meetha woh ek baap hai। kitna meetha kitna pyaara shiv bhola bhagwan hai! shiv bhola to ek ka hi naam hai।

meethe bachche, abhi tum bahut-bahut valuable heera bante ho। valuable heere javaahar jo hote hain unko safety ke liye hamesha bank mein rakhte hain। tum brahman bachche bhi valuable ho, jo shivbaaba ki bank mein safety se baithe ho। abhi tum baba ki safe mein rah amar bante ho। tum kaal par bhi vijay pahan rahe ho। shivbaaba ke bane to safe ho gaye। baaki oonch pad paane liye purushaartha karna hai। duniya mein manushyon ke paas kitna bhi dhan-daulat hai parantu woh sab khatma ho jaana hai। kuchh bhi nahin rahega। tum bachchon ke paas to abhi kuchh bhi nahin hai। yeh deh bhi nahin hai। yeh bhi baap ko de do। to jinke paas kuchh nahin hai unke paas jaise ki sab kuchh hai। tumne behad ke baap se sauda kiya hi hai bhavishya nai duniya ke liye। kehte ho baba deh sahit yeh jo kuchh kakhpan hai, sabhi kuchh aapko dete hain aur aap se phir vahaan sab kuchh lenge। to tum jaise safe ho gaye। sabhi kuchh baba ki tijori mein safe ho gaya। tum bachchon ke andar mein kitni khushi honi chaahiye, baaki thoda samay hai phir ham apni raajdhaani mein honge। tumko koi poochhe to bolo vaah! ham to behad ke baap se behad sukh ka varsa le rahe hain। ever healthy, wealthy bante hain। hamaari sabhi manokaamnaaen poori ho rahi hain। yeh baap kitna lovely pure hai। woh aatmaon ko bhi aap samaan pure banaate hain। tum jitna baap ko yaad karenge utna athaah lovely banenge, devtaayen kitne lovely hain। jo abhi tak bhi unke jad-chitron ko poojte rehte hain। to abhi tum bachchon ko itna lovely banna hai। koi bhi dehdhaari, koi bhi cheez pichhaadi ko yaad na aaye। baba aap se to humein sab kuchh mil gaya hai।

meethe bachchon ko apne saath pratigya karni chaahiye hamaare se koi aise vikarma na ho jisse dil andar khaati rahe isliye jitna ho sake apne ko sudhaarna hai, oonch martaba paane ka purushaartha karna hai। nambarvaar to hain hi। javaahraat mein bhi nambarvaar hote hain na। koi mein bahut defect hote hain, koi bilkul pure hote hain। baap bhi jauhri hai na। to baap ko ek-ek ratna ko dekhna hota hai। yeh kaun-sa ratna hai, inmen kaun sa defect hai। achhe-achhe pure ratnon ko baap bhi bahut pyaar se dekhenge। achhe-achhe pure ratnon ko sone ki dibbi mein rakhna hota hai। bachche bhi khud samajhte hain ki main kis prakaar ka ratna hoon। mere mein kaun sa defect hai।

ab tum kahenge vaah satguru vaah! jisne hamko yeh raasta bataaya hai। vaah takdeer vaah! vaah drama vaah! tumhaare dil se nikalta - shukriya baba aapka jo hamaare do mutthi chaaval lekar humein safety se bhavishya mein sauguna return dete ho। parantu ismen bhi bachchon ki badi vishaal buddhi chaahiye। bachchon ko athaah gyaan dhan ka khajaana milta rehta to apaar khushi honi chaahiye na। jitna hriday shuddh hoga to auron ko bhi shuddh banaayenge। yog ki sthiti se hi hriday shuddh banta hai। tum bachchon ko yogi banne banaane ka shauk hona chaahiye। agar deh mein moh hai, deh-abhimaan rehta hai to samjho hamaari avastha bahut kachchi hai। dehi-abhimaani bachche hi sachcha diamond bante hain isliye jitna ho sake dehi-abhimaani banne ka abhyaas karo। baap ko yaad karo। baba akshar sabse bahut meetha hai। baap bade pyaar se bachchon ko palkon par bithaakar saath le jaayenge। aise baap ki yaad ke nashe mein chaknaachoor hona chaahiye। baap ko yaad karte-karte khushi mein thande thaar ho jaana chaahiye। jaise baap apkaariyon par upkaar karte hain - tum bhi follow father karo। sukhdaai bano।

tum bachche abhi drama ke raaz ko bhi jaante ho - baap tumhein niraakaari, aakaari aur saakaari duniya ka sab samaachaar sunaate hain। aatma kehti hai abhi ham purushaartha kar rahe hain, nai duniya mein jaane ke liye। ham svarga mein chalne laayak zaroor banenge। apna aur doosron ka kalyaan karenge। achha - baap meethe bachchon ko samjhaate hain, baap duhkh harta sukh karta hai to bachchon ko bhi sabko sukh dena hai। baap ka right hand banna hai। aise bachche hi baap ko priy lagte hain। shubh kaarya mein right haath ko hi lagaate hain। to baap kehte har baat mein righteous bano, ek baap ko yaad karo to phir ant mati so gati ho jaayegi। is puraani duniya se mamatva mita do। yeh to kabristaan hai। dhandhaadhori bachchon aadi ke chintan mein mare to muphta apni barbaadi kar denge। shivbaaba ko yaad karne se tum bahut aabaad honge। deh-abhimaan mein aane se barbaadi ho jaati hai। dehi-abhimaani banne se aabaadi hoti hai। dhan ki bhi bahut laalach nahin rakhni chaahiye। usi phikraat mein shivbaaba ko bhi bhool jaate hain। baba dekhte hain sab kuchh baap ko arpan kar phir hamaari shreemat par kahaan tak chalte hain। shuru-shuru mein baap ne bhi trustee ho dikhaaya na। sab kuchh eeshvar arpan kar khud trustee ban gaya। bas eeshvar ke kaam mein hi lagaana hai। vighnon se kabhi darna nahin chaahiye। jahaan tak ho sake service mein apna sab kuchh saphal karna hai। eeshvar arpan kar trustee ban rehna hai। achha!

meethe-meethe sikeeldhe bachchon prati maat pita baapdaada ka yaadapyaar aur good morning। roohaani baap ki roohaani bachchon ko namaste।

avyakt-mahaavaakya - 1977

sabhi aavaaz se pare apne shant swaroop sthiti mein sthit rahne ka anubhav bahut samay kar sakte ho? aavaaz mein aane ka anubhav jyaada kar sakte ho va aavaaz se pare rahne ka anubhav jyaada samay kar sakte ho? jitna last stage athva karmaateet stage sameep aati jaayegi utna aavaaz se pare shant swaroop ki sthiti adhik priy lagegi, is sthiti mein sada ateendriy sukh ki anubhooti ho। isi ateendriy sukhmay sthiti dvaara anek aatmaon ka sahaj hi aahvaan kar sakenge। yeh powerful sthiti vishwa-kalyaankaari sthiti kahi jaati hai। jaise aajkal science ke saadhnon dvaara sab cheezen sameep anubhav hoti jaati hain, door ki aavaaz telephone ke saadhan dvaara sameep sunne mein aati hai, T.vi. (door-darshan) dvaara door ka drishya sameep dikhaai deta hai। aise hi silence ki stage dvaara kitna bhi door rehti hui aatma ko sandesh pahuncha sakte ho! vo aise anubhav karenge jaise saakaar mein sanmukh kisi ne sandesh diya hai। door baithe hue bhi aap shreshtha aatmaon ke darshan aur prabhu ke charitron ke drishya aise anubhav karenge jaise ki sammukh dekh rahe hain। sankalp ke dvaara dikhaai dega arthaat aavaaz se pare sankalp ki siddhi ka part bajaayenge। lekin is siddhi ki vidhi - jyaada-se-jyaada apne shant swaroop mein sthit hona hai isliye kaha jaata hai silence is gold, ise hi golden aged stage kaha jaata hai। is stage par sthit rahne se ‘kam kharcha baala nasheen' banenge। samay roopi khazaana, energy ka khazaana aur sthool khazaana sabmen ‘kam kharcha baala nasheen' ho jaayenge, iske liye ek shabd yaad rakho, woh kaun-sa hai? balance। har karma mein, har sankalp aur bol, sambandh va samparka mein balance ho। to bol, karma, sankalp, sambandh va samparka saadhaaran ke bajaae alaukik dikhaai dega arthaat chamatkaari dikhaai dega। har ek ke mukh se, man se yahi aavaaz niklega ki yeh to chamatkaar hai। samay ke pramaan svayan ke purushaartha ki speed aur vishwa seva ki speed teevra-gati ki chaahiye tab vishwa-kalyaankaari ban sakenge।

vishwa ki adhiktar aatmaayen baap ki aur aap ishta devtaaon ki pratyakshata ka aahvaan jyaada kar rahi hain aur ishta dev unka aahvaan kam kar rahe hain। iska kaaran kya hai? apne had ke svabhaav, sanskaaron ki pravritti mein bahut samay laga dete hain। jaise agyaani aatmaon ko gyaan sunne ki phursat nahin, vaise bahut se braahmanon ko bhi is powerful stage par sthit hone ki phursat nahin milti, isliye abhi jvaala roop banne ki aavashyakta hai।

baapdaada har ek ki pravritti ko dekh muskaraate rehte hain ki kaise tu mach busy ho gaye hain। bahut busy rehte ho na! vaastavik stage mein sada free rahenge। siddhi bhi hogi aur free bhi rahenge।

jab science ke saadhan dharti par baithe hue space mein gaye hue yantra ko control kar sakte hain, jaise chaahen, jahaan chaahen vahaan mod sakte hain, to silence ke shakti swaroop, is saakaar srishti mein shreshtha sankalp ke aadhaar se jo seva chaahe, jis aatma ki seva karna chaahe vo nahin kar sakte! lekin pahle apni-apni pravritti se pare arthaat upraam raho।

jo sabhi khazaane sunaaye woh svayan ke prati nahin, vishwa-kalyaan ke prati use karo। samjha, ab kya karna hai? aavaaz dvaara service, sthool saadhnon dvaara service aur aavaaz se pare sookshm saadhan sankalp ki shreshthata, sankalp shakti dvaara service ka balance pratyaksha roop mein dikhaao tab vinaash ka nagaada bajega। samjha। plans to bahut bana rahe ho, baapdaada bhi plan bata rahe hain। balance theek na hone ke kaaran mehnat jyaada karni padti hai। vishesh kaarya ke baad vishesh rest bhi lete ho na। final plan mein athakpan ka anubhav karenge। achha। aise sarva shaktiyon ko vishwa-kalyaan ke prati kaarya mein lagaane vaale, sankalp ki siddhi swaroop, svayan ki pravritti se svatantra, sada shant aur shakti swaroop sthiti mein sthit rahne vaale sarva shreshtha aatmaon ko baapdaada ka yaadapyaar aur namaste।

vardaan:- silence ki shakti dvaara nai srishti ki sthaapna ke nimitta banne vaale master shanti deva bhav

silence ki shakti jama karne ke liye is shareer se pare ashareeri ho jaao। yeh silence ki shakti bahut mahaan shakti hai, isse nai srishti ki sthaapna hoti hai। to jo aavaaj se pare silence roop mein sthit honge vahi sthaapna ka kaarya kar sakenge isliye shanti deva arthaat shant swaroop ban ashaanta aatmaon ko shanti ki kirnen do। vishesh shanti ki shakti ko badhaao। yahi sabse bade se bada mahaadaan hai, yahi sabse priy aur shaktishaali vastu hai।

slogan:- har aatma va prakriti ke prati shubh bhaavna rakhna hi vishwa kalyaankaari banna hai।