गुरुवार 4 अप्रैल 2024 की दैनिक मुरली

04-04-2024 praatahmurli om shanti "baapdaada"' madhuban

“meethe bachche - grihastha vyavhaar mein rehte paarlaukik baap se poora varsa lena hai, to apna sab kuchh exchange kar do, yeh bahut bada vyaapaar hai''

prashn:- drama ka gyaan kis baat mein tum bachchon ko bahut madad karta hai?

uttar:- jab shareer ki koi beemaari aati hai to drama ka gyaan bahut madad karta hai kyonki tum jaante ho yeh drama hoobhu repeat hota hai। ismen rone peetne ki koi baat nahin। karmon ka hisaab-kitaab chuktu hona hai। 21 janmon ke sukh ki bhent mein yeh duhkh kuchh bhi bhaasta nahin। gyaan poora nahin to tadaphte hain।

om shanti। bhagvaanuvaach। bhagwan unko kaha jaata hai jisko apna shareer nahin hai। aise nahin ki bhagwan ka naam, roop, desh, kaal nahin hai। nahin, bhagwan ko shareer nahin hai। baaki sab aatmaon ko apna-apna shareer hai। ab baap kehte hain meethe-meethe roohaani bachche, apne ko aatma samajhkar baitho। vaise bhi aatma hi sunti hai, part bajaati hai, shareer dvaara karma karti hai। sanskaar aatma le jaati hai। achhe bure karmon ka phal bhi aatma hi bhogti hai, shareer ke saath। bigar shareer ke to koi bhogna bhog nahin sakti isliye baap kehte hain apne ko aatma samajh baitho। baba hamko sunaate hain। ham aatma sun rahi hain is shareer dvaara। bhagvaanuvaach manmanaabhav। deh sahit deh ke sab dharmon ko tyaag apne ko aatma samajh baap ko yaad karo। yeh ek hi baap kehte hain, jo geeta ka bhagwan hain। bhagwan maana hi janma-maran rahit। baap samjhaate hain - mera janma alaukik hai। aur koi aise janma nahin lete hain, jaise main inmen pravesh karta hoon। yeh to achhi reeti yaad karna chaahiye। aise nahin, sab kuchh bhagwan karta hai, poojya-pujaari, thikkar-bhittar paramatma hai। 24 avtaar, kachchha-machchha avtaar, parshuraam avtaar dikhaate hain। abhi samajh mein aata hai ki kya bhagwan baith parshuraam avtaar lenge aur kulhaada lekar hinsa karenge! yeh wrong hai। jaise paramatma ko sarvavyaapi kah diya hai, aise kalpa ki aayu laakhon varsha likh di hai, isko kaha jaata hai ghor andhiyaara arthaat gyaan nahin hai। gyaan se hota hai sojhra। ab agyaan ka ghor andhiyaara hai। ab tum bachche ghor sojhre mein ho। tum sabko achhi reeti jaante ho। jo nahin jaante hain woh pooja aadi karte rehte hain। tum sabko jaan gaye ho isliye tumko pooja karne ki darkaar nahin। tum abhi pujaareepan se mukta hue। poojya devi-devta banne ke liye tum purooshaartha kar rahe ho। tum hi poojya devi-devta the phir pujaari manushya bane ho। manushya mein hain aasuri gun isliye gaayan hai - manushya ko devta banaaya। manushya ko devta kiye karat na laagi vaar… ek second mein devta bana dete hain। baap ko pahchaana aur shivbaaba kahne laga। baba kahne se dil mein aata hai ki ham vishwa ke, svarga ke maalik bante hain। yeh hai behad ka baap। abhi tum phat se aakar paarlaukik baap ke bane ho। baap phir kehte hain grihastha vyavhaar mein rehte hue ab paarlaukik baap se varsa le lo। laukik varsa to tum lete aaye ho, ab laukik varse ko paarlaukik varse ke saath exchange karo। kitna achha vyaapaar hai! laukik varsa kya hoga? yeh hai behad ka varsa, so bhi gareeb jhat le lete hain। gareebon ko adopt karte hain। baap bhi gareeb nivaaz hai na। gaayan hai main gareeb nivaaz hoon। bhaarat sabse gareeb hai। main aata bhi bhaarat mein hoon, inko aakar saahookaar banaata hoon। bhaarat ki mahima bahut bhaari hai। yeh sabse bada teertha hai। parantu kalpa ki aayu lambi kar dene se bilkul bhool gaye hain। samajhte hain bhaarat bahut saahookaar tha, ab gareeb bana hai। aage anaaj aadi sab yahaan se vilaayat mein jaata tha। abhi samajhte hain bhaarat bahut gareeb hai isliye madad dete hain। aise hota hai - jab koi badi aasaami fail ho jaati hai to aapas mein phainsala kar unko madad dete hain। yeh bhaarat hai sabse praacheen। bhaarat hi heaven tha। pahle-pahle aadi sanaatan devi-devta dharma tha। sirf time lamba kar diya hai isliye moonjhate hain। bhaarat ko madad bhi kitni dete hain। baap ko bhi bhaarat mein hi aana hai।

tum bachche jaante ho ham baap se varsa le rahe hain। laukik baap ka varsa exchange karte hain paarlaukik se। jaise isne (brahma ne) kiya। dekha, paarlaukik baap se to taaz-takhta milta hai - kahaan woh baadshaahi, kahaan yeh gadaai। kaha bhi jaata hai follow father। bhookh marne ki to baat hi nahin। baap kehte hain trustee hokar sambhaalo। baap aakar sahaj raasta bataate hain। bachchon ne bahut takleeph dekhi hai tab to baap ko bulaate hain - he parampita paramatma, raham karo। sukh mein koi bhi baap ko yaad nahin karte, duhkh mein simran sab karte hain। ab baap batlaate hain ki kaise simran karo। tumko to simran karna bhi aata nahin hai। main hi aakar tumko batlaata hoon। bachche apne ko aatma samjho aur paarlaukik baap ko yaad karo to tumhaare paap kat jaayenge। simar-simar sukh paao, kalah klesh mite tan ke। jo bhi shareer ke duhkh hain, sab mit jaayenge। tumhaari aatma aur shareer donon pavitra ban jaayenge। tum aise kanchan the। phir punarjanma lete-lete aatma par junk chadh jaati hai, phir shareer bhi puraana milta hai। jaise sone mein alloy daala jaata hai। pavitra sone ka jevar bhi pavitra hoga। usmein chamak hoti hai। alloy vaala jevar kaala ho jaayega। baap kehte hain tumhaare mein bhi khaad padi hai, usko ab nikaalna hai। kaise niklegi? baap se yog lagaao। padhaane vaale ke saath yog lagaana hota hai na। yeh to baap, teacher, guru sab kuchh hai। unko yaad karo to tumhaare vikarma vinaash honge aur woh tumko padhaate bhi hain। patit-paavan sarvashaktimaan tum mujhe hi kehte ho। kalpa-kalpa baap aise hi samjhaate hain। meethe-meethe sikeeldhe bachche, 5 hazaar varsha ke baad aakar tum mile ho isliye tumko sikeeldhe kaha jaata hai। ab is deh ka ahankaar chhod aatma-abhimaani bano। aatma ka bhi gyaan de diya, jo baap bigar koi de na sake। koi manushya nahin, jisko aatma ka gyaan ho। sannyaasi udaasi guru gosaai koi bhi nahin jaante। ab woh taakat nahin rahi hai। sabki taakat kam ho gai hai। saara jhaad jadajdeebhoot avastha ko paaya hua hai। ab phir nai sthaapna hoti hai। baap aakar variety jhaad ka raaz samjhaate hain। kehte hain pahle tum raam raajya mein the, phir jab tum vaam maarga mein jaate ho to raavan raajya shuru hota hai phir aur-aur dharma aate hain। bhakti maarga shuru hota hai। aage tum nahin jaante the। koi se bhi jaakar poochho - tum rachayita aur rachna ke aadi, madhya, ant ko jaante ho? to koi bhi nahin bataayenge। baap bhakton ko kehte hain ab tum judge karo। board par bhi likh do - actor hokar drama ke director, creator, principal actor ko nahin jaante to aise actor ko kya kahenge? ham aatma yahaan bhinna-bhinna shareer lekar part bajaane aate hain to zaroor yeh naatak hai na।

geeta hai maata, baap hai shiv। baaki sab hain rachna। geeta nai duniya ko create karti hai। yeh bhi kisko maaloom nahin ki nai duniya ko kaise create karte hain। nai duniya mein pahle-pahle tum hi ho। abhi yeh hai purooshottam sangamayugi duniya। yeh puraani duniya bhi nahin hai to nai duniya bhi nahin hai। yeh hai hi sangam। braahmanon ki choti hai। viraat roop mein bhi na shivbaaba ko dikhaate hain, na brahman choti dikhaate hain। tumne to choti bhi dikhaai hai oopar mein। tum brahman baithe ho। devtaaon ke peechhe hain kshatriy। dvaapar mein pet ke pujaari, phir shoodra bante hain। yeh baajoli hai। tum sirf baajoli ko yaad karo। yahi tumhaare liye 84 janmon ki yaatra hai। second mein sab yaad aa jaata hai। ham aise chakra lagaate hain। yeh right chitra hai, woh wrong hai। baap bigar right chitra koi banva na sake। in dvaara baap samjhaate hain। tum aise-aise baajoli khelte ho। second mein tumhaari yaatra hoti hai। koi takleeph ki baat nahin। roohaani bachche samajhte hain baap hamko padhaate hain। yeh satsang hai sat baap ke saath। woh hai jhooth sang। sachkhanda baap sthaapan karte hain। manushya ki taakat nahin hai। bhagwan hi kar sakte hain। bhagwan ko hi gyaan ka saagar kaha jaata hai। manushya yeh bhi nahin jaante ki yeh paramatma ki mahima hai। woh shanti ka saagar tumko shanti de raha hai। subah ko bhi tum drill karte ho। shareer se nyaara ho baap ki yaad mein rehte ho। yahaan tum aaye ho jeete ji marne। baap par nyochhaavar hote ho। yeh to puraani duniya, puraana chola hai, inse jaise naphrat aati hai, inko chhodkar jaayen। kuchh bhi yaad na aaye। sab-kuchh bhoola hua hai। tum kehte bhi ho bhagwan ne sab kuchh diya hai, to ab unko de do। bhagwan phir tumko kehte hain tum trustee bano। bhagwan trustee nahin banega। trustee tum bante ho। phir paap to karenge nahin। aage paap aatmaon ki paap aatmaon se len-den hoti aai hai। ab sangamayug par tumhaari paap aatmaon se len-den nahin hai। paap aatmaon ko daan kiya to paap sir par chadh jaayega। karte ho eeshvar arth aur dete ho paap aatma ko। baap kuchh lete thode hi hain। baap kahenge jaakar centre kholo to bahuton ka kalyaan hoga।

baap samjhaate hain jo kuchh hota hai hoobhu drama anusaar repeat hota hi rehta hai। phir ismen rone peetne duhkh karne ki baat hi nahin। karmon ka hisaab-kitaab chuktu hona to achha hi hai। vaidya log kehte hain - beemaari saari uthal khaayegi। baap bhi kehte hain raha hua hisaab-kitaab chuktu karna hai। ya to yog se ya phir sajaaon se chooktu karna pade। sajaayen to bahut kadi hain। unse beemaari aadi mein chuktu hota to bahut achha। woh duhkh 21 janmon ke sukh ki bhent mein bhaasta nahin hai kyonki sukh bahut hai। gyaan poora nahin hai to beemaari mein kudakte (tadaphte) rehte hain। beemaar padte hain to bhagwan ko bahut yaad karte hain। woh bhi achha hai। ek ko hi yaad karna hai। woh bhi samjhaate rehte hain। vo log gurooon ko yaad karte hain, anek guru hain। ek satguru ko to tum hi jaante ho। woh almighty authority hai। baap kehte hain - main in vedon granthon aadi ko jaanta hoon। yeh bhakti ki saamagri hai, inse koi mujhe praapta nahin karta hai। baap aate hi hain paap aatmaon ki duniya mein। yahaan punya aatma kahaan se aai। jisne poore 84 janma liye hain, unke shareer mein aata hoon। sabse pahle yeh sunte hain। baba kehte hain yahaan tumhaari yaad ki yaatra achhi hoti hai। yahaan bhal toophaan bhi aayenge parantu baap samjhaate rehte hain ki apne ko aatma samajh baap ko yaad karo। kalpa pahle bhi tumne aise hi gyaan suna tha। din-pratidin tum sunte rehte ho। raajdhaani sthaapan hoti rehti hai। puraani duniya ka vinaash bhi hona hi hai। achha! meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) savere-savere uth shareer se nyaara hone ki drill karni hai। puraani duniya, puraana chola kuchh bhi yaad na aaye। sab kuchh bhoola hua ho।

2) sangamayug par paap aatmaon se len-den nahin karni hai। karmon ka hisaab-kitaab khushi-khushi se chuktu karna hai। rona peetna nahin hai। sab kuchh baap par nyochhaavar kar phir trustee ban sambhaalna hai।

vardaan:- mahsoosta ki shakti dvaara sva parivartan karne vaale teevra purushaarthi bhav

koi bhi parivartan ka sahaj aadhaar mahsoosta ki shakti hai। jab tak mahsoosta ki shakti nahin aati tab tak anubhooti nahin hoti aur jab tak anubhooti nahin tab tak brahman jeevan ki visheshta ka foundation majboot nahin। umang-utsaah ki chaal nahin। jab mahsoosta ki shakti har baat ka anubhvi banaati hai tab teevra purushaarthi ban jaate ho। mahsoosta ki shakti sadaakaal ke liye sahaj parivartan kara deti hai।

slogan:- sneh ke swaroop ko saakaar mein emerge kar brahma baap samaan bano।