बुधवार 21 अगस्त 2024 की दैनिक मुरली

21-08-2024 praatahmurli om shanti "baapdaada"' madhuban

meethe bachche - tum ho chaitanya light house, tumhein sabko baap ka parichay dena hai, ghar ka raasta bataana hai

prashn:- aage chalkar kaun-sa direction aur kis vidhi se anek aatmaon ko milne vaala hai?

uttar:- aage chalkar bahuton ko yeh direction milega ki tum brahmaakumaar-kumaariyon ke paas jaao to tumko yeh vaikuntha ka prince banne ka gyaan denge। yeh ishaara unhon ko brahma ke saakshaatkaar se milega। aksar karke brahma aur shreekrishna ka hi saakshaatkaar hota hai। jaise aadi mein saakshaatkaar ka part chala, aise hi ant mein bhi chalne vaala hai।

om shanti। roohaani baap bachchon se poochhte hain, sabse to nahin poochh sakte। nalini beti se poochhte hain ki yahaan kya kar rahi ho? kiski yaad mein baithi ho? baap ki। sirf baap ki yaad mein baithi ho ya aur bhi kuchh yaad hai? baap ki yaad se to vikarma vinaash honge, aur kya yaad karti ho? yeh buddhi ka kaam hai na। ham aatmaon ko apne ghar jaana hai to ghar ko bhi yaad karna hai। achha, aur kya karna hai? kya ghar mein jaakar baith jaana hai! vishnu ko svadarshan chakra dikhaate hain na। unka arth bhi baap ne ab samjhaaya hai। sva arthaat aatma ko darshan hua, 84 janmon ke chakra ka। to woh chakra bhi phiraana pade। tum jaante ho ham 84 ka chakra lagaakar ghar jaayenge। phir vahaan se aayenge satayug mein part bajaane। phir 84 ka chakra lagaayenge। vishnu ko koi chakra hota nahin। woh to hai satayug ka devta। vishnupuri kaho ya lakshmi-naaraayan ki puri kaho, svarga kaho। svarga mein lakshmi-naaraayan ka raajya tha। agar raadhe-krishna ka raajya kehte hain to yeh bhool karte hain। raadhe-krishna ka raajya to hota nahin kyonki donon alag-alag raajaai ke prince-princess the, raajaai ke maalik to phir svayanvar ke baad banenge। to yeh jo vishnu ko chakra diya hai, yeh chakra hai tumhaara। to yahaan jab baithte ho to sirf shanti mein nahin baithna hai। varsa bhi yaad karna hai isliye yeh chakra hai। baap kehte hain tum light house bhi ho, bolta chalta light house ho। ek aankh mein hai shantidham, ek aankh mein hai sukhdhaam। donon ko yaad karna padta hai। yaad se to paap katne hain। ghar ko yaad karne se ghar mein chale jaayenge phir chakra ko bhi yaad karna hai। yeh saare chakra ki knowledge tumko hi hai। 84 ka chakra lagaaya hai। ab yeh antim janma hai mrityulok mein। nai duniya ko kaha jaata hai amar-lok। amar arthaat tum sadaiv jeete rehte ho। tum kabhi marte nahin ho। yahaan to baithe-baithe achaanak mrityu ho jaati hai। beemaariyaan hoti hain, vahaan marne ka dar nahin kyonki amarlok hai। tum budhe hote ho to bhi gyaan hai ham garbhamhal mein jaakar pravesh karenge। abhi jaate hain garbha jel mein। vahaan to garbha mahal hota hai। vahaan paap to karte nahin jo saja bhogni pade। yahaan to paap karte hain, jis kaaran saja bhog kar baahar nikalte hain to phir paap shuru kar lete hain। yeh hai paap aatmaon ki duniya। yahaan to duhkh hi hota hai। vahaan duhkh ka naam nahin। to ek aankh mein shantidham, doosri aankh mein sukhdhaam rakho। bhal tum janma-janmaantar jap-tap aadi karte aaye ho parantu woh gyaan to nahin hai na। woh hai bhakti। usmein koi yukti bhi nahin milti ki tum aise satopradhaan ban sakte ho। koi bhi nahin jaante। bas suna hai shreekrishna bhagvaanuvaach deh sahit… yeh geeta ke akshar hain jo padhkar sunaate hain। aise nahin kehte ki tum aise bano। sirf padhte hain bhagwan aise kahkar gaya tha, jab aaya tha patiton ko paavan banaane। sirf geeta mein parampita paramatma ke badle shreekrishna ka naam daal diya hai। ab shreekrishna to rathi hai na। unko rath chaahiye kya? woh to khud deh-dhaari hai। shreekrishna ka naam kisne rakha? jaise chhathi hoti hai to naam sabke padte hain। baap ko to sirf shiv hi kaha jaata hai। tum aatmaayen janma-maran mein aati ho to shareer ka naam badalta hai। shivbaaba to janma-maran mein aata nahin। woh sadaiv shiv hi hai। buri (bindi) jab likhte hain to kehte hai shiv। bindi aatma to hai bilkul sookshm। aatma ka agar saakshaatkaar hota to bhi kisko samajh mein nahin aata। devi ko dekh khush ho jaayenge। achha, phir kya! praapti to kuchh nahin, arth nahin। sirf naudha bhakti ki, darshan kiya to usmein hi khush ho jaate hain। baaki mukti-jeevanmukti ki to baat hi nahin hai। woh hai sab bhakti maarga। yahaan yeh hai gyaan maarga। yahaan aksar karke saakshaatkaar hota hai brahma ka, phir shreekrishna ka hoga। kahenge is brahma ke paas jaao to tum krishnapuri va vaikuntha mein jaayenge। lakshmi-naaraayan ka bhi saakshaatkaar ho sakta hai। aise nahin, saakshaatkaar hua maana sadgati ho gai। yeh sirf ishaara milta hai, yahaan jaao। aage chal bahuton ko saakshaatkaar hoga, direction milega। tumhaara trimoorti bhi akhbaar mein padta hai, brahmaakumaariyon ka naam bhi padta hai। to brahma ka hi saakshaatkaar hoga ki inke paas jaane se tumko yeh vaikuntha ka prince banne ka gyaan milega। jaise arjun ko vishnu ka aur vinaash ka saakshaatkaar hua।

baap kehte hain tumko kamal phool samaan banna hai। parantu sthaai to tum nahin rehte ho isliye alankaar vishnu ko de diye hain। nahin to devtaaon ko shankh aadi ki darkaar hai kya! mukh se sunaane ko shankh dhvani kaha jaata hai। kamal ka raaz bhi baap samjhaate hain। tum braahmanon ko is samay kamal phool samaan banna hai। gada hai 5 vikaaron roopi maaya ko jeetne ki। baap upaay bataate hain maamekam yaad karo to tumhaare vikarma vinaash honge। shreemat par chalkar patit-paavan baap ko yaad karo। doosra to koi patit-paavan hai nahin sivaae ek baap ke। baap kehte hain mujhe bulaate hi isliye hain ki ham sabko is shareer se chhudaakar paavan duniya mein le chalo। to baap hi aakar sab aatmaon ko patit se paavan banaate hain kyonki apvitra aatmaayen to ghar mein athva svarga mein ja nahin sakti hain। baap kehte hain pavitra banna hai to mujhe yaad karo। yaad se hi tumhaare paap katte jaayenge। yeh main guarantee karta hoon। bulaate hain - he patit-paavan aao। hamko paavan banaakar nai duniya mein le chalo। to kaise jaayenge? kitni seedhi baat bataate hain। baap ki sahaj knowledge aur sahaj baat hai। kehte hain kaamkaaj karte hue mujhe yaad karo। bhal naukri aadi karo, bhojan banaao to bhi yaad mein rahkar, to bhojan bhi shuddh hoga isliye gaaya jaata hai brahma bhojan ke liye devtaaon ko bhi dil hoti hai। yeh bachchiyaan bhi bhog lekar jaati hain to vahaan mahphil hoti hai। braahmanon aur devtaaon ka mela lagta hai। bhojan sveekaar karne aate hain। brahman log jab bhojan paan karte hain to bhi mantra japte hain। brahma bhojan ki bahut mahima hai। sannyaasi to brahm ko hi yaad karte hain। woh hain had ke sannyaasi। kehte hain hamne gharbaar milkiyat aadi sab chhoda hai। phir abhi andar ghus padte hain। tumhaara hai behad ka sannyaas। tum is puraani duniya ko hi bhool jaate ho। tumko phir jaana hai nai duniya mein। ghar grihastha mein rehte buddhi mein yeh hai ki ab hamko jaana hai sukhdhaam via shantidham। shantidham ko bhi yaad karna pade। baap ko, shantidham aur sukhdhaam ko yaad karte hain। yeh hamaara bahut janmon ke ant ka janma hai। 84 janma poore hue। sooryavanshi se chandravanshi phir vaishya, shoodra vanshi banen....। ve log phir kehte aatma so paramatma, aatma ko koi lep chhep nahin lagta kyonki aatma hi paramatma hai। baap kehte hain - yeh bhi unhon ka ulta arth hai। baap baith ham so ka arth samjhaate hain। ham aatma parampita paramatma ki santaan hoon। pahle-pahle ham svarga-vaasi devta the phir chandravanshi kshatriy bane, 2500 varsha poora hua phir vaishya shoodra vanshi vikaari banen। ab ham brahman choti bante hain। yahaan baithe hain, jaise ki 84 ki baajoli khelte hain। yeh baajoli ka bhi gyaan hai। aage teerthon par jaate the to bhi aise baajoli karte nishaan daalte jaate the। abhi tumhaara to sachcha teertha hai - shantidham aur sukhdhaam। tum ho roohaani pande। sabko raay dete ho - baap ko yaad karo to shantidham chale jaayenge। saadhu santa aadi sab shantidham mein jaane ke liye hi mehnat karte hain। parantu ja koi bhi nahin sakte। jaayenge phir saara whole lot ikattha। baap ne samjhaaya hai satayug mein to bahut thode hote hain phir vriddhi hoti jaati hai। to tum ho svadarshan chakradhaari। devtaayen nahin hain। parantu is samay tumhaari maaya ke saath yuddha chal rahi hai। us ladaai mein bhi jisko jordaar samajhte hain to phir unke paas jaakar sharan lete hain। abhi tum kiski sharan lete ho? stri-puroosh donon kehte hain ham sharan padte hain teri। mera to ek shivbaaba, doosra na koi, sab aatmaon ka baap to ek hai na। us ek ke tum bachche ho। saadhu santa to ek nahin hain। anek bhagwan ho jaate hain। jo ghar se roothe woh bhagwan, phir bade-bade saahookaar, karodapti jaakar unhon ke shishya bante hain aur mahphil manaate hain gande khaan-paan ki। tamopradhaan manushya hain na। hinduon ko phir apne dharma ka hi pata nahin hai।

baap samjhaate hain tum to vaastav mein aadi sanaatan devi-devta dharma ke ho, parantu patit ban gaye ho isliye apne ko devta kahla nahin sakte। woh dharma hi praayah lop ho gaya hai। manushya kitne vikaari criminal aai vaale hain। ek minister baba ke paas aaya tha, bola - hamaari to criminal aai jaati hai। ab baap samjhaate hain - bachche, civil aai bano। jab tak criminal aai jaati hai tab tak tum patit ho। apne ko bhaai-bhaai samjho to woh criminal drishti ud jaayegi। ham aatma bhaai-bhaai hain। ek baap se varsa le rahe hain। aatma ka takhta yeh bhrakuti hai, isko kaha jaata hai akaal takhta। akaal aatma is takhta par viraajmaan hai। yeh to mitti ka putla hai। saara part aatma mein hi bhara hua hai। baap kehte hain main 5 hazaar varsha ke baad aata hoon, tum bachchon ko varsa dene। tum jaante ho ham aaye hain health, wealth, happiness ka varsa lene। satayug mein athaah dhan milta hai। tum 21 peedhi devta bante ho। budhaape bigar kabhi koi marega nahin। yahaan to baithe-baithe achaanak mar padte hain। garbha mein andar bhi mar padte hain। vahaan to duhkh ka naam nahin hota। unko kaha jaata hai sukhdhaam, raam raajya। yeh hai duhkhadhaam raavan raajya। satayug mein raavan hota hi nahin।

to yeh 84 ka chakra bhi buddhi mein tumko yaad rahega। bahut khushi rahegi। tum jaante ho ham naye vishwa ke arthaat satayug ke maalik banne vaale hain। geeta mein bhi bhagvaanuvaach hai na - he bachche, deh sahit deh ke sab sambandhon ko chhodo। apne ko aatma samajh maamekam yaad karo। tumhaara sachcha-sachcha khuda dosta woh hai। allaah avaldeen ka naatak, haatamtaai ka naatak - sab is samay ke hain। abhi manushya kitna maatha maarte rehte hain - bachche kam paida hon। behad ka baap kitna kam kar dete hain। saare vishwa mein, satayug mein 9 laakh aabaadi jaakar rehti hai। baaki itne karodon manushya hote hi nahin। sab muktidhaam, shantidham mein chale jaayenge। yahi to karaamat ki baat hai na। ek devi-devta dharma ka foundation lagaakar baaki sab vinaash kar dete hain। yeh 84 ka chakra achhi reeti buddhi mein bithaana hai। yeh hai svadarshan chakra। baaki chakra se koi ka gala aadi nahin kaatna hai। shaastron mein phir shreekrishna ke liye hinsak baaten laga di hain। sabko svadarshan chakra se maara। yeh bhi glaani hui na। kitna hinsak bana diya hai। tum double ahinsak bante ho। kaam kataari chalaana, yeh bhi hinsa hai। devtaaon ko to pavitra kaha jaata hai। yogbal se jabki vishwa ke maalik ban sakte ho to yogbal se bachche kyon nahin paida ho sakte hain। saakshaatkaar hoga ab bachcha hona hai। baba to samajhte hain abhi yeh puraana shareer chhodenge aur golden spoon in mouth। tum bhi samajhte ho ham amarlok mein janma lenge to golden spoon in mouth hoga। gareeb praja bhi chaahiye na। duhkh ki koi bhi baat hoti hi nahin hai। praja ke paas thode hi itna dhan maal aadi hota hai। baaki haan, sukh hoga, aayu badi hogi। raaja, raani, saahookaar praja sab chaahiye na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ki yaad ke saath-saath khushi mein rahne ke liye 84 ke chakra ko bhi yaad karna hai। svadarshan chakra phiraana hai। khuda ko apna sachcha dosta banaana hai।

2) double ahinsak banne ke liye criminal aai ko badal civil aai banaani hai। ham aatma bhaai-bhaai hain, yeh abhyaas karna hai।

vardaan:- sarvashaktimaan baap ko combined roop mein saath rakhne vaale saphalta-moorta bhav

jin bachchon ke saath sarva shaktimaan baap combined hai - unka sarvashaktiyon par adhikaar hai aur jahaan sarva shaktiyaan hain vahaan saphalta na ho, yeh asambhav hai। yadi sada baap se combined rahne mein kami hai to saphalta bhi kam hoti hai। sada saath nibhaane vaale avinaashi saathi ko combined rakho to saphalta janma siddha adhikaar hai kyonki saphalta master sarvashaktimaan ke aage-peechhe ghoomti hai।

slogan:- sachche vaishnav woh hain jo vikaaron rupi gandagi ko chhoote bhi nahin।