शुक्रवार 17 मई 2024 की दैनिक मुरली

17-05-2024 praatahmurli om shanti "baapdaada"' madhuban

“meethe bachche - grihastha vyavhaar mein rehte hue aisa trustee bano jo kisi bhi cheez mein aasakti na rahe, hamaara kuchh bhi nahin, aisa beggar ban jaao''

prashn:- tum bachchon ke purooshaartha ki manzil kaun-si hai?

uttar:- aap mare mar gai duniya - yahi hai tumhaari manzil। shareer se mamatva toot jaae। aisa beggar bano jo kuchh bhi yaad na aaye। aatma ashareeri ban jaaye। bas, hamko vaapis jaana hai। aisa purooshaartha karne vaale beggar tu prince bante hain। tum bachche hi fakeer se ameer, ameer se fakeer bante ho। jab tum ameer ho to ek bhi gareeb nahin hota hai।

om shanti। baap bachchon se poochhte hain ki aatma sunti hai ya shareer sunta hai? (aatma) aatma sunegi zaroor shareer dvaara। bachche likhte bhi aise hain phalaane ki aatma baapdaada ko yaad karti hai। phalaane ki aatma aaj phalaani jagah jaati hai। yeh jaise aadat pad jaati hai, ham aatma hain kyonki bachchon ko aatma-abhimaani banna hai। jahaan bhi dekhte ho, jaante ho aatma aur shareer hai aur inmen hain do aatmaayen। ek ko aatma aur ek ko param aatma kehte hain। paramatma khud kehte hain mai is shareer mein, jismen inki aatma bhi pravesh rehti hai, main pravesh karta hoon। shareer bigar to aatma rah nahin sakti। ab baap kehte hain apne ko aatma samjho। apne ko aatma samjhenge tab baap ko yaad karenge aur pavitra ban shantidham mein jaayenge aur phir daiveegun bhi jitna dhaaran kar aur karaayenge, svadarshan chakradhaari bankar aur banaayenge utna oonch pad paayenge। ismen koi moonjhate ho to poochh sakte ho। yeh to zaroor hai main aatma hoon, baap bachchon ko hi kehte hain jo brahman bane hain। doosron ko nahin kahenge। bachche hi priy lagte hain। har ek baap ko bachche priy lagte hain। doosre ko bhal baahar se pyaar karenge parantu buddhi mein hai - yeh hamaare bachche nahin hain। main bachchon se hi baat karta hoon kyonki bachchon ko hi padhaana hai। baaki baahar vaalon ko padhaana tumhaara kaam hai। koi to jhat samajh jaate hain, koi thoda samajhkar chale jaayenge। phir jab dekhenge yahaan to bahut vriddhi ho rahi hai tab aayenge, dekhen to sahi। tum yahi samjhaayenge ki baap sabhi aatmaon va bachchon ko kehte hain mujhe yaad karo। sabhi aatmaon ko paavan baap hi banaate hain। woh kehte hain mere sivaae aur koi ko yaad na karo। meri avyabhichaari yaad rakho to tumhaari aatma paavan ban jaayegi। patit-paavan main ek hi hoon। meri yaad se hi aatma paavan banegi isliye kehte hain - bachchon, maamekam yaad karo। baap hi patit raajya se paavan raajya banaate hain, liberate karte hain। kahaan le jaate hain? shantidham phir sukhdhaam।

mool baat hi hai paavan banne ki। 84 ka chakra samjhaana bhi sahaj hai। chitra dekhne se hi nishchay baith jaata hai isliye baba hamesha kehte rehte hain museum kholo - bhabhke se। to manushyon ko bhabhka kheenchega। bahut aayenge, tum yahi sunaayenge ki ham baap ki shreemat par yeh ban rahe hain। baap kehte hain maamekam yaad karo aur daiveegun dhaaran karo। badge to zaroor saath hona chaahiye। tum jaante ho ham beggar tu prince banenge। pahle to shreekrishna banenge na। jab tak shreekrishna na banen tab tak shreenaaraayan ban na saken। bachche se bada ho tab naaraayan naam mile। to inmen donon chitra hain। tum yeh bante ho। abhi tum sab beggar bane hue ho। yeh brahmaakumaar-kumaariyaan bhi beggars hain, inke paas kuchh bhi nahin hai। beggar arthaat jinke paas kuchh bhi na ho। koi-koi ko ham beggar nahin kahenge। yeh baba to hai sabse bada beggar। ismen poora beggar banna hota hai। grihastha vyavhaar mein rehte aasakti todni hoti hai। tumne drama anusaar aasakti tod di hai। nishchaybuddhi hi jaante hain, hamaara jo kuchh hai woh baba ko de diya। kehte bhi hain na - he bhagwan, aapne jo kuchh diya hai woh aapka hi hai, hamaara nahin hai। woh to hota hai bhakti maarga। us samay to baba door tha। ab baba bahut nazdeek hai। saamne unka banna hota hai।

tum kehte ho baba, baba ke shareer ko nahin dekhna hai। buddhi chali jaati hai oopar। bhal yeh loan liya hua shareer hai parantu tumhaari buddhi mein hai ham shivbaaba se baat karte hain। yeh to kiraaye par liya hua rath hai। unka thode hi hai। yeh to zaroor hai, jitna bada aadmi hoga to kiraaya bhi bahut milega। makaan maalik dekhega - raaja makaan lete hain to ek hazaar kiraaye ka 4 hazaar bol dega kyonki samajhte hain yeh to dhanvaan hai। raaje log kabhi bhi bolenge nahin ki yeh to jaasti lete ho। nahin, unhon ko paise aadi ki parvaah hi nahin rehti hai। woh khud koi se baat nahin karte hain। private secretary hi baat karte hain। aajkal to rishvat bigar kaam nahin chalta। baba to bahut anubhvi hai। vo log bade royal hote hain। cheez pasanda ki bas, phir secretary ko kahenge inse phainsala kar le aao। aise maal khol kar rakhenge। mahaaraaja-mahaaraani donon aayenge, jo cheez pasanda hogi un par sirf aankh se ishaara karenge। secretary baat kar, beech mein apna hissa nikaal lete hain। koi-koi raajaayen saath mein paisa le aate, secretary ko kahenge inko paisa de do। baba to sabke connection mein aaye hain। jaante hain kaise-kaise unhon ki act chalti hai। jaise raajaaon ke paas khajaanchi rehte hain, vaise yahaan bhi shivbaaba ka khajaanchi hai। yeh to trustee hai। baba ka inmen koi moh nahin hai, isne apne paise mein hi moh nahin rakha, sab kuchh shivbaaba ko de diya to phir shivbaaba ke dhan mein moh kaise rakhenge। yeh trustee hai। jinke paas dhan rehta hai, aajkal to government kitna jaanch karti hai। vilaayat se aate hain to ekdam achhi reeti jaanch karte hain।

ab tum bachche jaante ho kaise beggar banna hai। kuchh bhi yaad na aaye। aatma ashareeri ban jaaye। is shareer ko bhi apna na samjhe। hamaara kuchh bhi na rahe। baap samjhaate hain, apne ko aatma samjho, abhi tumko vaapis jaana hai। tum jaante ho beggar kaise banna hota hai। shareer se bhi mamatva toot jaae। aap muye mar gai duniya। yeh manzil hai। samajhte ho baba theek kehte hain। ab hamko vaapis jaana hai। shivbaaba ko tum jo kuchh dete ho, uska phir return mein doosre janma mein mil jaata hai isliye kehte hain yeh sab kuchh eeshvar ne hi diya hai। aage janma mein aisa achha karma kiya hai, jiska phal mila hai। shivbaaba rakhta kiska bhi nahin hai। bade bade raajaayen, zameedaar aadi hote hain to unko nazraana bhi dete hain। phir koi nazraana lete, koi nahin lete। vahaan to tum kuchh bhi daan-punya nahin karte ho kyonki vahaan to sabke paas paise bahut hain। daan kisko karenge। gareeb to vahaan hote nahin। tum hi fakeer se ameer aur ameer se fakeer bante ho। kehte hain na inko tanduroosti bakhsho। kripa karo। yeh karo। aage shuru mein bhi shivbaaba se hi maangate the। phir vyabhichaari ban gaye hain to sabke aage jaate rehte hain। kehte hain jholi bhar do। kitne pattharbuddhi hain। kehte bhi hain pattharbuddhi se paarasbuddhi banaate hain। to tum bachchon ko khushi bahut rahni chaahiye। gaayan bhi hai ateendriy sukh poochhna ho to gopi vallabh ke gop-gopiyon se poochho। kisko bahut phaayda hota hai to bahut khushi hoti hai। to tum bachchon ko bhi bahut khushi rahni chaahiye। tumko 100 percent khushi thi phir ghatti gai। ab to kuchh bhi nahin hai। pahle thi behad ki baadshaahi। phir hoti hai had ki raajaai, alpakaal ke liye। ab birla ke paas kitni dher milkiyat hai। mandir banaate hain, usse kuchh bhi nahin milta। gareebon ko thode hi kuchh dete hain। mandir banaaya, jahaan manushya aakar maatha tekenge। haan, gareeb ko daan mein dete hain to uska return mein mil sakta hai। dharmashaala banaate hain to bahut manushya jaakar vahaan vishraam paate hain to doosre janma mein alpakaal ke liye sukh mil jaata hai। koi hospital banaata hai to bhi alpakaal ke liye sukh milta hai ek janma ke liye। to behad ka baap bachchon ko baith samjhaate hain, is purooshottam sangamayug ki bahut mahima hai। tumhaari bhi bahut mahima hai jo tum purooshottam bante ho। tum braahmanon ko hi bhagwan aakar padhaate hain। vahi gyaan ka saagar hai। is saare manushya srishti roopi vriksha ka beejroop hai। saare drama ke aadi-madhya-ant ka raaz samjhaate hain। tumse poochhenge kya tumko padhaate hain! bolo, kya yeh bhool gaye ho - geeta mein bhagvaanuvaach hai na, main tumko raajaaon ka raaja banaata hoon। iska arth tum abhi samajhte ho। patit raajaayen paavan raajaaon ki pooja karte hain isliye baap kehte hai tumko raajaaon ka raaja banaata hoon। yeh lakshmi-naaraayan svarga ke maalik the na। svarga ke devtaaon ko dvaapar-kaliyug mein sab naman-poojan karte hain। in baaton ko abhi tum samajhte ho। bhakta log kuchh bhi samajhte thode hi hain। woh to sirf shaastron ki kahaaniyaan padhte-sunte rehte hain। baap kehte hain - tum jo geeta aadhaakalpa se padhte sunte aaye ho, usse kuchh praapti hui? pet to kuchh bhi bhara nahin। abhi tumhaara pet bhar raha hai। tum jaante ho yeh part ek hi baar chalta hai। khud bhagwan kehte hain main is tan mein pravesh karta hoon। baap inke dvaara bolte hain to zaroor pravesh karenge। oopar se direction denge kya! kehte hain main sammukh aata hoon। abhi tum sun rahe ho। yeh brahma bhi kuchh nahin jaante the। abhi jaante jaate hain। baaki ganga ka paani paavan karne vaala nahin hai, yeh hai gyaan ki baat। tum jaante ho baap sammukh baithe hain, tumhaari buddhi ab oopar mein nahin jaayegi, yeh hai unka rath, inko baba boot bhi kehte hain, dibbi bhi kehte hain। is dibbi mein woh heera hai। kitni first class cheez hai। inko to rakhna chaahiye sone ki dibbi mein। golden aged dibbi banaate hain। baba kehte hain na - dhobi ke ghar se gai chhu। inko kehte hain chhu mantra। chhu mantra se second mein jeevanmukti, isliye unko jaadoogar bhi kehte hain। second mein nishchay ho jaata hai - ham yeh banenge। yeh baaten abhi tum practical mein sunte ho। pahle jab satya naaraayan ki katha sunte the to yeh samajhte the kya? us samay to katha sunte samay vilaayat, steamer aadi yaad rehta hai। satya naaraayan ki katha sunkar phir musaaphiri par jaate the। woh to phir laut aate the। baap to kehte hain tumko phir is chhi-chhi duniya mein lautna nahin hai। bhaarat amarlok, svarga devi-devtaaon ka raajya tha। yeh lakshmi-naaraayan vishwa ke maalik hain na। inke raajya mein pavitrata, sukh, shanti thi। duniya bhi yeh maangati hai - vishwa mein shanti ho, sab milkar ek ho jaaen। ab itne sab dharma milkar ek kaise honge! har ek ka dharma alag, features alag-alag sab ek kaise honge! woh to hai hi shantidham, sukhdhaam। vahaan ek dharma, ek raajya hota hai। doosra koi dharma hi nahin, jo taali baje। usko vishwa mein shanti kaha jaata hai। abhi tum bachchon ko baap padha rahe hain। yeh bhi jaante ho sab bachche ekras nahin padhte hain। nambarvaar to hote hi hain। yeh bhi raajdhaani sthaapan ho rahi hai। bachchon ko kitna samajhdaar banaaya jaata hai।

yeh hai eeshvareey university। bhakta log samajhte nahin। anek baar suna bhi hai - bhagvaanuvaach kyonki geeta hi bhaaratvaasiyon ka dharma-shaastra hai। geeta ki to aparmaapaar mahima hai। sarva shaastramai shiromni bhagvat geeta hai। shiromni arthaat shreshtha te shreshtha patit-paavan sadgati daata hai hi ek bhagwan, jo sabhi aatmaon ka baap hai। bhaaratvaasi arth ko samajhte nahin hain। besamjhi se sirf kah dete hain sab bhaai-bhaai hain। abhi tumko baap ne samjhaaya hai ham bhaai-bhaai hain। ham shantidham ke rahne vaale hain। yahaan part bajaate-bajaate ham baap ko bhi bhool jaate hain, to ghar ko bhi bhool jaate hain। jo baap bhaarat ko saare vishwa ka raajya dete hain, unko sab bhool jaate hain। yeh sab raaz baap hi samjhaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ateendriy sukh ka anubhav karne ke liye smriti rahe ki yahi purooshottam sangamayug hai jabki humein bhagwan padhaate hain, jisse ham raajaaon ka raaja banenge। abhi hi humein drama ke aadi, madhya, ant ka gyaan hai।

2) ab vaapas ghar jaana hai isliye is shareer se bhi poora beggar banna hai। ise bhool apne ko ashareeri aatma samajhna hai।

vardaan:- sada santushta rah apni drishti, vritti, kriti dvaara santushtata ki anubhooti karaane vaale santushtamni bhav

brahman kul mein vishesh aatmaayen vo hain jo sada santushtata ki visheshta dvaara svayan bhi santushta rehti hain aur apni drishti, vritti aur kriti dvaara auron ko bhi santushtata ki anubhooti karaati hain, vahi santushtamniyaan hain jo sada sankalp, bol, sangathan ke sambandh-samparka va karma mein baapdaada dvaara apne oopar santushtata ke golden pushpon ki varsha anubhav karti hain। aisi santushta maniyaan hi baapdaada ke gale ka haar banti hain, raajya adhikaari banti hain aur bhakton ke simran ki maala banti hain।

slogan:- negative aur vesta ko samaapta kar mehnat mukta bano।