मंगलवार 30 मई 2023 की दैनिक मुरली

30-05-2023 praatahmurli om shanti "baapdaada"' madhuban

“meethe bachche - vaaris banna hai to vaari jaao arthaat sabse nashtomoha bano। saakaar baap ko poora-poora follow karo।''

prashn:- paapon se bachne tatha anek aatmaon ki aasheervaad praapta karne ka saadhan kya hai?

uttar:- paapon se bachne ke liye tan-man-dhan sab kuchh baap par balihaar kar do, phir trustee hokar sambhaalo। kadam-kadam par shreemat lete raho। shreemat kehti hai - tum bachche apna paisa paap ke kaam mein nahin laga sakte ho। paap aatma ko daan dena - yeh bhi paap karaane ke nimitta banna hai isliye agar dhan hai to roohaani hospital kholo - isse bahuton ki aasheervaad milegi।

geet:- hamaare teertha nyaare hain…

om shanti। meethe va sikeeldhe bachchon ne apni mahima suni। baap ne samjhaaya hai - bhaarat hi paapaatma, bhaarat hi punyaatma kahlaata hai। bhaaratvaasi hi patit-paavan ko bulaate hain। satayug mein to patit hote nahin। unko kaha jaata hai svarga, shivaalay, punya aatmaon ki bhoomi। kaliyug hai paap aatmaon ki bhoomi। bhaarat mein phir daan-punya bhi bahut karte hain। is samay tum bachche bhi baap ko tan-man-dhan sab kuchh de dete ho। tumhaare aage misaal bhi hain। yeh baap (brahma) nimitta bana hai, kyonki samajhte bhi hain jaisa karma main karoonga, mujhe dekh aur bhi karne lag padenge। to baap kehte hain inse main aisa karma karaata hoon jo svarga mein yeh number one ban jaate hain। yeh tan-man-dhan sab dekar phauran nashtomoha ban gaye। apne bachchon ko vaaris na banaae inheen maataaon ko bana diya। sab kuchh maataaon ke havaale kar diya। trustee bana diya। bola - yeh sab kuchh aap maataaon ke charnon mein hai। tum vaaris ban jaao। bas, kuchh bhi khyaal nahin kiya। ham to baba ke ban jaate hain। bhaktimaarga mein janma by janma gaate aaye hain vaari jaaoon, mera to ek baba doosra na koi... to ab main in maataaon ko apna vaaris banaata hoon। in maataaon dvaara hi srishti ka kalyaan hona hai। pahle maata ko apna guru bana diya। bas, mera to ek baba doosra na koi। nahin to bachchon aadi se moh hota hai na। parantu ekdam unse dil toot, baap se dil lag gai। behad ka varsa lena hai to had ka sab kuchh dena pade। parantu baap to daata hai, woh kab lete nahin hain। shivbaaba dene vaala hai। direction denge - aise-aise karo। to yeh maata guru ban jaati hai। tvamev maataashcha pita.... pahle maata। satayug mein bhi pahle lakshmi phir naaraayan। pahle raadhe phir krishna। jaise baap maataaon ko aage rakhte hain vaise purushon ko bhi maataaon ko aage rakhna hai। unhon ki sambhaal karni hai। bichaari ablaayen hain।

tum sab is samay gyaan nadiyaan ho। brahmaputra nadi ka chhor (kinaara) saagar mein hota hai। kalkatta mein brahmaputra nadi hai। shivjayanti par vahaan bhaari mela lagta hai। brahmaputra nadi aur saagar ke sangam par sab yaatri jaate hain। vahaan jaakar sab snaan karte hain। shivbaaba hai gyaan saagar aur yeh brahma hai nadi। abhi tum aaye ho brahma nadi, shiv saagar ke mele par। parantu yeh sab hain gyaan ki baaten। gyaan saagar se tum nikle ho। gyaan snaan se hi sabka kalyaan hona hai। paani ki baat nahin। yeh brahmaputra brahma hai, shivbaaba ki santaan। teerthon ka raaz bhi tum samajhte ho। ham buddhiyog ki yaatra par hain। buddhiyog lagaate hain parampita paramatma saath। bhaktimaarga mein to kitna maatha maarte hain। baap ke saath buddhiyog rehta hi nahin। baap bhi kehte hain - main ek hi baar aakar mat deta hoon ki mere saath yog lagaao। aisa aur koi kah na sake। gyaan saagar baap hi sukh ka saagar, aananda ka saagar hai। harek ki mahima alag-alag hai। oonch te oonch bhagwan woh patit-paavan hai। woh ek hai, woh patit duniya ko paavan banaane ka part baja rahe hain। khud bhi kehte hain - kalpa-kalpa aakar sabko teertha par le jaata hoon। sab bhakta purushaartha karte hain mukti ke liye। sannyaasi nivriti maarga vaale mukti chaahte hain, woh to samajhte hain sukh kaag vishta ke samaan hai। ek paai ka sukh hai baaki hai duhkh। svarga mein to aise nahin hoga। baap ne samjhaaya hai woh nivriti maarga ka rajoguni had ka sannyaas hai। yeh hai sato-guni behad ka sannyaas। hamko to saari chhi-chhi srishti ko badal nai srishti mein aana hai। ham devta bante hain na। lakshmi ka aahvaan karte hain to kitni saphaai karte hain! abhi to hai behad ki baat। saari duniya ki saphaai honi hai, 5 tatva bhi tamopradhaan se satopradhaan ban jaate hain। vahaan to number one vaibhav rehte hain। phool aadi aise hote hain jo ghar baithe bhi sugandha aati hai। itar aadi bhi lagaane ki darkaar nahin rehti। agarbatti ki darkaar nahin rehti। natural khushbu rehti hai। svarga kahne se hi mukh meetha ho jaata hai।

parampita paramatma aakar srishti ko itna oonch banaate hain, to aise baap se kitna love karna chaahiye! promise karni chaahiye ki - baba, ham nashtomoha ho aapse yog lagaayenge। aapko hi vaaris banaayenge। harek ko apni kamaai karni hai। to kamaai ka ona hona chaahiye। jo karega so paayega। is duniya mein manushya jo bhi karenge paap karenge। abhi baap ke paas bali chadhne se hi tum meri mat par chalenge। dhan hamesha paatra ko diya jaata hai। agar koi sharaabi ko diya to us par dosh aa jaata hai। kapoot bachche ko diya to unka paap bhi tumhaare par chadh jaayega iseelie hisaab-kitaab chuktu karo। surrender hue phir allow nahin karenge kisko dene ke liye, nahin to phir paap ho jaayega। kanya ko to dena hi pade। agar svarga ka maalik nahin banti, svarga mein nahin chalti, narka mein hi gota khaane chaahti hai to kya kar sakte hain। tum bachche jaante ho - abhi chhote-bade sabka maut hai। yeh yaadav-kaurav apna plan bana rahe hain। paandavon ka phir apna plan hai। jeet to paandavon ki hai na। sthool ladaai ki baat hi nahin hai। yahaan to yog aur gyaan ki baat hai। jo kuchh shaastra aadi padhe hain un sabko bhool jaao। naye sir yahaan baith padho। jeete ji markar bachcha banenge to woh sab kuchh bhool jaayenge। tum chhote bachche ho। baap kehte hain ab tum hamaare ban ham se seekho। apne ko chhota god ka bachcha samjho। bachchon ko baap baith padhaate hain। unmein chhote bhi hain, boodhe bhi hain। sabko bachcha bana dete hain। phir shreemat dete hain - bachche, abhi tak jo kuchh suna hai woh bhoolte jaao। hear no evil, si no evil... koi manushya ki baat nahin suno। manushya jo kuchh karenge so unrighteous, wrong karenge। sabse bura hai eeshvar ko sarvavyaapi kehna। are, baap sarvavyaapi hua to varsa kisse lenge! phir to sab baap ho gaye। shivoham, tat tvam kah dene se varse ki baat nahin thaharti। sabko ulta raasta bataakar dubo dete hain। patit kaun banaate hain? raavan ki mat par chalne vaale isliye baap kehte hain in sabko bhoolo। maamekam yaad karo। aap mare mar gai duniya। practical mein bhi puraani duniya khatma honi hi hai। kabristaan banna hi hai, phir paristaan banna hai। bombs girne hain। saara kabristaan ban jaayega। phir naya banega। hiroshima ab kitna naya ban gaya hai। to ab saara bhaarat khaas, duniya aam kabristaan honi hai। samjho sab mare pade hain। ab paristaan vaikuntha ke liye purushaartha karna chaahiye।

bachche samajhte hain ab baapdaada aaye hain। shivbaaba brahma ke rath mein aakar rathi bante hain। aise nahin, krishna koi arjun ka rathi bana hai। nahin। parampita paramatma is rath par baith sunaate hain। baba to bahut busy rehte hain। kehte hain ki main aaya hoon patit duniya ko paavan banaane। to mujhe kitne roop dhaaran karne hote hain। bahuton ki jyoti jagaata hoon। mere saath yog lagaao, yeh petrol daalo to battery jag jaayegi। deeva bujhne lagta hai to usmein ghrit daalte hain। baba kehte hain ab poora yog lagaao। yeh to jaante ho baap is brahma ke tan se hamko padhaane aaya hai। bhagvaanuvaach, bhagwan kya kehte hain? bachche, mujhe yaad karo। maut tumhaare sir par khada hai। chhote-bade sabka maut hai। yeh hai mrityulok। main amarnaath aaya hoon amraktha sunaane। tum paarvatiyaan athva seetaayen ho। sab raavan ki jel mein ho। shok vaatika mein padi ho। baap aakar ashok vaatika mein le jaate hain। vahaan koi shok rehta nahin। abhi tum bachchon ko wrong-right sochne ki buddhi mili hai। right kya hai, wrong kya hai, punya kaise hota hai, paap kaise hota hai - yeh sab tum jaante ho। yog toota to maaya paap kara degi kyonki is samay maaya tamopradhaan hai isliye kadam-kadam par saavdhaani chaahiye। shreemat par chalne mein koi nuksaan nahin। manushya bhagwan ko pahchaante nahin। baap kehte hain main aaya hoon tumko shiksha dene। tum mere bachche praanon se pyaare ho। jaanta hoon tum bachche bahut duhkhi bane ho। ab tumko sukh ki duniya mein le chalne aaya hoon। sage aur sautele ka raaz bhi samjhaaya hai। sage par baap ka dhyaan rehta hai। sage raajaai ka varsa lenge। lage praja ka varsa lenge। itni saari deity kingdom sthaapan ho rahi hai। tum raajaai paane liye purushaartha kar rahe ho। pahli-pahli baat hai pavitrata ki। vikaar ka vikalpa aaya to karmendriyon se nahin karna chaahiye। krodh aaya to mukh se gussa nahin karna chaahiye। agar tumhaare mein bhoot hoga to lakshmi ko kaise varenge। jinmen 5 vikaar hain unko bandar kaha jaata hai। baba ne bandar ke badle apni nalini bachchi ka photo daala hai। talk no evil, si no evil... ka chitra hai। us bachchi ko laukik baap ne centre kholkar diya hai। jo kuchh poonji thi sab bechkar bachchi nalini ko de diya। jaise baap ne sab maataaon ko de diya vaise isne (kaaku bhaai ne) apni bachchi ko de diya। samjha yeh bhi kanya hai, kyon na inse shubh kaarya karaaoon। bachchi ne kaha main shaadi nahin karoongi। woh paisa is kaarya mein laga do। main patit duniya ko paavan banaane ki service karoongi। bhal bachche bhi hain, lekin vaaris bachchi ko bana diya hai। unka kitna oonch pad ho jaayega! bahut ooncha pad paayenge। bahuton ki aasheervaaden unke sir par aayengi kyonki godly hospital athva godly college khola hai। is samay manushyon ki chalan hi aisi hai jo sab paap mein laga dete hain। paap karte aur karaate rehte hain। paap aatma ban pade hain। ab baba kehte hain - bachche, mehnat karo। paapon ka bojha bahut hai। nirantar yaad karne ka purushaartha karo। ant mein woh avastha rahe। sannyaasi bhi aise baithe-baithe chale jaate hain। ham jaakar brahm mein leen hote hain। bas, aisa kah shareer chhod dete hain। aise bhi hote hain phir us samay sannaata chha jaata hai। yeh baba apne anubhav ki baat sunaate hain। anubhav bhi hota hai।

baap kehte hain tum bachche ho srishti ke paapaatmaaon ko punyaatma banaane vaali sachchi gyaan gangaayen। ganga ke kinaare par devtaaon ka mandir dikhaaya hai। naam rakh diya hai ganga। ab paani ki nadi to patit-paavan ho nahin sakti। na devtaayen patit-paavan hain। patit-paavan to brahman hain। unhonne ganga par devta ka chitra rakh diya hai। devtaayen to patit ko paavan banaate nahin। manushyon ko yeh gyaan nahin jo koi se poochh saken। kahaan woh paani ki nadi, kahaan yeh devtaayen। is samay tum gyaan gangaaon se gyaan snaan karte ho to devta ban jaate ho। tumhaari service hai manushya ko devta banaana। yahaan aatma pavitra ban jaati hai। aatmaon ko injection chaahiye।

baap aakar gyaan-yog ka injection dete hain। paanch hazaar varsha pahle bhi baap ne yeh gyaan yog sikhaaya tha jisko bhakti maarga vaale praacheen geeta ka gyaan aur yog kehte hain। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) andar koi bhi vikalpa aaye to bhi karmendriyon se koi vikarma nahin karna hai। raajaai paane ke liye pavitrata ki pratigya zaroor karni hai।

2) jeete ji markar apne ko chhota bachcha samajhna hai। ek baap se hi sunna aur seekhna hai baaki sab kuchh bhool jaana hai।

vardaan:- follow father kar nambarvaar vishwa ke raajya ka takhta lene vaale takhtansheen bhav

jaise baap ne bachchon ko aage kiya, svayan backbone rahe aise follow father karo। jitna yahaan baap ko follow karenge utna vahaan nambarvaar vishwa ke raajya ka takhta lene vaale takhtansheen banenge। jitna is samay sada baap ke saath khaate-peete rehte, khelte, padhaai karte utna hi vahaan saath rehte hain। jin bachchon ko jitna sameepta ki smriti rehti hai utna natural nasha, nishchay svatah rehta hai। to dil se sada yeh anubhav karo ki anek baar baap ke saathi bane hain, abhi hain aur anek baar bante rahenge।

slogan:- seva ka phal aur bal praapta karne vaale hi shaktishaali hain।