गुरुवार 8 जून 2023 की दैनिक मुरली

08-06-2023 praatahmurli om shanti "baapdaada"' madhuban

“meethe bachche - jaise baap ko sabhi par taras aata, naphrat nahin aati, aise tum bachche bhi kisi se naphrat mat karo, merciful bano।''

prashn:- merciful baap ka saare vishwa ke prati ek hi plan hai, woh kaun sa?

uttar:- sabhi manushya aatmaon ko tatvon sahit patit se paavan banaana, mukti aur jeevanmukti ka varsa dena। yeh ek hi plan baap ka hai। tum bachche baap ke madadgaar ho। tumhein pahle apne par raham karna hai। shreemat par chal apne ko paavan banaana hai। phir sabhi ko vikaaron roopi gandagi se nikaalne ki seva karni hai।

geet:- kaun aaya mere man ke dvaare…

om shanti। kaun aaya? baap aaya। kiske paas? bachchon ke paas। bachche kiske paas aaye hain? baap kehte hain mere paas। ab tum sammukh baithe ho। jaante ho baap bahut merciful hai। baap jaante hain ki in hamaare bachchon ko maaya ne bahut duhkhi patit kiya hai। yeh bachche nahin jaante। baap jaante hain to baap ko taras padta hai na। naphrat nahin aayegi। baap kehte hain mainne tumko sukh ke sambandh mein bheja tha। paanch hajaar varsha ki baat hai। phir drama anusaar maaya ne tumko duhkhi kiya। pahle tum satopradhaan the, phir rajo, tamo mein aaye ho। yeh main jaanta hoon। tum mere bachche ho। mujhe hi aana hota hai tum bachchon ko paavan banaane, raajya-bhaagya dene। bachche bhi samajhte hain barobar baap aaya hai। prem ka saagar, shanti ka saagar hai। hamko sukh-shanti ki duniya mein le jaate hain। baap jaante hain yeh maaya hi sabka bade te bada dushman hai isliye main aaya hoon। parantu hoon main vichitra isliye mujhe pahchaante nahin। aage samajhte the ki shreekrishna ne aakar raajayog sikhaaya, svarga ka maalik banaaya tha। parantu kab aur kaise banaaya - yeh nahin jaante। abhi baap ko bahut raham aata hai kyonki jaante hain bachche maaya arthaat 5 bhooton ke vash ho pade hain। parvash hain, unko ab liberate karta hoon। baap kehte hain bachche ab mere kaaran va is bhaarat athva saare universe ke kaaran tum meri mat par chalo। mujhe yaad karo aur raham dil bhi bano। sabko baap ka parichay do। judge log bhi god ka kasam uthvaate hain। parantu kyon? yeh koi nahin jaante। god hai kaun? sirf god kah dete hain। father shabd bhi hai। jab kasam uthvaate hain to unko samajh mein hi nahin aata hai। kah dete hain god father ka kasam uthaao। parantu father ko to jaante hi nahin। ab tum bachche jaante ho woh god father hai। kasam uthaate hain kyonki samajhte hain agar ham kuchh ulta karma karenge to baap saza denge। jaise ghar mein bachche ulta kaam karte hain to unko dar rehta hai baap thappad na maare। woh kasam god ka uthaate hain। parantu jaante nahin ki god kaun hai? kaise saza denge? Christian log Bible uthaayenge। koi geeta uthaayenge। samajhte hain geeta ka bhagwan shreekrishna tha। to shreekrishna ko saamne rakh kshama maangate hain। samajhte hain agar ham jhooth bolenge to woh danda denge। ab truth to baap ko kahenge। Christ ko saari duniya truth nahin kehti। sada truth to hai god father parantu usko jaante nahin। jab baap aaye bachchon ko janma de, tab bachche baap ko jaanen। abhi tum bachche jaante ho baba ne apna banaaya hai। is maata dvaara racha hai। unko aadi dev bhi kaha jaata hai। vaastav mein aadi devi bhi hai। agar mama ko aadi devi kahen to unse badi aadi devi yeh ho jaati hai। yeh badi guhya baaten hain। jo vishaalbuddhi hain vahi in baaton ko samajh sakte hain। kehte bhi hain baap patit ko paavan banaane vaala hai। achha, paavan duniya kaun si hai? kya mukti ko paavan duniya kahen va jeevanmukti ko paavan duniya kahen? yeh koi jaante nahin hain। gaate to bahut hain। unhon ki buddhi mein sirf yeh hai ki paramatma aata hai। parantu unka roop aadi nahin jaante। phir kehte hain sarvavyaapi hai।

baap bahut merciful hai, pyaar ka saagar hai। to bachchon ko bhi raham karna chaahiye। pyaar karna chaahiye। baap bahut raham karte hain, unko kaha jaata hai merciful। baap kehte hain tatvon sahit saari srishti par main merciful hoon। knowledgeful hoon। pyaar mein bhi full hoon। bahut pyaara banaata hoon। jaise shreekrishna kitna pyaara hai! unke gharaane mein sab pyaare hain। vaastav mein dynasty hamesha raaja ki kahi jaati hai। king Edward ki raajaai kahenge। prince aaph Wales ki nahin kahenge। prince phir king ho jaata hai। to yeh bhi aise hai। Christian ka connection shreekrishna ki raajdhaani se bahut hai। woh Christian log shreekrishna ki raajdhaani se bahut kamaate hain। pahle shreekrishna ki raajdhaani ko apne haath mein le lete hain। phir dete hain। shreekrishna ki kahen athva lakshmi-naaraayan ki raajdhaani thi na। ab ve Christian shreekrishna ko vishwa ki raajdhaani de denge। kitna wonderful raaz hai! ab vo hi shreekrishna ki raajdhaani ko madad bhi de rahe hain। aakhreen saari raajdhaani shreekrishna ko dekar jaate hain isliye shreekrishna ke mukh mein makkhan diya hai। aise nahin, makkhan ka koi gola hai। do bandar aapas mein ladte hain to maakhan shreekrishna ko mil jaata hai। bhaai nahin ladte hain, bandar ladte hain। paanch vikaar bhi bandar mein mashhoor hain। abhi tum shreekrishna ki dynasty bana rahe ho। vishwa ke maalikapne ka maakhan tumko milna hai। len-den ka athva karmon ka hisaab-kitaab kaisa hai! Christian ke bhi karma dekho, raajdhaani lekar phir vaapas dena hai। aapas mein kitna ladte hain! raajaai ka makkhan phir bhi tumko milna hai। tum prince-princess ban jaate ho। tum bachchon ko bhi bada raham-dil pyaar ka saagar banna hai। naphrat nahin laani hai। duniya mein to ek do ke liye naphrat rakhte hain। yatha raaja-raani tatha praja nambarvaar naphrat rakhte hain। aapas mein ladenge-marenge।

baap bahut achhi reeti samjhaate hain, ismen ghrina ki koi baat nahin। yeh to drama bana hua hai। har ek manushya apne ko neech paapi kehte hain। mandiron mein jaakar apne oopar naphrat karte hain। mahaatma ko pavitra samajh unke charnon mein girte hain। aap paavan ho ham patit hain। in sab baaton ko to baap hi jaante hain।

manushya god father ke naam par kasam uthvaate hain lekin woh bhi jhootha kasam ho jaata kyonki god father ko jaante nahin। agar god father kah kasam uthaayen to buddhi mein aaye ki unse to hamko varsa milna chaahiye। svarga kya hota hai, yeh kisi ko pata nahin hai। are tum to kehte ho phalaana mara, svargavaasi hua। to kahaan gaya। kuchh bhi samajhte nahin। baap ko koi ke liye bhi naphrat nahin hai। sabke liye pyaar hai।

abhi tum bachche sammukh ho। bachchon ko khaas, baaki general samjhaate hain। tum bachchon ko padhaakar jeevanmukti deta hoon aur sabko muktidhaam mein le jaate hain। mera sab par pyaar hai। us government ke to anek plans bante rehte hain। baba kehte hain mera ek hi plan hai। patit manushya ko paavan devi-devta banaana। manushya kehte bhi hain patit-paavan aao। phir unko na jaanne ke kaaran kah dete ham hi patit-paavan hain। to baap samjhaate hain pahle to bade te bade chief justice ki service karo। unhein samjhaana chaahiye aatma ka baap to ek hai, unka kasam tum kyon uthvaate ho? kya kasam uthaane samay shreekrishna yaad aata hai? Christian se poochho ki Christ yaad aata hai ya god father? jaante ho ki paap karenge to danda bhogna padega। parantu baap danda kabhi nahin deta। woh karnakraavanhaar hai। dharmaraaj dvaara saja dilaate hain। god to most beloved baap hai। woh jhoothe kalank lagaate hain ki baap hi sukh-duhkh dete hain। to kya berham hain? gaate bhi hain merciful। baap kehte hain main kaise berahmi karunga। maaya ne tumhaare par berahmi ki hai। main to unse chhudaata hoon। maaya ne tumko shraapit kiya hai। yeh bhi khel hai। sukhdhaam ko duhkhadhaam hona hi hai। bhaarat hi sukhdhaam tha, ab duhkhadhaam hai। baba phir sukhdhaam ka maalik banaate hain। parantu aise thode hi duhkhadhaam ka maalik khud hi banaayenge। bachche kehte hain baba pyaar ka saagar hai। baba aapki shreemat par chal ham apne ko paavan banaayenge। apne par raham karenge। jitna teacher se padhenge utna apne oopar raham karenge। nahin to naapaas ho padenge। ab tumhaari buddhi mein achhi reeti knowledge hai। tum jaante ho knowledgeful, merciful, patit se paavan banaane vaala ek hi baap hai to unki mat par chalna pade। apni mat maana raavan ki mat। shreemat par na chal apni mat par va kisi manushya ki mat par chalte hain to dhokha kha lete hain। shreemat par kadam-kadam chalen to beda paar hai। chadhaai bahut oonchi hai। maaya ke toofaan kisma-kisma se aate hain। parantu baap ko koi par naphrat nahin hai। bachchon ko bhi aisa banna chaahiye। ajaamil jaise paapi to sabhi hain। ek geet mein bhi hai na ki main ek chhota sa bachcha hoon। jaise kehte hain na ki main ek maas ka bachcha hoon। puraane bachche to aapke bahut hain jinko aap paavan bana rahe ho। to mujh chhote bachche ko bhi paavan banaao। to kehte hain ki shreemat par chalo to puraane se bhi achhi reeti aage ja sakte ho। lift bhi to milti hai। deri se aane se tumko shaktiyon se yogdaan milta hai। shaktiyaan bhi nambarvaar hain। aise nahin kaha jaata hai ki tum shaktiyon se buddhiyog lagaao। nahin, shaktiyon se tum shankhadhvani suno। buddhiyog baba se lagaana hai। baba ko yaad karo to vikarma vinaash honge। dhindhora pitvaana hai। yahaan koi andhashraddha ki baat nahin। college mein koi andhashraddha nahin ho sakti। yeh hai god fatherly university। knowledgeful god father baith bachchon ko padhaate hain। tumhaari em object hai ki ham manushya se devta banenge। woh manushya se barrister bante hain to buddhiyog barrister ke saath rehta hai। doctor ke saath nahin rehta। yeh bhi college hai, na ki andhashraddha। em object hai। god father hamko padhaate rehte hain। geeta mein bhi bhagvaanuvaach hai parantu bhagwan kaun hai? - yeh geeta vaale bhi nahin jaante। yeh brahma bhi kehte hain - ham bhi geeta padhte the। abhi ke manushya shaastron ko maante nahin। geeta ko uthaane se unki buddhi chali jaati hai shreekrishna ki taraph। unko sab dharma vaale nahin maanenge। geeta hai sarvashaastramai shiromni shivbaaba ki gaai hui। god father kehte hain woh hai svarga ka rachayita। to baap se tumko svarga ka varsa milna chaahiye ya father ke ghar jaana hai! bhagwan paas jaana chaahte hain। sab mukti hi chaahte hain। woh log jeevanmukti se kya jaanen। baap kehte hain main to padhaata hoon। main phir sarvavyaapi kaise hooonga। sarvavyaapi kahne se mukh hi meetha nahin hota। to bachche, yeh baaten achhi reeti dhaaran karo aur bahut meethe bano। koi se naphrat nahin karni chaahiye। surgeon log hote hain, kisko kaisi bhi gandi beemaari hoti hai to bhi unko taras padta hai aur shapha dete hain। samajhte bhi hain kuchh kharaab kaam kiya hai, uska yeh karmabhog hai। baap kehte hain maaya ki praveshta hone se manushyon se vikarma hi hote hain aur patit ban jaate hain। paanch vikaaron ko kharaab samajhte hain tab to sannyaasi bhi bhaagte hain। pavitrata ka maan bahut hai। yeh to samajhte ho ham pahle devtaaon ko naman karte hain, peechhe sannyaasiyon ko kiya hai kyonki ve bhi paavan bante hain। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) achhi reeti padhkar, shreemat par chal paavan ban apne aap par raham karna hai। kabhi bhi berahmi nahin banna hai।

2) kisi se bhi naphrat ya ghrina nahin karni hai। baap samaan pyaar ka saagar banna hai।

vardaan:- sookshm shaktiyon dvaara sthool karmendriyon ko sanyam niyam mein chalaane vaale svaraajya adhikaari bhav

sabse pahle apni sookshm shaktiyon ki result ko check karo, jo vishesh man-buddhi aur sanskaaron par poora control rakhte hain unhein hi svaraajya adhikaari kaha jaata hai। yeh sookshm shaktiyaan hi sthool karmendriyon ko sanyam aur niyam mein chala sakti hain। jo apni sookshm shaktiyon ko handle kar lete hain woh doosron ko bhi handle kar sakte hain। sva ke oopar controlling aur ruling power sarva ke liye yathaartha handling power ban jaati hai।

slogan:- jinke saath hajaar bhujaaon vaala baap hai ve kabhi dilshikasta nahin ho sakte।