गुरुवार 19 जनवरी 2023 की दैनिक मुरली

19-01-2023 praatahmurli om shanti "baapdaada"' madhuban

“meethe bachche, saakaar shareer ko yaad karna bhi bhoot abhimaani banna hai, kyonki shareer 5 bhooton ka hai, tumhein to dehi-abhimaani ban ek videhi baap ko yaad karna hai''

prashn:- sabse sarvottam kaarya kaun sa hai jo baap hi karte hain?

uttar:- saari tamopradhaan srishti ko satopradhaan sada sukhi bana dena, yeh hai sabse sarvottam kaarya, jo baap hi karte hain। is oonche kaarya ke kaaran unke yaadgaar bhi bahut oonche-oonche banaaye hain।

prashn:- kin do shabdon mein saare drama ka raaz aa jaata hai?

uttar:- poojya aur pujaari, jab tum poojya ho tab purushottam ho, phir madhyam, kanishta bante। maaya poojya se pujaari bana deti hai।

geet:- mahphil mein jal uthi shama…

om shanti। bhagwan baith bachchon ko samjhaate hain ki manushya ko bhagwan nahin kaha ja sakta। brahma, vishnu, shankar ka bhi chitra hai unko bhagwan nahin kah sakte। parampita paramatma ka nivaas unse bhi oonch hai। unko hi prabhu, eeshvar, bhagwan aadi kehte hain। manushya jab pukaarte hain to unhon ko koi bhi aakaar va saakaar moorti dikhaai nahin padti, isliye kis bhi manushya aakaar ko bhagwan kah dete hain। sannyaasiyon ko bhi dekhte hain to kehte hain bhagwan, parantu bhagwan khud samjhaate hain ki manushya ko bhagwan nahin kaha ja sakta। niraakaar bhagwan ko to bahut yaad karte hain। jinhonne guru nahin kiya hai, chhote bachche hain unko bhi sikhaaya jaata hai paramatma ko yaad karo, parantu kis paramatma ko yaad karo - yeh nahin bataaya jaata। koi bhi chitra budvi mein nahin rehta। duhkh ke samay kah dete hain he prabhu। koi guru va devta aadi ka chitra unke saamne nahin aata hai। bhal bahut guru kiye hon to bhi jab he bhagwan kehte hain to kabhi unko guru yaad nahin aayega। agar guru ko yaad kar aur hi bhagwan kahen to woh manushya to janma-maran mein aane vaala ho gaya। to yeh goya 5 tatvon ke bane hue shareer ko yaad karte hain, jisko 5 bhoot kaha jaata hai। aatma ko bhoot nahin kaha jaata। to woh jaise bhoot pooja ho gai। buddhiyog shareer taraph chala gaya। agar kisi manushya ko bhagwan samajhte to aise nahin ki unmein jo aatma hai usko yaad karte hain। nahin। aatma to donon mein hai। yaad karne vaale mein bhi hai to jisko yaad karte hain unmein bhi hai। paramatma ko to sarvavyaapi kah dete। parantu paramatma ko paap aatma nahin kaha ja sakta। vaastav mein paramatma naam jab nikalta hai to buddhi niraakaar taraph chali jaati hai। niraakaar baap ko niraakaar aatma yaad karti hai। usko dehi-abhimaani kahenge। saakaar shareer ko jo yaad karte hain woh jaise bhoot abhimaani hain। bhoot, bhoot ko yaad karte hain kyonki apne ko aatma samajhne badle 5 bhooton ka shareer samajhte hain। naam bhi shareer par padta hai। apne ko bhi 5 tatvon ka bhoot samajhte hain aur unko bhi shareer se yaad karte hain। dehi-abhimaani to hain nahin। apne ko niraakaar aatma samjhen to niraakaar paramatma ko yaad karen। sabhi aatmaon ka sambandh pahle-pahle paramatma se hai। aatma duhkh mein paramatma ko hi yaad karti hai, unke saath sambandh hai। woh aatmaon ko sabhi duhkhon se chhudaate hain। unko shama bhi kehte hain। koi batti aadi ki to baat nahin। woh to parampita param aatma hai। shama kahne se manushya phir jyoti samajh lete hain। yeh to baap ne khud samjhaaya hai main param aatma hoon, jiska naam shiv hai। shiv ko roodra bhi kehte hain। us niraakaar ke hi anek naam hain aur koi ke itne naam nahin। brahma, vishnu, shankar ka ek hi naam hai। jo bhi dehdhaari hain unhon ka ek hi naam hai। ek eeshvar ko hi anek naam diye jaate hain। unki mahima aparmaapaar hai। manushya ka ek naam fix hai। ab tum marjeeva bane ho to tumhaare par doosra naam rakha gaya hai, jisse puraana sab bhool jaaye। tum parampita paramatma ke aage jeete ji marte ho। to yeh hai marjeeva janma। to zaroor maat pita paas janma liya jaata hai। yeh guhya baaten baap baith tumko samjhaate hain। duniya to shiv ko jaanti nahin। brahma, vishnu, shankar ko jaanti hai। brahma ka din, brahma ki raat bhi kehte hain। yeh bhi sirf suna hai। brahma dvaara sthaapna... parantu kaise, yeh nahin jaante। ab creator to zaroor naya dharma, nai duniya rachega। brahma dvaara brahman kul hi rachega। tum brahman brahma ko nahin parampita paramatma ko yaad karte ho kyonki brahma dvaara tum unke bane ho। baahar vaale deh-abhimaani brahman aise apne ko brahma ke bachche shiv ke potre nahin kahenge। shivbaaba jiski jayanti bhi manaate hain, parantu unko na jaanne kaaran unka kadar nahin hai। unke mandir mein jaate hain, samajhte hain yeh brahma, vishnu shankar va lakshmi-naaraayan to nahin hain। woh zaroor niraakaar paramatma hai। aur sabhi actors ka apna-apna part hai, punarjanma lete hain, to bhi apna naam dharte hain। yeh parampita paramatma ek hi hai, jiska vyakta naam roop nahin hai, parantu moodhamti manushya samajhte nahin hain। paramatma ka yaadgaar hai to zaroor woh aaya hoga, svarga racha hoga। nahin to svarga kaun rachega। ab phir aakar yeh roodra gyaan yagya racha hai। isko yagya kaha jaata hai kyonki ismen svaaha hona hota hai। yagya to bahut manushya rachte hain। woh to sab hain bhakti maarga ke sthool yagya। yeh parampita paramatma svayan aakar yagya rachte hain। bachchon ko padhaate hain। yagya jab rachte hain to usmein bhi brahman log shaastra kathaayen aadi sunaate hain। yeh baap to knowledgeful hai। kehte hain yeh geeta bhaagvat aadi shaastra sabhi bhakti maarga ke hain। yeh material yagya bhi bhakti maarga ke hain। yeh hai hi bhakti maarga ka samay। jab kaliyug ka ant aaye tab bhakti ka bhi ant aaye, tab hi bhagwan aakar mile kyonki vahi bhakti ka phal dene vaala hai। unko gyaan soorya kaha jaata hai। gyaan chandrama, gyaan soorya aur gyaan lucky sitaare। achha gyaan soorya to hai baap। phir maata chaahiye gyaan chandrama। to jis tan mein pravesh kiya hai woh ho gai gyaan chandrama maata aur baaki sab hain bachche lucky sitaare। is hisaab se jagdamba bhi lucky star ho gai kyonki bachche thahre na। stars mein koi sabmen teekha bhi hota hai। vaise yahaan bhi number-vaar hain। woh hain sthool aakaash ke soorya chaand aur sitaare aur yeh hai gyaan ki baat। jaise woh paani ki nadiyaan aur yeh hai gyaan ki nadiyaan, jo gyaan saagar se nikli hain।

ab shivjayanti manaate hain, zaroor woh saare srishti ka baap aate hain। aakar zaroor svarga rachte honge। baap aate hi hain aadi sanaatan devi-devta dharma ki sthaapna karne, jo praayah lop ho gaya hai। government bhi koi dharma ko nahin maanti hai। kehte hain hamaara koi dharma nahin। yeh theek kehte hain। baap bhi kehte hain bhaarat ka aadi sanaatan devi-devta dharma praayah lop hai। dharma mein taakat rehti hai। bhaaratvaasi apne daivi dharma mein the to bahut sukhi the। world almighty authority raajya tha। purushottam raajya karte the। shri lakshmi-naaraayan ko hi purushottam kaha jaata hai। nambarvaar oonch neech to hote hain। sarvottam purush, uttam purush, madhyam, kanishta purush to hote hi hain। pahle-pahle sabhi se sarvottam purush jo bante hain vahi phir madhyam, kanishta bante hain। to lakshmi-naaraayan hain purushottam। sabhi purushon mein uttam। phir neeche utarte hain to devta se kshatriy, kshatriy se phir vaishya, shoodra kanishta bante hain। seeta raam ko bhi purushottam nahin kahenge। sabhi raajaaon ke raaja, sarvottam satopradhaan purushottam hain lakshmi-naaraayan। yeh sab baaten tumhaari budvi mein baithi hain। kaise yeh srishti ka chakra chalta hai। pahle-pahle uttam phir madhyam, kanishta bante hain। is samay to saari duniya tamopradhaan hai, yeh baap samjhaate hain। jiski ab jayanti manaayenge, tum bata sakte ho ki aaj se 5 hajaar varsha pahle parampita paramatma shiv padhaare the। nahin to shiv jayanti kyon manaate! parampita paramatma zaroor bachchon ke liye saugaat le aayenge aur zaroor sarvottam kaarya karenge। saari tamopradhaan srishti ko satopradhaan sada sukhi banaate hain। jitna oonch hai utna oonch yaadgaar bhi tha jis mandir ko lootkar le gaye। manushya chadhaai karte hi hain dhan ke liye। foreign se bhi aaye dhan ke liye, us samay bhi dhan bahut tha। parantu maaya raavan ne bhaarat ko kaudi tulya bana diya hai। baap aakar heere tulya banaate hain। aise shivbaaba ko koi bhi nahin jaante hain। kah dete sarvavyaapi hai, yeh kehna bhi bhool hai। naeeya paar karne vaala satguru ek hai। dubone vaale anek hain। sabhi vishay saagar mein doobe hue hain tab to kehte hain is asaar sansaar, vishay saagar se us paar le chalo, jahaan ksheersaagar hai। gaaya bhi jaata hai ki vishnu ksheersaagar mein rehte the। svarga ko ksheersaagar kaha jaata hai। jahaan lakshmi-naaraayan raajya karte hain। baaki aise nahin vishnu vahaan ksheersaagar mein vishraam karte hain। vo log to bada talaab banaakar uske beech mein vishnu ko rakhte hain। vishnu bhi lamba chauda banaate hain। itne bade to lakshmi-naaraayan hote nahin। bahut-bahut 6 foot honge। paandavon ke bhi bade-bade but banaate hain। raavan ka kitna bada but banaate hain। bada naam hai to bada chitra banaate hain। baba ka naam bhal bada hai parantu unka chitra chhota hai। yeh to samjhaane liye itna bada roop de diya hai। baap kehte hain mera itna bada roop nahin hai। jaise aatma chhoti hai vaise hi main paramatma bhi star misal hoon। usko supreme soul kaha jaata hai, woh hai sabse oonch। usi mein saara gyaan bhara hua hai, unki mahima gaai hui hai ki woh manushya srishti ka beejroop hai, gyaan ka saagar hai, chaitanya aatma hai। parantu sunaave tab jab organs leve। jaise bachcha bhi chhote organs se baat nahin kar sakta hai, bada hota hai to shaastra aadi dekhne se agle sanskaaron ki smriti aa jaati hai। to baap baith bachchon ko samjhaate hain main phir se 5 hajaar varsha baad tumko vahi raajayog sikhaane aaya hoon। shreekrishna ne koi raajayog nahin sikhaaya hai। unhonne to praalabdha bhogi hai। 8 janma sooryavanshi, 12 janma chandravanshi phir 63 janma vaishya, shoodra vanshi banen। abhi sabka yeh antim janma hai। yeh shreekrishna ki aatma bhi sunti hai। tum bhi sunte ho। yeh hai sangamayugi braahmanon ka varna। phir tum brahman se jaakar devta banenge। brahman dharma, sooryavanshi devta dharma aur chandravanshi kshatriy dharma teenon ka sthaapak ek hi parampita paramatma hai। to teenon ka shaastra bhi ek hona chaahiye। alag-alag koi shaastra hain nahin। brahma itna bada sabhi ka baap hai, prajaapita। unka bhi koi shaastra hai nahin। ek geeta mein hi bhagvaanuvaach hai। brahma bhagvaanuvaach nahin hai। yeh hai shiv bhagvaanuvaach brahma dvaara, jisse shoodron ko convert kar brahman banaaya jaata hai। brahman hi devta aur jo naapaas hote hain, woh kshatriy ban jaate hain। do kala kam ho jaati hain। kitna achhi reeti samjhaate hain। oonch te oonch hai parampita paramatma phir brahma, vishnu, shankar unko bhi purushottam nahin kahenge। jo purushottam bante hain, vahi phir kanishta bhi bante hain। manushyon mein sarvottam hain lakshmi-naaraayan, jiske mandir bhi hain। parantu unki mahima ko koi jaante nahin hain। sirf pooja karte rehte hain। ab tum pujaari se poojya ban rahe ho। maaya phir pujaari bana deti hai। drama aisa bana hua hai। jab naatak poora hota hai tabhi mujhe aana padta hai। phir vriddhi hona bhi automatically banda ho jaata hai। phir tum bachchon ko aakar apna-apna part repeat karna hai। yeh parampita paramatma khud baith samjhaate hain, jiski jayanti bhaktimaarga mein manaate hain। yeh to manaate hi rahenge। svarga mein to koi ki bhi jayanti nahin manaate hain। shreekrishna, raam aadi ki bhi jayanti nahin manaayenge। woh to khud practical mein honge। yeh to hokar gaye hain, tab manaate hain। vahaan varsha-varsha shreekrishna ka birth de nahin manaayenge। vahaan to sadaiv khushiyaan hain hi, birth de kya manaayenge। bachche ka naam to maat-pita hi rakhte honge। guru to vahaan hota nahin। vaastav mein in baaton ka gyaan aur yog se koi connection nahin hai। baaki vahaan ki rasam kya hai, so poochhna hota hai, ya to baba kah denge vahaan ke kaayde jo honge woh chal padenge, tumko poochhne ki kya darkaar hai। pahle mehnat kar apna pad to praapta kar lo। laayak to bano, phir poochhna। drama mein koi na koi kaayda hoga। achha।

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne ko niraakaar aatma samajh niraakaar baap ko yaad karna hai। kisi bhi dehdhaari ko nahin। marjeeva ban puraani baaton ko buddhi se bhool jaana hai।

2) baap ke rache hue is roodra yagya mein sampoorn svaaha hona hai। shoodron ko brahman dharma mein convert karne ki seva karni hai।

vardaan:- dincharya ki setting aur baap ke saath dvaara har kaarya accurate karne vaale vishwa kalyaankaari bhav

duniya mein jo bade aadmi hote hain unki dincharya set hoti hai। koi bhi kaarya accurate tab hota hai jab dincharya ki setting ho। setting se samay, energy sab bach jaate hain, ek vyakti 10 kaarya kar sakta hai। to aap vishwa kalyaankaari jimmevaar aatmaayen, har kaarya mein saphalta praapta karne ke liye dincharya ko set karo aur baap ke saath sada combined hokar raho। hajaar bhujaaon vaala baap aapke saath hai to ek kaarya ke bajaae hajaar kaarya accurate kar sakte ho।

slogan:- sarva aatmaon prati shuddh sankalp karna hi vardaani moorta banna hai।