शुक्रवार 7 फ़रवरी 2025 की दैनिक मुरली

07-02-2025 praatahmurli om shanti "baapdaada"' madhuban

“meethe bachche - tumhein chalte phirte yaad mein rahne ka abhyaas karna hai। gyaan aur yog yahi mukhya do cheejen hain, yog maana yaad''

prashn:- aklamand (hoshiyaar) bachche kaun se bol mukh se nahin bolenge?

uttar:- humein yog sikhlaao, yeh bol aklamand bachche nahin bolenge। baap ko yaad karna seekhna hota hai kya! yeh paathshaala hai padhne padhaane ke liye। aise nahin, yaad karne ke liye koi khaas baithna hai। tumhein karma karte baap ko yaad karne ka abhyaas karna hai।

om shanti। ab roohaani baap baith roohaani bachchon ko samjhaate hain। bachche jaante hain roohaani baap is rath dvaara hamko samjha rahe hain। ab jabki bachche hain to baap ko va kisi behen va bhaai ko kehna ki mujhe baba ko yaad karna sikhlaao, yeh wrong ho jaata hai। tum koi chhoti bachchiyaan to nahin ho na। yeh to jaante ho mukhya hai rooh। woh to hai avinaashi। shareer hai vinaashi। bada to rooh hua na। agyaankaal mein yeh gyaan kisko nahin rehta hai ki ham aatma hain, shareer dvaara bolte hain। deh-abhimaan mein aakar hi bolte hain - main yeh karta hoon। abhi tum dehi-abhimaani bane ho। jaante ho aatma kehti hai main is shareer dvaara bolti hoon, karma karti hoon। aatma mel hai। baap samjhaate hain - yeh bol bahut karke sune jaate hain, kehte hain hamko yog mein bithaao। saamne ek baithte hain, is khyaal se ki ham bhi baba ki yaad mein baithen, yeh bhi baithen। ab paathshaala koi iske liye nahin hai। paathshaala to padhaai ke liye hai। baaki aise nahin, yahaan baithkar sirf tumhein yaad karna hai। baap ne to samjhaaya hai chalte phirte, uthte baithte baap ko yaad karo, iske liye khaas baithne ki bhi darkaar nahin। jaise koi kehte hain raam-raam kaho, kya bigar raam-raam kahe yaad nahin kar sakte hain? yaad to chalte phirte kar sakte hain। tumko to karma karte baap ko yaad karna hai। aashik maashook koi khaas baith-kar ek-do ko yaad nahin karte hain। kaam kaaj dhandha aadi sab karna hai, sab kuchh karte apne maashook ko yaad karte raho। aise nahin ki unko yaad karne ke liye khaas kahaan jaakar baithna hai।

tum bachche geet va kavitaayen aadi sunaate ho, to baba kah dete hain yeh bhakti maarga ke hain। kehte bhi hain shanti deva, so to paramatma ko hi yaad karte hain, na ki shreekrishna ko। drama anusaar aatma ashaanta ho padi hai to baap ko pukaarti hai kyonki shanti, sukh, gyaan ka saagar woh hai। gyaan aur yog mukhya do cheezen hain, yog maana yaad। unhon ka hathayog bilkul hi alag hai। tumhaara hai raajayog। baap ko sirf yaad karna hai। baap dvaara tum baap ko jaanne se srishti ke aadi, madhya, ant ko jaan gaye ho। tumko sabse badi khushi to yeh hai ki hamko bhagwan padhaate hain। bhagwan ka bhi pahle-pahle poora parichay hona chaahiye। aisa to kabhi nahin jaana ki jaise aatma star hai, vaise bhagwan bhi star hai। woh bhi aatma hai। parantu unko param aatma, supreme soul kaha jaata hai। woh kabhi punarjanma to lete nahin hain। aise nahin ki woh janma maran mein aate hain। nahin, punarjanma nahin lete hain। khud aakar samjhaate hain main kaise aata hoon? trimoorti ka gaayan bhi bhaarat mein hai। trimoorti brahma-vishnu-shankar ka chitra bhi dikhaate hain। shiv parmaatmaae namah kehte hain na। us oonch te oonch baap ko bhool gaye hain, sirf trimoorti ka chitra de diya hai। oopar mein shiv to zaroor hona chaahiye, jisse yeh samjhen ki inka rachayita shiv hai। rachna se kabhi varsa nahin mil sakta hai। tum jaante ho brahma se kuchh bhi varsa nahin milta। vishnu ko to heere javaahron ka taaj hai na। shivbaaba dvaara phir penny se pound bane hain। shiv ka chitra na hone se saara khandan ho jaata hai। oonch te oonch hai parampita paramatma, unki yeh rachna hai। abhi tum bachchon ko baap se svarga ka varsa milta hai, 21 janmon ke liye। bhal vahaan phir bhi samajhte hain laukik baap se varsa mila hai। vahaan yeh pata nahin ki yeh behad ke baap se paai hui praalabdha hai। yeh tumko abhi pata hai। abhi ki kamaai vahaan 21 janma chalti hai। vahaan yeh maaloom nahin rehta hai, is gyaan ka bilkul pata nahin rehta। yeh gyaan na devtaaon mein hai, na shoodron mein rehta hai। yeh gyaan hai hi tum braahmanon mein। yeh hai roohaani gyaan, spiritual ka arth bhi nahin jaante hain। doctor aaph philosophy kehte hain। doctor aaph spiritual knowledge ek hi baap hai। baap ko surgeon bhi kaha jaata hai na। saadhu sannyaasi aadi koi surgeon thode hi hain। ved shaastra aadi padhne vaalon ko doctor thode hi kahenge। bhal title bhi de dete hain parantu vaastav mein roohaani surgeon hai ek baap, jo rooh ko injection lagaate hain। woh hai bhakti। unko kehna chaahiye doctor aaph bhakti athva shaastron ka gyaan dete hain। unse phaayda kuchh bhi nahin hota, neeche girte hi jaate hain। to unko doctor kaise kahenge? doctor to phaayda pahunchaate hain na। yeh baap to hai avinaashi gyaan surgeon। yogbal se tum ever healthy bante ho। yeh to tum bachche hi jaante ho। baahar vaale kya jaanen। unko avinaashi surgeon kaha jaata hai। aatmaon mein jo vikaaron ki khaad padi hai, use nikaalna, patit ko paavan banaakar sadgati dena - yeh baap mein shakti hai। almighty patit-paavan ek father hai। almighty koi manushya ko nahin kah sakte hain। to baap kaun-si shakti dikhaate hain? sarva ko apni shakti se sadgati de dete hain। unko kahenge doctor oph spiritual knowledge। doctor aaph philosophy - yeh to dher ke dher manushya hain। spiritual doctor ek hai। to ab baap kehte hain apne ko aatma samajh mujh baap ko yaad karo aur pavitra bano। main aaya hi hoon pavitra duniya sthaapan karne, phir tum patit kyon bante ho? paavan bano, patit mat bano। sabhi aatmaon ko baap ka direction hai - grihastha vyavhaar mein rehte kamal phool samaan pavitra raho। baal brahmachaari bano to phir pavitra duniya ke maalik ban jaayenge। itne janma jo paap kiye hain, ab mujhe yaad karne se paap bhasma ho jaayenge। mool vatan mein pavitra aatmaayen hi rehti hain। patit koi ja nahin sakte hain। buddhi mein yeh to yaad rakhna hi hai - baba hamko padhaate hain। student aise kahenge kya ki hamko teacher ki yaad sikhlaao। yaad sikhlaane ki kya darkaar hai। yahaan (sandali par) koi na baithe to bhi harja nahin hai। apne baap ko yaad karna hai। tum saara din dhandhe dhori aadi mein rehte ho to bhool jaate ho, isliye yahaan bithaaya jaata hai। yeh 10-15 minute bhi yaad karen। tum bachchon ko to kaam kaaz karte yaad mein rahne ki aadat daalni hai। aadhaakalpa baad maashook milta hai। ab kehte hain mujhe yaad karo to tumhaari aatma se khaad nikal jaayegi aur tum vishwa ke maalik ban jaayenge। to kyon nahin yaad karna chaahiye। stri ka jab hathiyaala baandhate hain to unko kehte hain pati tumhaara guru eeshvar sab kuchh hai। parantu woh to phir bhi mitra, sambandhi, guru aadi bahuton ko yaad karti hai। woh to dehdhaari ki yaad ho gai। yeh to patiyon ka pati hai, unko yaad karna hai। koi kehte hain hamko neshtha mein bithaao। parantu isse kya hoga। 10 minute yahaan baithte hain to bhi aise mat samjho ki koi ekras ho baithte hain। bhakti maarga mein kiski pooja karne baithte hain to buddhi bahut bhatakti rehti hai। naudha bhakti karne vaalon ko yahi taat lagi rehti hai ki hamko saakshaatkaar ho। woh aash lagaakar baithe rehte hain। ek ki lagan mein lavleen ho jaate hain, tab saakshaatkaar hota hai। unko kaha jaata hai naundha bhakta। woh bhakti aisi hai jaise aashik-maashook। khaate peete buddhi mein yaad rehti hai। unmein vikaar ki baat nahin hoti, shareer par pyaar ho jaata hai। ek-do ko dekhne bigar rah nahin sakte।

ab tum bachchon ko baap ne samjhaaya hai - mujhe yaad karne se tumhaare vikarma vinaash honge। kaise tumne 84 janma liye hain। beej ko yaad karne se saara jhaad yaad aa jaata hai। yeh variety dharmon ka jhaad hai na। yeh sirf tumhaari buddhi mein hi hai ki bhaarat golden ej mein tha, ab iron ej mein hai। yeh angreji akshar achhe hain, inka arth achha nikalta hai। aatma sachcha sona hoti hai phir unmein khaad padti hai। abhi bilkul jhoothi ho gai hai, inko kaha jaata hai iron aged। aatmaayen iron aged hone se jevar bhi aisa ho gaya hai। abhi baap kehte hain main patit-paavan hoon, maamekam yaad karo। tum mujhe bulaate ho he patit-paavan aao। main kalpa-kalpa aakar tumko yeh yukti batlaata hoon। manmanaabhav, madhyaaji bhav arthaat svarga ke maalik bano। koi kehte hain hamko yog mein bahut maja aata hai, gyaan mein itna maja nahin। bas, yog karke yeh bhaagenge। yog hi achha lagta hai, kehte hain hamko to shanti chaahiye। achha, baap ko to kahaan bhi baith yaad karo। yaad karte-karte tum shantidham mein chale jaayenge। ismen yog sikhlaane ki baat hi nahin hai। baap ko yaad karna hai। aise bahut hain jo centres par jaakar aadha pauna ghanta baithte hain, kehte hain hamko neshtha karaao ya to kahenge baba ne programme diya hai neshtha ka। yahaan baba kehte hain chalte phirte yaad mein raho। na se to baithna achha hai। baba mana nahin karte hain, bhal saari raat baitho, parantu aisi aadat thode hi daalni hai ki bas raat ko hi yaad karna hai। aadat yeh daalni hai ki kaam kaaz karte yaad karna hai। ismen badi mehnat hai। buddhi ghadi-ghadi aur taraph bhaag jaati hai। bhakti maarga mein bhi buddhi bhaag jaati hai phir apne ko chutki kaatte hain। sachche bhakta jo hote hain unki baat karte hain। to yahaan bhi apne saath aisi-aisi baaten karni chaahiye। baba ko kyon nahin yaad kiya? yaad nahin karenge to vishwa ke maalik kaise banenge? aashik-maashook to naam-roop mein phanse rehte hain। yahaan to tum apne ko aatma samajh baap ko yaad karte ho। ham aatma is shareer se alag hain। shareer mein aane se karma karna hota hai। bahut aise bhi hain jo kehte hain ham deedaar karen। ab deedaar kya karenge। woh to bindi hai na। achha, koi kehte hain shreekrishna ka deedaar karen। shreekrishna ka to chitra bhi hai na। jo jad hai so phir chaitanya mein dekhenge isse phaayda kya hua? saakshaatkaar se thode hi phaayda hoga। tum baap ko yaad karo to aatma pavitra ho। naaraayan ka saakshaatkaar hone se naaraayan thode hi ban jaayenge।

tum jaante ho hamaari em object hai hi lakshmi-naaraayan banne ki parantu padhne bigar thode hi banenge। padhkar hoshiyaar bano, praja bhi banaao tab lakshmi-naaraayan banenge। mehnat hai। paas with honour hona chaahiye jo dharmaraaj ki saja na mile। yeh murabbi bachcha bhi saath hai, yeh bhi kehte hain tum teekhe ja sakte ho। baba ke oopar to kitna bojha hai। saara din kitne khyaalaat karne padte hain। ham itna yaad nahin kar sakte hain। bhojan par thodi yaad rehti phir bhool jaate hain। samajhta hoon baba aur ham donon sair karte hain। sair karte-karte baba ko bhool jaata hoon। khisakni vastu hai na। ghadi-ghadi yaad khisak jaati hai। ismen bahut mehnat hai। yaad se hi aatma pavitra honi hai। bahuton ko padhaayenge to oonch pad paayenge। jo achha samajhte hain woh achha pad paayenge। pradarshani mein kitni praja banti hai। tum ek-ek laakhon ki seva karenge aur phir apni bhi avastha aisi chaahiye। karmaateet avastha ho jaayegi phir shareer nahin rahega। aage chal tum samjhenge ab ladaai jor ho jaayegi phir dher tumhaare paas aate rahenge। mahima badhti jaayegi। ant mein sannyaasi bhi aayenge, baap ko yaad karne lag padenge। unka part hi muktidhaam mein jaane ka hai। knowledge to lenge nahin। tumhaara message sabhi aatmaon tak pahunchna hai, akhbaaron dvaara bahut sunenge। kitne gaanv hain, sabko paigaam dena hai। messenger paigambar tum hi ho। patit se paavan banaane vaala aur koi hai nahin, sivaae baap ke। aise nahin ki dharma sthaapak kisko paavan banaate hain। unka dharma to vriddhi ko paana hai, woh vaapis jaane ka raasta kaise bataayenge? sarva ka sadgati daata ek hai। tum bachchon ko ab pavitra zaroor banna hai। bahut hain jo pavitra nahin rehte hain। kaam mahaashatru hai na। achhe-achhe bachche gir padte hain, kudrishti bhi kaam ka hi ansh hai। yeh bada shaitaan hai। baap kehte hain is par jeet pahno to jagatjeet ban jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ka namaste।

dhaarna ke liye mukhya saar:-

1) kaam-kaaj karte yaad mein rahne ki aadat daalni hai। baap ke saath jaane va paavan nai duniya ka maalik banne ke liye pavitra zaroor banna hai।

2) oonch pad paane ke liye bahuton ki seva karni hain। bahuton ko padhaana hai। messenger ban yeh message sabhi tak pahunchaana hai।

vardaan:- sneh ki god mein aantarik sukh va sarva shaktiyon ka anubhav karne vaale yathaartha purooshaarthi bhav

jo yathaartha purooshaarthi hain ve kabhi mehnat va thakaavat ka anubhav nahin karte, sada mohabbat mein masta rehte hain। ve sankalp se bhi surrender hone ke kaaran anubhav karte ki humein baapdaada chala rahe hain, mehnat ke paanv se nahin lekin sneh ki godi mein chal rahe hain, sneh ki god mein sarva praaptiyon ki anubhooti hone ke kaaran woh chalte nahin lekin sada khushi mein, aantarik sukh mein, sarva shaktiyon ke anubhav mein udte rehte hain।

slogan:- nishchay roopi foundation pakka hai to shreshtha jeevan ka anubhav svatah hota hai।

avyakt ishaare - ekaantapriy bano ekta aur ekaagrata ko apnaao

‘anekta mein ekta' to practical mein anek desh, anek bhaashaayen, anek roop-rang lekin anekta mein bhi sabke dil mein ekta hai na! kyonki dil mein ek baap hai। ek shreemat par chalne vaale ho। anek bhaashaaon mein hote hue bhi man ka geet, man ki bhaasha ek hai।