बुधवार 24 जुलाई 2024 की दैनिक मुरली

24-07-2024 praatahmurli om shanti "baapdaada"' madhuban

“meethe bachche - baap se wholesale vyaapaar karna seekho, wholesale vyaapaar hai manmanaabhav, alpha ko yaad karna aur karaana, baaki sab hai retail''

prashn:- baap apne ghar mein kin bachchon ki welcome karenge?

uttar:- jo bachche achhi reeti baap ki mat par chalte hain aur koi ko bhi yaad nahin karte hain, deh sahit deh ke sabhi sambandhon se buddhiyog tod ek ki yaad mein rehte hain, aise bachchon ko baap apne ghar mein receive karenge। baap abhi bachchon ko gul-gul (phool) banaate, phir phool bachchon ki apne ghar mein welcome karte hain।

om shanti। bachchon ko apne baap aur shantidham, sukhdhaam ki yaad mein baithna hai। aatma ko, baap ko hi yaad karna hai, is duhkhadhaam ko bhool jaana hai। baap aur bachchon ka yeh hai meetha sambandh। itna meetha sambandh aur koi baap ka hota hi nahin। sambandh ek hota hai baap se phir teacher aur guru se hota hai। abhi yahaan yeh teenon hi ek hain। yeh bhi buddhi mein yaad rahe, khushi ki baat hai na। ek hi baap mila hua hai, jo bahut sahaj raasta bataate hain। baap ko, shantidham aur sukhdhaam ko yaad karo, is duhkhadhaam ko bhool jaao। ghoomo-phiro lekin buddhi mein yahi yaad rahe। yahaan to koi gorakhdhandha aadi nahin hai। ghar mein baithe hain। baap sirf 3 akshar yaad karne ko kehte hain। vaastav mein hai ek akshar - baap ko yaad karo। baap ko yaad karne se sukhdhaam aur shantidham donon varse yaad aa jaate hain। dene vaala to baap hi hai। yaad karne se khushi ka paara chadhega। tum bachchon ki khushi to naameegraami hai। bachchon ki buddhi mein hai - baba hamko ghar mein phir welcome karenge, receive karenge, parantu unko, jo achhi reeti baap ki mat par chalenge aur koi ko yaad nahin karenge। deh sahit deh ke sarva sambandhon se buddhiyog tod maame-kam yaad karna hai। bhaktimaarga mein to tumne bahut seva ki hai parantu jaane ka raasta milta hi nahin। abhi baap kitna sahaj raasta bataate hain, sirf yeh yaad karo - baap, baap bhi hai, shikshak bhi hai, srishti ke aadi-madhya-ant ka gyaan sunaate hain, jo aur koi samjha na sake। baap kehte hain ab ghar chalna hai। phir pahle-pahle satayug mein aayenge। is chhi-chhi duniya se ab jaana hai। bhal yahaan baithe hain parantu yahaan se ab gaye ki gaye। baap bhi khush hote hain, tum bachchon ne baap ko invite kiya hai bahut samay se। ab phir baap ko receive kiya hai। baap kehte hain main tumko gul-gul banaakar phir shantidham mein receive karoonga। phir tum nambarvaar chale jaayenge। kitna sahaj hai। aise baap ko bhoolna nahin hai। baat to bahut meethi aur seedhi hai। ek baat alf ko yaad karo। bhal detail mein samjhaate hain phir pichhaadi mein kehte hain alf ko yaad karo, doosra na koi। tum janma-janmaantar ke aashik ho ek maashook ke। tum gaate aaye ho - baba aap aayenge to ham aapke hi banenge। ab woh aaye hain to ek ka hi banna chaahiye। nishchaybuddhi vijayanti। vijay paayenge raavan par। phir aana hai raamraajya mein। kalpa-kalpa tum raavan par vijay paate ho। brahman bane aur vijay paai raavan par। raamraajya par tumhaara hak hai। baap ko pahchaana aur raamraajya par hak hua। baaki purooshaartha karna hai oonch pad paane ka। vijay maala mein aana hai। badi vijay maala hai। raaja banenge to sab kuchh milega। daas-daasiyaan sab nambarvaar bante hain। sab ek jaise nahin hote। koi to bahut nazdeek rehte hain, jo raaja-raani khaate, jo kuchh bhandaare mein banta woh sab daas-daasiyon ko milta hai, jisko 36 prakaar ka bhojan kaha jaata hai। padmapti bhi raajaaon ko kaha jaata, praja ko padmapti nahin kahenge। bhal vahaan dhan ki parvaah nahin rehti। parantu yeh nishaani devtaaon ki hoti hai। jitna yaad karenge utna sooryavanshi mein aayenge। nai duniya mein aana hai na। mahaaraaja-mahaaraani banna hai। baap knowledge dete hain nar se naaraayan banne ki, jisko raajayog kaha jaata hai। baaki bhakti maarga ke shaastra bhi sabse jaasti tumne padhe hain। sabse jaasti bhakti tum bachchon ne ki hai। ab baap se aakar mile ho। baap raasta to bahut sahaj aur seedha bataate hain ki baap ko yaad karo। baba bachche-bachche kah samjhaate hain। baap bachchon par vaari jaate hain। vaaris hain to vaari jaana pade। tumne bhi kaha tha baba aap aayenge to ham vaari jaayenge। tan-man-dhan sahit kurbaan jaayenge। tum ek baar kurbaan jaate ho, baba 21 baar jaayenge। baap bachchon ko yaad bhi dilaate hain। samajh sakte hain, sab bachche nambarvaar purooshaartha anusaar apna-apna bhaagya lene aaye hain। baap kehte hain meethe bachchon, vishwa ki baadshaahi hamaari jaageer hai। ab jitna purooshaartha tum kar lo। jitna puru-shaartha karenge utna oonch pad paayenge। number one so number last mein hai। number one mein phir zaroor jaayenge। saara madaar purooshaartha par hai। baap bachchon ko ghar le jaane aaye hain। ab apne ko aatma samajh baap ko yaad karenge to paap katte jaayenge। woh hai kaam agni, yeh hai yog agni। kaam agni mein jalte-jalte tum kaale ho gaye ho। bilkul khaak ho pade ho। ab main aakar tumko jagaata hoon। tamopradhaan se satopradhaan banne ki yukti bataata hoon, bilkul simple। main aatma hoon, itna samay deh-abhi-maan mein rahne kaaran tum ulta latak pade the। ab dehi-abhimaani ban baap ko yaad karo। ghar jaana hai, baap lene ke liye aaya hai। tumne nimantran diya aur baap aaye hain। patiton ko paavan banaakar panda ban le jaayenge sab aatmaon ko। aatma ko hi yaatra par jaana hai।

tum ho paandav sampradaay। paandavon ka raajya nahin tha। kaurvon ka raajya tha। yahaan to abhi raajaai bhi khatma ho gai hai। abhi bhaarat ka kitna bura haal ho gaya hai। tum poojya vishwa ke maalik the ab pujaari bane ho। to vishwa ka maalik koi bhi nahin। vishwa ke maalik sirf devi-devta hi bante hain। yeh log kehte hain vishwa mein shanti ho। tum poochho vishwa mein shanti kisko kehte ho? vishwa mein shanti kab hui hai? world ki history-geography repeat hoti rehti hai। chakra phirta rehta hai। bataao vishwa mein shanti kab hui thi? tum kaun-si shanti chaahte ho? koi bata nahin sakenge। baap samjhaate hain vishwa mein shanti to svarga mein thi, jisko paradise kehte hain। Christian log kehte hain barobar Christ se 3 hazaar varsha pahle paradise tha। unhon ki na paaras-buddhi banti hai, na phir pattharbuddhi banti hai। bhaaratvaasi hi paarasbuddhi aur pattharbuddhi bante hain। new world ko heaven kaha jaata, puraani ko to heaven nahin kahenge। bachchon ko baap ne hell aur heaven ka raaz samjhaaya hai। yeh hai retail। wholesale mein to sirf ek akshar kehte hain - maamekam yaad karo। baap se hi behad ka varsa milta hai। yeh bhi puraani baat hai, paanch hazaar varsha pahle bhaarat mein svarga tha। baap bachchon ko sachchi-sachchi kahaani bataate hain। satya naaraayan ki katha, teejri ki katha, amar-katha mashhoor hai। tumko bhi teesra netra gyaan ka milta hai। usko teejri ki katha kaha jaata hai। woh to bhakti ki pustak bana di hai। ab tum bachchon ko sab baaten achhi reeti samjhaai jaati hai। retail aur wholesale hota hai na! itna gyaan sunaate hain jo saagar ko syaahi banaao to bhi ant na aaye - yeh hua retail। wholesale mein sirf kehte hain manmanaabhav। akshar hi ek hai, uska arth bhi tum samajhte ho aur koi bata na sake। baap ne koi sanskrit mein gyaan nahin diya hai। woh to jaisa raaja hai woh apni bhaasha chalaate hain। apni bhaasha to ek hindi hi hogi। phir sanskrit kyon seekhni chaahiye। kitna paisa kharcha karte hain।

tumhaare paas koi bhi aaye unko bolo baap kehte hain mujhe yaad karo to shantidham-sukhdhaam ka varsa milega। yeh samajhna ho to baithkar samjho। baaki hamaare paas aur koi baat nahin hai। baap alf hi samjhaate hain। alpha se hi varsa milta hai। baap ko yaad karo to paap naash hon phir pavitra ban shantidham mein chale jaayenge। kehte bhi hain shanti deva। baap hi shanti ke saagar hain to unko hi yaad karte hain। baap jo svarga sthaapan karte hain woh to yahaan hi hota hai। sookshm vatan mein kuchh bhi hai nahin। yeh to saakshaatkaar ki baaten hain। aisa farishta banna hai। banna yahaan hi hai। pharishta bankar phir ghar chale jaayenge। raajdhaani ka varsa baap se milta hai। shanti aur sukh donon varse milte hain। baap ke sivaae aur koi ko saagar kah nahin sakte hain। baap jo gyaan ka saagar hai vahi sarva ki sadgati kar sakte hain। baap poochhte hain, main tumhaara baap, teacher, guru hoon, tumhaari sadgati karta hoon, phir tumhaari durgati kaun karte hain? raavan। durgati aur sadgati ka yeh khel hai। koi moonjhate hain to poochh sakte hain। bhakti maarga mein prashn dher uthte hain, gyaan maarga mein prashn ki baat nahin। shaastron mein to shivbaaba se lekar devtaaon ki bhi kitni glaani kar di hai, kisko bhi chhoda nahin hai। yeh bhi drama bana hua hai, phir bhi karenge। baap kehte hain yeh devi-devta dharma bahut sukh dene vaala hai। phir yeh duhkh nahin rahega। baap tumhein kitna samajhdaar banaate hain। yeh lakshmi-naaraayan samajhdaar hain, tab to vishwa ke maalik hain। besmajh to vishwa ke maalik ho na saken। pahle to tum kaante the, ab phool ban rahe ho isliye baba bhi gulaab ka phool le aate hain - aisa phool banna hai। khud aakar phoolon ka bageecha banaate hain। phir raavan aata hai kaanton ka jangal banaane। kitna clear hai। yeh sab simran karna hai। ek ko yaad karne se usmein sab aa jaata hai। baap se varsa milta hai। yeh bahut bhaari daulat hai, shanti ka bhi varsa milta hai kyonki shanti ka saagar vahi hai। laukik baap ki aisi mahima kabhi nahin karenge। shreekrishna hai sabse pyaara। pahle-pahle janma hi unka hota hai isliye unko sabse jaasti pyaar karte hain। baap bachchon ko hi saare ghar ka samaachaar dete hain। baap bhi pakka vyaapaari hai, koi virla aisa vyaapaar kare। wholesale vyaapaari koi mushkil banta hai। tum wholesale vyaapaari ho na! baap ko yaad karte hi rehte ho। kai retail mein sauda kar phir bhool jaate hain। baap kehte hain nirantar yaad karte raho। varsa mil gaya phir yaad karne ki darkaar nahin rahegi। laukik sambandh mein baap boodha ho jaata hai to koi-koi bachche pichhaadi tak bhi sahaayak bante hain। koi to milkiyat mili aur udaakar khalaas kar dete hain। baba sab baaton ka anubhvi hai। tab to baap ne bhi inko apna rath banaaya hai। gareebi ka, saahookaari ka sabmen anubhvi hai। drama anusaar yeh ek hi rath hai। yeh kabhi badal nahin sakta। drama bana hua hai, ismen kabhi change ho nahin sakti hai। sab baaten wholesale aur retail mein samjhaakar phir ant mein kah dete hain manmanaabhav, madhyaaji bhav। manmanaabhav mein sab aa jaata hai। yeh bahut bhaari khajaana hai, unse jholi bharte hain। avinaashi gyaan ratna ek-ek laakh roopaye ke hain। tum padmaapadma bhaagyashaali bante ho। baap to khushi, na khushi donon se nyaara hai। saakshi ho drama dekh rahe hain। tum part bajaate ho। main part bajaate bhi saakshi hoon। janma-maran mein nahin aata hoon। aur to koi inse chhoot nahin sakta, moksha mil na sake। yeh anaadi bana-banaaya drama hai। yeh bhi wonderful hai। chhoti-si aatma mein saara part bhara hua hai। yeh avinaashi drama kabhi vinaash ko nahin paata। achha।

meethe-meethe sikeeldhe bachchon prati maat-pita baapdaada ka dil va jaan, sik va prem se, serviceable bachchon ko nambarvaar puru-shaartha anusaar yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise baap bachchon par vaari jaate hain, aise tan-man-dhan sahit ek baar baap par poora kurbaan jaakar 21 janmon ka varsa lena hai।

2) baap jo avinaashi anmol khajaana dete hain usse apni jholi sada bharpoor rakhni hai। sada isi khushi va nashe mein rehna hai ki ham padmaapadma bhaagyashaali hain।

vardaan:- brahman jeevan ki property aur personality ka anubhav karne aur karaane vaali vishesh aatma bhav

baapdaada sabhi brahman bachchon ko smriti dilaate hain ki brahman bane - aho bhaagya! lekin brahman jeevan ka varsa, property santushtata hai aur brahman jeevan ki personality prasannata hai। is anubhav se kabhi vanchit nahin rehna। adhikaari ho। jab daata, vardaata khuli dil se praaptiyon ka khajaana de rahe hain to use anubhav mein laao aur auron ko bhi anubhvi banaao tab kahenge vishesh aatma।

slogan:- last samay ka sochne ke bajaae last sthiti ka socho।