रविवार 19 जनवरी 2025 की दैनिक मुरली

19-01-25 praatahmurli om shanti ''avyakt-baapdaada'' revise 30-11-2003 madhuban

“chaaron hi subject mein anubhav ki authority ban samasya ko samaadhaan swaroop mein parivartan karo''

aaj brahman sansaar ka rachta apne chaaron or ke brahman bachchon ko dekh rahe hain। yeh brahman sansaar chhota sa sansaar hai, lekin ati shreshtha, ati pyaara sansaar hai। yeh brahman sansaar saare vishwa ki vishesh aatmaon ka sansaar hai। har ek brahman koton mein koi, koi mein bhi koi aatma hai kyonki apne baap ko pahchaan, baap ke varse ke adhikaari bane hain। jaise baap oonche te ooncha hai to baap ko pahchaan baap ka banne vaali aatmaayen bhi vishesh aatmaayen hain। har brahman aatma ke janmate hi bhaagya vidhaata baap ne mastak par shreshtha bhaagya ki lakeer kheench li hai, aisi shreshtha bhaagyavaan aatma hain। aise bhaagyavaan apne ko samajhte ho? itna bada roohaani nasha anubhav hota hai? har ek brahman ke dil mein dilaaraam, dil ka dulaar, dil ka pyaar de rahe hain। yeh parmaatma pyaar saare kalpa mein ek dvaara aur ek samay hi praapta hota hai। yeh roohaani nasha sada har karma mein rehta hai? kyonki aap vishwa ko challenge karte ho ki ham karmayogi jeevan vaale vishesh aatmaayen hain। sirf yog lagaane vaale yogi nahin, yogi jeevan vaale ho। jeevan sadaakaal ki hoti hai। natural aur nirantar hoti hai। 8 ghante, 6 ghante ke yogi jeevan vaale nahin। yog arthaat yaad to brahman jeevan ka lakshya hai। jeevan ka lakshya svatah hi yaad rehta hai aur jaisa lakshya hota hai vaise lakshan bhi svatah hi aate hain।

baapdaada har brahman aatma ke mastak mein chamakta hua bhaagya ka sitaara dekhte hain। baapdaada sada har bachche ko shreshtha svamaandhaari, svaraajyadhaari dekhte hain। to aap sabhi bhi apne ko svamaandhaari aatma hoon, svaraajyadhaari aatma hoon - aise hi anubhav karte ho? second mein agar smriti mein laao ki main svamaandhaari aatma hoon, to second mein svamaan ki kitni list aa jaati! abhi bhi apne svamaan ki list smriti mein aai? lambi list hai na! svamaan, abhimaan ko khatma kar deta hai kyonki svamaan hai shreshtha abhimaan। to shreshtha abhimaan ashuddha bhinna-bhinna deh-abhimaan ko samaapta kar deta hai। jaise second mein light ka switch on karne se andhakaar bhaag jaata hai, andhakaar ko bhagaaya nahin jaata hai ya andhakaar ko nikaalne ki mehnat nahin karni padti hai lekin switch on kiya andhakaar svatah hi samaapta ho jaata hai। aise svamaan ki smriti ka switch on karo to bhinna-bhinna deh-abhimaan samaapta karne ki mehnat nahin karni padegi। mehnat tab tak karni padti hai jab tak svamaan ke smriti swaroop nahin bante। baapdaada bachchon ka khel dekhte hain - svamaan ko dil mein varnan karte hain - “main baapdaada ke dil takhtansheen hoon'', varnan bhi kar rahe hain, soch bhi rahe hain lekin anubhav ki seat par set nahin hote। jo sochte hain woh anubhav hona zaroori hai kyonki sabse shreshtha authority anubhav ki authority hai। to baapdaada dekhte hain - sunte bahut achha hain, sochte bhi bahut achha hain lekin sunna aur sochna alag cheez hai, anubhvi swaroop banna - yahi brahman jeevan ki shreshtha authority hai। yahi bhakti aur gyaan mein antar hai। bhakti mein bhi sunne ki masti mein bahut masta hote hain। sochte bhi hain lekin anubhav nahin kar paate hain। gyaan ka arth hi hai, gyaani tu aatma arthaat har svamaan ke anubhvi banna। anubhvi swaroop roohaani nasha chadhaata hai। anubhav kabhi bhi jeevan mein bhoolta nahin hai, suna hua, socha hua bhool sakta hai lekin anubhav ki authority kabhi kam nahin hoti hai।

to baapdaada yahi bachchon ko smriti dilaate hain - har suni hui baat jo bhagwan baap se suni, uske anubhvi moorta bano। anubhav ki hui baat hajaar log bhi agar mitaane chaahen to mit nahin sakti। maaya bhi anubhav ko mita nahin sakti। jaise shareer dhaaran karte hi anubhav karte ho ki main phalaana hoon, to kitna pakka rehta hai! kabhi apni deh ka naam bhoolta hai? koi aapko kahe nahin aap phalaani ya phalaana nahin ho, to maan sakte ho? aise hi har svamaan ki list anubhav karne se kabhi svamaan bhool nahin sakta। lekin baapdaada ne dekha ki anubhav har svamaan ka va har point ka, anubhvi banne mein nambarvaar hain। jab anubhav kar liya ki main hoon hi aatma, aatma ke sivaae aur ho hi kya! deh ko to mera kehte ho lekin main hoon hi aatma, jab ho hi aatma to dehbhaan kahaan se aaya? kyon aaya? kaaran, 63 janma ka abhyaas, main deh hoon, ulta abhyaas pakka hai। yathaartha abhyaas anubhav mein bhool jaata hai। baapdaada bachchon ko jab mehnat karta dekhte hain to bachchon par pyaar aata hai। parmaatma bachche aur mehnat! kaaran, anubhav moorta ki kami hai। jab dehbhaan ka anubhav kuchh bhi ho jaae, koi bhi karma karte dehbhaan bhoolta nahin hai, to brahman jeevan arthaat karmayogi jeevan, yogi jeevan ka anubhav bhool kaise sakta!

to check karo - har subject ko anubhav mein laaya hai? gyaan sunna sunaana to sahaj hai lekin gyaan swaroop banna hai। gyaan ko swaroop mein laaya to svatah hi har karma knowledgeful arthaat knowledge ki light might vaala hoga। knowledge ko kaha hi jaata hai light aur might। aise hi yogi swaroop, yogayukta, yuktiyukta swaroop। dhaarna swaroop arthaat har karma, har karmendriy, har gun ke dhaarna swaroop hogi। seva ke anubhvi moorta, sevaadhaari ka arth hi hai nirantar svatah hi sevaadhaari, chaahe mansa, chaahe vaacha, chaahe karmana, chaahe sambandh-samparka har karma mein seva natural hoti rahe, isko kaha jaata hai chaar hi subject mein anubhav swaroop। to sabhi check karo - kahaan tak anubhvi bane hain? har gun ka anubhvi, har shakti ka anubhvi। vaise bhi kahaavat hai ki anubhav samay par bahut kaam mein aata hai। to anubhvi moorta ka anubhav kaisi bhi samasya ho, anubhvi moorta anubhav ki authority se samasya ko second mein samaadhaan swaroop mein parivartan kar leta hai। samasya, samasya nahin rahegi, samaadhaan swaroop ban jaayegi। samjha।

abhi samay ki sameepta, baap samaan banne ki sameepta samaadhaan swaroop ka anubhav karaaye। bahut samay samasya ka aana, samaadhaan karna yeh mehnat ki, ab baapdaada har ek bachche ko svamaandhaari, svaraajya adhikaari, samaadhaan swaroop mein dekhne chaahte hain। anubhvi moorta second mein parivartan kar sakta hai। achha।

sab taraph ke pahunch gaye hain। double foreigners bhi har group mein apna chance achha le rahe hain। achha - is group mein paandav bhi kam nahin hain। paandav sabhi haath uthaao। maataayen, kumaariyaan, teachers haath uthaao। pahle group mein maataayen jyaada thi lekin is group mein paandavon ne bhi race achhi ki hai। paandavon ka nasha aur nishchay abhi tak gaayan mein bhi gaaya hua hai। kya gaaya hua hai? jaante ho? 5 paandav lekin nasha aur nishchay ke aadhaar se vijayi bane, yeh gaayan abhi tak hai। to aise paandav ho? achha - nasha hai? to paandav jab bhi sunte honge aap paandav ho, to paandavon ko paandavapti to nahin bhoolta hai na! kabhi-kabhi bhoolta hai? paandav aur paandavapti, paandavon ko kabhi bhi paandavapti bhool nahin sakta। paandavon ko yeh nasha hona chaahiye, ham kalpa-kalpa ke paandav, paandavapti ke pyaare hain। yaadgaar mein paandavon ka bhi naam kam nahin hai। paandavon ka title hi hai vijayi paandav। to aise paandav hain? bas ham vijayi paandav hain, sirf paandav nahin, vijayi paandav। vijay ka tilak avinaashi mastak par laga hua hi hai।

maataaon ko kya nasha rehta hai? bahut nasha rehta hai! maataayen nashe mein kehti hain ki baba aaya hi hai hamaare liye। aise hai na! kyonki aadhaakalpa mein maataaon ko martaba nahin mila hai, abhi sangam par raajneeti mein bhi maataaon ko adhikaar mila hai। har department mein aap shaktiyon ko baap ne aage rakha na, to sansaar mein bhi har varga mein ab maataaon ko adhikaar milta hai। koi bhi aisa varga nahin hai jismen maataayen nahin ho। yeh sangamayug ka martaba hai। to maataaon ko rehta hai - hamaara baba। rehta hai - mera baba? nasha hai? maataayen haath hila rahi hain। achha hai। bhagwan ko apna bana liya to jaadoogrini to maataayen hui na! baapdaada dekhta hai maataayen chaahe paandav, baapdaada ke sarva sambandhon se, pyaar to sarva sambandhon se hai lekin kisko kaun sa vishesh sambandh pyaara hai, woh bhi dekhte hain। kai bachchon ko khuda ko dosta banaana bahut achha lagta hai, iseelie khuda dosta ki kahaani bhi hai। baap-daada yahi kehte, jis samay jis sambandh ki aavashyakta ho to bhagwan ko us sambandh mein apna bana sakte ho। sarva sambandh nibha sakte ho। bachchon ne kaha baba mera, aur baap ne kya kaha, main tera।

madhuban ki raunak achhi lagti hai na! chaahe kitna bhi door baithe sune bhi, dekhen bhi lekin madhuban ki raunak apni hai। madhuban mein baapdaada to milte hi hain lekin aur kitni praaptiyaan hoti hain? agar list nikaalo to kitni praapti hai? sabse bade te badi praapti sahaj yog, svatah yog rehta hai। mehnat nahin karni padti। agar koi madhuban ke vaayumandal ka mahatva rakhe, to madhuban ka vaayumandal, madhuban ki din-charya sahajyogi svatahyogi banaane vaali hai। kyon? madhuban mein buddhi mein sirf ek hi kaam hai, sevaadhaari group aata hai woh alag baat hai lekin jo refresh hone ke liye aate hain to madhuban mein kya kaam hai? koi jimmevaari hai kya? khaao, pio, mauj karo, padhaai karo। to madhuban, madhuban hi hai। videsh mein bhi sun rahe hain। lekin woh sunna aur madhuban mein aana, ismen raat-din ka pharka hai। baap-daada saadhnon dvaara sunne, dekhne vaalon ko bhi yaad-pyaar to dete hain, koi bachche to raat jaagkar bhi sunte hain। na se achha zaroor hai lekin achhe te achha madhuban pyaara hai। madhuban mein aana achha laga hai, ya vahaan baithkar murli sun lo! kya achha lagta hai? vahaan bhi to murli sunenge na। yahaan bhi to peechhe-peechhe T.vi. mein dekhte hain। to jo samajhte hain madhuban mein aana hi achha hai, woh haath uthaao। (sabhi ne uthaaya) achha। phir bhi dekho bhakti mein bhi gaayan kya hai? madhuban mein murli baaje। yeh nahin hai london mein murli baaje। kahaan bhi ho, madhuban ki mahima ka mahatva jaanna arthaat svayan ko mahaan banaana।

achha - sab jo bhi aaye hain vo yogi jeevan, gyaani tu aatma jeevan, dhaarna swaroop ka anubhav kar rahe hain। abhi pahle tarna mein is season ke liye vishesh attention dilaaya tha ki yeh poora season santushtamni ban rehna hai aur santushta karna hai। sirf banna hai nahin, karna bhi hai। saath mein abhi samay anusaar kabhi bhi kuchh bhi ho sakta hai, prashn nahin poochho kab hoga, ek saal mein hoga, 6 maas mein hoga। achaanak kuchh bhi kisi samay bhi ho sakta hai isliye apne smriti ka switch bahut powerful banaao। second mein switch on aur anubhav swaroop ban jaao। switch dheela hota hai na to ghadi-ghadi on-oph karna padta hai aur samay lagta hai, theek hone mein। lekin second mein switch on svamaan ka, svaraajya adhikaari ka, antarmukhi hokar anubhav karte jaao। anubhvon ke saagar mein sama jaao। anubhav ki authority ko koi bhi authority jeet nahin sakti। samjha, kya karna hai? baapdaada ishaara to de deta hai lekin intajaar nahin karo, kab-kab-kab nahin, ab। ever ready। second mein smriti ka switch on kar sakte ho? kar sakte ho? kaise bhi circumstance hon, kaisi bhi samasya ho, smriti ka switch on karo। yeh abhyaas karo kyonki final paper second ka hi hona hai, minute bhi nahin। sochne vaala nahin paas kar sakega, anubhav vaala paas ho jaayega। to abhi second mein sabhi “main paramdham nivaasi shreshtha aatma hoon'', is smriti ke switch ko on karo aur koi bhi smriti nahin ho। koi buddhi mein halchal nahin ho, achal। (drill) achha।

chaaron or ke shreshtha svamaandhaari, anubhvi aatmaon ko, sada har subject ko anubhav mein laane vaale, sada yogi jeevan mein chalne vaale nirantar yogi aatmaon ko, sada apne vishesh bhaagya ko har karma mein emerge swaroop mein rakhne vaale koton mein koi, koi mein bhi koi vishesh aatmaon ko baapdaada ka yaadapyaar aur namaste।

daadi ji se:- sabhi ko umang-utsaah mein laane ka achha kaarya kar rahi ho। (abhi to karodon ko sandesh dene ka plan chal raha hai) karod kya saare vishwa ki aatmaon ko sandesh milna hai। aho prabhu to kahenge na! aho prabhu kahne ke liye bhi to taiyaar karna hai na! (daadiyon se) yeh bhi sahayog de rahi hain। achha hai, madhuban ko sambhaal rahe hain। achha sahayogi group mila hai na! ek-ek ki visheshta hai। phir bhi aadi ratnon ka prabhaav padta hai। chaahe kitni bhi aayu ho jaae, naye-naye bhi aage badh rahe hain lekin phir bhi aadi ratnon ki paalna apni hai, iseelie group achha hai।

vardaan:- vighna proof chamkeeli pharishta dress dhaaran karne vaale sada vighna-vinaashak bhav

sva ke prati aur sarva ke prati sada vighna vinaashak banne ke liye question mark ko vidaai dena aur full stop dvaara sarva shaktiyon ka full stock karna। sada vighna proof chamkeeli pharishta dress pahankar rakhna, mitti ki dress nahin pahanna। saath-saath sarva gunon ke gahnon se saje rehna। sada ashta shakti shastradhaari sampanna moorti bankar rehna aur kamal pushpa ke aasan par apne shreshtha jeevan ke paanv rakhna।

slogan:- abhyaas par poora-poora attention do to first division mein number aa jaayega।

apni shaktishaali mansa dvaara sakaash dene ki seva karo

jaise vaacha seva natural ho gai hai, aise mansa seva bhi saath-saath aur natural ho। vaani ke saath mansa seva bhi karte raho to aapko bolna kam padega। bolne mein jo energy lagaate ho woh mansa seva ke sahayog kaaran vaani ki energy jama hogi aur mansa ki shaktishaali seva saphalta jyaada anubhav karaayegi।

soochna:- aaj antarraashtreey yog divas teesra ravivaar hai, saayan 6.30 se 7.30 baje tak sabhi bhaai bahinen sangathit roop mein ek hi shuddh sankalp se prakriti sahit sarva vishwa ki aatmaon ko shanti aur shakti ki sakaash dene ki vishesh seva karen। anubhav karen ki baapdaada ke mastak se shaktishaali kirnen nikalkar meri bhrikuti par aa rahi hain aur mujhse saare globe par ja rahi hain।