मंगलवार 6 फ़रवरी 2024 की दैनिक मुरली

06-02-2024 praatahmurli om shanti "baapdaada"' madhuban

“meethe bachche - apne haar aur jeet ki history ko yaad karo, yeh sukh aur duhkh ka khel hai, ismen 3/4 sukh hai, 1/4 duhkh hai, equal nahin''

prashn:- yeh behad ka drama bahut hi wonderful hai - kaise?

uttar:- yeh behad ka drama itna to wonderful hai jo har second saari srishti mein ho raha hai, woh phir se hoobhu repeat hoga। yeh drama joon misal chalta hi rehta hai, tik-tik hoti rehti hai। ek tik na mile doosri tik se, isliye yeh bada wonderful drama hai। jo bhi manushya ka part achha va bura chalta hai sab noondh hai। is baat ko bhi tum bachche hi samajhte ho।

om shanti। om shanti ka arth bachchon ko samjhaaya hai kyonki ab aatma-abhimaani bane ho। aatma apna parichay deti hai ham aatma hain। aatma ka svadharma hai shant। ab sabhi aatmaon ke ghar jaane ka programme hai। yeh ghar jaane ka programme kaun bataate hain? zaroor baap hi bataayega। he aatmaayen, ab puraani duniya khatma honi hai। sabhi actors aa gaye hain। baaki thodi aatmaayen rahi hain, ab sabko vaapis jaana hai। phir part repeat karna hai। tum bachche asul mein aadi sanaatan devi-devta dharma ke the, pahle-pahle satayug mein aaye the phir punarjanma lete-lete ab paraaye raajya mein aakar pade ho। yeh sirf tumhaari aatma jaanti hai aur koi nahin jaante। tum ek baap ke bachche ho। meethe-meethe bachchon ko baap kehte hain - bachche, tum ab paraaye raavan raajya mein aakar pade ho। apna raajya-bhaagya ganva baithe ho। satayug mein devi-devta dharma ke the, jisko 5 hajaar varsha hue। aadhaakalpa tumne raajya kiya kyonki seedhi neeche bhi zaroor utarna hai। satayug se treta phir dvaapar-kaliyug mein aana hai - yeh bhoolo nahin। apni haar aur jeet ki jo history hai unko yaad karo। bachche jaante hain ham satayug mein satopradhaan, sukhdhaam ke vaasi the। phir punarjanma lete-lete duhkhadhaam mein jadajdeebhoot avastha mein aa pahunche hain। ab phir tum aatmaon ko baap se shreemat milti hai kyonki aatma-paramatma alag rahe… tum bachche bahutkaal alag rahe ho। pahle-pahle tum bichhude phir sukh ka part bajaate aaye। phir tumhaara raajya-bhaagya chheena gaya। duhkh ke part mein aa gaye। ab tum bachchon ko phir se raajya bhaagya lena hai sukh-shanti ka। aatmaayen kehti hain vishwa mein shanti ho। is samay tamopradhaan hone kaaran vishwa mein ashaanti hai। yeh bhi shanti aur ashaanti, duhkh aur sukh ka khel hai। tum jaante ho 5 hajaar varsha pahle vishwa mein shanti thi। mool vatan to hai hi shantidham। jahaan aatmaayen rehti hain vahaan to ashaanti ka prashn hi nahin। satayug mein vishwa mein shanti thi phir girte-girte ashaanti ho gai। ab saare vishwa mein shanti sab chaahte hain। brahm mahtatva ko vishwa nahin kahenge। unko brahmaanda kaha jaata hai, jahaan tum aatmaayen nivaas karti ho। aatma ka svadharma hai shant। shareer se aatma alag hone se shant ho jaati hai phir doosra shareer le tab churpur kare। ab tum bachche yahaan kislie aaye ho? kehte hain - baba, apne shantidham, sukhdhaam mein le chalo। shanti athva muktidhaam mein sukh-duhkh ka part nahin hai। satayug hai sukhdhaam, kaliyug hai duhkhadhaam। utarte kaise hain? woh to seedhi mein dikhaaya hai। tum seedhi utarte ho phir ek hi baar chadhte ho। paavan ban chadhte ho aur patit ban utarte ho। paavan banne bigar chadh nahin sakte ho, isliye pukaarte hain - baba, aakar hamko paavan banaao।

tum pahle paavan shantidham mein jaakar phir sukhdhaam mein aayenge। pahle hai sukh, peechhe hai duhkh। sukh ki margin jyaada hai। equal ho phir to koi faayda hi nahin। jaise phaaltu ho jaaye। baap samjhaate hain yeh jo drama bana hua hai usmein 3/4 sukh hai, baaki 1/4 kuchh na kuchh duhkh hai, isliye isko sukh-duhkh ka khel kaha jaata hai। baap jaante hain mujh baap ko sivaae tum bachchon ke koi jaan nahin sakte। mainne hi tumko apna parichay diya hai aur srishti ke aadi-madhya-ant ka parichay diya hai। tumko naastik se aastik bana diya hai। teenon lokon ko bhi tum jaante ho। bhaaratvaasi to kalpa ki aayu bhi nahin jaante। ab tum hi jaante ho baba hamko phir se padhaate hain। baap gupta vesh mein paraaye desh mein aaye hain। baba bhi gupta hai। manushya apni deh ko jaante hain, aatma ko jaante nahin। aatma avinaashi, deh vinaashi hai। aatma aur aatma ke baap ko tumhein kabhi bhoolna nahin chaahiye। ham behad ke baap se varsa le rahe hain। varsa tab milega jab pavitra banenge। is raavan raajya mein tum patit ho isliye baap ko pukaarte ho। do baap hain। parampita paramatma sabhi aatmaon ka ek baap hai। aise nahin, brothers hi sab baap hain। jab-jab bhaarat par ati dharma glaani hoti hai, jab sabhi dharmon ka jo paarlaukik baap hai, unko bhool jaate hain, tab hi baap aate hain। yeh bhi khel hai। jo kuchh hota hai khel repeat hota rehta hai। tum aatmaayen kitna vaari part bajaane aati aur jaati ho, yeh naatak anaadi joon misal chalta rehta hai। kabhi banda nahin hota। tik-tik hoti rehti hai parantu ek tik na mile doosre se। kaisa wonderful naatak hai। second-second jo kuchh saari srishti mein hota rehta hai woh phir repeat hoga। jo har dharma ke mukhya paartadhaari hain unka bataate hain। woh sab apna-apna dharma sthaapan karte hain। raajdhaani nahin sthaapan karte hain। ek parampita paramatma dharma bhi sthaapan karte aur raajdhaani athva dynasty bhi sthaapan karte hain। woh to dharma sthaapan karte hain, unke pichhaadi sabko aana hai। sabko le kaun jaata hai? baap। koi to bahut thoda part bajaaya aur khalaas। jaise jeev jantu, nikle aur mare। unki to jaise drama mein baat hi nahin। attention kis taraph jaata hai? ek to creator taraph jaayega, jise sab kehte hain O god father, he parampita paramatma। vo sabhi aatmaon ka pita hai। pahle aadi sanaatan devi-devta dharma tha। yeh kitna bada behad ka jhaad hai। kitne mat mataantar, kitni variety cheejen nikli hui hain। ginti karna mushkil ho jaata hai। foundation hai nahin। baaki sab khade hain। baap kehte hain - meethe-meethe bachchon, main aata hi tab hoon jabki anek dharma hain, ek dharma nahin hai। foundation praayah lop hai। sirf chitra khade hain। aadi sanaatan tha hi ek dharma। baaki sab baad mein aate hain। treta mein bahut hain jo svarga mein nahin aate।

tum ab purooshaartha karte ho ham svarga nai duniya mein jaayen। baap kehte hain svarga mein tum tab aayenge jab mere ko yaad kar paavan banenge aur daiveegun dhaaran karenge। baaki jhaad ki taal-taaliyaan to anek hain। bachchon ko jhaad ka bhi pata pada hai ki ham sab aadi sanaatan devi-devtaayen svarga mein the। ab svarga hai nahin। abhi narka hai। tab baap ne prashnaavli banaai thi ki apne dil se poochho - ham satayugi svargavaasi hain ya kaliyugi narkavaasi hain? satayug se neeche kaliyug mein utarte ho? phir oopar kaise jaayenge? baap shiksha dete hain। tum tamopradhaan se satopradhaan kaise banenge? apne ko aatma samajh mujhe yaad karo to yog agni se tumhaare paap kat jaayenge। kalpa pahle bhi tumko gyaan sikhlaakar devta banaaya tha, abhi tum tamopradhaan ban pade ho। phir zaroor koi to satopradhaan banaane vaala hoga। patit-paavan koi manushya to ho na sake। he patit-paavan, he bhagwan jab kehte ho to buddhi oopar chali jaati hai। woh hai niraakaar। baaki sab hain paartadhaari। sab punarjanma lete rehte hain। main punarjanma rahit hoon। yeh drama bana hua hai, isko koi nahin jaante। tum bhi nahin jaante the। ab tumko svadarshan chakradhaari kaha jaata hai। tum apne sva aatma ke dharma mein thahro। apne ko aatma nishchay karo। baap samjhaate hain yeh srishti chakra kaise phirta hai, isliye tumhaara naam hai svadarshan chakradhaari aur koi ko yeh gyaan nahin hai। to tumko bahut khushi honi chaahiye। baap hamaara teacher bhi hai। bahut meetha baba hai। baba jaisa meetha aur koi nahin। tum paarlaukik baap ke bachche parlok mein rahne vaali aatmaayen ho। baap bhi paramdham mein rehte hain। jaise laukik baap bachchon ko janma de paalna kar pichhaadi mein sab-kuchh de jaate hain kyonki bachche vaaris hain, yeh kaayda hai। tum jo behad baap ke bachche bante ho, baap kehte hain ab sabko vaapis vaani se pare ghar jaana hai। vahaan hai silence phir movie, phir talkie। bachchiyaan sookshm vatan mein jaati hain, saakshaatkaar hota hai। aatma nikal nahin jaati। drama mein jo noondh hai woh second-second repeat hota hai। ek second na mile doosre se। jo bhi manushya ka part chalta hai, achha va bura, sab noondh hai। satayug mein achha, kaliyug mein bura part bajaate hain। kaliyug mein manushya duhkhi hote hain। raam raajya mein chhi-chhi baaten nahin hoti। raam raajya aur raavan raajya ikattha nahin hota। drama ko na jaanne kaaran kehte hain duhkh-sukh paramatma dete hain। jaise shivbaaba ka kisko pata nahin, vaise raavan ka bhi kisko pata nahin। shiv jayanti har varsha manaate hain, to raavan maranti bhi har varsha manaate hain। ab behad ka baap apna parichay de rahe hain ki apne ko aatma samajh mujh baap ko yaad karo। baap to bahut meetha hai। baba apni mahima baith thode hi karenge, jinko sukh milta hai woh mahima karte hain।

tum bachchon ko baap se varsa milta hai। baap pyaar ka saagar hai। phir satayug mein tum pyaare meethe bante ho। koi bole vahaan bhi to vikaar aadi hain, bolo vahaan raavan raajya hi nahin। raavan raajya dvaapar se hota hai। kitna achhi reeti samjhaate hain। world ki history-geography ko aur koi jaante hi nahin। is samay hi tumko samjhaate hain। phir tum devta ban jaate ho। devtaaon se oonch koi hai nahin, isliye vahaan guru karne ki darkaar nahin। yahaan to dher guru hain। satguru hai ek। sikkha log bhi kehte hain satguru akaal। akaal moorta hai hi satguru। woh kaalon ka kaal mahaakaal hai। woh kaal to ek ko le jaate hain। baap kehte hain main to sabko le jaata hoon। pavitra banaakar pahle sabko shantidham aur sukhdhaam mein le jaata hoon। agar mera bankar phir maaya ke ban jaate hain, to kaha jaata hai guru ka nindak thaur na paaye। woh svarga ka sampoorn sukh nahin pa sakenge, praja mein chale jaayenge। baap kehte hain - bachche, meri ninda nahin karaao। main tumko svarga ka maalik banaata hoon to daiveegun bhi dhaaran karne hain। kisko duhkh nahin dena। baap kehte hain main aaya hi hoon tumko sukhdhaam ka maalik banaane। baap hai pyaar ka saagar, manushya hain duhkh dene ke saagar। kaam kataari chalaakar ek-do ko duhkh dete hain। vahaan to yeh baaten hain nahin। vahaan hai hi raam raajya। yogbal se bachche paida hote hain। is yogbal se tum saare vishwa ko pavitra banaate ho। tum warriors ho parantu unknown। tum bahut naameegraami bante ho phir bhakti maarga mein tum deviyon ke kitne mandir bante hain। kehte hain amrit ka kalash maataaon ke sir par rakha। gau maata kehte hain, yeh hai gyaan। paani ki baat nahin। tum ho shiv shakti sena। woh log phir copy kar kitne guru bankar baithe hain। ab to tum sach ki naeeya mein baithe ho। gaate hain naeeya meri paar lagaao। ab khivaiya mila hai paar le jaane। veshyaalay se shivaalay mein le jaate hain। unko baagvaan bhi kehte hain, kaanton ke jangal ko phoolon ka bageecha banaate hain। vahaan sukh hi sukh hai। yahaan hai duhkh। baba ne jo parche chhapaane ke liye kaha hai usmein likha hai - apne dil se poochho svargavaasi ho ya narkavaasi? bahut prashn poochh sakte ho। sab kehte hain bhrashtaachaar hai to zaroor koi samay shreshthaachaari bhi honge! woh devtaayen the, ab nahin hain। jab devi-devta dharma praayah lop ho jaata hai to bhagwan ko aana padta hai, ek dharma ki sthaapna karne। goya tum apne liye svarga ki sthaapna kar rahe ho shreemat se। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan pyaar ka saagar banna hai। duhkh ka saagar nahin। baap ki ninda karaane vaala koi bhi karma nahin karna hai। bahut meetha pyaara banna hai।

2) yogbal se pavitra bankar phir doosron ko bhi banaana hai। kaanton ke jangal ko phoolon ka bageecha banaane ki seva karni hai। sada khushi mein rehna hai ki hamaara meetha baba baap bhi hai to teacher bhi hai। un jaisa meetha koi nahin।

vardaan:- parmaatma dulaar ko praapta karne vaale ab ke so bhavishya ke raaj dulaare bhav

sangamayug par aap bhaagyavaan bachche hi dilaaraam ke dulaar ke paatra ho। yeh parmaatma dulaar koton mein koi aatmaon ko hi praapta hota hai। is divya dulaar dvaara raaj dulaare ban jaate ho। raajdulaare arthaat ab bhi raaje aur bhavishya ke bhi raaje। bhavishya se bhi pahle ab svaraajya adhikaari ban gaye। jaise bhavishya raajya ki mahima hai ek raajya, ek dharma…aise abhi sarva karmendriyon par aatma ka ek chhatra raajya hai।

slogan:- apni soorat se baap ki seerat dikhaane vaale hi parmaatma snehi hain।