बुधवार 10 मई 2023 की दैनिक मुरली

10-05-2023 praatahmurli om shanti "baapdaada"' madhuban

“meethe bachche - tum roohaani social worker ho, tumhein bhaarat ko svarga banaane ki seva karni hai, duhkhadhaam ko sukhdhaam banaana hai''

prashn:- sangam par tum brahman bachche kis baat mein bahut expert (teekhe) ban jaate ho?

uttar:- sabhi manushyaatmaaon ki manokaamna poorn karne mein abhi tum expert bane ho। manushyon ki kaamna mukti aur jeevanmukti paane ki hai, woh tumhein poorn karni hai। tum sabhi ko shanti ka raasta bataate ho। shanti koi jangal mein nahin milti, lekin aatma ka svadharma hi shanti hai। shareer se detach ho baap ko yaad karo to sukh-shanti ka varsa mil jaayega।

geet:- mukhda dekh le praani…

om shanti। behad ka baap apne sikeeldhe bachchon ko samjha rahe hain। jin bachchon ne baap ko jaana hai aur baap ki sharan mein aaye hain। kehte hain prabhu teri sharan aaye। sharan mile tab, jabki baap aaye aur bachchon ko samjhaave। bhagat bhagwan ki sharan mein aate hain kyonki yahaan sab duhkhi hain। bhaarat duhkhadhaam hai। ek do ko duhkh dete rehte hain। baap ne samjhaaya hai yeh hai tumhaari hans mandali। yahaan paavan bachchon bigar koi bhi aa nahin sakta। baap samjhaate hain - bachche, paavan bhaarat ko hi sukhdhaam kaha jaata hai aur koi khanda ko sukhdhaam nahin kahenge। bhaarat hi sukhdhaam aur bhaarat hi duhkhadhaam banta hai। bhaaratvaasi bahut duhkhi hain kyonki patit hain। parantu yeh baat unhein koi samjhaate nahin। baap samjhaate hain - sannyaasi paavan hain, gharbaar chhodte hain, parantu khud bhi gaate hain - patit-paavan seetaaraam...। abhi tum aaye ho patit-paavan baap ke paas। jo ek hi parampita paramatma hai vahi saari duniya ko paavan banaate hain। manushya, manushya ko paavan bana na sake। yeh hai hi patit duniya। koi bhi paavan nahin। kehte bhi hain - he parampita paramatma। phir kah dete eeshvar sarvavyaapi hai। shivoham, tat tvam। sab bichaare baap ko bhoole hue hain। jaise manushya sharaab peete hain, to bhale woh devaala maara hua ho to bhi sharaab se ekdam nasha chadh jaata hai। vaise hi manushya ko yeh pata nahin padta ki yeh vikaar hi patit banaate hain, tab to sannyaasi bhi paavan banne ke liye gharbaar chhodte hain। parantu woh hai nivritti maarga। yahaan to baap aaye hain। jo aadhaakalpa se duhkhi hain woh aakar sharan lete hain। duhkhi karne vaali hai maaya। paanch vikaaron ke mahaarogi hain। manushya ko raavan ne bilkul asur banaaya hai। jab bilkul duhkhadhaam ban jaata hai, tab phir baap aakar sukhdhaam sthaapan karte hain।

tum ho roohaani social worker। tumse baap seva karaate hain ki - bachche, tum is bhaarat ko svarga banaao। saara madaar yog par hai। yog mein koi 7 roz achhi reeti rahe to kamaal ho jaaye। aise koi yog mein mushkil tik sakenge। ghar yaad aayega, man bhaagta rahega। saat roz mashhoor hain। geeta, bhaagvat, grantha ka paath bhi 7 roz rakhte hain। yeh rasma-rivaaj is sangamayug ki hai। saat roz bhatthi mein rehna pade। kiski bhi yaad na aave। ek baap ke saath yog laga rahe। saat roz is ekras avastha mein rehna - yeh bada mushkil hai। tum bachchon ke yaadgaar bhi yahaan hi hain। tum abhi jhaad ke neeche baithkar raajayog ki tapasya karte ho। jagat amba bhi hai to tum bachche bhi ho। tum ho sabhi manushyon ki sarva manokaamnaayen svarga mein poori karne vaale athva manushyon ko mukti-jeevanmukti ka phal dene vaale। tum expert ho। duniya mein koi nahin jaante ki mukti-jeevanmukti kisko kaha jaata hai? kaun dete hain? patit duniya mein kaun paavan bana sakte hain? sannyaasi log shanti ke liye gharbaar chhodte hain। jangal mein jaate hain, parantu shanti to mil nahin sakti। aatma ka svadharma hai shant aur manushya baahar dhoondhate hain। yeh kisko pata nahin ki aatma ka svadharma shant hai। (raani ke haar ka misaal) yeh organs hain, chaahe karmendriyon se kaam lo ya na lo। ham aatma is shareer se apne ko detach kar lete hain। jaise raat ko aatma detach ho jaati hai na। sab kuchh bhool jaati hai। usko phir neend kahenge। yahaan sirf shanti mein tum baithte ho। aatma kehti hai main karmendriyon se kaam kar thak gayi hoon। achha, apne ko shareer se detach kar lo। yeh organs hain karma karne ke liye। yeh knowledge baap hi dete hain। detach kar baith jaao, kuchh na bolo। parantu aise detach ho kahaan tak baithenge? yeh to tum jaante ho karma bigar koi rah na sake। detach to hue parantu saath mein phaayda bhi chaahiye। sirf detach ho baithne se itna faayda nahin hoga। detach ho phir mujhe yaad karo to tumko phaayda hoga, shakti milegi। baap apne bachchon ko samjhaate hain - bachche, yeh gyaan-indra-sabha hai। yahaan tum sab ratna baithe ho। koi patthar-buddhi baitha hoga to vaayumandal kharaab kar dega kyonki shivbaaba ki yaad mein rahega nahin। unko apne mitra-sambandhi yaad padte rahenge। tumko to apne baap ko nirantar yaad karna hai। yeh koi common satsang nahin hai। yeh badi university hai। medical college mein koi anpadh aakar baithe to kuchh nahin samjhega। unko to allow nahin karenge। sirf dekhne se kuchh samajh nahin sakenge। is knowledge ko bhi vikaari patit samajh na sake, isliye aise ko allow nahin kiya jaata hai। koi kahe ki ham class mein aaven, lecture sunen? parantu isse kuchh samajh nahin sakega। yeh university hai - malechchha se svachchha devta banne ke liye। yahaan aise koi ko allow nahin kiya jaata hai। baap ko to jaan na sake। baap hai gupta। tum jaante ho behad ke baap ki sharan mein aaye hain - baap se sada sukh ka varsa lene। baap khud kehte hain yeh brahma ka jo shareer hai yeh bahut janmon ke ant ka vaanaprastha vaala hai। yeh bhi bahut shaastra aadi padha hua hai। abhi main sab ved-shaastron ka saar in dvaara sunaata hoon। brahma ke haath mein shaastra dikhaate hain। vishnu ki naabhi-kamal se brahma nikla। samjhaaya hai vishnu ki naabhi-kamal se brahma, brahma ki naabhi-kamal se vishnu nikla hai। brahma-sarasvati donon kaise naaraayan-lakshmi bante hain। phir 84 janma poora kar ant mein brahma sarasvati bante hain। unhonne phir gaandhi ki naabhi-kamal se nehru dikhaaya hai। abhi yahaan to ksheersaagar hai nahin। yeh hai vishay saagar। ksheersaagar satayug mein dikhaate hain।

tum bachche jaante ho - aadhaakalpa se maaya ne duhkhi banaaya hai। bhaarat jitna duhkhi aur koi nahin hai। bhaarat jitna sukhi bhi aur koi ho nahin sakta। baap kehte hain devi-devta dharma to praayah lop hona hi hai। tab to main aakar phir se naya dharma sthaapan karoon। barobar ab sthaapan ho raha hai। tum bachche aakar baap se varsa le rahe ho। jaante ho svarga mein kaun raajya karte hain। bachpan mein raadhe-krishna vahi phir lakshmi-naaraayan bante hain। ab to baap aaya hua hai। bhinna naam-roop se lakshmi-naaraayan padhte hain। shreekrishna ka saanvara roop yahaan baitha hai। baap isko us paar le jaate hain। shaastron mein dikhaate hain shreekrishna ko tokri mein us paar le gaye। ab shivbaaba aaya hua hai। tum bachchon ko okhon par bithaakar svarga ka maalik banaate hain। saari vanshaavli ko padha kar baap le jaate hain - kansapuri se krishnapuri mein। ek ki to baat nahin hai। raavanpuri se tum sabko nikaal, naynon par bithaakar sukhdhaam le jaata hoon। main tum bachchon ko svarga tak pahunchaane aaya hoon। phir is puraani duniya ka vinaash ho jaayega। ladaai ki baat bhi shaastron mein hai। parantu samajhte kuchh bhi nahin hain। yeh daada bhi bahut shaastra padha hua tha। ab baba kehte hain in sabko chhod maamekam yaad karo। main sabka sadguru hoon। kansapuri kaliyug ko, krishnapuri satayug ko kaha jaata hai। ab tumko raavanpuri se raampuri va krishnapuri mein le chalta hoon। chalenge sukhdhaam krishnapuri mein? gaate hain na - bhajo raadhe-govinda.. yeh hua bhakti maarga। abhi tum raadhe-govinda phir se ban rahe ho। abhi tumhaara donon taaj nahin raha hai - na light ka, na raajaai ka। pavitra ko hi light ka taaj dete hain। lakshmi-naaraayan to hain hi sada pavitra। unko kabhi sannyaas nahin karna padta hai। sannyaasi janma lekar phir gharbaar chhodte hain pavitra banne ke liye। tumhaara 21 janmon ke liye yeh ek janma ka sannyaas hota hai। woh koi 21 janma pavitra nahin hote hain। woh pahle to vikaariyon ke paas janma le patit ban jaate phir pavitra banne liye gharbaar chhodte hain। woh hai rajoguni sannyaas। baap kehte hain main knowledgeful hoon। knowledgeful, blissful... mere mein hi full knowledge hai। sookshm vatan, mool vatan, sthoolavtan aur srishti ke aadi-madhya-ant ki full knowledge tum bachchon ko deta hoon, jisse tum full bante ho। devi-devtaayen hain hi full। tum bachche baap ki god mein aaye ho। jaante ho ham shreemat par chal phir se raajya-bhaagya lete hain। yeh haar-jeet ka khel hai। maaya se haare haar hai, maaya se jeete jeet hai। tum sarvashaktimaan baap se yog lagaakar, shakti le maaya par vijay paate ho। samajhte ho - hamaara 84 janmon ka drama ab poora hota hai। ham phir se raajya-bhaagya lete hain। lakshmi-naaraayan ko ksheersaagar mein dikhaate hain। yeh hai vishay saagar। raadhe-krishna to chhote bachche the। shreekrishna ko bahut pyaar se jhoole mein jhulaate hain। samajhte hain - woh svarga ka prince hai। shreekrishna ko 16 kala kaha jaata hai, raam ko 14 kala। vahi shreekrishna phir 16 kala se 14 kala bante hain। punarjanma to lena pade na। baba ne samjhaaya hai - poore 84 janma to sab nahin lete honge। aur dharma vaale 84 janma nahin lenge। samajhne ki baaten hain। father se varsa zaroor milna chaahiye। woh hai svarga ka rachayita। to zaroor svarga ka maalik hi banaayenge। woh father paramdham mein rehte hain। ham bhi vahaan se aate hain। baba ko achhi reeti yaad karna hai। yaad se shanti milegi। manushya to kehte hain - paramatma se yog kaise lagaayen? moonjh padte hain। tumko to sab samajh mili hai।

baap aate hi hain duhkhadhaam aur sukhdhaam ke sangam par। kaliyug ant hai duhkhadhaam, satayug aadi hai sukhdhaam। duhkhadhaam ko badal sukhdhaam mein baap hi bithaayenge। itni hi samajh ki baat hai। yeh padhaai pavitrata ke bigar koi padh na sake isliye yahaan patit ko nahin bithaaya jaata hai। samjhaana hai - tum aadha kalpa ke mahaarogi ho। maaya ne maha-rogi banaaya hai isliye pahle bhatthi mein rakha jaata hai। tum bachche harek ke occupation ko jaan gaye ho। shiv ke mandir mein jaayenge to samajh jaayenge - yeh baba gati-sadgati daata hai। sabse bada teertha bhi bhaarat hai। parantu geeta mein shreekrishna ka naam daal diya hai। shivbaaba ka naam gum kar diya hai। shivbaaba hi aakar sabko duhkh se chhudaate hain। baaki paani ki ganga to patit-paavni hai nahin। woh to pahaadon se nikli hai। usko patit-paavni kaise kahenge। isko andhashraddha kaha jaata hai। manushya kya-kya karte rehte hain। gaate hain - manushya jaisa durlabh janma hai nahin। so durlabh janma tumhaara abhi ka hai jabki baap aaya hua hai। yeh tumhaara amoolya janma hai। tum pavitra ban bhaarat ko svarga bana dete ho isliye shiv-shakti bhaarat-maata gaai hui hai। tum jaante ho - baba pavitrata ki madad se bhaarat to kya, saari duniya ko pavitra banaate hain। jo-jo pavitrata ki anguli dete hain, manamnaabhav rehte hain, vahi madadgaar hain। iska arth bhi tum samajhte ho। yeh daada bhi nahin samajhte the। inke bahut guru kiye hue hain। shaastra padhe hue hain। tab baba kehte hain maamekam yaad karo। main hi tumhaara sab kuchh hoon। gati-sadgati daata hoon। manushya to patit hain। ab tum aaye ho shivbaaba ke paas, brahma dvaara varsa lene। is nishchay bigar koi aa na sake। aakar aur hi ashaanti phaila denge। tum bhaarat ko supreme shanti mein le jaate ho। yeh hai sthaapna ka kaarya, jo manushya kar na sake। tum bhi shivbaaba ki madad se kar rahe ho। tumko bhi prize kya milti hai? svarga ke maalik bante ho। aise baba ke bante bhi phir nishchay-buddhi nahin hain to maaya ekdam hap kar leti hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is ek janma mein puraani duniya se sannyaas kar baap ka madadgaar banna hai। pavitrata ki anguli deni hai aur manamnaabhav rehna hai।

2) bhaarat ko supreme shanti mein le jaane ki seva karni hai। is shareer se detach ho baap ki yaad mein rahkar shakti leni hai। shanti ka daan dena hai।

vardaan:- teenon kaalon, teenon lokon ki knowledge ko dhaaran kar buddhivaan banne vaale vighna-vinaashak bhav

jo teenon kaalon aur teenon lokon ke knowledgeful hain unhein hi buddhivaan arthaat ganesh kaha jaata hai। ganesh arthaat vighna-vinaashak। woh kisi bhi paristhiti mein vighna roop nahin ban sakte। yadi koi vighna roop banen bhi to aap vighna-vinaashak ban jaao, isse vighna khatma ho jaayenge। vighna-vinaashak aatmaayen vaataavran, vaayumandal ko bhi parivartan kar deti hain, uska varnan nahin karti।

slogan:- apni chalan aur chehre se satyata ki sabhyata ka anubhav karaana hi shreshthata hai।