शुक्रवार 9 जून 2023 की दैनिक मुरली

09-06-2023 praatahmurli om shanti "baapdaada"' madhuban

meethe bachche - sweetest baap aaya hai, sweet banaane, tumhein devtaaon samaan sweet banna aur banaana hai

prashn:- sada sukhi banne ka vardaan kin bachchon ko praapta hota hai?

uttar:- jinhen gyaan ratnon ki value hai। ek-ek ratna padmapti banaane vaala hai। tum bachche in ratnon ko dhaaran kar roop basanta bano। mukh se sadaiv ratna nikalte rahen to sada sukhi ban jaayenge। jo bachche meetha bante hain, unhein baap bhi dekhkar khush hote hain aur sada sukhi banne ka vardaan dete hain। tum bachche isi vardaan se ever healthy, ever wealthy ban jaate ho।

geet:- aa gaye dil mein tu …

om shanti। kitna meetha geet hai। bhal banaaya film vaalon ne hai, parantu ve to kuchh bhi jaante nahin। tum meethe bachche is behad ke naatak mein part baja rahe ho। behad ke drama mein behad ka baap bhi ab part baja rahe hain sammukh। tum bachchon ko sweet baba hi nazar aata hai। aatma in naynon se (shareer ke organs se) ek-do ko dekhti hai। aatma bhi jo sammukh baithi hai, woh jaanti hai, jiske liye baba kehte hain sweet children। baba kehte hain main sab bachchon ko bahut sweet banaane aaya hoon। maaya ne tumko bahut kadua bana diya hai। yeh baap hi aakar samjhaate hain, tum kitne sweet the। barobar tum jab mandiron mein jaate ho to devtaaon ko kitna sweet samajhte ho। devtaaon ko kitni meethi nazar se dekhte ho। kahaan mandir khule to sweet devtaaon ka darshan karen। banaavat to bhal patthar ki hai, parantu samajhte hain yeh sweet hokar gaye hain। shiv ke mandir mein jaate hain, vo bhi bahut sweetest hain। zaroor hokar gaye hain। sweetest te sweetest, meethe se meetha baap zaroor bhaarat mein hi aaya hoga। mandiron mein jo bhi hain vo sab hokar gaye hain। zaroor kuchh karke gaye hain। sweetest baap ko jaanne vaale bachche hi honge। to zaroor kahenge niraakaar parampita paramatma sabse sweetest hai।

bhaarat mein khaas, duniya mein aam shivbaaba ki mahima to bahut hai। shiv kaashi vishwa naath ganga - aise bahut kehte hain। vahaan jaakar rehte bhi hain। yeh baba bhi sab taraph chakra lagaakar aaye hain। manushya shiv ki kitni mahima karte hain! baap jaante hain yeh sab sweet children hain। ghar ke bachche hain। sabko nambarvaar apna part milta hai, parantu sabki nazar hero-heroine par hi jaayegi। ab is drama mein jo hero-heroine hain unhon ke liye gaate hain tum maat-pita....। abhi tum bachche jaante ho us maat-pita ke sammukh baithe hain। duniya ke sammukh to nahin hain। yeh hai gupta। inka naam-nishaan bilkul hi gum kar diya hai। sirf chitra hain parantu unse koi pata nahin padta। shiv ke pujaari to bahut hote hain। lekin poora parichay nahin hai। tum jaante ho shivbaaba hai sweetest, un jaisa sweet koi ho nahin sakta। woh sweetest baap na aaye to yeh patit duniya paavan kaise banen। is samay tum bachchon ke sivaae koi bhi sweet nahin hai। bhal apne ko shivoham, bhagwan kehte rehte hain। lekin bhagwan to itna sweetest hai, woh to paramdham mein rahne vaala hai, tum phir is patit duniya mein kaise kehte ho - shivoham, ham bhagwan hain! bhagwan to rachayita, patit-paavan hai। bhagwan ko sabhi bhakta yaad karte hain। aise nahin, sab bhakta bhagwan hain। niraakaar shiv ko hi sweetest kahenge। sweetest baba dvaara hi sweetest svarga mein jaayenge। yeh dynasty rachi ja rahi hai। sweetest baba hamko most beloved sweet bana rahe hain। jo jaisa hoga aisa banaayega na। kehte hain main niraakaar hoon। tum aatmaayen bhi niraakaar ho। shiv ke mandir mein shivling ki pooja hoti hai na। yagya rachte to saaligraam aur shiv banaate hain। unki pooja karte hain। bahut bade-bade seth log yagya rachte hain। rudra shiv ka bhi ling banaate hain aur saaligraam bhi banaate hain। brahman log pooja karte hain। tum brahman hi poojya the phir pujaari bane ho। shiv ka ling bada, saaligraam chhota banaakar pooja karte hain। uska naam hi hai rudra yagya। to yeh ho gai mitti ki pooja। but aadi mitti ke banaate hain yaadgaar ke liye। phir pujaari baith pooja karte hain। bhaarat poojya tha। satayug-treta mein pujaareepan nahin tha। aadha kalpa hai gyaan, aadha kalpa hai bhakti। gaaya bhi jaata hai aap-hi poojya aur aap-hi pujaari। phir kehte hain sab bhagwan hain। samajhte hain bhagwan hi poojya tha, bhagwan hi pujaari banta hai, isko ulti ganga kaha jaata hai। baap ko to sab bulaate hain - he bhagwan, he patit-paavan, he merciful, pukaarna maana aahvaan karna। bhakti maarga mein aadha kalpa bhakta log aahvaan karte hain। svarga mein to tum maalik honge। baap kehte hain tumko bahut sweetest bana raha hoon। god father kitna meetha, kitna pyaara shiv bhola bhagwan hai। shankar ka to naam hi nahin daalenge। shiv niraakaar, shankar aakaari - donon ko milaana to galat hai na। manushya koi ke bhi mandir mein jaayenge to pooja ek hi niraakaar ki karenge। sabko mila dete hain। achtam keshvam, shri raam naaraaynam.... ab raam kahaan, naaraayan kahaan। sabko ikattha kar diya hai।

vyaas kaun tha - yeh koi bhi nahin jaante। vaastav mein sachche vyaas sukhdev ke tum bachche ho। baba baith sahaj yog ki knowledge sunaate hain aur us sukhdev ke ham bachche hain sachche-sachche vyaas। ham brahman hain। hamko practical mein baith sahaj raajayog sikhlaate hain, jisse ham manushya se devta bante hain। devtaaon ke aage jaakar gaate hain ham paapi, neech, kaduve hain। woh to bahut meethe hain na। in lakshmi-naaraayan ne hi 84 janma liye hain। tatatvam। yeh knowledge tumko hi milti hai। lakshmi-naaraayan mein vahaan yeh knowledge nahin hogi। ham vahaan yeh knowledge dekar kisi ko devta nahin banaate hain। to baaki kya kaam karen? yahaan to kitne kaam hain। abhi ham sweetest baba ke bachche hain, phir shri lakshmi-naaraayan banenge। tum jaante ho ham sweetest father se sweetest bante hain। shivbaaba hai shri shri meethe te meetha। unse ham bhi meethe bante hain। ham apne ko shri shri nahin kah sakte। yeh samajhne ki baaten hain। tum jitna ashareeri, dehi-abhimaani banenge aur meethe baap ko yaad karenge utna meetha banenge। dehi-abhimaani ban baap aur varse ko yaad karna hai। yeh ek mukhya baat na bhoolo। mujhe yaad karenge to mere jaisa meetha ban jaayenge। to aisa banaane vaale baap ko kitna yaad karna chaahiye। baba mithaas ka to jaise ek pahaad hai। kehte hain na - simar-simar sukh paao। koi simarni nahin simarni hai। maala nahin pherni hai। sirf yaad karna hai। koi ko bhi yeh pata nahin hai ki yeh maala kiski yaad mein bani hui hai। sirf raam-raam karte rehte, maala pherte rehte hain। abhi tum samajhte ho raam shiv baba ke ham bachche hain isliye simran karte ho। maala pherna to pujaareepan ka chinha hai। ham baba ko bahut yaad karte hain। yaad se hi ham ever healthy, nirogi ban jaate hain। baba baar-baar kehte hain apne ko ashareeri samajh mujhe yaad karo to beda paar hai। baaki koi 10-20 bhuja ya soondh vaala manushya nahin hota। na koi chheenkane se devta nikal aayenge। yeh baaten ab sunte hain to samajhte hain yeh sab kya hai! yeh sab hai bhaktimaarga ki saamagri। satayug mein yeh kuchh bhi hogi nahin। bhakti aadha kalpa chalti hai। gyaan koi aadha kalpa nahin chalta hai। gyaan ki praalabdha aadha kalpa chalti hai। gyaan se 21 janma ka varsa milta hai। to jaise woh bhakti ka varsa milta hai। bhakti pahle satopradhaan thi। phir sato, rajo, tamo ho jaati hai। jaise yeh bhi baap se varsa milta hai। to phir pahle satopradhaan, phir sato, rajo, tamo mein aate hain। gyaan ka varsa bhi satopradhaan, sato, rajo, tamo hota hai। yeh samajhne ki baaten hain। pahle to samajhna hai - ham aatma most beloved baap ke bachche hain। baap is jisma mein aaye hain। jisma bigar murli kaise suna sakenge। niraakaari duniya to hai silence world phir hai movie, yeh talkie। teen lok hain na। ek-ek baat tum nai sunte ho। duniya mein aur koi jaan na sake। tum jaante ho ham aatmaayen silence world se aati hain। vahaan ki rahvaasi hain, isliye unka naam brahmaanda rakha hua hai। ande misal aatmaayen rehti hain। parantu aise hai thode hi। agar star kahen to star ki pooja kaise ho! phal, phool, doodh aadi un par kaise thahar sake। naam to shiv theek hai। aise nahin ki woh baap bada, ham aatmaayen chhoti hain। param maana paramdham ki rahne vaali aatma jo most beloved hai।

tum jaante ho ab hamko baba ki shreemat par chalna hai। bahut meethe te meetha baba aakar hamko most sweet banaate hain। aatma sweet banengi to shareer bhi sweet milega। baap kehte hain sirf beej aur jhaad ko yaad karo। beej baap oopar mein hai। woh hai vriksha-pati। yeh hai foundation। phir inse aur taal taaliyaan nikalti hain। duniya mein koi ki buddhi mein yeh nahin hai। baba kehte hain - laadle bachche, niraakaar baap is shareer dvaara bolte hain। tum in kaanon se sunte ho। aatma hi dhaaran karti hai। gyaan soorya pragta, agyaan andher vinaash। andhiyaari raat hoti hai na। manushya samajhte hain isse bhi ajun andhiyaara hoga। yeh hai hi ghor andhiyaara। manushya yeh nahin jaante। abhi tum rachayita aur rachna ke aadi, madhya, ant ko jaan gaye ho। jiske liye sannyaasi kehte hain beanta hai। eeshvar tumhaari gat mat nyaari hai। tum to samajhte ho eeshvar hi aakar gati sadgati karte hain। tum jaante ho shreemat se ham so nar se naaraayan, naari se lakshmi banenge। kitna bhaari nasha hai! em object to ek hoti hai na। barrister banenge, parantu nambarvaar to banenge na isliye follow father mother। jaante ho mother father purushaartha kar number one mein jaate hain to ham bhi purushaartha karen। ham bhi itna sweetest banen। bachche maa-baap ke takhta par jeet paate hain na। woh bade ho jaayenge to maat-pita neeche utrenge। to jaise tum maat-pita ke takhta par jeet paate ho।

tum bachchon ko bahut pyaara, bahut meetha banna hai। tumhaare mukh se sadaiv ratna nikalne chaahiye। roop basanta tum ho। unhonne to ek kahaani baith banaai hai। yeh hai gyaan ratna। javaahraat ko to baba achhi reeti jaante hain। sabse oonch javaahraat ka dhandha gina jaata hai। yeh bhi gyaan ratna hain। ek-ek ratna ki dhaarna hoti hai। isse tum anginat padmapti bante ho। tumhaare mahlon mein kaise sone ki eeten, heere javaahraat lagte hain! bade sukhi rahenge। ever healthy, ever wealthy banenge। yeh jaise baba vardaan dete hain। jitna meetha banenge, utna baap khush hoga। school mein teacher student ko jaante hain na। yeh to behad ka baap-teacher-satguru hai। abhi tum bachche saamne baithe ho to murli bhi aisi nikalti hai। parantu phir gyaani tu aatma ko baba yahaan rahne nahin dete। kehte hain - jaao, jaakar manushya se devta banaane ki seva karo। jo kaduve te kaduve, plegi bahut rogi ho gaye hain, unko nirogi banaao। abhi to average aayu 40-45 varsha hogi। yogi ki aayu bahut badi hoti hai। shreekrishna ko mahaatma, yogeshvar kehte hain। unka jab raajya tha tab average aayu 150 varsha thi। ab rogi ban gaye hain। hisaab to hai na। parantu manushya jaante nahin। buddhi roopi bartan jo sone ka tha, usmein vish (jahar) bharne se yeh haal ho gaya hai। ab baba gyaan amrit daal sone ka banaate hain। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan sweetest banna hai। mukh se kabhi kaduve vachan nahin nikaalne hain, sadaiv meetha bolna hai।

2) baap hamko jo amoolya gyaan ratna de rahe hain, unki value ko samajh achhi reeti dhaaran karna hai।

vardaan:- apne harshit chehre dvaara prabhu pasanda banne vaale khushiyon ke khajaane se sampanna bhav

baapdaada ne brahman janma hote hi sabko khushi ka bade se bada khajaana diya hai, yeh brahman janma ki gift hai। baapdaada har bachche ka chehra sada khush dekhna chaahte hain। sada harshit, cheerful chehra hi prabhu pasanda hai aur har ek ko bhi vahi pasanda aata hai। sada khush rahne ke liye yahi geet gaate raho ki “paana tha vo pa liya'', kaam baaki kya raha। nashe se kaho ki ham khush nahin rahenge to kaun rahega।

slogan:- niraakaari, niranhakaari sthiti mein sthit rahkar, vishwa ko prakaashit karne vaale hi chaitanya deepak hain।