गुरुवार 20 जुलाई 2023 की दैनिक मुरली

20-07-2023 praatahmurli om shanti "baapdaada"' madhuban

“meethe bachche - shivbaaba ka chitra ek kothri mein rakh do, ghadi-ghadi jaakar uske saamne baith baaten karo, to saara din yaad bani rahegi''

prashn:- naya aur anokha pyaar kaunsa hai, jiski anubhooti keval sangam par hi hoti hai?

uttar:- vichitra baap ke saath pyaar karna - yeh hai naya pyaar। tum jaante ho niraakaar vichitra baba is saakaar mein aaya hua hai, ham unke saamne baithe hain, humein sangam par direct eeshvar ka pyaar milta hai - yeh hai naya aur anokha pyaar। saara kalpa dehdhaariyon se pyaar kiya, ab videhi baap se pyaar karna hai। aisa pyaar sangam par hi hota hai।

geet:- kaun aaya mere man ke dvaare…

om shanti। bachche jaante hain ki behad ka baap vichitra hai aur abhi ek naya pyaar lekar ke ham baba ke paas baithe hain va aaye hain। isko naya pyaar kehte hain। eeshvar ka pyaar sirf ek baar bachchon ko milta hai। bachche samajh sakte hain barobar parampita paramatma ko ham sab yaad karte hain। woh baith bachchon ko padhaate hain। woh niraakaar vichitra baba ismen aaya hua hai। parampita paramatma ham aatmaon ka baap hai। ham abhi unko jaan-pahchaan gaye hain। yeh pyaar bhi anokha hai। vaise to hamesha dehdhaari ko hi pyaar kiya jaata hai। yeh hai videhi, bigar deh ke। ham unke saamne baithe hain। woh bahut pyaar se aakar padhaate hain। to nai baat hui na। aage jo aashaayen thi - dhan mile, mahal milen, woh sab aashaayen badal gai hain। saari duniya mein tumhaari aash badli hui hai। ham abhi baba se vishwa ka maalik banne ka purushaartha kar rahe hain। abhi tum sammukh baithe ho। jaante ho vahi sab aatmaon ka baap patit-paavan shiv hai। yaad bhi unko hi karte hain। abhi tum bachche sammukh baithe ho। dil mein umang hai - behad ke baap se, behad ka varsa lena hai। kitna vichitra, anokha, wonderful baba hai! yeh aur koi nahin jaante। sirf tum hi jaante ho - baap kaise apna banaakar phir padhaate hain। to aisi kya yukti karen jo ghadi-ghadi baap ko yaad karte rahen? baap raay dete hain - har ek apne ghar mein shiv ka chitra rakh de। shivbaaba ka chitra dekh samjhenge - behad ka baba patit-paavan aaya hua hai paavan duniya sthaapan karne। unse ham abhi 5 hajaar varsha pahle muaaphik varsa le rahe hain, svarga ke svaraajya ka। aatma jaanti hai - ham svarga mein jaakar shareer ke saath raajya karenge। jo baat kabhi svapna mein bhi nahin thi, ab woh aaya hai to ek kothri apni banaae shiv ka chitra rakh usmein likh dena chaahiye - baba aaya hua hai। unko aana hi hai svarga ki sthaapna karne। narkavaasiyon ko svargavaasi banaane। ghadi-ghadi shivbaaba ko dekhte rahenge to yaad rahegi। chitra gale mein bhi daal dete hain। pati ka chitra bhi gale mein daal dete hain na। tum bachchon ke liye bhi taiyaar kara rahe hain। paarlaukik baap ko yaad karna bada anokha hai। aur sabhi ki yaad ko samet ek ko yaad karna hai। jaise bhakti maarga mein bhi apne ghar mein pooja ki kothi athva mandir banaate hain na, vaise gyaan maarga mein bhi kothi banaae usmein sirf shivbaaba ka chitra rakhna chaahiye। manushya samajhte hain - brahmaakumaariyon ki murli vikaar se chhudaati hai। are, yeh to achha hai na। paavan banne liye zaroor vikaaron ko to chhodna hoga। bigadte hain - bhakti kyon chhodte ho? achha, ham bhakti karte hain parantu ek ki, doosra na koi। aur sang buddhiyog tod dena hai।

tumhaari yuddha maaya se hai। tum baap ko yaad karte ho, maaya todne ki koshish karti hai। hamko shivbaaba se varsa milta hai - aise yaad karte rahenge। shivbaaba ko dekhte rahenge to tumhaari kothi vaikuntha ban jaayegi। meera bhi bhakti karti thi to vaikuntha ka saakshaatkaar karti thi। unko bhi saakshaatkaar karaane vaala shivbaaba hai। tumhaari buddhi mein ab aaya hai - ham shivbaaba se vishwa ka maalik bante hain। bhakti maarga mein yeh pata nahin rehta - shiv kya karte hain? kyon us par bali chadhte hain? tum samajhte ho - sabse oonch hai shivbaaba, unko hi paramatma kaha jaata hai। paramatma se zaroor nai cheez milegi। unko heavenly god father kaha jaata hai। svarga mein hai shreekrishna, unko father nahin kahenge। woh to bachcha hai। svarga sthaapan karne vaala baap hai niraakaar। woh dehdhaari nahin। yoon to aajkal sabko father kehte rehte hain। gaandhi ko bhi baapu ji kehte hain। parantu sab dharma vaale nahin kahenge। arth to samajhte nahin। tum jaante ho - sabka baapu ji shivbaaba hai। shiv daada nahin, baba। woh niraakaari duniya mein rehte hain। shreekrishna ko yaad karenge lekin woh to vaikuntha nivaasi hai। rishi-muni aadi sab dehdhaari yahaan hokar gaye hain। paramatma hai niraakaar, unko deh hai nahin। sarvavyaapi ke gyaan kaaran buddhi kiski bhi chalti nahin। baap aakar buddhi ka taala kholte hain। yahaan hai nai baat। aur satsang mein aise nahin samajhte hain ki shivbaaba knowledge de rahe hain। vahaan to sab dehdhaari baithe hue hain। tumko nishchay hai - ham niraakaar baap se sun rahe hain। niraakaar zaroor jab saakaar mein aaye tab to pahchaan de। kalpa-kalpa baap aate hain। aakar maalik banaate hain। phir bhi maaya kitna hairaan karti hai! vighna daalti hai। roodra gyaan yagya mein asuron ke vighna padte hain। deh abhimaan aane se hi vighna padte hain। baba kehte hain - apne ko ashareeri samjho। ham to baba ke bane hain। baba vaapis lene aaye hain। yeh shareer chhod ab vaapis jaana hai। apne se baaten karo। sookshm dehdhaari va sthool dehdhaari sabki yaad chhodni hai। pakka-pakka nishchay karna hai। ham aatmaayen paramdham se aai hain। vahaan ke ham rahne vaale hain। satayug mein itne janma raajaai ki। 84 janma liye, ab naatak poora hota hai। vaapis jaana hai। ghar mein koi hangaama ho to kothri mein shiv ka chitra rakh do।

brahman log striyon ko kehte hain ki shiv ki pooja nahin karni hai। parantu shivbaaba to aate hi hain maataaon ke liye। shiv ke oopar to bahut jaakar lotiyaan chadhaate hain। pujaari log khush hote hain kyonki maataayen sabse jaasti paise rakhti hain। bhakti ki sachchi bhaavna ablaaon maataaon mein rehti hai। purush to jaise khagge hain। ghadi-ghadi baahar nikal jaate hain। buddhiyog bahut bhatakta hai। patni ka pati taraph bahut moh jaata hai। tum bachche samajhte ho yeh duhkhadhaam hai। ab sukhdhaam sthaapan karne vaala baba aaya hua hai। yuktiyaan rachni hai - ham baap ko kaise yaad karen? unko in aankhon se nahin dekha jaata। yeh aatma kehti hai - hamaara shivbaaba baap hai। shiv ka chitra dekhne se badi khushi hogi।

tum bachchon ka yog bhi avyabhichaari chaahiye। shiv ka chitra rakh ghadi-ghadi yaad karte raho। baba ne apna misaal bataaya tha। lakshmi-naaraayan ke chitra se hamaara kitna pyaar tha! phir ek din khyaal aaya - lakshmi daasi ban paanv daba rahi hai। aise to theek nahin hai। to artist ko kaha - isse lakshmi ko to mukta kar do। baaki naaraayan ka chitra pocket mein pada rehta tha। ek pocket mein, ek muraadi ke box mein। ghadi-ghadi chitra dekhta rehta tha। jaise masta। parantu gupta karta tha। koi dekhe nahin। nahin to kahenge - yeh kya karta hai? pahle shreekrishna se pyaar tha phir unko chhod vishnu se ho gaya। jaise bhakti naudha hoti hai। vaise yeh yaad bhi naudha honi chaahiye, isse praapti bahut bhaari hai। unse to kuchh nahin alpakaal ke liye thoda sukh milta hai। phir doosre janma mein mehnat karni pade। bhakti mein, dhandhe aadi mein mehnat lagti hai। kamaao, tab khaao। baba tumko is ek janma mein itni mehnat karaate hain jo 21 janma praalabdha bhogte rahenge। kuchh mehnat karne ki darkaar nahin rahegi। 21 janma sada sukhi rahenge। to aisa baap jo purushaartha karna sikhlaate hain, unko to yaad karna chaahiye na। kehte hain - shvaanson shvaans yaad karo। guru log apne shishyon ko kehte hain - maala phero। raam-raam karte raho, bas। raam-raam japte-japte romaanch khade ho jaate hain। raam-raam ki masti mein jhoolte hain। jaise ki raam ki puri mein pahunch gaye hain। tumko to baba kehte hain - ek shivbaaba ki yaad ka ajpaajaap karo aur kuchh yaad na aaye। parantu maaya bhi saamna karti hai। bhakti maarga mein thode hi maaya saamna karti hai। yeh hai maaya aur eeshvar ke bachchon ki yuddha। naatak bhi banaate hain - bhagwan aise kehte hain, maaya aise kehti hai। abhi hai sangamayug। maaya ke ulte-sulte sankalp-vikalpa to aate rahenge। toofaan aisa jor se lagta hai jo manushya ko bhi udaakar door phenk deta hai। yeh phir maaya raavan ka toofaan hai। unse bachne ki yuktiyaan to baba bataate rehte hain। tum kahenge hamko parampita paramatma raajayog sikhlaate hain।

tumse koi poochhe - tumko yeh sannyaas kisne karaaya? guru kaun hai? bolo - parampita paramatma। aisa koi nahin hoga jisko bhagwan aakar sannyaas karaaye। woh sab manushya, manushya ko karaate hain। yahaan baap aakar kehte hain - deh sahit jo bhi sambandh hain unko chhodo। is puraani duniya ka tyaag kar nai duniya ko yaad karo - sannyaasi aise thode hi kahenge। ab to practical mein puraani duniya ka vinaash hona hai, isliye sabka buddhi se tyaag kar ek baap se buddhi lagaani hai। tum sagaai karte ho na। dehdhaari ko yaad kiya to sagaai kachchi ho jaayegi। sarva dharmaani... main phalaana hoon, yeh hoon...। woh sab chhod apne ko aatma samjho। 84 janmon ko to tum jaan gaye ho। ab khushi se vaapis jaate hain। taali bajaani chaahiye। ham aatmaayen ek shareer chhod doosra leti hain। apne ko dehi samajhna hai। ham aatma pahle-pahle gori thi, phir 84 janma liye। ab vaapis jaakar ke phir aae svarga mein raajya karenge। yeh svadarshan chakra phiraana kitna sahaj hai। shiv ka chitra to pocket mein pada rahe। baba aap aaye ho, kitne meethe ho, hamaare baba ho na - aisi-aisi baaten karni chaahiye। shreekrishna ke saath bhakti maarga mein aisi baaten karte the na। shiv ka first class locket sone-chaandi ka banaayenge। gareebon ko sone ka, saahookaaron ko chaandi ka denge। yeh maataayen badi meethi hain। gaanv vaalon mein bhaav achha rehta hai। saadhaaran bachchon ko dekh baba bhi khush hote hain। shreekrishna ko gaanvade ka chhora kehte hain na। shreekrishna to gaanvade ka chhora ban na sake। woh to svarga ka maalik hai। inki aur shreekrishna ki baaten mix kar di hain। gaanvade ka poora anubhav inko hai। to shivbaaba va shreekrishna gaanvade ka chhora ban na sake। haan, yeh (daada) chhotepan mein tha। pala hi gaanvade mein hoon। to is saadhaaran tan mein phir baap ne aakar pravesh kiya hai। baba ne mukhya baat samjhaai hai ki saara madaar hai yaad par। yaad kabhi bhoolni nahin chaahiye। laukik bachcha thode hi kabhi kahega - main baap ko bhool jaata hoon। sazni kabhi saajan ko bhool jaati hai kya? impossible hai। yeh hai tum bachchon ke liye mehnat। nirantar yaad ke abhyaas se hi vikarma vinaash honge। nahin to phir saja khaani padegi। vijay maala mein aa nahin sakenge। kamaal hai baap ki jo budhiyon, gareebon, ganikaaon, ahilyaaon, kubjaaon aadi ko aakar apna banaate hain। yoon to koi chitra ki darkaar nahin hai। parantu maaya bhula deti hai, isliye chitra rakha jaata hai। buddhi mein rehna chaahiye ham jaate hain baba ke paas। raasta dekh liya hai mukti-jeevanmukti ka। aur koi panda hota hi nahin hai। inko indraprastha bhi kehte hain, koi patit aakar chhip karke baithega to pattharbuddhi ban jaayega। baba to antaryaami hai na! yeh baba (brahma) baahar-yaami hai। us baba ko jhat maaloom pad jaata hai - patit chhipa hua baitha hai। to jisne aise patit ko laaya unko aur jo patit aakar baitha hoga - un donon ko saja milegi isliye kabhi bhi patit ko nahin laana chaahiye। law aise kade hain। koi patit chhi-chhi ko nahin bithaana chaahiye। nahin to badi kadi saja ke bhaagi ban jaayenge। yahaan koi chori thagi chal na sake। paap aur punya ka hisaab-kitaab dharmaraaj ke paas rehta hai na। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sabhi ki yaad ko samet, buddhiyog sabhi se tod ek baap ki yaad mein rehna hai। shivbaaba ki kothi banaae unki avyabhichaari yaad mein baithna hai।

2) apne aapse meethi-meethi baaten karni hai। ham pahle kitne sundar (gore) the, phir 84 janma liye, ab khushi se vaapis jaate hain - aise apne saath baaten kar svadarshan chakra phiraana hai।

vardaan:- svachintan aur svadarshan dvaara heere samaan amoolya jeevan ka anubhav karne vaale bedaag bhav

heere samaan amoolya jeevan ka anubhav karne ke liye sada svachintan karo aur svadarshan chakradhaari bano kyonki heere ko daagi banaane vaali keval do baaten hain - ek pardarshan, doosra parchintan। yahi do baaten sang ke rang mein svachchha heere ko daagi bana deti hain isliye is mool beej ko samaapta kar svachintan karo aur svadarshan chakra phiraao to dhool aur daag lag nahin sakta। sada bedaag sachcha heera, chamakta hua amoolya heera ban jaayenge।

slogan:- vichitra baap ke chitra aur charitra ko yaad karne vaale hi charitravaan hain।