शनिवार 9 दिसंबर 2023 की दैनिक मुरली

09-12-2023 praatahmurli om shanti "baapdaada"' madhuban

“meethe bachche - ek baap ke saath sachchi muhabbat ho to baap tumhein apne saath ghar le jaayenge, sab paapon se mukta kar denge, svarga ka maalik bana denge''

prashn:- apne aapko khushi mein rakhne ke liye kaun si mukhya dhaarna chaahiye?

uttar:- khushi mein tabhi rah sakte jab apne aapse rooh-rihaan karna aata ho। kisi bhi cheez mein aasakti na ho। do roti pet ko mile, bas - aisi anaasakta vritti ki dhaarna ho tab harshit rahenge। gyaan ka manan kar svayan ko harshit rakho। tum karmayogi ho, karma karte, ghar ka kaam karte, khaana aadi khaate bhi baap ko yaad karo। svadarshan chakra buddhi mein ghoomta rahe, to bahut khushi rahegi।

geet:- na woh hamse juda honge…

om shanti। meethe-meethe bachchon ne geet suna। yeh hai bachchon ki va aatmaon ki apne parampita paramatma ke saath roohaani muhabbat। yeh roohaani muhabbat sirf tum brahman bachchon ki hi hoti hai। tum apne ko aatma nishchay karte ho। parantu jab kehte hain ki aatma so paramatma, to aatma kiske saath muhabbat rakhe। muhabbat hoti hai bachchon ki baap ke saath। baap, baap ki muhabbat nahin hoti hai। abhi tum samajhte ho ham aatmaayen apne parampita paramatma ke saath muhabbat jod rahi hain। yeh muhabbat hi tumko saath le jaati hai। tum roohaani muhabbat baap ke saath rakhte ho to takleeph bhi sahan karni padti hai। saari duniya, ghar ke bhaati aadi sab dushman ban jaate hain।

bachchon ko samjhaaya hai ki patit-paavni ganga nahin hai। manushya paavan hone ke khyaal se ganga va jamuna ke tat par haridvaar, kaashi mein jaakar baithte hain। mukhya sthaan yeh do hain। kehte hain - he patit-paavni ganga। ab woh ganga to sunti hi nahin। sunne vaala ek patit-paavan baap hi hai। abhi tum us baap ke sammukh baithe ho। baap batla rahe hain tum paavan kaise banoge? paani ki ganga thode hi kehti hai - maamekam yaad karne se tumhaare vikarma vinaash honge। baap kehte hain - main pratigya karta hoon agar tum mujh baap ko yaad karenge to tumhaare vikarma vinaash honge। guarantee dete hain, ganga to guarantee de na sake। jaise manushya raavan ko varsha-varsha jalaate aaye hain parantu raavan marta hi nahin hai, vaise ganga mein snaan bhi janma-janmaantar karte aaye hain parantu patit se paavan koi bante hi nahin। phir-phir snaan karne jaate rehte hain। ek baar paavan banen to phir kyon jaate hain snaan karne? kitne mele lagte hain। unko koi aatma-paramatma ka sangam nahin kahenge। bhakti maarga mein bheed lagti hai mele par। abhi tum baap ke saath buddhiyog lagaate ho। tum jaante ho ham aatmaayen aashik bani hai। aatma hi bhagwan ko yaad karti hai shareer dvaara। baap kehte hain main bhi is shareer dvaara tumko padha raha hoon isliye hamesha baba ko yaad karte raho। baba kahne se svarga zaroor yaad aayega aur apna muktidhaam ghar bhi yaad aayega। mukti ko nirvaandhaam bhi kehte hain।

yeh hai saakaari duniya। jab tak aatmaayen yahaan na aayen to saakaari duniya kaise badhe? aatmaayen niraakaari duniya se aati hain। manushya srishti badhti jaati hai। koi samajhte hain natural badhti rehti hai। tum jaante ho aatmaayen yahaan aati hain, vriddhi ko paati rehti hain। bachchon ko maaloom hua hai ki sweet hom shantidham hai। shanti ko bahut log pasanda karte hain। tum jaante ho shantidham to hamaara sweet god fatherly hom hai। bhaaratvaasi vilaayat se lautte hain to kehte hain ham apne sweet hom bhaarat mein jaate hain। jahaan janma lete hain woh desh pyaara lagta hai। kehte hain hamko sweet hom (bhaarat mein) le chalo। achha, samjho mar jaate hain, aatma to chali gai। phir shareer ko yahaan le aakar khatma karte hain। samajhte hain bhaarat ki mitti bhaarat mein hi jaaye। nehru ne shareer chhoda to unki raakh dekho kahaan-kahaan le gaye! kheton mein giraai। samajhte hain kheti achhi hogi। parantu har cheez ko woh kitna bhi maan den, puraani to zaroor honi hai। kitni takleeph sahan kar rahe hain! baap ka pata nahin hai। tum baap ko jaankar baap se varsa le rahe ho। to dil hoti hai mitra sambandhiyon aadi ko bhi svargavaasi banaayen। kisko tum kaho svargavaasi bano to kahenge tum maarne chaahte ho kya! tum bachche jaante ho - shreemat par ham shreshtha svargavaasi ban rahe hain। dehi-abhimaani banne mein badi mehnat lagti hai। ghadi-ghadi deh-abhimaan mein aakar baap ko bhool jaate ho। abhi tum sammukh baithe ho। jaante ho ham apne parampita paramatma paas aaye hain। baba kehte hain - aage kabhi mile the? to jhat kehte hain - haan, baba 5 hajaar varsha pahle। yeh tumhaara gupta akshar hai। aur koi copy kar na sake। bhal shreekrishna ka vesh dhaaran kar lete hain, kehte hain ham aaye hain svarga ki sthaapna karne। parantu yeh baat ki 5 hajaar varsha pahle bhi svarga sthaapan kiya tha - yeh kah na saken। tum hi kehte ho - baba, 5 hajaar varsha pahle ham aapse varsa lene aaye the। aapne raajayog sikhaaya tha। yeh aatma kehti hai is shareer dvaara। apne ko aatma nishchay kar aur baap ko yaad karna hai, ismen sarvavyaapi ki to baat hi nahin। yeh bhi nahin samajhte hain ki brahma zaroor saakaar mein hona chaahiye, jis dvaara parampita paramatma srishti rachte hain।

patit-paavan baap aakar so devi-devta paavan banaate hain। baap hi svarga ka rachayita hai। to zaroor svarga mein manushya chaahiye। baba aakar tumhein svarga ka dvaar bataate hain। tum koshish karte ho ham narkavaasi ko svargavaasi banaayen। koi bade aadmi ko seedha kaho tum patit narkavaasi ho to kitna bigad padenge। abhi tum jaante ho ham narka se nikal svarga mein ja rahe hain। abhi ham sangamvaasi hain। ham aatmaayen ab ja rahi hain - is shareer ko chhod baba ke saath, baba ke ghar। yeh hai tumhaari roohaani yaatra। baba ki yaad mein rehna hai। samajhte ho yeh shareer jahaan tak rahega vahaan tak yaatra chaalu hai। karma bhi to karna hai। bhal khaao, piyo, khaana pakaao। jitna samay mile baap ko zaroor yaad karna hai। daphtar mein baithte ho, dekho phursat hai to baba ki yaad mein baith jaao। bahut kamaai hai। train mein saphar karte ho, us samay to koi kaam nahin rehta hai। baithe hue baba ko yaad karte raho। abhi ham baba ke paas jaate hain। baba paramdham se hamko lene liye aaya hai। achha, shaam ko ghar ka khaana aadi pakaate ho to bhi ek-do ko yaad dilaao - aao, ham apne baap ki yaad mein baithen। point bhi ek-do ko sunaao। ham svadarshan chakradhaari hain। baba kehte hain - tum light house bhi ho, raasta batlaate ho। uthte, baithte, chalte tum light house ho। ek aankh mein mukti, ek aankh mein jeevanmukti। svarga yahaan tha। abhi nahin hai। ab to narka hai। baba phir se svarga sthaapan kar rahe hain। baap kehte hain ham tumko bahut gul-gul banaate hain। phir tum jaakar mahaaraani, patraani banenge। khaddar ki raani nahin banna। tumhein 16 kala sampanna banna hai, na ki 14 kala। shreekrishna 16 kala tha। tum bachchiyaan kitne vrat-nem aadi rakhti thi! 7 roz nirjal rehti thi, kitni mehnat karti thi! parantu shreekrishnapuri mein ja na saken। abhi tum krishnapuri svarga mein practical mein jaane liye purushaartha kar rahe ho। shreekrishna ko dvaapar mein le jaane se svarga ka kisko pata nahin padta hai। vaastav mein 7 roz ka arth kya hai, so tum abhi jaante ho। sivaae baap ke aur koi ko yaad nahin karna hai। baaki nirjal aadi ki koi baat nahin। baba ko yaad karne se tum baba ke paas chale jaayenge। baap phir svarga mein bhej denge। vrat-nem rakh tum kitne din bhookhe marte ho! janma by janma kitni mehnat karte ho! praapti kuchh bhi nahin hui hai। abhi tumko unse chhudaae sadgati maarga mein le jaate hai। tum kehte ho - baba, kalpa pahle bhi aapse mile the svarga ka varsa lene। baap kehte hain kadam-kadam par raay lete raho। sab hisaab-kitaab poochho। baba raay dete rahenge। bhal tum apna dhandhaadhori aadi karte raho। phir bhi baba raay dete rahenge। dekhenge - yeh bahut dhandhe mein ghus pade hain to raay denge। kyon itna maatha maarte ho? kitna samay tum jiyenge। pet to ek-do roti maangata hai। unse gareeb bhi chalte to saahookaar bhi chalte hain। saahookaar log achhi reeti khaate hain phir rogi bhi bante hain। bheel log dekho kitne majboot rehte hain! aur khaate kya hain! kitna kaam karte hain! apni kutiya mein woh khush rehte hain। to is samay tumhein aur sab aashaayen chhod deni chaahiye। do roti mili, pet bhara, bas, baap ko yaad karna hai। tum ho roohaani bachche, parampita paramatma maashook ke aashik bane ho। jitna baba ko yaad karenge utna vikarma vinaash honge aur jisko yaad karte ho unse jaae milenge। kai chaahte hain saakshaatkaar ho, yeh ho। baba kehte hain ghar baithe bhi tumko ho sakta hai। shivbaaba ko yaad karne se tumko vaikuntha ka saakshaatkaar hoga, shreekrishna-puri dekhenge। yahaan to baba tumko vaikuntha ka maalik bana dete hain। sirf saakshaatkaar ki baat nahin। mere ko yaad karo kyonki main aaya hoon tumko le jaane। shivbaaba ko yaad karna hai। vahi shreekrishnapuri ka maalik banaane vaala hai। shreekrishna to nahin banaayenge। shivbaaba ko yaad karne se tumko vaikuntha ki baadshaahi milti hai। ab woh paramdham se aaya hua hai। zaroor aaye hain tab to mandir yaadgaar bana hai na। shiv ka mandir hai। shivjayanti bhi manaate hain na। parantu woh bhaarat mein kaise aate hain - yeh kisko pata nahin hain। shreekrishna ke tan mein to nahin aate। shreekrishna hota hi hai satayug mein। shiv ka bada bhaari mandir hai। shreekrishna ka itna bada nahin hai। somnaath ka mandir kitna bada hai! shreekrishna ke mandir mein raadhe-krishna ko bahut gahne dikhaate hain। shiv ke mandir mein kabhi gahne nahin dekhenge। ab woh shivbaaba to bade mahlon mein rehta nahin। rehta hai shreekrishna। baba kehte hain main mahlon mein rehta hi nahin hoon। parantu bhakti maarga mein kitna bada aaleeshaan heere-javaahron ka mandir banaaya hai! jinko shivbaaba dvaara svarga ka varsa mila hai unhon ne unka mandir itna oonch banaaya hai। yaadgaar ke liye kitna bada mandir banaaya hai! to woh khud kitne na saahookaar honge! mandir bahut achha banaate hain। baambe mein baabureenaath mein shiv ka mandir hai। lakshmi-naaraayan ka maadhav baag mein hai। baap kehte hain ham tumko svarga ka maalik banaate hain। to bhakti maarga mein tum kitna bhaari mandir banaate ho aur abhi dekho kaise jhopdi mein baitha hoon! tumhaara bhi naam baala hona hai। tum jaante ho hamaara phir mandir banega। hamaare baap shiv ke bhi bahut mandir hain, kamaal hai। jinhonne somnaath ka mandir banaaya tha, vo kitne dhanvaan honge! abhi to kitna gupta hoon! koi ko pata nahin। tum jaan gaye ho phir kaise shivbaaba ka mandir banaana padega। bhakti maarga mein aayenge। mama-baba jo pahle number mein poojya bante hain, vaikuntha ke maalik bante hain, phir pahle-pahle pujaari ban mandir bhi unko hi banaana hai। to dil mein kahenge na - ham hi pujaari ban mandir banaayenge। aisi-aisi baaton mein raman karne se phir yeh puraani duniya bhool jaayegi। aapas mein bhi aisi-aisi baaten karni chaahiye to tumko khushi bahut rahegi। apne se roohrihaan karo।

supreme rooh baith tumhaari rooh ko rijhaate hain। is gyaan se harshit banaate hain। tum kehte ho ham kalpa baad phir se aaye hain। anek baar baap se mile hain। varsa paaya hai। aise-aise aapas mein baaten karni chaahiye। phir tum karmayogi bhi ho। bhal ghar mein khaana aadi pakaao, khushi rahegi। tum 84 janmon ki history-geography ko jaante ho। ham abhi brahman bane hain phir devta ban raajya karenge। pujaari se poojya banenge। phir mahal aadi banaayenge। apni hi history-geography sunaate raho। hamaari history-geography chakra kaise lagaati hai - isko hi svadarshan chakradhaari kaha jaata hai। tum teenon lokon ko jaanne vaale ho। gyaan ka netra tumhaara khula hai। yeh chakra yaad karne se tumko badi khushi rahni chaahiye। baap ko bhi khushi rehti hai। abhi tum seva mein upasthit ho। tum sevaadhaariyon ke mandir phir baad mein bhakti maarga mein banenge। abhi main tum bachchon ki service mein aaya hoon। tumko svarga ka poora varsa dene aaya hoon। jitna jo purushaartha karenge, us anusaar svarga ke maalik banenge। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) chalte-phirte light house ban sabhi ko raasta bataana hai। sab aashaayen chhod ek baap ki yaad mein rehna hai। baap se raay lete rehna hai।

2) gyaan ki baaton mein hi raman karna hai। apne aapse baaten karni hai। svadarshan chakra phiraate sada harshit rehna hai।

vardaan:- yog ki dhoop mein aansuon ki tanki ko sukhaakar rona proof banne vaale sukh swaroop bhav

kai bachche kehte hain ki phalaana duhkh deta hai isliye rona aata hai। lekin woh dete hain aap lete kyon ho? unka kaam hai dena, aap lo hi nahin। paramatma ke bachche kabhi ro nahin sakte। rona banda। na aankhon ka rona, na man ka rona। jahaan khushi hogi vahaan rona nahin hoga। khushi va pyaar ke aansu ko rona nahin kaha jaata। to yog ki dhoop mein aansuon ki tanki ko sukha do, vighnon ko khel samjho to sukh swaroop ban jaayenge।

slogan:- saakshi rahkar part bajaane ka abhyaas ho to tension se pare svatah attention mein rahenge।