गुरुवार 22 फ़रवरी 2024 की दैनिक मुरली

22-02-2024 praatahmurli om shanti "baapdaada"' madhuban

“meethe bachche - is shareer se jeete ji marne ke liye abhyaas karo - ‘main bhi aatma, tum bhi aatma' - is abhyaas se mamatva nikal jaayega''

prashn:- sabse oonchi manzil kaun-si hai? us manzil ko praapta karne vaalon ki nishaani kya hogi?

uttar:- sabhi dehdhaariyon se mamatva toot jaae, sada bhaai-bhaai ki smriti rahe-yahi hai oonchi manzil। is manzil par vahi pahunch sakte hain jo nirantar dehi-abhimaani banne ka abhyaas karte hain। agar dehi-abhimaani nahin to kahin na kahin phansate rahenge ya apne shareer mein ya kisi na kisi mitra sambandhi ke shareer mein। unhein koi ki baat achhi lagegi ya koi ka shareer achha lagega। oonchi manzil par pahunchne vaale jisma (deh) se pyaar kar nahin sakte। unka shareer ka bhaan toota hua hoga।

om shanti। roohaani baap roohaani bachchon ko kehte hain - dekho, main tum sabhi bachchon ko aapasmaan banaane aaya hoon। ab baap aap samaan banaane kaise aayenge? woh hai niraakaar, kehte hain main niraakaar hoon tum bachchon ko aapasmaan arthaat niraakaari banaane, jeete ji marna sikhlaane aaya hoon। baap apne ko bhi aatma samajhte hain na। is shareer ka bhaan nahin hai। shareer mein rehte hue bhi shareer ka bhaan nahin hai। yeh shareer unka to nahin hai na। tum bachche bhi is shareer ka bhaan nikaal do। tum aatmaon ko hi mere saath chalna hai। yeh shareer jaise mainne loan liya hai, vaise aatmaayen bhi loan leti hain part bajaane liye। tum janma-janmaantar shareer lete aaye ho। ab jaise main jeete ji is shareer mein hoon parantu hoon to nyaara arthaat mara hua। marna shareer chhodne ko kaha jaata hai। tumko bhi jeete ji is shareer se marna hai। main bhi aatma, tum bhi aatma। tumko bhi mere saath chalna hai ya yahaan hi baithna hai? tumhaara is shareer mein janma-janmaantar ka moh hai। jaise main ashareeri hoon, tum bhi jeete ji apne ko ashareeri samjho। hamko ab baba ke saath jaana hai। jaise baba ka yeh puraana shareer hai, tum aatmaon ka bhi yeh puraana shareer hai। puraani jutti ko chhodna hai। jaise mera ismen mamatva nahin hai, tum bhi is puraani jutti se mamatva nikaalo। tumko mamatva rakhne ki aadat padi hui hai। hamko aadat nahin hai। main jeete ji mara hua hoon। tumko bhi jeete ji marna hai। mere saath chalna hai to ab yeh practice karo। shareer ka kitna bhaan rehta hai, baat mat poochho! shareer rogi ho jaata hai to bhi aatma usko chhodti nahin hai, isse mamatva nikaalna pade। hamko to baba ke saath jaana zaroor hai। apne ko shareer se nyaara samajhna hai। isko hi jeete ji marna kaha jaata hai। apna ghar hi yaad rehta hai। tum janma-janmaantar se is shareer mein rehte aaye ho isliye tumko mehnat karni padti hai। jeete ji marna padta hai। main to ismen aata hi tempory hoon। to markar chalne se arthaat apne ko aatma samajhkar chalne se koi bhi dehdhaari mein mamatva nahin rahega। aksar karke kisi na kisi ka kisi mein moh ho jaata hai। bas, unko dekhne bigar rah nahin sakte। yeh dehdhaari ki yaad ek-dam uda deni chaahiye kyonki bahut badi manzil hai। khaate-peete jaise ki is shareer mein hoon hi nahin। yeh avastha pakki karni hai tab 8 ratnon ki maala mein aa sakte hain। mehnat bigar thode hi oonch pad mil sakta hai। jeete ji dekhte hue samjhen ki main to vahaan ka rahne vaala hoon। jaise baba ismen tempory baitha hai, aise ab hamko bhi ghar jaana hai। jaise baba ka mamatva nahin hai, vaise hamko bhi ismen mamatva nahin rakhna hai। baap ko to is shareer mein baithna padta hai, tum bachchon ko samjhaane liye।

tumko ab vaapis chalna hai isliye koi dehdhaari mein mamatva na rahe। yeh phalaani bahut achhi hai, meethi hai - aatma ki buddhi jaati hai na। baap kehte hain shareer ko nahin, aatma ko dekhna hai। shareer ko dekhne se tum phans marenge। badi manzil hai। tumhaara bhi janma-janmaantar ka puraana mamatva hai। baba ka mamatva nahin hai tab to tum bachchon ko sikhlaane aaya hoon। baap khud kehte hain main to is shareer mein nahin phansata hoon, tum phanse hue ho। main tumko chhudaane aaya hoon। tumhaare 84 janma poore hue, ab shareer se bhaan nikaalo। dehi-abhimaani hokar na rahne se tum kahin na kahin phansate rahenge। koi ki baat achhi lagegi, koi ka shareer achha lagega, to ghar mein bhi unki yaad aati rahegi। jisma par pyaar hoga to haar kha lenge। aise bahut kharaab ho jaate hain। baap kehte hain stri-purush ka sambandh chhod apne ko aatma samjho। yeh bhi aatma, ham bhi aatma। aatma samajhte-samajhte shareer ka bhaan nikalta jaayega। baap ki yaad se hi vikarma bhi vinaash honge। is baat par tum achhi tarah se vichaar saagar manthan kar sakte ho। vichaar saagar manthan karne bigar tum uchhal nahin sakenge। yeh pakka hona chaahiye ki hamko baap ke paas jaana hai zaroor। mool baat hai yaad ki। 84 ka chakra poora hua phir shuru hona hai। is puraani deh se mamatva nahin hataaya to phans padenge ya apne shareer mein ya koi mitra-sambandhi ke shareer mein। tumko to kisse bhi dil nahin lagaani hai। apne ko aatma samajh baap ko yaad karna hai। ham aatma bhi niraakaar, baap bhi niraakaar, aadha-kalpa tum bhakti maarga mein baap ko yaad karte aaye ho na। ‘he prabhu' kahne se shivling hi saamne aayega। koi dehdhaari ko ‘he prabhu' kah na sake। sabhi shiv ke mandir mein jaate hain, unko hi paramatma samajh poojte hain। oonche se ooncha bhagwan ek hi hai। oonche se ooncha arthaat paramdham mein rahne vaala। bhakti bhi pahle avyabhichaari hoti hai ek ki। phir vyabhichaari ban jaati hai। to baap baar-baar bachchon ko samjhaate hain ki tumko oonch pad paana hai to yeh practice karo। deh ka bhaan chhodo। sannyaasi bhi vikaaron ko chhodte hain na। aage to satopradhaan the abhi to woh bhi tamopradhaan ban pade hain। satopradhaan aatma kashish karti hai, apvitra aatmaon ko kheenchati hai kyonki aatma pavitra hai। bhal punarjanma mein aate hain to bhi pavitra hone ke kaaran kheenchate hain। kitne unhon ke followers bante hain। jitni pavitrata ki jaasti taakat, utne jyaada followers। yeh baap to hai hi ever pure aur hai bhi gupta। double hai na, taakat saari unki hai। inki (brahma ki) nahin। shuru mein bhi tumko usne kashish ki। is brahma ne nahin kyonki woh to ever pure hai। tum koi inke pichhaadi nahin bhaage। yeh kehte hain main to sabse jaasti poore 84 janma pravritti maarga mein raha। yeh to tumko kheench na sake। baap kehte hain mainne tumko kheencha। bhal sannyaasi pavitra rehte hain। parantu mere jaisa pavitra to koi bhi hoga nahin। woh to sab bhakti maarga ke shaastra aadi sunaate hain। main aakar tumko sab vedon shaastron ka saar sunaata hoon। chitra mein bhi dikhaaya hai vishnu ki naabhi se brahma nikla phir brahma ke haath mein shaastra dikhaaye hain। ab vishnu to brahma dvaara shaastron ka saar sunaate nahin hain। vo to vishnu ko bhi bhagwan samajh lete hain। baap samjhaate hain main in brahma dvaara sunaata hoon। main vishnu dvaara thode hi samjhaata hoon। kahaan brahma, kahaan vishnu। brahma so vishnu bante hain phir 84 janma ke baad yeh sangam hoga। yeh to nai baaten hain na। kitni wonderful baaten hain samjhaane ki।

ab to baap kehte hain - bachche, jeete ji marna hai। tum shareer mein jeete ho na। samajhte ho ham aatma hain, ham baba ke saath chale jaayenge। yeh shareer aadi kuchh bhi le nahin jaana hai। ab baba aaya hai, kuchh to nai duniya mein transfer kar den। manushya daan-punya aadi karte hain doosre janma mein paane ke liye। tumko bhi nai duniya mein milna hai। yeh bhi karenge vahi jinhonne kalpa pahle kiya hoga। kam jaasti kuchh bhi hoga nahin। tum saakshi hokar dekhte rahenge। kuchh kahne ki bhi darkaar nahin rehti। phir bhi baap samjhaate hain jo kuchh karte hain to uska bhi ahankaar nahin aana chaahiye। ham aatma yeh shareer chhodkar jaayenge। vahaan nai duniya mein jaakar naya shareer lenge। gaaya bhi jaata hai raam gayo raavan gayo… raavan ka parivaar kitna bada hai। tum to mutthi bhar ho। yeh saara raavan sampradaay hai। tumhaara raam sampradaay kitna thoda hoga - 9 laakh। tum dharti ke sitaare ho na। maa-baap aur tum bachche। to baap baar-baar bachchon ko samjhaate hain ki marjeeva banne ki koshish karo। agar kisko dekhkar buddhi mein aata hai - yeh bahut achhi hai, bahut meetha samjhaati hai, yeh bhi maaya ka vaar hota hai, maaya lalcha deti hai। unki takdeer mein nahin hai to maaya saamne aa jaati hai। kitna bhi samjhaao to gussa lagega। yeh nahin samajhte hain ki yeh deh-abhimaan hi kaam kara raha hai। agar jyaada samjhaate hain to toot padte hain isliye pyaar se chalaana padta hai। kisse dil lag jaata hai to baat mat poochho, paagal ho jaate hain। maaya ekdam besmajh bana deti hai isliye baap kehte hain kabhi koi ke naam-roop mein nahin phansana। main aatma hoon aur ek baap jo videhi hai, unse hi pyaar rakhna hai। yahi mehnat hai। koi bhi deh mein mamatva na ho। aise nahin, ghar mein baithe bhi woh gyaan dene vaali yaad aati rahe - badi meethi hai, bahut achha samjhaati hai। are, meetha to gyaan hai। meethi aatma hai। shareer thode hi meetha hai। baat karne vaali bhi aatma hai। kabhi bhi shareer par aashik nahin hona hai।

aajkal to bhakti maarga bahut hai। aanandamai maa ko bhi maa-maa karte yaad karte rehte hain। achha, baap kahaan hai? varsa baap se milna hai ya maa se? maa ko bhi paisa kahaan se milega? sirf maa-maa kahne se jara bhi paap nahin katenge। baap kehte hain maamekam yaad karo। naam roop mein nahin phansana hai, aur hi paap ho jaayega kyonki baap ka naapharmaanbardaar bante ho। bahut bachche bhoole hue hain। baap samjhaate hain main tum bachchon ko lene aaya hoon so zaroor le jaaoonga, isliye mere ko yaad karo। ek mujhe yaad karne se hi tumhaare paap katenge। bhakti maarga mein bahuton ko yaad karte aaye ho। parantu baap bigar koi kaam kaise hoga। baap thode hi kehte hain maa ko yaad karo। baap to kehte hain mujhe yaad karo। patit-paavan main hoon। baap ke direction par chalo। tum bhi baap ke direction par auron ko samjhaate raho। tum thode hi patit-paavan thahre। yaad ek ko hi karna hai। hamaara to ek baap, doosra na koi। baba ham aap par hi vaari jaayenge। vaari jaana to shivbaaba par hi hai aur sabki yaad chhoot jaani chaahiye। bhakti maarga mein to bahuton ko yaad karte rehte hain। yahaan to ek shivbaaba, doosra na koi। phir bhi koi apni chalaate hain to kya gati-sadgati hogi! moonjh padte hain - bindi ko kaise yaad karen? are, tumko apni aatma yaad hai na ki main aatma hoon। woh bhi bindi roop hi hai। to tumhaara baap bhi bindi hai। baap se varsa milta hai। maa to phir bhi deh-dhaari ho jaati hai। tumko videhi se hi varsa milna hai isliye aur sab baaten chhod ek se buddhiyog lagaana hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shareer ka bhaan khatma karne ke liye chalte-phirte abhyaas karna hai-jaise ki is shareer se mare hue hain, nyaare hain। shareer mein hain hi nahin। bigar shareer aatma ko dekho।

2) kabhi bhi kisi ke shareer par tumhein aashik nahin hona hai। ek videhi baap se hi pyaar rakhna hai। ek se hi buddhiyog lagaana hai।

vardaan:- seva aur sva purushaartha ke balance dvaara blessing praapta karne vaale karmayogi bhav

karmayogi arthaat karma ke samay bhi yog ka balance ho। seva arthaat karma aur sva purushaartha arthaat yogayukta - in donon ka balance rakhne ke liye ek hi shabd yaad rakho ki baap karaavanhaar hai aur main aatma karanhaar hoon। yeh ek shabd balance bahut sahaj banaayega aur sarva ki blessing milegi। jab karanhaar ke bajaae apne ko karaavanhaar samajh lete ho to balance nahin rehta aur maaya apna chance le leti hai।

slogan:- nazar se nihaal karne ki seva karni hai to baapdaada ko apni nazron mein sama lo।