शुक्रवार 21 अप्रैल 2023 की दैनिक मुरली

21-04-2023 praatahmurli om shanti "baapdaada"' madhuban

“meethe bachche - harek ke sir par anek janmon ke vikarmon ka bojh hai, hisaab-kitaab ki bhogna hai, jise yog-bal se hi chuktu karna hai''

prashn:- baap samaan kis baat mein saakshi banna hai?

uttar:- jaise baap ko kisi bhi baat ka aphsos nahin hota। bhal koi bachcha beemaar bhi padta, kuchh bhi hota, baap saakshi hokar dekhte hain। aise tum bachche bhi saakshi bano। is puraani duniya se mamatva mita do। harek ka karmabhog apna-apna hai। aatma ne jo ulte karma kiye hain, uski bhogna use bhogni hi hai isliye saakshi hokar dekhte raho।

geet:- yeh vakta ja raha hai…

om shanti। behad ka baap varsa lene vaale bachchon ko samjha rahe hain ki samay najdeek hota jaata hai। yeh koi ke liye rukta nahin hai। yeh buddhiyog ki musaaphiri hai, jo tumhein karni hi hai। yeh shaadi-muraadi, teertha aadi kuchh bhi nahin karne hain। baap ka yeh antim direction hai - meethe-meethe bachche ab jaana hai paramdham। geeta, bhaagvat, raamaayan, mahaabhaarat mein jo likha hua hai uski ab tum peeth kar sakte ho। jo baba ne pahle sahaj raajayog sikhaaya tha, vo ab sikhla rahe hain। bhakti maarga ke shaastron mein aur ab practical ki baaton mein kitna raat din ka farka hai! baap hi aakar raajayog sikhlaate hain। bachchon ko direction dete hain ki deh sahit sab sambandhon ko chhod ek baap ko yaad karte raho। bachche ab practical mein samajhte hain ki shaastra right hain ya is samay jo baap sammukh samjhaate hain woh right hai।

tum bachche ab drama ke raaz ko jaante ho। harek cheez satopradhaan hoti hai phir sato rajo tamo hoti hai। jaise naya ghar phir puraana ho jaata hai। vaise hi yeh behad ki duniya svarga thi। vahaan kaun rehte the, yeh tumhaari buddhi mein sab chamakta hai। devi-devtaaon ko kaise raajya-bhaagya mila tha jo phir ab mil raha hai। bachche bhi apni takdeer anusaar purushaartha kar rahe hain। baap samjhaate hain bachche, is puraani duniya se mamatva mita do, dehi-abhimaani bano। ismen badi mehnat lagti hai। nirantar us baap ko aur sukh-dhaam ko yaad karna hai। baap ko kabhi koi baat mein duhkh nahin hota। saakshi ho dekhte hain। bachche kab beemaar, rogi ban padte hain to kya shivbaaba ko aphsos hota hoga? kabhi nahin। kahenge drama anusaar karmabhog to harek ko bhogna hi hai। jaise woh saakshi ho dekhte hain, bachchon ko bhi saakshi ho dekhna hai। behad ka baap, woh hai parampita paramatma। unka bachchon mein lav to bahut hai na। paramatma ka aatmaon mein lav hai। baap kehte hain main jaanta hoon harek karma anusaar duhkh-sukh paate hain। saakshi ho dekhte hain। bachchon ko bhi aise saakshi ho dekhna hai। har ek jeev ki aatma jo ulta karma karti hai to shareer ke saath aatma ko bhogna padta hai। duhkh-sukh aatma bhogti hai। sanskaar aatma mein rehte hain। baap kehte hain main aakar duhkh se chhudaata hoon। ab bachchon ko shiksha deta hoon। manushya geeta shaastra aadi se koi shiksha praapta nahin kar sakte। yeh baap sammukh baith samjhaate hain। baap kehte hain tum bhakti maarga mein mujhe kitna yaad karte ho! bhale koi science ko, nature ko maanne vaala hai phir bhi kisi na kisi samay unke mukh se he parampita paramatma, O god father zaroor nikalta hoga। sab bhakta baap ko zaroor yaad karte hain। baap sab kuchh karke bachchon ko sukhi banaae khud chhip jaate hain। baap aate hi hain ek baar। kehte hain drama anusaar mujhe sankalp uthta hai main ab jaaoon। shareer ka aadhaar zaroor lena pade। jaise aatma bigar shareer bol nahin sakti। garbha mein bachcha banta hai phir bada hone se bolna seekhta hai। baap to aate hi bade shareer mein hain। mera bhi part hai, main ek hi baar aakar sabko maaya ke duhkhon se liberate karta hoon। ab to sab taraph manushya duhkhi hain। traahi traahi karte rehte hain। ghar-ghar mein rona-peetna, ladna-jhagadna laga hua hai। satayug mein yeh koi baat hoti nahin। naam hi hai svarga। shaastron mein to bahut baaten likh di hain। bachche jaante hain is srishti mein kitna duhkh hai। kitne dharma hain, satayug mein itne dharma thode hi the। 5 hajaar varsha ki baat hai। laakhon varsha kah dene se manushyon ki buddhi se satayug ka naam gum ho gaya hai। 5 hajaar varsha pahle main aaya tha। aakar anek dharmon ka vinaash kar ek aadi sanaatan dharma ki sthaapna ki thi। baaki jo bhi itne manushya hain sabhi ka vinaash hona hai, iske liye hi yeh mahaabhaari ladaai hai। gaaya hua hai mahaabhaari mahaabhaarat ladaai mein vinaash hua tha। yeh sab dharma vinaash ho jaayenge। jo devi-devta dharma ke hain unko aakar main padhaata hoon। mera part hai। manushya bhi jaante hain ki abhi bahut duhkh hai। main bhi jaanta hoon manushyon ko bahut duhkh hai। ghar mein rona peetna laga hua hai। bachche dhan ke liye baap ka khoon karne mein bhi deri nahin karte hain, itni gandi duniya hai। baap aakar bachchon ko svarga ka saakshaatkaar karaate hain।

shivbaaba kehte hain main aaya hoon bachchon ko svarga ka, vishwa ka maalik banaane। koi mehnat nahin karaata hoon। yogbal se vikarmon ko bhasma karna hai। vikarmon ka bojha sir par bahut hai। beemaari khaansi aadi hoti hai। yeh janma-janma ke hisaab-kitaab ki bhogna hai। ab jagdamba-jagatpita hai। kitna unka naam baala hai! pooja ho rahi hai। manushya thode hi jaante ki jagdamba antim janma mein kaun thi? ab jagdamba-jagatpita ka practical mein part chal raha hai। to inko bhi dekho sab janmon ka hisaab-kitaab chuktu karna padta hai। itna yog lagaate hain, service karte hain phir bhi karmabhog, operation aadi karaane padte hain। us sannyaas aur is sannyaas mein bahut farka hai। woh to gharbaar chhod kaphni pahan sannyaasi ban jaate hain। ham to purushaartha karte rehte hain। jab ant aayega tab hamaara poora sannyaas hoga। abhi purushaarthi hain। un sannyaasiyon ke liye aise nahin kahenge ki purushaarthi sannyaasi hain। unhonne to ghar-baar chhoda aur naam pada sannyaasi। ham sannyaas ke liye baba dvaara kitni mehnat karte hain। to yeh anek janmon ka bojha sir par hai। kitna yog mein rehte hain, auron ko sukh dete hain। unki aasheervaad bhi milti hai to bhi dekho karmabhog nikal padta। karmaateet avastha hui nahin hai, woh ant mein honi hai। yeh janma-janmaantar ke karmon ka hisaab-kitaab hai। abhi poore sannyaasi bane nahin hain। unke sannyaas aur hamaare sannyaas mein raat din ka farka hai। woh gharbaar chhod jangal mein jaakar baithte hain। vikaari manushya unki seva karte hain। aise bhi nahin woh koi sab paavan bane hue hain। woh bhi saadhna karte rehte hain। karmabhog to unko bhi hota hai। anek janmon ke vikarmon ka bojha sir par hai। vikarmon ka bojha yog se hi bhasma hota hai। jab tak baap nahin aave tab tak koi yog sikhla na sake। unhon ka yog sarvashaktimaan baap se nahin hai to vikarma vinaash ho nahin sakte। brahm va tatva ko sarva-shaktimaan thode hi kahenge। sarvashaktimaan to ek parampita paramatma shiv hai। woh param aatma hai jo aate hain। brahm va tatva to nahin aayega।

to bachchon ke sir par bhi bahut paapon ka bojh hai। bahut mehnat karni hai - vikarma vinaash karne liye। vishwa ka maalik banna hai। sivaae baap ke koi bana na sake। baap banaate hain - yogbal se। bal milta hai sarvashaktimaan baap se। woh world almighty authority hai। ab tum bachche jaante ho yeh saari duniya duhkhi hai। sukh jo bhi hain woh alpakaal kaag vishta samaan hai। sachcha sukh to hota hi hai svarga mein। vahaan duhkh dene vaali maaya hi nahin। kai in baaton ko maante hi nahin। kehte hain aise kaise hoga? nahin maante hain to samjho hamaare daivi kul ke nahin hain। daivi kul vaale zaroor maanenge। kalpa pahle bhi maana tha। ab baap suna rahe hain। to behad ke baap ko sab centres ke bachche yaad padte hain। koi sannyaasi aise kah na sake ki ham sabhi bachchon ko sunaate hain। vahaan sabhi followers banenge। unko aise murli thode hi bheji jaati hai jo sab sunen। yahaan to sabke paas murli bheji jaati hai, jisse shreemat par chal shreshtha banen। bhagwan ko kaha jaata hai shri shri, sabse shreshtha। baap kehte hain shreshtha te shreshtha to main hoon jo sabhi ko shreshtha banaata hoon। patit duniya mein shreshtha kahaan se aaye! shri shri 108 yeh hoobhu shivbaaba ki roodra maala hai। unko hi shri shri kehte hain। shreshtha te shreshtha satayug ki sthaapna kar manushya srishti mein shreshtha banaate hain, jo ham svarga ke maalik bante hain। to samajhte hain shri shri 108 jinki maala banti hai, oopar mein hai niraakaar shivbaaba, woh hamko aisa shreshtha bana rahe hain।

yeh hai hi eeshvareey vishwa-vidyaalay। in brahmaakumaar kumaariyon ko eeshvar padhaate hain। eeshvareey vishwa vidyaalay hai parampita paramatma ka। yeh vishwa ko knowledge dene liye vishwa-vidyaalay hai। jo chaahe so vishwa ka maalik bane। chaahe to sweet hom mein jaakar baithe। baap aaye hi hain sada shant, sada sukhi banaane। main kalpa-kalpa aakarke bhaaratvaasi bachchon ko vishwa ka maalik banaata hoon। baaki sab aatmaayen shantidham mein nivaas karti hain। svarga mein sirf devi-devtaaon ki aatmaayen hoti hain। tum jaante ho barobar baba hamko padhaakar svarga ka maalik banaate hain, yatha yog jitna jo purushaartha karte hain। baaki sab aatmaayen hisaab-kitaab chuktu kar vaapis jaayengi। shareer sab khatma ho jaayenge। kaliyug ka ant aur satayug ki aadi hogi। to tum bachche jaante ho baaki kitna samay hoga? abhi karodon hain, satayug mein sirf 9 laakh honge। shuru mein thode hote hain, phir vriddhi ko paayenge। to itne sab jeev jo hain, un sabki aatmaayen hisaab-kitaab chuktu kar vaapis jaayengi। sabki kayaamat ka samay hai। maaya ne sabko kabra-daakhil bana diya hai। kabristaani ban pade hain। koi kaam ke nahin hain। ab tum samajhte ho ki behad ka baap ham sab aatmaon ko padhaakar svarga ka maalik banaate hain। vishwa ka maalik banne ka yahi eeshvareey vishwa-vidyaalay hai। baap ki jaaydaad hai hi svarga। agar yeh nishchay hai to kyon na ham unki mat par chal baap se svarga ka varsa len। ismen chhodne ki to koi baat hi nahin। vikaaron ko chhodna hai। so to achha hai na। baba, ham kyon nahin pavitra rahenge, kyon nahin chhodenge! 5 vikaaron ka sannyaas karne se hi ham chakravarti raaja banenge। baap kehte hain ab marna hai। zaroor nirvaandhaam mein jaana hai to kyon na kamaai karni chaahiye। aur dharma vaale bhi aakar lakshya lenge। bachchon ne saakshaatkaar kiya hai - ibraaham, Christ aadi ki aatmaayen aati hain - salaami bharne, lakshya lene। baaki knowledge nahin lenge। haan, koi brahman kul bhooshan hoga to uth padega। brahman kul bhooshan banne bigar devta kul bhooshan ban na saken। brahman bane phir devta bane। devta hi kshatriy, vaishya phir shoodra bante hain। yeh varna chakra lagaate rehte hain। shri lakshmi-naaraayan jo worth pound the unhon ko bhi 84 janma poore karne hain। so agar nishchay ho jaae ki behad ke baap se varsa zaroor lena hai, jisse aadhaakalpa sukh paate rehte hain to kyon nahin purushaartha karen। chhodne ki to baat hi nahin hai। woh sindha ka part tha। likha hua hai krishna ne bhagaaya, gau charaate the। bhagaaya to kya gaali khaane ke liye! bhagaaya patraani banaane ke liye! yeh to bhatthi banni thi। tapasya kar service laayak banna tha। ab to koi mushkil service laayak bante hain। so tum practical anubhvi ho। tum samajhte ho shivbaaba hamko vishwa ka maalik banaate hain। woh bhi kaam karte hain। parampita paramatma svarga ka rachayita hai to zaroor yahaan aaya tha। abhi bhi kehte hain main svarga ki sthaapna kar raha hoon। tumko padhaata hoon। samjhaate bachchon ko hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sir se anek janmon ke vikarmon ka bojh utaarne ke liye sarvashaktimaan baap ki yaad mein rah bal lena hai।

2) sarva ko sukh de aasheervaad leni hai। shri shri ki shreshtha mat par chal poora sannyaas karna hai। is kayaamat ke samay mein sabse buddhi yog tod dena hai।

vardaan:- master knowledgeful ban 5 hajaar varsha ki janma patri ko jaanne vaale svadarshan chakradhaari bhav

jo abhi svadarshan chakradhaari bante hain vahi bhavishya mein chakravarti raajya-bhaagya ke adhikaari bante hain। svadarshan chakradhaari arthaat apne saare chakra ke andar sarva bhinna-bhinna part ko jaanne vaale। aap bachche vishesh is samay 5 hajaar varsha ki janmapatri ko jaankar master knowledgeful ban gaye। sabhi ne yeh vishesh baat jaan li ki is antim janma mein heere tulya jeevan banaane se saare kalpa ke andar hero part bajaane vaale ban jaate hain।

slogan:- apne saathiyon ko bhi baap ke sang ka rang lagaao to unke sang ka rang aapko nahin lagega।