शनिवार 24 जून 2023 की दैनिक मुरली

24-06-23 praatahmurli om shanti ''maateshvari'' revise 21-06-61 madhuban

jagdamba maa ke smriti divas par praatahklaas mein sunaane ke liye - anmol mahaavaakya

“maaya ke anek prakaar ke vighnon se paar hona hai, to checking power se apne aapko saavdhaan rakho, sambhalkar chalo''

(meethi maa ki madhur lori)

abhi chaaron or maaya ka zor hai kyonki uska raajya hai aur pichhaadi ke samay usmein jitni bhi taakat hai woh abhi apni poori taakat lagaayegi, isliye jitna aage badhte jaayenge utna maaya bhi force dekar ladegi। pahle to maaya ka pata hi nahin tha। maaya ke vash mein the। abhi pata chala hai to hamse hi ladegi। dushman banengi। pyaar bhi karegi to andar dushmani rakh karke karegi। jabki jaante ho ki maaya hamaari dushman hai to kisam-kisam ki sabhi baaten saamne aayengi। koi bandhan nahin hai phir bhi man ke phaaltu vikalpa tang karenge। pahle shareer mein kabhi rog nahin hua hoga, abhi woh bhi hoga, kahenge itna samay to ham kabhi beemaar nahin pade, abhi beemaar pad gaye hain। dhan ki bhi kami padegi, business mein ghaata pad jaayega, aise aur bhi kai baaten hogi। dosta dushman ban jaayenge, mitra-sambandhi nahin poochhenge, kai aisi ulat-pulat baaten aa sakti hain aur aayengi kyonki abhi apna pichhla hisaab sab chuktu hona hai।

abhi yeh sab jo raavan ka khaata tha, usko ham khatma kar rahe hain। deh sahit deh ke sarva sambandhon se apni buddhi hataate hain to phir woh saamna bhi hoga, isliye aisi-aisi baaton mein sambhalna hai। kai to sochte hain bhagwan ke bane to aur hi museebten aa gai। jab main paramatma ka bana hoon, ek uska hi sahaara liya hai to mera sab achha ho jaana chaahiye, parantu aisa nahin hai। kai aise khyaal karte hain ki hamaare paas koi takleeph nahin aani chaahiye। parantu pareekshaayen zaroor hongi, tarah-tarah ki bahut baaten aayengi। to aisa khyaal nahin karna ki shaayad mujhe bhagwan hi nahin mila hai। yeh bhagwan hai ya nahin, pata nahin ham kahin ulte raaste par to nahin hain, jo bhagwan naaraaz hua hai। aise kai sankalp aayenge…। aise-aise vighnon ke kaaran kai toot jaate hain। koi museebat aayi, baat aayi to samajhte hain shaayad yeh bhagwan hi nahin hai, pata nahin kya hai... isliye in sab baaton se bichaare dar karke, kisi ne kuchh kah diya ya darva diya to toot padte hain। lekin yeh sab to hota aaya hai। yeh bhi baap batla dete hain ki in sabka mool kaaran hai deh-abhimaan। deh-abhimaan ke kaaran kahaan kaam ki goli, kahaan krodh ki, kahaan lobh ki, kahaan moh ki, kahaan phir anek prakaar ke sanshay ki goli lag jaati hai। aisi baaten laakar hi maaya hataane ki koshish karegi। yeh sab maaya ke paas sahi maarga se hataane ke astra-shastra hain। buddhi mein ulti-ulti baaten le aana, ulti buddhi banaana, yahi to maaya ka kaam hai। ismen hi to apne ko sambhalna hai, ismen hi apni himmat rakhni hai iske liye baap kehte hain mere se buddhiyog rakho to teri buddhi ulti na banen। jhat se usko check kar sako। svayan ko check karne ki bhi power chaahiye। to checking power se apne ko saavdhaan rakho aur phir usi saavdhaani se apne ko paar karo। yahi maaya ke anek prakaar ke vighna hain, inheen se paar hona hai। baaki aise nahin hai ki abhi hamaara sabkuchh theek ho jaaye। nahin, abhi to paar hona hai, abhi jo hamaara yeh janma hai, ismen to hamko badalna hai। isi mein mehnat ki aavashyakta hai। sabkuchh abhi aaraam se mil jaaye, to phir ham to samjhenge yahaan hi vaikuntha hai, yahaan hi svarga hai। phir to svarga ko bhi yaad karna bhool jaayenge isliye baap kehte hain yeh thodi andar ki mehnat hai। ismen baahar se kuchh nahin karna padta hai। yeh yeh vighna aate hain, aisi aisi baaten aayengi, in sab baaton mein apna nishchay atal rakh karke apna purushaartha karna hai। saavdhaan rehna hai। phir doosron ko bhi saavdhaan kiya jaata hai ki girne vaale is tarah se phisalte hain to apne ko phisalne se bachaana hai।

chalte-chalte koi kaam vikaar ke kaaran phisle, koi krodh ke kaaran phisle, koi phir matbhed mein aakar phisle...yahaan se hi girte hain, to abhi girne se sambhalna hai। man mein anek prakaar ke sankalp, vikalpa aayenge। in sab baaton ko yathaartha reeti se samajhna hai ki yeh bhi sab bahut janmon ka ulta khaata jo bana hua hai, woh abhi ek hi janma mein chukaana hai। is ek janma mein ham bahut janmon ka khaata chukaane ka purushaartha karte hain। bahut janmon ke karjadaar agar abhi nahin aayenge to kab aayenge? kyonki ham janma-janma unke the, anek janmon ka khaata stock hota aaya hai। kabhi kisi janma mein thoda-thoda chukaaya bhi hoga, phir bhi jo kuchh bacha hua hai, isi ek janma mein poora hisaab-kitaab chukaana hai। maaya bhi dekhti hai ki agar abhi yeh poora karja nahin chukaayenge to phir kab chukaayenge isliye woh gheraav karegi na। kai janma ke karjadaar nikal padenge, samajh mein aayega ki hamne abhi to aisa kuchh kiya hi nahin hai। phir yeh hamaara aisa dushman kyon bana, yeh baat aisi kyon aai! yeh rog kyon aaya, yeh baat kyon hui?.. parantu nahin। sab prakaar ki pareekshaayen abhi hi aayengi।

abhi inheen sab baaton se apne ko sambhalna, samajhna yahi to knowledge hai। gyaan to isi ka naam hai। karma ki gati kya hai, yeh sab baap vistaar se samjhaate hain। karma ka hisaab kaise banta hai, kaise bigadta hai, kaise savanrata hai aur sanvar karke phir kya bante ho! yeh sabhi baaten baap hi baith karke samjhaate hain kyonki hamaare saare karma ki knowledge baap ke paas hai। hamaare kin karmon se durgati hui hai, usse kaise chhooten, kaise hamaari gati phir sadgati hogi, is poori knowledge ke gati ka chakra baap ne samjhaaya hai, jiske paas poora gyaan hai woh kabhi hilega nahin। agar knowledge ki kami hai to phir hilega, uske paanv dheele padenge। phir aashcharyavat pashyanti, sunanti, kathanti bhaaganti.. gyaan sunne vaale, doosron ko sunaane vaale saakshaatkaar karne vaale... sab tarah ke toot padte hain। yeh sabhi hota aaya hai isliye inheen sab baaton mein sambhalne ke liye yeh saavdhaani di jaati hai। apne paanv kaise majboot rakhna hai, usi majbooti ke liye baap kisam-kisam se samjhaate hain kyonki abhi majboot paanv rakh karke baap se poora poora adhikaar paana hai। to adhikaar paane vaalon ko yeh batlaate hain ki inhon ko kitna himmat aur bharose se, bal se kaam lena hai।

ham bhi warriors hai na, apni roohaani ladaai koi haath-paanv se nahin hai parantu gupta hai। hamaari andar ki yuddha hai aur yuddha karke usmein humein jeet praapta karni hai। vikaaron se gupta ladaai hai, baap bhi gupta baith karke bachchon mein abhi sab bal bhar raha hai, saavdhaan kar raha hai ki bachche saavdhaan ho rehna। yeh maaya ka pichhaadi ka force tumhaare paas aayega parantu tum in sab baaton mein hilna nahin। in baaton ko samajh karke apne purushaartha ko bahut himmat se aur dhaarnaaon ke saath chalaana hai। usmein apna ulhaas umang rakhte hue, usi nashe aur khushi se aage badhne ka purushaartha karte rehna hai। ismen koi duhkh aur ashaanti ki baat hi nahin hai।

abhi laachaari vaala purushaartha nahin karna hai। kai aise chalte hain jaise doosron par meharbaani karte hain। meharbaani to apne oopar karni hai, jo apne liye samajh karke purushaartha karte hain unhon ka purushaartha theek rahega। ham apne liye karte hain aur kisi ke liye nahin karte hain। agar bigaadte hain to bhi apna bigaadte hain, sudhaarte hain to bhi apna sudhaarte hain। to har ek ko apne oopar attention dena hai, doosron ko nahin dekhna hai। isne aisa kiya, usne aisa kiya.. bhaav svabhaav ki baaten bhi ismen bahut aati hain। baahar ke logon ka sunna karna sahaj hai kyonki samajhte hain woh to agyaani hai na। lekin brahman parivaar mein koi ne kuchh kaha kiya to kahenge yahaan bhi vahi chalta hai। yahaan aapas mein kuchh hota hai to woh baat bahut badi lagti hai। parantu nahin, yahi to maaya hai। idhar bhi maaya kisi na kisi roop mein ghusegi na! kahegi dekhen, isne mujhe chhodkar inhen saathi banaaya hai to un saathiyon mein bhi isko takkar khilaayen। parantu humein to yeh knowledge hai ki yeh jo hisaab-kitaab ki takkar hai, yeh pichhli hai isliye aise nahin kaho ki are! bhagwan ke bachche hokar yeh kya kar rahe hain? ismen hilna nahin kyonki abhi gyaan hai ki yeh bhi inke saath kuchh hisaab-kitaab hai, use yog aur gyaan se kaatna hai। aise nahin, takkar kha karke kaatna hai। nahin, woh to hamaara vikarma ban jaayega। usmein sambhalna hai। parantu kai sanshay mein aa jaate hain ki dekho, yeh gyaan mein aa karke bhi kya kar rahe hain। to koi bhi hisaab-kitaab mein takkar khaana agyaan hai। abhi yeh agyaan nikal jaana chaahiye। yeh sab baaten samjhaai ja rahi hain kyonki abhi aisi aisi baaten ho rahi hain। to inheen sab baaton mein saavdhaan kiya jaata hai। kahin in baaton ke kaaran baap se jo takdeer leni hai, woh takdeer lena bhool na jaayen। behad baap se behad ka varsa lena hi chhod den, isliye baap samjhaate hain bachche, bhale aapas mein kuchh hai bhi lekin always si father। baap ko hi dekho। baap se jo varsa lena hai usse hi matlab hai na! jisse matlab hai usko pakad karke rakho। takkar aapas mein khaate ho aur chhod dete ho baap ko। ismen tumhaara hi nuksaan hai, tera varsa chala jaayega। aisa mahaamoorkha nahin banna hai। ismen saavdhaan rahkar svayan ko sambhaalna hai। aise nahin yahaan get ke andar aaye to safe ho gaye, nahin। safety to apni svayan karni hai। agar koi bhi dhaarna mein kami hai to phir maaya idhar bhi ghus aayegi। idhar bhi takkar khilaayegi, koi ke bhaav se, koi ke svabhaav se phir baap padhaata hai yeh bhool jaayega। aise takkar-chakkar ki baaton mein gir padenge isliye saavdhaan! ek ko girta hua dekhenge to doosre ko saavdhaan karenge na ki dekhna yahaan phislan hai, sambhalna, saavdhaan rehna। yahi to apna dharma hai। kahaan se kaun-kaun kaise phisalte ya khisakte hain, woh aap logon ke dhyaan mein in advance diya jaata hai। aap chal rahe ho to khabardaari se chalna। baap se poora varsa paana hai to phir poora paanv dridhta se rakhna। paramatma ke gyaan ki yeh manzil bahut oonchi hai। yahi jo baaten aati hain inse paar hona aur apna poora adhikaar praapta karna। to in sabhi baaton mein apne ko sambhaalna hai। chaahe puraane hain ya naye hain, yeh baaten sabke liye hain। naye puraane sabke oopar maaya ki nazar hai। abhi ham koi maayaaprooph nahin ho gaye hain। agar aatma complete ho gayi to shareer bhi complete hona chaahiye। parantu nahin, abhi uncomplete shareer mein baithe hain, to iska matlab ki aatma kuchh uncomplete hai। lekin ghadi-ghadi maaya ki angoori nahin khaani hai, isse chot lagti hai, phir woh register achha nahin rahega। naam to kharaab hoga na। maaya bahut yuktibaaz hoke giraati hai। yahi to hamaari maaya se ladaai hai, baaki kaurav paandav ki koi yuddha nahin hui hai। yeh to paandavon ne maaya se yuddha ki hai।

abhi humein kya karna hai! apne ko maaya se safe karte chalo, doosra apna tan man dhan fix deposit almighty bank mein rakh do। ise insure karke apne shreshtha karma se apna bhavishya oonch banaate chalo। jo karega so paayega। direction to sabke liye ek jaisa hai lekin jo bhi karega woh apna banaayega। baap se sabhi ko apna sambandh poora rakhna hai ismen doosron ko nahin dekhna hai। yeh sab dhaarnaayen apne ko samjhaane ke liye hain। kya wrong hai, kya right hai, yeh doosron ko samjhaana maana apne ko samjhaana isliye baba bhi kehte doosron ko khabardaar karenge to khud bhi khabardaar rahenge। to sabhi aisi tej raphtaar se chal rahe ho na। achha।

baaki saare din ki dincharya ka, baba ki yaad ka, service ka poora chart rakhte chalo। shareer nirvaah ke liye jo kaam karte ho woh bhi karna hai lekin lobh laalach bahut nahin rakhna hai। apne pet ki aajeevika jitna kaam chalaana hai। baaki jo time hai, buddhi bal se, tan, man, dhan eeshvareey kaarya mein lagaane se phaayda hi phaayda hai kyonki usse abhi jama hoga। to baap kehte hain bachche, abhi apna jama karo, jisse tumko 100 guna, 1000 guna ho karke mile। achha।

meethe meethe bahut sapoot bachchon prati aur aise achhi tarah se jo saavdhaan rah karke chal rahe hain, aise bachchon prati baapdaada aur maa ka yaadapyaar aur good morning।

vardaan:- bindu roop baap ki yaad se har second kamaai jama karne vaale padmaapadmapti bhav

aap bachche ek-ek second mein padmon se bhi jyaada kamaai jama kar sakte ho। jaise ek ke aage ek bindi lagaao to 10 ho jaata, phir ek bindi lagaao to 100 ho jaata, aise ek second bindu roop baap ko yaad karo, second beeta aur bindi lag gai, itni badi kamaai jama karne vaale aap bachche abhi padmaapadmapti bante ho jo phir anek janma tak khaate rehte ho। aise kamaai karne vaale bachchon par baap ko bhi naaz hai।

slogan:- bigde hue kaarya ko, bigde hue sanskaaron ko, bigde hue mood ko shubh bhaavna se theek kar dena - yahi shreshtha seva hai।