बुधवार 16 अक्टूबर 2024 की दैनिक मुरली

16-10-2024 praatahmurli om shanti "baapdaada"' madhuban

“meethe bachche - tum maat-pita ke sammukh aaye ho, apaar sukh paane, baap tumhein ghanere duhkhon se nikaal ghanere sukhon mein le jaate hain''

prashn:- ek baap hi reserve mein rehte, punarjanma nahin lete hain - kyon?

uttar:- kyonki koi to tumhein tamopradhaan se satopradhaan banaane vaala chaahiye। agar baap bhi punarjanma mein aaye to tumko kaale se gora kaun banaaye isliye baap reserve mein rehta hai।

prashn:- devtaayen sada sukhi kyon hain?

uttar:- kyonki pavitra hain, pavitrata ke kaaran unki chalan sudhri hui hai। jahaan pavitrata hai vahaan sukh-shanti hai। mukhya hai pavitrata।

om shanti। meethe-meethe sikeeldhe bachchon prati roohaani baap samjhaate hain। woh baap bhi hai, maat-pita bhi hai। tum gaate the na - tum maat-pita ham baalak tere… sab pukaarte rehte hain। kisko pukaarte hain? parampita paramatma ko। baaki unko samajh mein nahin aata ki unki kripa se sukh ghanere kaun-se aur kab mile? sukh ghanere kisko kaha jaata hai, woh bhi nahin samajhte। abhi tum yahaan saamne baithe ho, jaante ho yahaan kitne duhkh ghanere hain। yeh hai duhkhadhaam। woh hai sukhdhaam। kiski buddhi mein nahin aata hai ki ham 21 janma svarga mein bahut sukhi rehte hain। tumko bhi pahle yeh anubhav nahin tha। abhi tum samajhte ho ham us parampita paramatma, maat-pita ke saamne baithe hain। jaante ho ham 21 janmon ke liye svarga ki baadshaahi praapta karne ke liye hi yahaan aate hain। baap ko bhi jaan liya aur baap dvaara saare srishti chakra ko bhi samajh liya hai। ham pahle ghanere sukh mein the phir duhkh mein aaye, yeh bhi nambarvaar har ek ki buddhi mein rehta hai। student ko to sadaiv yaad rehna chaahiye parantu baba dekhte hain ghadi-ghadi bhool jaate hain isliye phir murjha jaate hain। chhui mui avastha ho jaati hai। maaya vaar kar leti hai। woh jo khushi honi chaahiye, woh nahin rehti। nambarvaar pad to hai na। svarga mein to jaate hain parantu vahaan bhi raaja se lekar rank tak rehte hain na। woh gareeb praja, woh saahookaar। svarga mein bhi aise hain to narka mein bhi aise hain। oonch aur neech। abhi tum bachche jaante ho ham purooshaartha karte hain - sukh ghanere paane ke liye। in lakshmi-naaraayan ko sabse jaasti sukh ghanere hain na। mukhya hai pavitrata ki baat। pavitrata ke sivaae pees aur prosperity mil nahin sakti। ismen chalan bahut achhi chaahiye। manushya ki chalan sudharti hai pavitrata se। pavitra hain to unko devta kaha jaata hai। tum yahaan aaye ho devta banne ke liye। devtaayen sada sukhi the। manushya koi sada sukhi ho na sake। sukh hota hi hai devtaaon ko। in devtaaon ki hi tum pooja karte the na kyonki pavitra the। saara madaar hai pavitrata par। vighna bhi ismen hi padte hain। chaahte hain duniya mein pees ho। baba kehte hain sivaae pavitrata ke shanti kabhi ho na sake। pahli-pahli mukhya hai hi pavitrata ki baat। pavitrata se hi sudhri hui chalan hoti hai। patit hone se phir chalan bigadti hai। samajhna chaahiye ab hamko phir se devta banna hai to pavitrata zaroor chaahiye। devtaayen pavitra hain tab to apvitra manushya unke aage maatha tekte hain। mukhya baat hai pavitrata ki। pukaarte bhi aise hain he patit-paavan aakar hamko paavan banaao। baap kehte hain kaam mahaashatru hai, in par jeet pahno। in par jeet paane se hi tum pavitra banenge। tum jab pavitra satopradhaan the to shanti thi, sukh bhi tha। tum bachchon ko ab yaad aai hai, kal ki to baat hai। tum pavitra the to athaah sukh-shanti sab kuchh tha। ab phir tumko yeh lakshmi-naaraayan banna hai, ismen pahli mukhya baat hai sampoorn nirvikaari banna। yeh to gaayan hai, yeh hai gyaan yagya, ismen vighna to zaroor padenge। pavitrata ke oopar kitna tang karte hain। aasuri sampradaay aur daivi sampradaay bhi gaai hui hai। tumhaari buddhi mein hai satayug mein yeh devta the। bhal soorat to manushyon ki hai parantu unhon ko devta kaha jaata hai। vahaan hain sampoorn satopradhaan। koi bhi khaami vahaan hoti nahin। har cheez perfect hoti hai। baap perfect hai to bachchon ko bhi perfect banaate hain। yogbal se tum kitne pavitra, beautiful bante ho। yeh musaaphir to ever gora hai, jo tumko saanvare se aakar gora banaate hain। vahaan natural beauty hoti hai। khoobsoorat banaane ki darkaar nahin rehti। satopradhaan hote hi hain khoobsoorat। vahi phir tamopradhaan hone se kaale ho padte hain। naam hi hai shyaam aur sundar। shreekrishna ko shyaam aur sundar kyon kehte hain? iska arth kabhi koi bata na sake, sivaae baap ke। bhagwan baap jo baaten sunaate hain woh aur koi manushya suna nahin sakenge। chitron mein svadarshan chakra devtaaon ko de diya hai।

baap samjhaate hain - meethe-meethe bachchon, svadarshan chakra ki to devtaaon ko darkaar nahin। woh kya karenge shankh aadi। svadarshan chakradhaari tum brahman bachche ho। shankhadhvani bhi tumko karni hai। tum jaante ho ab vishwa mein kaise shanti sthaapan ho rahi hai। saath mein chalan bhi achhi chaahiye। bhakti maarga mein bhi tum devtaaon ke aage jaakar apni chalan ka varnan karte ho na। parantu devtaayen koi tumhaari chalan ko sudhaarte nahin hain। sudhaarne vaala aur hai। woh shivbaaba to hai niraakaar। unke aage aise nahin kahenge ki aap sarvagun sampanna ho....... shiv ki mahima hi alag hai। devtaaon ki mahima gaate hain। parantu ham aise kaise banen। aatma hi pavitra aur apvitra banti hai na। ab tumhaari aatma pavitra ban rahi hai। jab aatma sampoorn ban jaayegi to phir yeh shareer patit nahin rahega phir jaakar paavan shareer lenge। yahaan to paavan shareer ho na sake। paavan shareer tab ho jab prakriti bhi satopradhaan ho। nai duniya mein har ek cheez satopradhaan hoti hai। abhi 5 tatva tamopradhaan hain isliye kitne upadrav hote rehte hain। kaise manushya marte rehte hain। teertha yaatra par jaate hain, koi accident hua mar padte। jal, prithvi aadi kitna nuksaan karte hain। yeh sab tatva tumko madad karte hain। vinaash mein achaanak baadh aa jaati, toofaan lagte - yeh hai natural aapdaayen। woh bombs aadi jo banaate hain, woh bhi drama mein noondh hai। unko eeshvareey aapdaayen nahin kahenge। woh to manushyon ke banaaye hue hain। arth-quake aadi koi manushyon ke banaaye hue nahin hain। yeh aapdaayen sab aapas mein milti hain, prithvi se halkaai hoti hai। tum jaante ho kaise baba hamko ekdam halka banaakar saath le jaate hain nai duniya mein। maatha halka hone se phir chusta ho jaate hain na। tumko baba bilkul halka kar dete hain। sab duhkh door ho jaate hain। abhi tum sabka maatha bahut bhaari hai phir sab halke, shant, sukhi ho jaayenge। jo jis dharma vaale hain, sabko khushi honi chaahiye, baba aaya hua hai, sabki sadgati karne। jab poori sthaapna ho jaati hai tab phir sab dharma vinaash ho jaate hain। aage tumhaari buddhi mein yeh khyaal bhi nahin tha। abhi samajhte ho, gaayan bhi hai brahma dvaara sthaapna। baaki anek dharma sab vinaash। yeh kartavya ek baap hi karte hain, doosra koi kar na sake। sivaae ek shivbaaba ke। aisa alaukik janma aur alaukik kartavya kiska ho na sake। baap hai oonch te oonch। to unka kartavya bhi bahut oonch hai। karnakraavanhaar hai na। tum knowledge sunaate ho baap aaya hua hai, is srishti se paap aatmaon ka bojh utaarne ke liye। yeh to gaayan bhi hai na - baap aate hain ek dharma ki sthaapna aur anek dharmon ka vinaash karne। tumko ab kitna oonch mahaatma bana rahe hain। mahaatma devta bigar koi hota nahin। yahaan to anekon ko mahaatma kehte rehte hain। parantu mahaatma kaha jaata hai mahaan aatma ko। raamraajya kaha hi jaata hai svarga ko। vahaan raavan raajya hi nahin, to vikaar ka savaal bhi nahin uth sakta isliye usko kaha jaata hai sampoorn nirvikaari। jitna sampoorn banenge utna bahut samay sukh paayenge। apoorna to itna sukh pa na saken। school mein bhi koi sampoorn, koi apoorna hote hain। pharka dikhaai padta hai। doctor maana doctor। parantu koi ki pagaar bahut kam, koi ki bahut jaasti। vaise hi devtaayen to devtaayen hote hain parantu martabe ka pharka kitna pad jaata hai। baap aakar tumko oonch padhaai padhaate hain। shreekrishna ko kehte hain shyaam sundar। saanvara krishna bhi dikhaate hain। shreekrishna saanvara thode hi hota hai। naam roop to badal jaata hai na। so bhi aatma saanvari banti hai, bhinna naam, roop, desh, kaal। abhi tumko samjhaaya jaata hai, tum samajhte ho barobar ham shuru se lekar kaise part mein aaye hain। pahle devta the phir devta se asur banen। baap ne 84 janmon ka raaz bhi samjhaaya hai, jiska aur koi ko pata nahin hai। baap hi aakar sab raaz samjhaate hain। baap kehte hain - mere laadle bachche, tum hamaare saath ghar mein rehte the na। tum bhaai-bhaai the na। sab aatmaayen thi, shareer nahin tha। baap tha aur tum bhaai-bhaai the। aur koi sambandh nahin tha। baap to punarjanma mein aate nahin। woh to drama anusaar reserve rehte hain। unka part hi aisa hai। tumne kitna samay pukaara hai, woh bhi baap ne bataaya hai। aise nahin, dvaapar se pukaarna shuru kiya hai। nahin, bahut samay ke baad tumne pukaarna shuru kiya hai। tumko to baap sukhi banaate hain arthaat sukh ka varsa baap de rahe hain। tum bhi kehte ho baba ham aapke paas kalpa-kalpa anek baar aaye hain। yeh chakra chalta hi rehta hai। har 5 hajaar varsha ke baad baba aapse milte hain aur yeh varsa paate hain। jo bhi sab dehdhaari hain sab student hain, padhaane vaala hai videhi। yeh unki deh nahin hai। khud videhi hai, yahaan aakar deh dhaaran karte hain। deh bigar bachchon ko padhaave kaise। sabhi roohon ka woh baap hai। bhakti maarga mein sab unko pukaarte hain, barobar roodra maala simarte hain। oopar mein hai phool aur yugal meru। woh to ek jaise hi hain। phool ko kyon namaskaar karte hain, yeh bhi abhi tumko pata pada hai ki maala kiski pherte hain। devtaaon ki maala pherte hain ya tumhaari pherte hain? maala devtaaon ki hai ya tumhaari hai? devtaaon ki nahin kahenge। yeh brahman hi hain jinko baap baith padhaate hain। brahman se phir tum devta ban jaate ho। abhi padhte ho phir vahaan jaakar devta pad paate ho। maala tum braahmanon ki hai, jo tum baap dvaara padhkar, mehnat kar phir devta ban jaate ho। balihaari padhaane vaale ki। baap ne bachchon ki kitni seva ki hai। vahaan to koi baap ko yaad bhi nahin karte hain। bhakti maarga mein tum maala pherte the। abhi woh phool aakar tumko bhi phool banaate hain arthaat apni maala ka daana banaate hain। tum gul-gul bante ho na। aatma ka gyaan bhi abhi tumko milta hai। saare srishti ke aadi-madhya-ant ka gyaan tumhaari buddhi mein hai। tumhaari hi mahima hai। tum brahman baith aap samaan brahman banaakar phir svargavaasi devi-devta banaate ho। devtaayen svarga mein rehte hain। tum jab devta ban jaate ho vahaan tumko past, present, future ki knowledge nahin hogi।

abhi tum brahman bachchon ko hi past, present, future ka gyaan milta hai, aur koi ko bhi gyaan nahin milta। tum bahut-bahut bhaagyashaali ho। parantu maaya phir bhula deti hai। tumko koi yeh baba nahin padhaate hain। yeh to manushya hain, yeh bhi padh rahe hain। yeh to sabse last mein tha। sabse number one patit vahi phir number one paavan bante hain। kitna sukhi hote hain। em object saamne khadi hai। baap tumko kitna oonch banaate hain। aayushvaan bhav, putravaan bhav..... yeh bhi drama mein noondh hai। baap kehte hain main agar aasheervaad doon phir to sabko deta rahoon। main to tum bachchon ko padhaane aata hoon। padhaai se hi tumhein sab aasheervaaden mil jaati hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise baap perfect hai - aise svayan ko perfect banaana hai। pavitrata ko dhaaran kar apni chalan sudhaarni hai, sachche sukh-shanti ka anubhav karna hai।

2) srishti ke aadi-madhya-ant ka gyaan buddhi mein rakh brahman so devta banaane ki seva karni hai। apne oonche bhaagya ko kabhi bhoolna nahin hai।

vardaan:- dhaarna swaroop dvaara seva karke khushi ka pratyakshaphal praapta karne vaale sachche sevaadhaari bhav

seva ka umang rakhna bahut achha hai lekin yadi circumstance anusaar seva ka chance aapko nahin milta hai to apni avastha giraavat va halchal mein na aaye। agar gyaan sunaane ka chance nahin milta hai lekin aap apni dhaarna swaroop ka prabhaav daalte ho to seva ki marks jama ho jaati hain। dhaarna swaroop bachche hi sachche sevaadhaari hain। unhein sarva ki duaayen aur seva ke return mein pratyakshaphal khushi ki anubhooti hoti hai।

slogan:- sachche dil se daata, vidhaata, vardaata ko raazi kar lo to roohaani mauj mein rahenge।