गुरुवार 17 अगस्त 2023 की दैनिक मुरली

17-08-2023 praatahmurli om shanti "baapdaada"' madhuban

“meethe bachche - tumhein mukh se kuchh bhi bolna nahin hai, sachche dil se ek baap ko nirantar yaad karna hai, sachche dil par hi saaheb raazi hai''

prashn:- sabse achha manner (charitra) kaun sa hai? kis devtaai manners ko tumhein dhaaran karna hai?

uttar:- sada harshit rehna bahut achha manner hai। devtaayen sada harshit rehte hain, khilkhilaakar hansate nahin। aavaaj se hansana bhi ek vikaar hai। tum bachchon ko yaad ki gupta khushi rahni chaahiye। familiarity ka sanskaar bhi bahut nuksaankaarak hai। service ki saphalta ke liye anaasakta vritti chaahiye। naam-roop ki badbu jara bhi na ho। buddhi bahut svachchha chaahiye। isi dhaarna se jab service karte, doosron ko aap samaan banaate to chehra harshit rehta hai।

geet:- na woh hamse juda honge…

om shanti। bachche jaante hain so bhi nambarvaar purushaartha anusaar kyonki kaha jaata hain sachchi dil par saaheb raazi। dil bhi aatma mein hai na। to sachche saaheb ko yaad karo to sukh milega। yaad maana andar mein baap ko yaad karna hai। jap saaheb ko। jap ka arth yeh nahin ki mukh se kuchh bolte raho। nahin, yaad karte raho to bahut sukh milega। auron ko bhi aap samaan banaana hai। kisko samjhaana bhi bada sahaj hai। jaise sachchi pativrata stri sivaae pati ke aur kisko bhi love nahin karti hai, vaise hi aatma ko us paarlaukik behad ke baap ko sachchi dil se yaad karna hai। jaise aashik-maashook ka pyaar hota hai। woh naam-roop par marte hain, vikaar ki koi baat nahin rehti। aashik maashook ko, maashuk aashik ko yaad karte hain। bas, aur kahaan buddhi nahin jaati। bhal dhandhaadhori bhi karte hain parantu dil ek ke saath rehti hai। woh pavitra yaad hoti hai। shareer aur buddhi apvitra nahin rehti। uska bhi gaayan hai, parantu aise bahut thode hain। is gyaan mein bhi sachche aashik bahut thode hain। maaya aisi hai jo naak se pakad leti hai। drishtaanta diya hua hai angad ka। raavan ne kaha - dekhen, yeh hilta hai va nahin? jo teekhe-teekhe mahaarthi hain unko hi maaya pachhaadti hai। jaise chooha kaatta hai, phoonk aisi deta hai jo pata bhi nahin padta hai। aise maaya bhi badi jabardasta hai। jo koi bekaayde chalan chalte hain to andar se hi buddhi ko gupta taala laga deti hai। ismen samajhne ki badi buddhi chaahiye। baba ko yaad karne ka bada abhyaas chaahiye। baap mein poora-poora love chaahiye।

tumko service karni hai anaasakta hokar। bhal koi kitna achha bachcha hai parantu aise nahin ki unke naam-roop mein phans padna hai, isse bada nuksaan kar dete hain। baap kehte hain apne ko ashareeri aatma samajhkar mujhe yaad karo। apne ko svachchha rakho। tum shivbaaba ke bante ho, woh tumko svachchha banaate hain। vikaaron ko nikaal dena hai। tumhaara naam hi hai shiv shaktiyaan। tumko sarvashaktimaan se shakti milti hai, to achhi tarah unse yog lagaana pade। baap kehte hain nirantar yaad karna maasi ka ghar nahin hai। bhojan karte samay kitni koshish karte hain phir bhi bhool jaate hain। bahut koshish karte hain - saara samay baap ki yaad mein khaayen kyonki woh hamaara bahut pyaara hai, kyon na ham unko yaad kar khaayen to saath mein rahega। phir bhi ghadi-ghadi yaad bhool jaati hai। bhakti maarga mein bhi buddhi aur-aur taraph bhatakti rehti hai। yeh to hai gyaan ki baat। in baaton ko bachche bhi poora nahin samajhte hain। kai bachche ajun regdi pahante (chhote bachche ki tarah ghutnon ke bal chalte) rehte hain। agar nirantar yog lag jaae to samjha jaae ki ab karmaateet avastha aa rahi hai। parantu yaad thaharti nahin hai, badi yuddha chalti hai। baba dekhte hain bahuton ka buddhiyog bhatakta hai, ashareeri banne mein mehnat lagti hai। bahut thode hain jo sach bolte hain। kahne mein lajja aati hai। maaya badi dushtar hai। ekdam maatha mood lene mein deri nahin karti hai। aise nahin, ham to bachche hain hi। yuktiyaan bhi batlaai jaati hain। pahle to karmaateet avastha mein jaana hai phir hai nambarvaar pad। baba jaante hain - bachchon ko maaya bada hairaan karti hai, yaad thaharne nahin deti hai। bahuton ki avastha dekhi jaati hai। naam-roop mein phans padte hain। apne ko ashareeri samajhne ka abhyaas karna hai kyonki bahut samay se apne ko ashareeri nahin samjha hai। satayug mein yeh gyaan poora rehta hai ki main aatma hoon, mujhe yeh puraana shareer chhod naya lena hai। saakshaatkaar bhi ho jaata hai। paroksha, chaahe aproksha, samajhte hain - abhi shareer ki aayu poori aakar hui hai। jaise koi marne par hota hai to kehte hain hamko aisa lagta hai ki ab marunga, rah nahin sakoonga। vahaan phir samajhte hain ab shareer bada ho gaya hai, isko ab chhodna hai। apne time par khushi se chhod dete hain। aatma ka gyaan poora hai। baap ka gyaan bilkul nahin hai। drama mein hai nahin। vahaan baap ko kyon yaad karen? darkaar hi nahin। yahaan to duhkh mein manushya yaad karte hain aur tumko phir apne ko aatma samajh baap se yog lagaana hai। yeh shareer to puraana hai। isse to bilkul naphrat aani chaahiye। bhal kitna bhi khoobsoorat, suhaana (sundar) shareer ho, lekin laamuzeeb to sab kaale hain kyonki aatma kaali hai। yeh buddhi se samajhne ki baat hai। shareer koi sabke kaale to nahin hote hain। yeh to hava paani par hota hai। jahaan thanda jaasti hoti hai vahaan saphed manushya hote hain। to baap samjhaate hain - buddhi ka yog ek se lagaana hai। jaise love-marriage karte hain na। yeh bhi tumhaari aatma ki love-marriage hai। phir is deh ke saath bhi love nahin rehta hai। apni deh se hi love nahin to phir auron ki deh se kya love rakhna hai। duniya mein to kaale aur gore shakla par bhi chalta hai। koi-koi bigar dekhe sagaai kar lete hain phir jab shakla dekhte hain to kehte hain hamko aisi kaali nahin chaahiye। phir jhagda ho jaata hai - ham paise ko kya karen, humein to sundar chaahiye।

ab tum jaante ho - ham aatma hain। is puraane shareer se moh nahin rakhna hai। yeh to vikaari sambandh hain na। duniyaavi baaton se apni baat nyaari hai। abhi tumhaari kaali aatma ki sagaai hui hai gore musaaphir se। jaante ho is duniya mein sabki aatma kaali hi kaali hai। gore se sambandh jod aatma ko gora banaana hai। ek musaaphir saikdon-hajaaron ko haseen banaate hain। kaali aatma ko gora banaana hai। ismen bada achha yog chaahiye। kaala rah jaane se ek to saza khaani padegi aur pad bhi bhrashta ho jaayega। yahaan kiske naam-roop mein nahin latakna hai। badi disservice ho padti hai isliye baba samjhaate hain - khabardaar raho, tum maaya ki chakri mein aa gaye ho, parantu samajhte nahin। bhaavi chhodti nahin। apna pad bhrashta kar dete hain। baap kehte hain - yog agni se apni aatma ko pavitra banaana hai। yeh hai bhatthi। baap ke saath yog lagaana hai। aur taraph buddhi jaati hai to vyabhichaari thahra। service kar na sake। pad bhi pa nahin sakenge। yog agni se hi khaad nikal sakegi। yog hai to gyaan bhi thahrega।

baba roop bhi hai, basanta bhi hai। tum bachche bhi jitna roop bante jaayenge utna gyaan ki dhaarna hogi। pahle aatma ko pavitra banaana hai। yog-yog kehte hain parantu tumhaare mein bhi kai yog ka arth nahin samajhte। yog ke bina apne ko athva bhaarat ko pavitra bana nahin sakenge। bhal service bhi karte hain, centre kholte hain parantu maaya naak se ekdam pakad leti hai। anhakaar aa jaata hai - hamne itne centre khole hain। deh-abhimaan aa jaata hai। baap to samjhaate hain apne ko aatma samajh yog lagaao baap se। koi bhi vikarma na ban jaae। agar baba ko bhool koi ke naam-roop mein phansate ho to bada nuksaan ho jaata hai। yeh badi manzil hai। vishwa ka maalik banna kam baat hai kya! baap ki kitni mahima hai! kitne mandir banaate hain - unke naam par! tum jaante ho somnaath ka mandir kisne aur kab banaaya। mandir bhi nambarvaar bante hain। somnaath ke baad phir hai lakshmi-naaraayan ka athva jagdamba ka mandir। manushya thode hi jaante hain ki somnaath ka mandir kisne banaaya? woh to niraakaar hai। niraakaar ke pujaari niraakaar shiv ko hi poojenge। parantu jaante nahin। tum bachchon mein bhi nambarvaar hain। raat-din service ka hi ona rehta hai। ona poora tab rahe jab deh-abhimaan toote। dehi-abhimaani banna hai। baap ke saath poora yog lagaana hai। unka poora regard rakhna maasi ka ghar nahin hai। maaya ke bhoot yog tudva dete hain। yeh to baap hi jaante hain। kitne to aise naazuk hain, jo kuchh kaho to jhat traitor ban bigad padte hain। woh phir apna hi khaana kharaab kar dete hain। aashcharyavat baba ka bananti, phir bhaaganti ho jaate hain। disservice karne lag jaate hain। bhaagvat mein bhi mashhoor hai - amrit peete-peete traitor ban phir sataate hain। baap ko kitna khyaal rehta hai - yeh phalaana kachcha hai, koi bhi samay traitor ban nuksaan kar sakta hai। barobar dekhte hain traitor ban nuksaan karne lag padte hain phir kitni ablaaon par atyaachaar hote hain। aur satsangon mein atyaachaar hote hain kya? yahaan pahli baat hai vish (vikaar) chhodne ki। vish chhodte nahin hain।

kehte bhi hain phalaana svarga padhaara। parantu heaven kya hai, kuchh jaante nahin hain। jaise bigar arth koi bol de, aise hi kah dete hain। ab kitni samajh aai hai। baap jaante hain kaun achhe-achhe phool hain। koi hain jinmen naam-roop mein phansane ki badbu nahin hai। gyaan ke bigar aur koi baat nahin। yog bhi poora chaahiye। koi kaale to pahle se hi hain phir aur hi kaale hote jaate hain। is lashkar mein haathiyon ka bhi lashkar hai, sher sherniyon ka bhi lashkar hai, ghode-ghodiyon ka bhi hai, bakre-bakriyon ka bhi hai। sab hain। chalan se jhat maaloom pad jaata hai - yeh to jaise ridh (bhed) hain। kuchh bhi nahin samajhte, buddhi mein baithta hi nahin। jaise bhains buddhi hain। baap kitna sahaj karke batlaate hain - tum aatma ho। tum behad ke baap ko yaad nahin kar sakte ho? he aatma, tum aur sab taraph se buddhiyog hataakar mujhe yaad karo। tum yaad nahin kar sakte ho? aur mitra-sambandhiyon aadi ko yaad karte ho, mujhe yaad karne mein kya museebat hai? kehte hain - baba, maaya buddhiyog tod deti hai! are, varsa ganva baithoge। tum buddhiyog poora lagaao to vishwa ka maalik banoge। baap ko thode hi kabhi bhoolna hota hai। deh-abhimaani banne se hi tum bhoolte ho। tumko baar-baar kaha jaata hai apne ko aatma samjho, baap ko nirantar yaad karo। japo nahin, aavaaj nahin karo। tumko to vaani se pare jaana hai। raam-raam mukh se kaha to deh-abhimaan aa gaya। andar simran karna hai। organs ka sirf aadhaar lena hai। main aatma hoon, shanti mein rahkar baap ko yaad karna hai। baba hai gyaan ka saagar, knowledgeful। unmein saari knowledge hai। tumko bhi sikhlaate hain। baap ko yaad karne se tum pavitra ban jaayenge, holi taaj milega aur srishti chakra ko jaanne se ratna jadit taaz milega। double sirtaaj ban jaayenge। yaad se hi vikarma vinaash honge। nahin to dharmaraaj ke dande khaane padenge। pad bhi bhrashta ho jaayega isliye baap ko yaad karna hai। phir khushi bhi chaahiye gupta। aavaaz se hansana nahin hai। lakshmi-naaraayan ko harshit mukh kaha jaata hai। harshitmukh rehna aur hansana alag-alag baat hai। harshitmukh rahne se woh gupta khushi rehti hai। aavaaz se hansana buri baat hai। harshit rehna sabse achha hai। khilkhila kar hansana (aavaaj se hansana) bhi ek vikaar hai। woh bhi nahin rehna chaahiye। khushi chehre par aani chaahiye। woh aayegi tab jab aap samaan banaayenge। service aur service। service mili aur yeh bhaaga, doosri koi baat nahin। tum bachche service karte ho, kaanton ko kali banaate ho। baba bachchon ko achhi-achhi points bataate hain। yeh nishchay rakhna hai ki baba hi sunaate hain। yeh bhi kehte hain meri mahima nahin karna। mahima saari shivbaaba ki hai, unko yaad karne se hi poora vikarmaajeet banenge। bahut sahaj baat hai। yaad karna hai aur chakra phiraana hai। svadarshan chakradhaari poore ant mein bante hain nambarvaar। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ko saath rakhne ki yukti rachni hai। bhojan par yaad mein rehna hai। ashareeri banne ka abhyaas karna hai। apni puraani deh se bhi love nahin rakhna hai।

2) baap ka poora regard rakhna hai। anhakaar mein nahin aana hai। naam-roop ki beemaari se sada door rehna hai। gyaan-yog mein masta rehna hai।

vardaan:- sab kuchh baap havaale kar sangamayugi baadshaahi ka anubhav karne vaale avinaashi raajtilak adhikaari bhav

aajkal ki baadshaahi ya to dhan daan karne se milti hai ya vote se milti hain lekin aap bachchon ko svayan baap ne raajtilak de diya। beparvaah-baadshaah - yeh kitni achhi sthiti hai। jab sab kuchh baap ke havaale kar diya to parvaah kisko hogi? baap ko। lekin aise nahin ki thoda-thoda kahin apni authority ko ya manmat ko chhipaakar rakha ho। agar shreemat par hain to baap havaale hain। aise sachche dil se sab kuchh baap havaale karne vaale double light, avinaashi raajtilak ke adhikaari bante hain।

slogan:- ek-ek vaakya mahaavaakya ho, koi bhi bol vyartha na jaae tab kahenge master satguru।