सोमवार 22 अप्रैल 2024 की दैनिक मुरली

22-04-2024 praatahmurli om shanti "baapdaada"' madhuban

“meethe bachche - sarva ka sadgati daata ek baap hai, baap jaisi nishkaam seva aur koi bhi nahin kar sakta''

prashn:- new world sthaapan karne mein baap ko kaun-si mehnat karni padti hai?

uttar:- ekdam ajaamil jaise paapiyon ko phir se lakshmi-naaraayan jaise poojya devta banaane ki mehnat baap ko karni padti hai। baap tum bachchon ko devta banaane ki mehnat karte। baaki sarva aatmaayen vaapis shantidham jaati hain। har ek ko apna hisaab-kitaab chuktu kar laayak bankar vaapas ghar jaana hai।

geet:- is paap ki duniya se…

om shanti। meethe-meethe roohaani bachchon ne geet suna। bachche jaante hain yeh hai paap ki duniya। nai duniya hoti hai punya ki duniya। vahaan paap hota nahin hai। woh hai raam raajya, yeh hai raavan raajya। is raavan raajya mein sab patit duhkhi hain, tab to pukaarte hain - he patit-paavan aakar humein paavan banaao। sabhi dharma vaale pukaarte hain - O god father aakar humein liberate karo, guide bano। goya baap jab aate hain to jo bhi dharma hain saari srishti mein, sabko le jaate hain। is samay sabhi raavan raajya mein hain। sabhi dharma vaalon ko le jaate hain vaapis shantidham। vinaash to sabka hona hi hai। baap yahaan aakar bachchon ko sukh-dhaam ka laayak banaate hain। sabhi ka kalyaan karte hain, isliye ek ko hi sarva ka sadgati daata, sarva ka kalyaan karne vaala kaha jaata hai। baap kehte hain abhi tumko vaapis jaana hai। sabhi dharma vaalon ko shantidham, nirvaandhaam jaana hai, jahaan sabhi aatmaayen shanti mein rehti hain। behad ka baap jo rachayita hai, vahi aakar sabhi ko mukti aur jeevanmukti dete hain। to mahima bhi us ek god father ki karni chaahiye। jo sarva ki aakar seva karte hain, unko hi yaad karna chaahiye। baap khud samjhaate hain main door desh, paramdham ka rahne vaala hoon। sabse pahle jo aadi sanaatan devi-devta dharma tha, woh hai nahin isliye mujhe pukaarte hain। main aakar sabhi bachchon ko vaapis le jaata hoon। ab hindu koi dharma nahin hai। asul hai devi-devta dharma। parantu pavitra na hone kaaran apne ko devta ke badle hindu kah diya hai। hindu dharma sthaapan karne vaala to koi hai nahin। geeta hi hai sarva shaastra shiromni। woh bhagwan ki gaai hui hai। bhagwan ek ko hi kaha jaata hai - god father। shreekrishna va lakshmi-naaraayan ko god father va patit-paavan nahin kahenge। yeh to raaja-raani hain। unhon ko aisa kisne banaaya? baap ne। baap pahle nai duniya rachte hain, jiske yeh maalik bante hain। kaise banen, yeh koi manushya maatra nahin jaante hain। bade-bade lakhapti mandir aadi banaate hain। unhon se poochhna chaahiye - inhon ne yeh vishwa ka raajya kaise paaya? kaise maalik banen? kabhi koi batla nahin sakenge। kya karma kiya jo itna phal paaya? ab baap samjhaate hain - tum apne dharma ko bhoole hue ho। aadi sanaatan devi-devta dharma ko na jaanne kaaran sab aur-aur dharmon mein convert ho gaye hain। woh phir return honge apne-apne dharma mein। jo aadi sanaatan devi-devta dharma ke hain, woh phir apne hi dharma mein aa jaayenge। Christian dharma ka hoga to phir Christian dharma mein aa jaayega। yeh aadi sanaatan devi-devta dharma ka sapling lag raha hai। jo-jo jis dharma ka hai, unko apne-apne dharma mein aana padega। yeh jhaad hai, inki teen tubes hain phir unse vriddhi hoti jaati hai। aur koi yeh knowledge de na sake। ab baap kehte hain tum apne dharma mein aa jaao। koi kehte hain main sannyaas dharma mein jaata hoon, raamkrishna paramhans sannyaasi ka follower hoon। ab woh hai nivritti maarga vaale, tum ho pravritti maarga vaale। grihastha maarga vaale nivritti maarga vaalon ke followers kaise ban sakte hain! tum pahle pravritti maarga mein pavitra the। phir raavan dvaara tum apvitra bane ho। yeh baaten baap samjhaate hain। tum ho grihastha aashram ke, bhakti bhi tumko karni hai। baap aakar bhakti ka phal sadgati dete hain। kaha jaata hai - religion is might। baap religion sthaapan karte hain। tum saare vishwa ke maalik bante ho। baap se tumko kitni might milti hai। ek sarvashaktimaan baap hi aakar sabki sadgati karte hain aur koi na sadgati de sakte hain, na pa sakte hain। yahaan hi vriddhi ko paate rehte hain। vaapis koi bhi ja nahin sakta। baap kehte hain main sabhi dharmon ka servant hoon, sabko aakar sadgati deta hoon। sadgati kaha jaata hai satayug ko। mukti hai shantidham mein। to sabse bada kaun hua? baap kehte hain - he aatmaayen tum sab brothers ho, sabko baap se varsa milta hai। sabko aakar apne-apne section mein bhejne ke laayak banaata hoon। laayak nahin bante to sajaayen khaani padti hain। hisaab-kitaab chuktu kar phir vaapas jaate hain। woh hai shantidham aur woh hai sukhdhaam।

baap kehte hain main aakar new world sthaapan karta hoon, ismen mehnat karni padti hai। ekdam ajaamil jaise paapiyon ko aakar aisa devi-devta banaata hoon। jabse tum vaam maarga mein gaye ho to seedhi neeche utarte aaye ho। yeh 84 janmon ki seedhi hai hi neeche utarne ki। satopradhaan se sato, rajo, tamo… abhi yeh hai sangam। baap kehte hain main aata hi ek baar hoon। main koi ibraaham-buddha ke tan mein nahin aata hoon। main purooshottam sangamayug par hi aata hoon। ab kaha jaata hai follow father। baap kehte hain tum sab aatmaon ko mujhe hi follow karna hai। maamekam yaad karo to tumhaare paap yog agni mein bhasma honge। isko kaha jaata hai yog agni। tum ho sachche-sachche brahman। tum kaam chita se utar gyaan chita par baithte ho। yeh ek hi baap samjhaate hain। Christ, buddha aadi sab ek ko yaad karte hain। parantu unko yathaartha koi jaante nahin। ab tum aastik bane ho। rachta aur rachna ko tumne baap dvaara jaana hai। rishi-muni sab neti-neti kehte the, ham nahin jaante। svarga hai sachkhanda, duhkh ka naam nahin। yahaan kitna duhkh hai। aayu bhi bahut chhoti hai। devtaaon ki aayu kitni badi hai। woh hain pavitra yogi। yahaan hain apvitra bhogi। seedhi utarte-utarte aayu kamti hoti jaati hai। akaale mrityu bhi hoti rehti hai। baap tumko aisa banaate hain jo tum 21 janma kabhi rogi nahin banenge। to aise baap se varsa lena chaahiye। aatma ko kitna samajhdaar banna chaahiye। baba aisa varsa dete hain jo vahaan koi duhkh nahin। tumhaara rona-chillaana banda ho jaata hai। sab paartadhaari hain। aatma ek shareer chhod doosra leti hai। yeh bhi drama। baba karma, akarma, vikarma ki gati bhi samjhaate hain। brahma ka din aur raat gaai hui hai। brahma ka din-raat so braahmanon ka। ab tumhaara din hone vaala hai। mahaashivraatri kehte hain। ab bhakti ki raat poori ho gyaan ka uday hota hai। ab hai sangam। tum ab phir se svargavaasi ban rahe ho। andhiyaari raat mein dhakke bhi khaaye, tippad bhi ghisaai, paise bhi khalaas kiye। ab baap kehte hain main aaya hoon tumko shantidham aur sukhdhaam mein le jaane ke liye। tum sukhdhaam ke rahvaasi the। 84 janma ke baad duhkhadhaam mein aakar pade ho। phir pukaarte ho - baba aao, is puraani duniya mein। yeh tumhaari duniya nahin hai। tum ab yogbal se apni duniya sthaapan kar rahe ho। tumko ab double ahinsak banna hai। na kaam kataari chalaani hai, na ladna-jhagadna hai। baap kehte hain main har 5 hazaar varsha ke baad aata hoon। yeh kalpa 5 hazaar varsha ka hai, na ki laakhon varsha ka। agar laakhon varsha ka hota phir to yahaan bahut aadamshumaari hoti। gapode lagaate rehte hain isliye baap kehte hain main kalpa-kalpa aata hoon, mera bhi drama mein part hai। part bigar main kuchh bhi nahin kar sakta hoon। main bhi drama ke bandhan mein hoon। poore time par aata hoon, manmanaabhav। parantu iska koi arth nahin jaanta। baap kehte hain deh ke sabhi sambandh chhod maamekam yaad karo to sab paavan ban jaayenge। bachche baap ko yaad karne ki mehnat karte rehte hain।

yeh hai eeshvareey vishwa-vidyaalay। aise vidyaalay aur ho na saken। yahaan eeshvar baap aakar saare vishwa ko change karte hain। hell se heaven bana dete hain, jis par tum raajya karte ho। ab baap kehte hain mujhe yaad karo to tum tamopradhaan se satopradhaan ban jaayenge। yeh hai baba ka bhaagyashaali rath, jismen baap aakar pravesh karte hain। shiv jayanti ko koi bhi jaante nahin hain। woh to kah dete paramatma naam-roop se nyaara hai। are, naam-roop se nyaari to koi cheez hoti nahin। kehte hain yeh aakaash hai, to yeh naam to hua na। bhal polaar hai, parantu phir bhi naam hai। to baap ka bhi naam hai kalyaankaari। phir bhakti maarga mein bahut naam rakhe hain। baabureenaath bhi kehte hain। woh aakar kaam kataari se chhudaakar paavan banaate hain। nivritti maarga vaale brahm ko hi paramatma maante hain, unko hi yaad karte hain। brahm yogi, tatva yogi kahlaate hain। parantu woh ho gaya rahne ka sthaan, jisko brahmaanda kaha jaata hai। woh phir brahm ko bhagwan samajh lete hain। samajhte hain ham leen ho jaayenge। goya aatma ko vinaashi bana dete hain। baap kehte hain main hi aakar sarva ki sadgati karta hoon isliye ek shivbaaba ki jayanti heere tulya hai baaki sab jayantiyaan kaudi tulya hain। shivbaaba hi sabki sadgati karte hain। to woh hai heere jaisa। vahi tumko golden ej mein le jaate hain। yeh knowledge tumko baap hi aakar padhaate hain, jisse tum devi-devta bante ho। phir yeh knowledge praayahlop ho jaati hai। in lakshmi-naaraayan mein rachta aur rachna ki knowledge nahin hai।

bachchon ne geet suna - kehte hain aisi jagah le chalo, jahaan shanti aur chain ho। woh hai shantidham, phir sukhdhaam। vahaan akaale mrityu nahin hoti hai। to baap aaye hain bachchon ko us sukh-chain ki duniya mein le chalne। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

raatri class

abhi tumhaari sooryavshi, chandravanshi donon dynasty banti hain। jitna tum jaante ho aur pavitra bante ho utna aur koi jaan nahin sakenge, na pavitra ban sakenge। baaki sunenge baap aaya hua hai to baap ko yaad karne lag jaayenge। so bhi tum aage chal yeh bhi dekhenge - laakhon, karodon samajhte jaayenge। vaayumandal hi aisa hoga। pichhaadi ki ladaai mein sabhi hopeless ho jaayenge। sabhi ko touch hoga। tumhaara aavaaz bhi hoga। svarga ki sthaapna ho rahi hai। baaki sabhi ka maut taiyaar hai। parantu woh samay aisa hota hai jo ghutka khaane ka samay nahin rahega। aage chal bahut samjhenge, jo honge। aise bhi nahin - yeh sabhi us samay honge। koi mar bhi jaayenge। honge vahi jo kalpa-kalpa hote hain। us samay ek baap ki yaad mein honge। aavaaj bhi kam ho jaayega। phir apne ko aatma samajh baap ko yaad karne lagenge। tum sabhi saakshi hokar dekhenge। bahut dardanaak ghatnaayen hoti rahengi। sabhi ko maaloom pad jaayega ki abhi vinaash hona hai। duniya change honi hai। vivek kehta hai vinaash tab hoga jab bombs girenge। abhi aapas mein kehte rehte hain condition karo, vachan do ham bombs nahin chhodenge। lekin yeh sabhi cheezen bani hui hain vinaash ke liye।

tum bachchon ko khushi bhi bahut rahni hai। tum jaante ho nai duniya ban rahi hai। samajhte ho baap hi nai duniya sthaapan karenge। vahaan duhkh ka naam nahin hoga। uska naam hi hai paradise। jaise tumko nishchay hai vaise aage chal bahuton ko hoga। kya hota hai jinko anubhav paana hai, woh aage chalkar bahut paayenge। pichhaadi ke samay yaad ki yaatra mein bhi bahut rahenge। abhi to samay pada hai, purushaartha poora nahin karenge to pad kam ho jaayega। purooshaartha karne se pad bhi achha milega। us samay tumhaari avastha bhi bahut achhi hogi। saakshaatkaar bhi karenge। kalpa-kalpa jaise vinaash hua hai, vaise hoga। jinmen nishchay hoga, chakra ka gyaan hoga woh khushi mein rahenge। achha - roohaani bachche goodnight।

dhaarna ke liye mukhya saar:-

1) double ahinsak ban yogbal se is hell ko heaven banaana hai। tamopradhaan se satopradhaan banne ka purooshaartha karna hai।

2) ek baap ko poora-poora follow karna hai। sachcha-sachcha brahman ban yog-agni se vikarmon ko dagdha karna hai। sabko kaam chita se utaar gyaan chita par bithaana hai।

vardaan:- nihsvaartha aur nirvikalp sthiti se seva karne vaale saphalta moorta bhav

seva mein saphalta ka aadhaar aapki nihsvaartha aur nirvikalp sthiti hai। is sthiti mein rahne vaale seva karte svayan bhi santushta aur harshit rehte aur unse doosre bhi santushta rehte। seva mein sangathan hota hai aur sangathan mein bhinna-bhinna baaten, bhinna-bhinna vichaar hote hain। lekin anekta mein moonjho nahin। aisa nahin socho kiska maanen, kiska nahin maanen। nihsvaartha aur nirvikalp bhaav se nirnay lo to kisi ko bhi vyartha sankalp nahin aayega aur saphalta moorta ban jaayenge।

slogan:- ab sakaash dvaara buddhiyon ko parivartan karne ki seva praarambha karo।