बुधवार 21 फ़रवरी 2024 की दैनिक मुरली

21-02-2024 praatahmurli om shanti "baapdaada"' madhuban

“meethe bachche - gyaan ki talvaar mein yog ka jauhar chaahiye tab hi vijay hogi, gyaan mein yog ka jauhar hai to uska asar zaroor hoga''

prashn:- tum khuda ke paigambar ho, tumhein saari duniya ko kaun-sa paigaam dena hai?

uttar:- saari duniya ko paigaam do ki khuda ne kaha hai - tum sab apne ko aatma samjho, deh-abhimaan chhodo, ek mujh baap ko yaad karo to tumhaare sir se paapon ka bojha utar jaayega। ek baap ki yaad se tum paavan ban jaayenge। antarmukhi bachche hi aisa paigaam sabhi ko de sakte hain।

om shanti। baap ne samjhaaya hai ki koi bhi manushya maatra, phir chaahe daivi gun vaala ho ya aasuri gun vaala ho, unko bhagwan nahin kah sakte। yeh to bachche jaante hain - daiveegun vaale hote hain satayug mein, aasuri gun vaale hote hain kaliyug mein isliye baba ne likhat bhi banaai hai ki daiveegun vaale ho ya aasuri gun vaale? satayugi ho ya kaliyugi? yeh baaten badi mushkil se manushyon ko samajh mein aati hain। tum seedhi par bahut achhi reeti samjha sakte ho। tumhaare gyaan ke baan bahut achhe hain, parantu usmein jauhar chaahiye। jaise talvaar mein bhi jauhar hota hai। koi bahut teekhe jauhar vaale hote hain। jaise guru govindasinh ki talvaar vilaayat chali gai। us talvaar ko lekar parikrama dete hain। bahut saaph rakhte hain। koi do paise ki talvaar bhi hoti hai, jismen jauhar hota hai, woh bahut teekhi hoti hai। unka daam bahut hota hai। bachchon mein bhi aise hain। koi mein gyaan bahut hai, yog ka jauhar kam hai। jo baandhele hain, gareeb hain woh shivbaaba ko bahut yaad karte hain। unmein gyaan kam hai, yog ka jauhar bahut hai। woh tamopradhaan se satopradhaan ban rahe hain। jaise ek arjun-bheel ka bhi misaal dikhaate hain। arjun se bhi bheel teekha ho gaya - baan maarne mein। arjun arthaat jo ghar mein rehte hain, roz sunte hain। unse baahar rahne vaale teekhe ho jaate hain। jinmen gyaan ka jauhar hai unke aage woh bhari dhote hain। kahenge bhaavi। koi fail hote hain va devaala maarte hain to naseeb par haath rakhte hain। gyaan ke saath yog ka jauhar bhi zaroor chaahiye। jauhar nahin to goya kukkad-gyaani hain। bachche bhi feel karte hain। koi ka pati mein, koi ka kismen pyaar hota hai। gyaan mein bahut teekhe hote lekin andar khitkhit rehti hai। yahaan to bilkul saadhaaran rehna hai।

sab-kuchh dekhte hue jaise dekhte hi nahin। ek baap se hi preet hai। tab to gaaya jaata hai kam kaar de… office aadi mein kaam karte bhi buddhi mein yaad rahe ki main aatma hoon। baba ne pharmaan kiya hai ki mujhe yaad karte raho। bhakti maarga mein bhi kaamkaaj karte koi na koi ishta devta ko yaad karte rehte hain। woh to hai patthar ka but। unmein aatma to hai nahin। lakshmi-naaraayan bhi pooje jaate hain। woh bhi patthar ki moorti hai na। bolo inki aatma kahaan hai? ab tum samajhte ho zaroor koi naam-roop mein hai। ab tum phir yogbal se paavan devta ban rahe ho। em object bhi hai। doosri baat, baap samjhaate hain gyaan saagar aur gyaan gangaayen is purushottam sangamayug par hi hote hain। bas, ek hi samay par hote hain। gyaan saagar aate hi hain kalpa ke is purushottam sangamayug par। gyaan saagar hai niraakaar parampita paramatma shiv। unko shareer zaroor chaahiye, jo baat bhi kar sake। baaki paani ki to baat hi nahin। yeh tumko gyaan milta hi hai sangamayug par। baaki sabke paas hai bhakti। bhakti maarga vaale ganga ke paani ko bhi poojte rehte hain। patit-paavan to ek hi baap hai। woh aate hi ek baar hain, jab puraani duniya badalni hai। ab yeh kisko samjhaane mein buddhi bhi chaahiye। ekaanta mein vichaar saagar manthan karna pade। kya likhen jo manushya samajh jaayen ki gyaan saagar parampita paramatma ek shiv hi hain। woh jab aate hain unke bachche jo brahmaakumaar-kumaariyaan bante hain, woh gyaan dhaaran kar gyaan gangaayen bante hain। anek gyaan gangaayen hain jo gyaan sunaate rehte hain। vo hi sadgati kar sakte hain। paani mein snaan karne se paavan nahin ban sakte। gyaan hota hi hai sangam par। yeh samjhaane ki yukti chaahiye। bada antarmukh chaahiye। shareer ka bhaan chhod apne ko aatma samajhna hai। is samay kahenge ham purushaarthi hain, yaad karte-karte jab paap khatma honge tab ladaai shuru hogi, jab tak sabko paigaam mil jaaye। paigaam athva message to shivbaaba hi dete hain। khuda ko paigambar kehte hain na। tum sabko yeh paigaam pahunchaate ho ki apne ko aatma samajh parampita paramatma ke saath yog lagaao to baap pratigya karte hain ki tumhaare janma-janmaantar ke paap kat jaayenge। yeh to baap brahma mukh se baith samjhaate hain। paani ki ganga kya samjhaayegi। behad ka baap behad ke bachchon ko samjhaate hain - tum satayug mein kitne sukhi sampattivaan the, abhi duhkhi kangaal ban pade ho। yeh hai behad ki baat। baaki yeh chitra aadi sab bhakti maarga ke hain। yeh bhaktimaarga ki saamagri bhi banni hai। shaastra padhna, pooja karna yeh bhakti hai na। main thode hi shaastra aadi padhaata hoon। main to tum patiton ko paavan banaane ke liye gyaan sunaata hoon ki apne ko aatma samjho। abhi aatma aur shareer donon hi patit hain। ab baap ko yaad karo to tum yeh devta ban jaayenge। deh ke sarva puraane sambandhiyon se mamatva mit jaaye। gaate bhi hain aap aayenge to ham aur koi ki nahin sunenge, ek aap se hi sab sambandh jodenge aur sab dehdhaariyon ko bhool jaayenge। ab baap tumko apna vaayda yaad karaate hain। baap kehte hain mere saath yog lagaane se hi tumhaare vikarma vinaash honge। tum nai duniya ke maalik ban jaayenge। yeh hai em object। raajaaon ke saath praja bhi zaroor banni hai। raajaaon ko daas-daasiyaan bhi chaahiye। baap sab baaten samjhaate rehte hain। achhi tarah yog mein nahin rahenge, daivi gun dhaaran nahin karenge to oonch pad kaise paayenge? ghar mein koi na koi baat par jhagda kalah hoti hai na। baap likh dete hain tumhaare ghar mein kalah hai isliye gyaan thaharta nahin। baba poochhte hain stri purush donon theek chalte hain? chalan badi achhi chaahiye। krodh ka ansh bhi na rahe। ab to duniya mein kitna hangaama aur ashaanti hai। tumhaare mein bahut gyaan-yog mein teekhe ho jaayenge to aur bhi bahut yaad karne lag padenge। tumhaari practice bhi achhi ho jaayegi aur buddhi bhi vishaal ho jaayegi।

baba ko chhote chitra itne pasanda nahin aate hain। sab bade-bade chitra hon। baahar mukhya sthaanon par rakho। jaise naatak ke bade-bade chitra rakhte hain na। achhe-achhe chitra banaao jo bilkul kharaab na hon। seedhi bhi bahut badi-badi banaakar aisi jagah rakho jo sabki nazar pade। seat par hi rang aadi aisa majboot ho jo paani va dhoop mein kharaab na ho। mukhya sthaanon par rakh do ya kahaan exhibition hoti hai to mukhya bade do teen chitra hi kaaphi hain। yeh gola bhi vaastav mein deevaar jitna banna chaahiye। bhal 8-10 aadmi uthaakar rakhen। koi bhi door se dekhe to ekdam clear maaloom pad jaaye। satayug mein to aur sab itne dharma hote nahin। woh to aate hi baad mein hain। pahle to svarga mein bahut thode manushya hote hain। ab svarga hai ya narka - tum is par bahut achhi tarah samjha sakte ho। jo aaye unko samjhaate raho। bade-bade chitra hon। kaise paandavon ke bade-bade but banaate hain। tum bhi paandav ho na।

shivbaaba to sangam par padhaate hain। woh shreekrishna hai satayug ka first prince, tum samjhaate-samjhaate apni raajaai sthaapan kar lete ho। koi padhte-padhte chhod dete hain। school mein bhi koi nahin padh sakte hain to padhaai chhod dete hain। yahaan bhi bahut hain jinhonne padhaai ko chhod diya hai phir woh svarga mein nahin aayenge kya? main vishwa ka maalik, mere se koi do akshar bhi sunen to bhi svarga mein zaroor aayenge। aage chalkar dher sunenge। yeh saari raajdhaani sthaapan hoti hai, kalpa pahle misal। bachche samajhte hain hamne anek baar raajya liya hai, phir ganvaaya hai। heere jaisa the phir kaudi jaisa bane hain। bhaarat heere misal tha। abhi phir kya hua hai? bhaarat to vo hi hoga na। is sangam ko purushottam yug kaha jaata hai। uttam se uttam purush bhi hain। baaki sab hain kanishta। jo poojya the vahi phir pujaari bane hain। 84 janma lete hain। woh shareer bhi khatma ho gaye, aatma bhi tamopradhaan ho gai। jab satopradhaan hain tab to poojte hi nahin। chaitanya mein hain। ab tum shivbaaba ko chaitanya mein yaad karte ho। phir pujaari banenge to patthar ko poojenge। ab baba chaitanya hai na। phir unki hi patthar ki moorti banaakar poojte rehte hain। raavan raajya mein bhakti shuru hoti hai। aatmaayen vo hi hain, bhinna-bhinna shareer dhaaran karti aayi hain। neeche girne se hi bhakti shuru hoti hai। baba phir aakar gyaan dete hai to din shuru ho jaata hai। brahman so devta ban jaate hain। ab to devta nahin kahenge। brahma to satayug mein hota nahin। yahaan brahma tapasya kar rahe hain। manushya hai na। shivbaaba ko shiv hi kaha jaata hai। inmen hai to bhi shiv-baba kahenge। doosra koi naam nahin rakha jaata, inmen shivbaaba aate hain। woh gyaan ka saagar hai, is brahma tan dvaara gyaan dete hain। to chitra aadi bhi badi samajh se banaane hain। ismen likhat hi kaam mein aati hai। patit-paavan paani ka saagar ya paani ki nadiyaan hain? va gyaan saagar aur unse nikli hui gyaan gangaayen brahmaakumaar-kumaariyaan hain? inko hi baap gyaan dete hain। brahma dvaara jo brahman bante hain vo hi phir devta bante hain। viraat roop ka chitra bhi bahut bada dikhaana hai। yeh hai mukhya chitra।

baba samjhaate hain - meethe bachche, tumhein apni civil buddhi banaani hai। jab baba dekhte hain ki inki criminal aai hai to samajh jaate hain yeh chal nahin sakenge। tumhaari aatma ab trikaaldarshi banti hai, yeh koi virla samajhte hain। bahut buddhu hain। baap ko phaarakti de dete hain। yeh to bachche samajhte hain ki raajdhaani sthaapan ho rahi hai। usmein sab chaahiye। pichhaadi mein sab saakshaatkaar honge। first class daas-daasiyaan bhi banengi। first class daasi krishna ki paalna karegi। bartan saaph karne vaali, khaana khilaane vaali, saphaai karne vaali sab hongi। yahaan se hi niklengi। first number vaali zaroor achha pad paayegi। woh bhaasna aati hai। baba ko bachchon se bhaasna aati hai yeh bahut achhi murli chalaate hain, parantu yog kam hai। koi stri, purush se bhi teekhi ho jaati hai। ek gyaan mein hai, kehte hain baba doosra pahiya theek nahin hai। ek-do ko saavdhaan karna hai। pravritti maarga hai na। jodi ek jaisi chaahiye। aap samaan banaana hai। pichhaadi mein tum duniya ko hi bhool jaayenge। samajhte ho na ki ham hans hain, yeh bagula hai। kismen koi avgun, kismen koi। chataabheti bhi chalti hai। mehnat bahut hai। hai bhi bahut sahaj। second mein jeevanmukti। bigar kaudi kharcha oonch se oonch pad pa sakte hain। gareeb jo hain woh achhi service karte rehte hain। yeh to pata hai na ki kaun-kaun khaali haath aaye hain। bahut kuchh le aane vaale aaj hain nahin aur gareeb bahut oonch martaba pa rahe hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan talvaar mein yaad ka jauhar bharne ke liye karma karte antarmukhi ban abhyaas karna hai ki main aatma hoon। mujh aatma ko baap ka pharmaan hai ki nirantar mujhe yaad karo। ek baap se sachchi preet rakho। deh aur deh ke sambandhiyon se mamatva nikaal do।

2) pravritti mein rehte ek-do ko saavdhaan kar hans ban oonch pad lena hai। krodh ka ansh bhi nikaal dena hai, apni civil buddhi banaani hai।

vardaan:- saakshi ho karmendriyon se karma karaane vaale kartaapan ke bhaan se mukta, ashareeri bhav

jab chaaho shareer mein aao aur jab chaaho ashareeri ban jaao। koi karma karna hai to karmendriyon ka aadhaar lo lekin aadhaar lene vaali main aatma hoon, yeh nahin bhoole, karne vaali nahin hoon, karaane vaali hoon। jaise doosron se kaam karaate ho to us samay apne ko alag samajhte ho, vaise saakshi ho karmendriyon se karma karaao, to kartaapan ke bhaan se mukta ashareeri ban jaayenge। karma ke beech-beech mein ek do minute bhi ashareeri hone ka abhyaas karo to last samay mein bahut madad milegi।

slogan:- vishwa raajan banna hai to vishwa ko sakaash dene vaale bano।