शनिवार 19 अक्टूबर 2024 की दैनिक मुरली

19-10-2024 praatahmurli om shanti "baapdaada"' madhuban

“meethe bachche - sada khushi mein raho to yaad ki yaatra sahaj ho jaayegi, yaad se hi 21 janmon ke liye punya aatma banenge''

prashn:- tumhaare sabse achhe servant va gulaam kaun hain?

uttar:- natural calamities va science ki invention, jisse saare vishwa ka kichda saaph hota hai। yeh tumhaare sabse achhe servant va gulaam hain jo saphaai mein madadgaar bante hain। saari prakriti tumhaare adhikaar mein rehti hai।

om shanti। meethe-meethe roohaani bachche kya kar rahe hain? yuddha ke maidaan mein khade hain। khade to nahin, tum to baithe ho na। tumhaari sena kaisi achhi hai। inko kaha jaata hai roohaani baap ki roohaani sena। roohaani baap ke saath yog lagaakar raavan par jeet paane ka kitna sahaj purooshaartha karaate hain। tumko kaha jaata hai gupta warriors, gupta mahaaveer। paanch vikaaron par tum vijay paate ho, usmein bhi pahle hai deh-abhimaan। baap vishwa par jeet paane va vishwa mein shanti sthaapan karne ke liye kitni sahaj yukti bataate hain। tum bachchon bigar aur koi nahin jaante। tum vishwa mein shanti ka raajya sthaapan kar rahe ho। vahaan ashaanti, duhkh, rog ka naam-nishaan nahin hota। yeh padhaai tumko nai duniya ka maalik banaati hai। baap kehte hain - meethe-meethe bachchon, kaam par jeet paane se tum 21 janmon ke liye jagat jeet bante ho। yeh to bahut sahaj hai। tum ho shivbaaba ki roohaani sena। raam ki baat nahin, krishna ki bhi baat nahin hai। raam kaha jaata hai parampita paramatma ko। baaki woh jo raam ki sena aadi dikhaate hain, woh sab hai wrong। gaaya bhi jaata hai gyaan soorya pragta, agyaan andher vinaash। kaliyug ghor andhiyaara hai। kitna ladaai-jhagda maaraamaari hai। satayug mein yeh hoti nahin। tum apna raajya dekho kaise sthaapan karte ho। koi bhi haath paanv ismen nahin chalaate ho, ismen deh ka bhaan todna hai। ghar mein rehte ho to bhi pahle yeh yaad karo - ham aatma hain, deh nahin। tum aatmaayen hi 84 janma bhogti ho। abhi tumhaara yeh antim janma hai। puraani duniya khatma honi hai। isko kaha jaata hai purooshottam sangamayug ka leap yug। choti chhoti hoti hai na। braahmanon ki choti mashhoor hai। baap kitna sahaj samjhaate hain। tum har 5 hazaar varsha ke baad aakar baap se yeh padhte ho, raajaai praapta karne ke liye। em object bhi saamne hai - shivbaaba se hamko yeh banna hai। haan bachchon, kyon nahin। sirf deh-abhimaan chhod apne ko aatma samajh mujh baap ko yaad karo to paap kat jaaen। tum jaante ho is janma mein paavan banne se ham 21 janma punya aatma bante hain phir utraai shuru hoti hai। yeh bhi jaante ho hamaara hi 84 ka chakra hai। saari duniya to nahin aayegi। 84 ke chakra vaale aur is dharma vaale hi aayenge। satayug aur treta baap hi sthaapan karte hain। jo ab kar rahe hain phir dvaapar-kaliyug raavan ki sthaapna hai। raavan ka chitra bhi hai na। oopar mein gadhe ka sheesh hai। vikaari tattu ban jaate hain। tum samajhte bhi ho - ham kya the! yeh hai hi paap aatmaon ki duniya। paap aatmaon ki duniya mein karodon aadmi hain। punya aatmaon ki duniya mein hote hain 9 laakh shuru mein। tum abhi saare vishwa ke maalik bante ho। yeh lakshmi-naaraayan vishwa ke maalik the na। svarga ki baadshaahi to zaroor baap hi denge। baap kehte hain main tumko vishwa ki baadshaahi dene aaya hoon। ab paavan zaroor banna pade। so bhi yeh antim janma mrityulok ka pavitra bano। is puraani duniya ka vinaash saamne taiyaar hai। bombs aadi sab aise taiyaar kar rahe hain jo vahaan ghar baithe khalaas kar denge। kehte bhi hain ghar baithe puraani duniya ka vinaash kar denge। yeh bombs aadi ghar baithe aise chhodenge jo saari duniya ko khatma karenge। tum bachche ghar baithe yogbal se vishwa ke maalik ban jaate ho। tum shanti sthaapan kar rahe ho yogbal se। woh science bal se saari duniya khalaas kar denge। woh tumhaare servant hain। tumhaari service kar rahe hain। puraani duniya khatma kar dete hain। natural calamities aadi yeh sab tumhaare gulaam bante hain। saari prakriti tumhaari gulaam ban jaati hai। sirf tum baap se yog lagaate ho। to tum bachchon ke andar mein badi khushi honi chaahiye। aise beloved baap ko kitna yaad karna chaahiye। yahi bhaarat poora shivaalay tha। satayug mein sampoorn nirvikaari, yahaan hain vikaari। abhi tumko smriti aai hai - barobar baap ne humein kaha hai hear no evil… gandi baaten mat suno। mukh se bolo bhi nahin। baap samjhaate hain tum kitne dirty ban gaye ho। tumhaare paas to athaah dhan tha। tum svarga ke maalik the। abhi tum svarga ke badle narka ke maalik ban pade ho। yeh bhi drama bana hua hai। har 5 hazaar varsha baad tum bachchon ko ham raurav narka se nikaal svarga mein le jaata hoon। roohaani bachche kya tum meri baat nahin maanenge? paramatma kehte hain tum pavitra duniya ka maalik bano to kya nahin banenge?

vinaash to zaroor hoga। is yogbal se hi tumhaare janma-janmaantar ke paap katenge। baaki janma-janmaantar ke paap katne mein time lagta hai। bachche shuru se aaye hue hain, 10 percent bhi yog nahin lagta hai isliye paap katte nahin hain। naye-naye bachche jhat yogi ban jaate hain to paap kat jaate hain aur service karne lag padte hain। tum bachche samajhte ho ab hamko vaapis jaana hai। baap aaya hua hai le jaane। paap-aatmaayen to shantidham-sukhdhaam mein ja na saken। woh to rehti hain duhkhadhaam mein, isliye ab baap kehte hain mujhe yaad karo to tumhaare paap bhasma ho jaaen। are bachche gul-gul (phool) ban jaao। daivi kul ko kalank nahin lagaao। tum vikaari banne ke kaaran kitne duhkhi ho gaye ho। yeh bhi drama ka khel bana hua hai। pavitra nahin banenge to pavitra duniya svarga mein nahin aayenge। bhaarat svarga tha, krishnapuri mein tha, abhi narkavaasi hai। to tum bachchon ko to khushi se vikaaron ko chhodna chaahiye। vish peena phat se chhodna hai। vish peete-peete tum vaikuntha mein thode hi ja sakenge। abhi yeh banne ke liye tumko pavitra banna hai। tum samjha sakte ho - inhonne yeh raajaai kaise praapta ki hai? raajayog se। yeh padhaai hai na। jaise bairistari yog, surgeon yog hota hai। surgeon se yog to surgeon banenge। yeh phir hai bhagvaanuvaach। rath mein kaise pravesh karte hain? kehte hain bahut janmon ke ant mein main inmen baith tum bachchon ko knowledge deta hoon। jaanta hoon yeh vishwa ke maalik pavitra the। ab patit kangaal bane hain phir pahle number mein yeh jaayenge। ismen hi pravesh kar tum bachchon ko knowledge dete hain। behad ka baap kehte hain - bachche, pavitra bano to tum sada sukhi banenge। satayug hai amarlok, dvaapar kaliyug hai mrityulok। kitna achhi reeti bachchon ko samjhaate hain। yahaan dehi-abhimaani bante hain phir deh-abhimaan mein aakar maaya se haar kha lete hain। maaya ki ek hi top aisi lagti hai jo ekdam gutter mein gir padte hain। baap kehte hain yeh gutter hai। yeh koi sukh thode hi hai। svarga to phir kya! in devtaaon ki rahni-karni dekho kaisi hai। naam hi hai svarga। tumko svarga ka maalik banaate hain phir bhi kehte hain ham vish zaroor piyenge! to svarga mein aa nahin sakenge। saza bhi bahut khaayenge। tum bachchon ki maaya se yuddha hai। deh-abhimaan mein aakar bahut chhi-chhi kaam karte hain। samajhte hain hamko koi dekhta thode hi hai। krodh-lobh to private nahin hota। kaam mein privacy chalti hai। kaala munh karte hain। kaala munh karte-karte tum gore se saanvare ban gaye to saari duniya tumhaare pichhaadi aa gai। aisi patit duniya ko badalna zaroor hai। baap kehte hain - tumko sharma nahin aati hai, ek janma ke liye pavitra nahin bante ho।

bhagvaanuvaach - kaam mahaashatru hai। vaastav mein tum svargavaasi the to bade dhanvaan the। baat mat poochho। bachche kehte hain baba hamaare shahar mein chalo। kya kaanton ke jangal mein bandaron ko dekhne chaloon! tum bachchon ko drama anusaar service karni hi hai। gaaya jaata hai father shows san। bachchon ko hi jaakar sabka kalyaan karna hai। baap bachchon ko samjhaate hain - yeh bhoolo mat - ham yuddha ke maidaan mein hain। tumhaari yuddha hai 5 vikaaron se। yeh gyaan maarga bilkul alag hai। baap kehte hain main tumko svarga ka maalik banaata hoon 21 janmon ke liye, phir tumko narkavaasi kaun banaate hain? raavan। pharka to dekhte ho na। janma-janmaantar tumne bhakti maarga mein guru kiye, mila kuchh bhi nahin। inko kaha jaata hai satguru। sikkha log kehte hain na - satguru akaal moorta। unko kabhi koi kaal khaata nahin। woh satguru to kaalon ka kaal hai। baap kehte hain main tum sab bachchon ko kaal ke panje se chhudaane aaya hoon। satayug mein phir kaal aata hi nahin hai, unko amarlok kaha jaata hai। abhi tum shreemat par amarlok satayug ke maalik ban rahe ho। tumhaari ladaai dekho kaisi hai। saari duniya ek-do mein ladti-jhagadti rehti hai। tumhaari phir hai raavan 5 vikaaron ke saath yuddha। un par jeet paate ho। yeh hai antim janma।

baap kehte hain main gareeb nivaaz hoon। yahaan aate hi gareeb hain। saahookaaron ki to takdeer mein hi nahin hai। dhan ke nashe mein hi magroor rehte hain। yeh sab khatma ho jaane vaala hai। baaki thoda samay hai। drama ka plan hai na। yeh itne bombs aadi banaaye hain, woh kaam mein zaroor laane hain। pahle to ladaai baanon se, talvaaron se, bandookon aadi se chalti thi। abhi to bombs aisi cheez nikli hai jo ghar baithe hi khalaas kar denge। yeh cheejen koi rakhne ke liye thode hi banaai hain। kahaan tak rakhenge। baap aaye hain to vinaash bhi zaroor hona hai। drama ka chakra phirta rehta hai, tumhaari raajaai zaroor sthaapan honi hai। yeh lakshmi-naaraayan kabhi ladaai nahin karte hain। bhal shaastron mein dikhaaya hai - asuron aur devtaaon ki ladaai hui parantu woh satayug ke, woh asur kaliyug ke। donon milenge kaise jo ladaai hogi। abhi tum samajhte ho ham 5 vikaaron se yuddha kar rahe hain। in par jeet paakar sampoorn nirvikaari ban nirvikaari duniya ke maalik ban jaayenge। uthte-baithte baap ko yaad karna hai। daiveegun dhaaran karne hain। yeh bana-banaaya drama hai। koi-koi ke naseeb mein hi nahin hai। yogbal ho tab hi vikarma vinaash hon। sampoorn banen tab to sampoorn duniya mein aa saken। baap bhi shankh dhvani karte rehte hain। unhonne phir bhakti maarga mein shankh va tutaari aadi baith banaai hai। baap to is mukh dvaara samjhaate hain। yeh padhaai hai raajayog ki। bahut sahaj padhaai hai। baap ko yaad karo aur raajaai ko yaad karo। behad ke baap ko pahchaano aur raajaai lo। is duniya ko bhool jaao। tum behad ke sannyaasi ho। jaante ho puraani duniya saari khatma honi hai। in lakshmi-naaraayan ke raajya mein sirf bhaarat hi tha। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne daivi kul ko kalank nahin lagaana hai। gul-gul banna hai। anek aatmaon ke kalyaan ki service kar baap ka show karna hai।

2) sampoorn nirvikaari banne ke liye gandi baaten na to sunni hai, na mukh se bolni hai। hear no evil, talk no evil...... deh-abhimaan ke vash ho koi chhi-chhi kaam nahin karne hain।

vardaan:- manamnaabhav ke mantra dvaara man ke bandhan se chhootne vaale nirbandhan, trustee bhav

koi bhi bandhan pinjada hai। pinjade ki maina ab nirbandhan udta panchhi ban gayi। agar koi tan ka bandhan bhi hai to bhi man udta panchhi hai kyonki manamnaabhav hone se man ke bandhan chhoot jaate hain। pravritti ko sambhaalne ka bhi bandhan nahin। trustee hokar sambhaalne vaale sada nirbandhan rehte hain। grihasthi maana bojh, bojh vaala kabhi ud nahin sakta। lekin trustee hain to nirbandhan hain aur udti kala se second mein sweet hom pahunch sakte hain।

slogan:- udaasi ko apni daasi bana do, use chehre par aane na do।