रविवार 12 मई 2024 की दैनिक मुरली

12-05-24 praatahmurli om shanti ''avyakt-baapdaada'' revise 30-11-99 madhuban

“paas with honour banne ke liye sarva khajaanon ke khaate ko jama kar sampanna bano''

aaj baapdaada kis sabha ko dekh rahe hain? aaj ki sabha mein har ek bachcha highest aur avinaashi khajaanon se richest hai। duniya vaale kitne bhi richest ho lekin ek janma ke liye richest hain। ek janma bhi richest rahega ya nahin, yeh bhi nishchit nahin hai। chaahe kitna bhi richest in world ho parantu ek janma ke liye, aur aap ho jo nishchay aur nashe se kehte ho ki ham anek janma richest hain kyonki aap sabhi avinaashi khajaanon se sampanna ho। aap sabhi jaante ho ki ham is samay ke purushaartha se ek din mein bhi bahut kamaai karne vaale hain। jaante ho ki ek din mein aap kitni kamaai karte ho? hisaab jaante ho na! gaaya hua hai, anubhav hai ek kadam mein padam। to ek din mein baap dvaara, baap ki knowledge dvaara, yaad dvaara har kadam mein padam jama hote hain। to saare din mein jitne bhi kadam yaad mein uthaate ho utne padam jama karte ho। to aisa kamaai karne vaala, khajaana jama karne vaala vishwa mein koi hoga! va hai? vishwa mein chakkar lagaakar aao, sivaae aapke itna jama koi kar nahin sakta, isliye baap kehte hain is shreshtha smriti mein raho ki ham aatmaon ka bhaagya param aatma dvaara aisa shreshtha bana hai।

apne khajaane to jaante ho na! samay ke khajaane ko bhi jaante ho ki is sangamayug ka samay kitna shreshtha hai, jo praapti chaahiye woh adhikaari ban baap se le rahe ho। sarva adhikaar praapta kar liya hai na? ek-ek shreshtha sankalp kitna bada khajaana hai, samay bhi bada khajaana hai, sankalp bhi bada khajaana hai। sarva shaktiyaan bade se bada khajaana hai। ek-ek gyaan ratna kitna bada khajaana hai। har ek gun kitna bada khajaana hai। duniya vaale bhi maante hain ki shvaanson shvaans yaad se shvaans saphal hote hain। to aap sabke shvaans saphalta swaroop hain, vyartha nahin। har shvaans mein saphalta ka adhikaar samaaya hua hai। baapdaada ne sabhi bachchon ko sarva khajaane ek jaise hi diye hain। sarva bhi diye hain aur samaan diye hain। koi ko ek guna, koi ko das guna, koi ko 100 guna… aise nahin diya hai। dene vaale daata ne ek-ek bachche ko sarva khajaane brahman bante hi samaan roop mein diya hai। lekin khajaane ko kitna jama karte hain ya ganvaate hain, yeh har ek ke oopar hai। har ek ko check karna hai ki ham saare din mein kitna jama karte hain ya ganvaate hain? check karte ho? check zaroor karna hai kyonki ek janma ke liye nahin hai lekin har janma ke liye hai। anek janma ke liye jama chaahiye। jama karne ki vidhi jaante ho? bahut sahaj hai। sirf bindi lagaate jaao। bindi yaad hai to jama hota hai। jaise sthool khajaane mein bhi ek ke saath bindi lagaate jaao to badhta jaata hai na! aise hi aatma bhi bindi, baap bhi bindi aur drama mein jo beet chuka woh bhi fullstop arthaat bindi। agar har khajaane ko bindi roop se yaad karo to jama hota jaata। anubhav hai na! bindi lagaai aur vyartha se jama hota jaata hai। bindi lagaane aati hai? kai baar aise hota hai jo koshish karte ho bindi lagaane ki lekin bindi ke bajaae lambi line ho jaati hai, bindi ke bajaae question-mark ho jaata hai, aashcharya ki line lag jaati hai। to jama ka khaata badhaane ki vidhi hai bindi aur ganvaane ka raasta hai lambi line lagaana, question mark lagaana, aashcharya ki maatra lagaana। sahaj kya hai? bindi hai na! to vidhi bahut sahaj hai - svamaan aur baap ki yaad tatha phaaltu ko fullstop lagaana।

baapdaada ne pahle bhi kaha hai - roz amritvele apne aapko teen bindiyon ki smriti ka tilak lagaao to ek khajaana bhi vyartha nahin jaayega। har samay, har khajaana jama hota jaayega। baapdaada ne sabhi bachchon ke har khajaane ke jama ka chart dekha। usmein kya dekha? abhi tak bhi jama ka khaata jitna hona chaahiye utna nahin hai। samay, sankalp, bol vyartha bhi jaata hai। chalte-chalte kabhi samay ka mahatva emerge roop mein kam hota hai। agar samay ka mahatva sada yaad rahe, emerge rahe to samay ko aur jyaada saphal bana sakte ho। saare din mein saadhaaran roop se samay chala jaata hai। galat nahin lekin saadhaaran। aise hi sankalp bhi bure nahin chalte lekin vyartha chale jaate hain। ek ghante ki checking karo, har ghante mein samay ya sankalp kitne saadhaaran jaate hain? jama nahin hote hain। phir baapdaada ishaara bhi deta hai, to baapdaada ko bhi dilaase bahut dete hain। baba, aise thoda sa sankalp hai bas। baaki nahin, sankalp mein thoda chalta hai। sampoorn ho jaayenge। theek ho jaayenge। abhi ant thode hi aaya hai, thoda samay to pada hai। samay par sampanna ho jaayenge। lekin baapdaada ne baar-baar kah diya hai ki jama bahut samay ka chaahiye। aise nahin jama ka khaata ant mein sampanna karenge, samay aane par ban jaayenge! bahut samay ka jama hua bahut samay chalta hai। varsa lene mein to sabhi kehte hain ham to lakshmi-naaraayan banenge। agar haath uthvaayenge ki tretaayugi banenge? to koi nahin haath uthaata। aur lakshmi-naaraayan banenge? to sabhi haath uthaate। agar bahut samay ka jama ka khaata hoga to poora varsa milega। agar thoda sa jama hoga to full varsa kaise milega? isliye sarva khajaane ko jitna jama kar sako utna abhi se jama karo। ho jaayega, aa jaayenge... ge ge nahin karo। “karna hi hai'' yeh hai dridhta। amritvele jab baithte hain, achhi sthiti mein baithte hain to dil hi dil mein bahut vaayde karte hain - yeh karenge, yeh karenge। kamaal karke dikhaayenge... yeh to achhi baat hai। shreshtha sankalp karte hain lekin baapdaada kehte hain in sab vaaydon ko karma mein laao। sirf vaayda nahin karo lekin jo bhi vaayde karte ho woh man-vachan aur karma mein laao। bachche sankalp bahut achhe-achhe karte hain, baapdaada us samay khush hote hain kyonki himmat to rakhte hain na। yeh banenge, yeh karenge... himmat bahut achhi rakhte hain। to himmat par baapdaada khush hote hain। parantu jab karma mein aana hota hai to kabhi-kabhi ho jaata hai। vaayda karna bahut sahaj hai। lekin karma mein karna maana vaayda nibhaana। vaayde karne vaale to bahut hain lekin nibhaane mein nambarvaar ho jaate hain। to sankalp aur karma ko, plan aur practical donon ko samaan banaao। bana sakte ho na? business vaale aaye hain। business vaale to business karna jaante hain na! jama karna jaante hain na! aur engineer va vaigyaanik bhi practical mein kaam karte hain। aur jo rural (graameen prabhaag) hai, baapdaada unhon ko ruler kehte hain, kyonki agar yeh seva nahin karte to koi nahin chal paate। to teenon hi wing jo aaye hain woh karma karne vaale hain। sirf kahne vaale nahin, karne vaale hain। to sabhi vaayde karma mein nibhaane vaali aatmaaye ho na! ya sirf vaayda karne vaale ho? vaayde ke samay to baapdaada ko himmat dikhaakar khush kar dete hain। baapdaada ke paas har ek bachche ke vaaydon ka file hai। vahaan (vatan mein) vaaydon ka file rakhne ke liye almaari va jagah ki to baat hai nahin। kabhi-kabhi baapdaada apni alaukik T.vi. achaanak kholte hain। sada nahin kholte hain, kabhi-kabhi kholte hain to sab sunne mein aata hai। jo aapas mein bolchaal karte hain, woh bhi sunte hain। iseelie baapdaada kehte hain - vyartha ko jama ke khaate mein jama karo।

brahman arthaat alaukik। brahman jeevan ka mahatva bahut bada hai। praaptiyaan bahut badi hain। svamaan bahut bada hai aur sangam ke samay par baap ka banna, yeh bade se bada padamguna bhaagya hai isliye baapdaada kehte hain ki har khajaane ka mahatva rakho। jaise doosron ko bhaashan mein sangamayug ki kitni mahima sunaate ho। agar aapko koi topic deven ki sangamayug ki mahima karo to kitna samay kar sakte ho? ek ghanta kar sakte ho? teachers bolo। jo kar sakta hai woh haath uthaao। to jaise doosron ko mahatva sunaate ho, mahatva jaante bahut achha ho। baapdaada aise nahin kahega ki jaante nahin hain। jab suna sakte hain to jaante hain tab to sunaate hain। sirf hai kya ki merge ho jaata hai। emerge roop mein smriti rahe - woh kabhi kam ho jaata hai, kabhi jyaada। to apna eeshvareey nasha emerge rakho। haan main to ho gai, ho gaya... nahin। practical mein hoon... yeh emerge roop mein ho। nishchay hai lekin nishchay ki nishaani hai roohaani nasha। to saara samay nasha rahe। roohaani nasha - main kaun! yeh nasha emerge roop mein hoga to har second jama hota jaayega।

to aaj baapdaada ne jama ka khaata dekha isliye aaj vishesh attention dila rahe hain ki samay ki samaapti achaanak honi hai। yeh nahin socho ki maaloom to padta rahega, samay par theek ho jaayenge। jo samay ka aadhaar leta hai, samay theek kar dega, ya samay par ho jaayega... unka teacher kaun? samay ya svayan param aatma? param aatma se sampanna nahin ban sake aur samay sampanna banaayega, to isko kya kahenge? samay aapka master hai ya paramatma aapka shikshak hai? to drama anusaar agar samay aapko sikhaayega ya samay ke aadhaar par parivartan hoga to baapdaada jaante hain ki praarabdha bhi samay par milegi kyonki samay teacher hai। samay aapka intajaar kar raha hai, aap samay ka intajaar nahin karo। woh rachna hai, aap master rachta ho। to rachta ka intajaar rachna kare, aap master rachta samay ka intajaar nahin karo। aur mushkil hai bhi kya? sahaj ko svayan hi mushkil banaate ho। mushkil hai nahin, mushkil banaate ho। jab baap kehte hain jo bhi bojh lagta hai woh bojh baap ko de do। woh dena nahin aata। bojh uthaate bhi ho phir thak bhi jaate ho phir baap ko ulaahna bhi dete ho - kya karen, kaise karen...! apne oopar bojh uthaate kyon ho? baap offer kar raha hai apna sab bojh baap ke havaale karo। 63 janma bojh uthaane ki aadat padi hui hai na! to aadat se majboor ho jaate hain, isliye mehnat karni padti hai। kabhi sahaj, kabhi mushkil। ya to koi bhi kaarya sahaj hota hai ya mushkil hota hai। kabhi sahaj kabhi mushkil kyon? koi kaaran hoga na! kaaran hai - aadat se majboor ho jaate hain aur baapdaada ko bachchon ki mehnat karna, yahi sabse badi baat lagti hai। achhi nahin lagti hai। master sarvashakti-maan aur mushkil? title apne ko kya dete ho? mushkil yogi ya sahaj yogi? nahin to apna title change karo ki ham sahaj yogi nahin hain। kabhi sahajyogi hain, kabhi mushkil yogi? aur yog hai hi kya? bas yaad karna hai na। aur powerful yog ke saamne mushkil ho hi nahin sakti। yog lagan ki agni hai। agni kitna bhi mushkil cheez ko parivartan kar deti hai। loha bhi mould ho jaata hai। yeh lagan ki agni kya mushkil ko sahaj nahin kar sakti hai? kai bachche bahut achhi-achhi baaten sunaate hain, baba kya karen vaayu-mandal aisa hai, saathi aisa hai। hans, bagule hain, kya karen puraane hisaab-kitaab hain। baaten bahut achhi-achhi kehte hain। baap poochhte hain aap braahmanon ne kaun sa theka uthaaya hai? theka to uthaaya hai vishwa parivartan karenge। to jo vishwa parivartan karta hai woh apni mushkil ko nahin mita sakta?

to aaj kya karenge? jama ka khaata badhaao। to jo kehte ho sahaj yogi, woh anubhav karenge। kabhi mushkil kabhi sahaj, ismen maja nahin hai। brahman jeevan hai maje ki। sangam-yug hai maje ka yug। bojh uthaane ka yug nahin hai। bojh utaarne ka yug hai। to check karo, apne takdeer ki tasveer knowledge ke aaine mein achhi tarah se dekho। aaina to hai na? ya nahin hai? toot to nahin gaya hai na? sabhi ko aaina mila hai? maataayen, aaina mila hai ya chori ho gaya hai? paandav to sambhaalne mein hoshiyaar hain na? aaina hai? haath to achha uthaaya। achha hai। takdeer ki tasveer dekho aur sada apne takdeer ki tasveer dekh vaah-vaah ka geet gaao। vaah meri takdeer! vaah mera baba! vaah mera parivaar! parivaar bhi vaah-vaah hai! aise nahin yeh to bahut vaah-vaah hai, yeh thoda aisa hai! nahin। vaah mera parivaar! vaah mera bhaagya! aur vaah mera baba! brahman jeevan arthaat vaah-vaah! haay-haay nahin। shaareerik vyaadhi mein bhi haay-haay nahin, vaah! yeh bhi bojh utarta hai। agar 10 man se aapka 3-4 man bojh utar jaae to achha hai ya haay-haay? kya hai? vaah bojh utra! haay mera part hi aisa hai! haay mere ko vyaadhi chhodti hi nahin hai! aap chhodo ya vyaadhi chhodegi? vaah-vaah karte jaao to vaah-vaah karne se vyaadhi bhi khush ho jaayegi। dekho, yahaan bhi aise hota hai na, kiski mahima karte ho to vaah-vaah karte hain। to vyaadhi ko bhi vaah-vaah kaho। haay yeh mere paas hi kyon aai, mera hi hisaab hai! praapti ke aage hisaab to kuchh bhi nahin hai। praaptiyaan saamne rakho aur hisaab-kitaab saamne rakho, to woh kya lagega? bahut chhoti si cheez lagegi। matlab to brahman jeevan mein kuchh bhi ho jaae, positive roop mein dekho। negative se positive karna to aata hai na। negative positive ka course bhi to karaate ho na! to us samay apne aapko course karaao to mushkil sahaj ho jaayega। mushkil shabd braahmanon ki dictionary mein nahin hona chaahiye। achha - koi bhi hisaab hai, aatma se hai, shareer se hai ya prakriti se hai; kyonki prakriti ke yeh 5 tatva bhi kai baar mushkil ka anubhav karaate hain। koi bhi hisaab-kitaab yog agni mein bhasma kar lo। samjha kya karna hai? jama ka khaata badhaao। bol mein bhi saadhaaran bol nahin, bol mein bhi bhinna-bhinna bhaav aur bhaavna hoti hai aur bol dvaara bhaav aur bhaavna ka pata pad jaata hai। to sada jo bhi bol bolo usmein aatmik bhaav ho aur shubh va shreshtha bhaavna ho। bol bhi aur bhaavna bhi। maaya ki jo bhaavna hai woh hai eershya, hasad, ghrina... yeh maaya ki bhaavna hai। sada shubh bhaav aur bhaavna ho। aisa hai? check karna। samay ka khajaana, bol ka khajaana, sankalpon ka khajaana, shaktiyon ka khajaana, gyaan ka khajaana, gunon ka khajaana... ek-ek khajaane ko check karo kyonki har khajaane ka khaata jama karna hai। in sarva khajaanon ka khaata bharpoor ho tab kahenge full marks arthaat paas with honour। aise nahin sochna - ek khajaana agar kam jama hai to kya harja hai lekin paas with honour banne ke liye sarva khajaanon mein khaata bharpoor ho। achha - jo ek second mein apne sankalp ko jahaan chaahe, jo sochna chaahen vahi soch chalta rahe, aise jo samajhte hain, woh haath uthaao। ek second mein mind control ho jaae, aise second mein ho sakta hai? agar kar sakte ho to haath uthaao।

achha - is vaayumandal mein, madhuban mein baithe ho। madhuban ka vaayumandal powerful hai, is vaayumandal mein is samay man ko control kar sakte ho? chaahe minute mein karo, chaahe second mein karo lekin kar sakte ho? order do man ko, bas aatma paramdham nivaasi ban jaao। dekho man order maanta hai ya nahin maanta hai? (drill) achha।

chaaron or ke sarva khajaanon ke maalik bachchon ko, sada mushkil ko second mein parivartan karne vaale sada sahaj-yogi, sada sankalp, samay, bol, karma ko shreshtha banaane vaale, sada bachat ka khaata badhaane vaale, sada man ke maalik, man-buddhi-sanskaar ko order mein chalaane vaale, aise svaraajya adhikaari bachchon ko, chaahe desh mein hain chaahe videsh mein hain lekin dil se door nahin hain, aise chaaron or ke bachchon ko baapdaada ka yaadapyaar aur namaste।

vardaan:- ooncha baap, oonche ham aur ooncha kaarya is smriti se shaktishaali banne vaale baap samaan bhav

jaise aajkal ki duniya mein koi vi.aai.pi. ka bachcha hoga to woh apne ko bhi vi.aai.pi. samjhega। lekin baap se ooncha to koi nahin hai। ham aise oonche se oonche baap ki santaan oonchi aatmaayen hain - yeh smriti shaktishaali banaati hai। ooncha baap, oonche ham aur ooncha kaarya - aisi smriti mein rahne vaale sada baap samaan ban jaate hain। saare vishwa ke aage shreshtha aur oonchi aatmaayen aapke sivaae koi nahin hain isliye aapka hi gaayan aur poojan hota hai।

slogan:- sampoornata ke darpan mein sookshm lagaavon ko check karo aur mukta bano।