बुधवार 7 फ़रवरी 2024 की दैनिक मुरली

07-02-2024 praatahmurli om shanti "baapdaada"' madhuban

“meethe bachche - aatma-abhimaan vishwa ka maalik banaata hai, deh-abhimaan kangaal bana deta hai, isliye aatma-abhimaani bhav''

prashn:- kaun-sa abhyaas ashareeri banne mein bahut madad karta hai?

uttar:- apne ko sada actor samjho, jaise actor part poora hote hi vastra utaar dete hain, aise tum bachchon ko bhi yeh abhyaas karna hai, karma poora hote hi puraana vastra (shareer) chhod ashareeri ho jaao। aatma bhaai-bhaai hai, yeh abhyaas karte raho। yahi paavan banne ka sahaj saadhan hai। shareer ko dekhne se criminal khyaalaat chalte hain isliye ashareeri bhav।

om shanti। baap baith bachchon ko samjhaate hain kyonki bahut besmajh ban gaye hain। 5 hajaar varsha pahle bhi tumko samjhaaya tha aur daivi karma bhi sikhlaaye the। tum devi-devta dharma mein aaye the phir drama plan anusaar punarjanma lete-lete aur kalaayen kamti hote-hote yahaan practically bilkul hi nil kala ho gai hai, kyonki yeh hai hi tamopradhaan raavan raajya। yeh raavan raajya bhi pahle satopradhaan tha। phir sato, rajo, tamo bana hai। ab to bilkul hi tamopradhaan hai। ab iska ant hai। raavan raajya ko kaha jaata hai aasuri raajya। raavan ko jalaane ka fashion bhaarat mein hai। raam raajya aur raavan raajya bhi bhaaratvaasi kehte hain। raam raajya hota hi hai satayug mein। raavan raajya hai kaliyug mein। yeh badi samajhne ki baaten hain। baba ko wonder lagta hai achhe-achhe bachche poori reeti na samajhne ke kaaran apni takdeer ko lakeer laga dete hain। raavan ke avgun chatak padte hain। daivi gunon ka khud bhi varnan karte hain। baap ne samjhaaya hai tum vo hi devtaayen the। tumne hi 84 janma bhoge hain। tumko farka bataaya hai - tum kyon tamopradhaan bane ho। yeh hai raavan raajya। raavan hai sabse bada dushman, jisne hi bhaarat ko itna kangaal tamopradhaan banaaya hai। raam raajya mein itne aadmi nahin hote hain। vahaan to ek dharma hota hai। yahaan to sabmen bhooton ki praveshta hai। krodh, lobh, moh ka bhoot hai na। ham avinaashi hain, yeh shareer vinaashi hai - yeh bhool jaate hain। aatma-abhimaani bante hi nahin hain। deh-abhimaani bahut hain। deh-abhimaan aur aatma-abhimaan mein raat-din ka farka hai। aatma-abhimaani devi-devta saare vishwa ke maalik ban jaate hain। deh-abhimaan hone se kangaal ban padte hain। bhaarat sone ki chidiya tha, bhal kehte bhi hain parantu samajhte nahin hain। shivbaaba aate hain daivi buddhi banaane। baap kehte hain meethe-meethe bachchon tumko vishwa ka maalik banaata hoon, yeh lakshmi-naaraayan vishwa ke maalik the। kab suna ki inhon ko raajaai kisne di? unhonne kaun-sa aisa karma kiya jo itna oonch pad paaya? karmon ki baat hai na। manushya aasuri karma karte hain to woh karma vikarma ban jaata hai। satayug mein karma akarma hote hain। vahaan karmon ka khaata hota nahin। baap samjhaate hain na samajhne kaaran bahut vighna daalte hain। kah dete hain shiv-shankar ek hain। are, shiv niraakaar akela dikhaate hain, shankar-paarvati dikhaate hain, donon ki activity bilkul hi alag। minister aur president ko ek kaise kahenge। donon ka martaba bilkul alag hai, to shiv-shankar ko ek kaise kah dete hain। yeh jaante hain jinko raam sampradaay mein aana nahin hai ve samjhenge bhi nahin। aasuri sampradaay gaaliyaan denge, vighna daalenge kyonki unmein 5 vikaar hain na। devtaayen hain sampoorn nirvikaari। unhon ka kitna oonch pad hai। ab tum samajhte ho ham kitne vikaari the। vikaar se paida hote hain। sannyaasiyon ko bhi vikaar se paida hona hai, phir sannyaas karte hain। satayug mein yeh baaten nahin hoti। sannyaasi satayug ko samajhte bhi nahin। kah dete hain satayug hai hi hai। jaise kehte hain shreekrishna haazira hazoor hai, raadhe bhi haazira hazoor hai। anek mat-mataantar, anek dharma hain। aadhaakalpa daivi mat chalti hai jo ab tumko mil rahi hai। tum hi brahma mukh vanshaavli phir vishnu vanshi aur chandravanshi bante ho। woh donon dynasty aur ek brahman kul kahenge, inko dynasty nahin kahenge। inki raajaai hoti nahin। yeh bhi tum hi samajhte ho। tumhaare mein bhi koi-koi samajhte hain। koi to sudharte hi nahin, koi na koi bhoot hai। lobh ka bhoot, krodh ka bhoot hai na। satayug mein koi bhoot nahin। satayug mein hote hain devtaayen, jo bahut sukhi hote hain। bhoot hi duhkh dete hain, kaam ka bhoot aadi-madhya-ant duhkh deta hai। ismen bahut mehnat karni hai। maasi ka ghar nahin hai। baap kehte rehte hain bhaai-behen samjho to criminal drishti na jaaye। har baat mein himmat chaahiye। koi kah dete hain shaadi nahin karoge to niklo ghar se baahar। to himmat chaahiye। apni jaanch bhi ki jaati hai।

tum bachche bahut padmaapadma bhaagyashaali ban rahe ho। yeh sab-kuchh khatma ho jaayega। sab-kuchh mitti mein mil jaana hai। koi to achhi himmat rakh chal padte hain। koi to himmat rakh phir fail ho jaate hain। baap har baat mein samjhaate rehte hain। parantu nahin karte to samjha jaata hai poora yog nahin hai। bhaarat ka praacheen raajayog to mashhoor hai। is yog se hi tum vishwa ke maalik bante ho। padhaai hai source oph income। padhaai se hi nambarvaar tum oonch pad paate ho। bhaai-behen ke sambandh mein bhi buddhi chalaaymaan hoti hai isliye baap isse bhi oonch le jaate hain ki apne ko aatma samjho, doosre ko bhi aatma bhaai-bhaai samjho। ham sab bhaai-bhaai hain to doosri drishti jaayegi nahin। shareer ko dekhne se criminal khyaalaat aate hain। baap kehte hain - bachche, ashareeri bhav, dehi-abhimaani bhav। apne ko aatma samjho। aatma avinaashi hai। shareer se part bajaaya, phir shareer se alag ho jaana chaahiye। woh actors part poora kar kapda badli kar dete hain। tumko bhi ab puraana kapda (shareer) utaar naya kapda pahanna hai। is samay aatma bhi tamopradhaan, shareer bhi tamopradhaan hai। tamopradhaan aatma mukti mein ja nahin sakti। pavitra ho tab jaaye। apvitra aatma vaapis nahin ja sakti। yeh jhooth bolte hain ki phalaana brahm mein leen hua। ek bhi ja nahin sakte। vahaan jaise sijra bana hua hai, vaise hi rehta hai। yeh tum brahman bachche jaante ho। geeta mein braahmanon ka naam kuchh bhi dikhaaya nahin hai। yeh to samjhaate hain prajaapita brahma ke tan mein pravesh karta hoon to zaroor adoption chaahiye। woh brahman hain vikaari, tum ho nirvikaari। nirvikaari banne mein bahut sitam sahan karne padte hain। yeh naam roop dekhne se bahuton ko vikalpa aate hain। bhaai-behen ke sambandh mein bhi gir padte hain। likhte hain baba ham gir pade, kaala munh kar liya। baap kehte hain - vaah! hamne kaha bhaai-behen hokar raho, tumne phir yeh kharaab kaam kiya। uski phir badi kadi saza mil jaati hai। vaise koi kisko kharaab karte hain to unko jel mein daala jaata hai। bhaarat kitna pavitra tha jo mainne sthaapan kiya। unka naam hi hai shivaalay। yeh gyaan bhi koi mein nahin hai। baaki shaastra aadi jo hain woh sab bhakti maarga ke karmakaanda hain। satayug mein sab sadgati mein hain, isliye vahaan koi purooshaartha nahin karte। yahaan sab gati-sadgati ke liye purooshaartha karte hain kyonki durgati mein hain। ganga snaan karne jaate hain to ganga ka paani sadgati dega kya? woh paavan banaayega kya? kuchh bhi jaante nahin। tumhaare mein bhi nambarvaar hain। koi to khud nahin samajhte to doosron ko kya samjhaayenge, isliye baba bhejta nahin। gaate rehte hain - baba aap aayenge to aapki shreemat par chalkar devta banenge। devtaayen rehte hain satayug aur treta mein। yahaan to sabse jaasti kaam vikaar mein phanse hue hain। kaam vikaar bigar rah nahin sakte। yeh vikaar hai jaise maai-baap ka varsa। yahaan tumko milta hai raam ka varsa। pavitrata ka varsa milta hai। vahaan vikaar ki baat nahin hoti।

bhakta log kehte hain shreekrishna bhagwan hai। tum unko 84 janmon mein dikhaate ho। are, bhagwan to niraakaar hai। unka naam shiv hai। baap kitna achhi reeti samjhaate hain। taras bhi padta hai। merciful hai na। yeh kitna achhe samajhdaar bachche hain। bhabhka bhi achha hai। jismen gyaan aur yog ki taakat hai to woh kashish karte hain। padhe-likhe ko satkaar achha milta hai। anapdhe ko satkaar nahin milta hai। yeh to jaante ho is samay sab aasuri sampradaay hain। kuchh bhi samajhte nahin hain। shiv aur shankar ka antar to bilkul clear hain। woh hai mool vatan mein, woh sookshm vatan mein, sab ek jaise kaise honge? yeh to tamopradhaan duniya hai। raavan dushman hai aasuri sampradaay ka, jo aap samaan bana deta hai। ab baap tumko aap samaan daivi sampradaay banaate hain। vahaan raavan hota nahin। aadhaakalpa unko jalaate hain। raam raajya hota hai satayug mein। gaandhi ji raam raajya chaahte the lekin woh raam raajya kaise sthaapan kar sakte? woh koi aatma-abhimaani banne ki shiksha nahin dete the। baap hi sangam par kehte hain aatma-abhimaani bano। yeh hai uttam banne ka yug। baap kitna pyaar se samjhaate rehte hain। ghadi-ghadi kitna pyaar se baap ko yaad karna chaahiye - baba aapki to kamaal hai। ham kitne patthar buddhi the, aap hamko kitna oonch banaate hain! aapki mat bigar ham aur kiski mat par nahin chalenge। pichhaadi ko sab kahenge barobar brahmaakumaar-kumaariyaan to daivi mat par chal rahe hain। kitni achhi-achhi baaten sunaate hain। aadi-madhya-ant ka parichay dete hain। character sudhaarte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) drishti ko shuddh pavitra banaane ke liye kisi ke bhi naam roop ko na dekh ashareeri banne ka abhyaas karna hai। svayan ko aatma samajh, aatma bhaai se baat karni hai।

2) sarva ka satkaar praapta karne ke liye gyaan-yog ki taakat dhaaran karni hai। daiveegunon se sampanna banna hai। character sudhaarne ki seva karni hai।

vardaan:- beemaari conscious ke bajaae khushi-khushi se hisaab-kitaab chuktu karne vaale soul conscious bhav

tan to sabke puraane hain hi। har ek ko koi na koi chhoti badi beemaari hai। lekin tan ka prabhaav agar man par aa gaya to double beemaar ho beemaari conscious ho jaayenge isliye man mein kabhi bhi beemaari ka sankalp nahin aana chaahiye, tab kahenge soul conscious। beemaari se kabhi ghabraao nahin। thoda sa davaai roopi fruit khaakar use vidaai de do। khushi-khushi se hisaab-kitaab chuktu karo।

slogan:- har gun, har shakti ka anubhav karna arthaat anubhvi moorta banna।