गुरुवार 6 फ़रवरी 2025 की दैनिक मुरली

06-02-2025 praatahmurli om shanti "baapdaada"' madhuban

“meethe bachche - puraani duniya ke kaanton ko nai duniya ke phool banaana - yeh tum hoshiyaar maaliyon ka kaam hain''

prashn:- sangamayug par tum bachche kaun-si shreshtha takdeer banaate ho?

uttar:- kaante se khushboodaar phool banna - yeh hai sabse shreshtha takdeer। agar ek bhi koi vikaar hai to kaanta hai। jab kaante se phool bano tab satopradhaan devi-devta bano। tum bachche abhi 21 peedhi ke liye apni sooryavanshi takdeer banaane aaye ho।

geet:- takdeer jagaakar aai hoon…

omshaanti। geet bachchon ne suna। yeh to common geet hai kyonki tum ho maali, baap hai baagvaan। ab maaliyon ko kaanton se phool banaana hai। yeh akshar bahut clear hai। bhakta aaye hain bhagwan ke paas। yeh sab bhaktiyaan hain na। ab gyaan ki padhaai padhne baap ke paas aaye hain। is raajayog ki padhaai se hi nai duniya ke maalik bante ho। to bhaktiyaan kehti hain - ham takdeer banaakar aaye hain, nai duniya dil mein sajaakar aaye hain। baba bhi roz kehte hain ki sweet hom aur sweet raajaai ko yaad karo। aatma ko yaad karna hai। har ek centre par kaanton se phool ban rahe hain। phoolon mein bhi nambarvaar hote hain na। shiv ke oopar phool chadhaate, koi kaisa phool chadhaate, koi kaisa। gulaab ke phool aur ak ke phool mein raat-din ka pharka hai। yeh bhi bageecha hai। koi motiye ke phool hain, koi champa ke, koi ratan jyot hain। koi ak ke bhi hain। bachche jaante hain is samay sab hain kaante। yeh duniya hi kaanton ka jangal hai, inko banaana hai nai duniya ke phool। is puraani duniya mein hain kaanten, to geet mein bhi kehte hain ham baap ke paas aaye hain puraani duniya ke kaante se nai duniya ka phool banne। jo baap nai duniya sthaapan kar rahe hain। kaante se phool arthaat devi-devta banna hai। geet ka arth kitna sahaj hai। ham aaye hain - takdeer jagaane nai duniya ke liye। nai duniya hai satayug। koi ki satopradhaan takdeer hai, koi ki rajo, tamo hai। koi sooryavanshi raaja bante hain, koi praja bante hain, koi praja ke bhi naukar chaakar bante hain। yeh nai duniya ki raajaai sthaapan ho rahi hai। school mein takdeer jagaane jaate hain na। yahaan to hai nai duniya ki baat। is puraani duniya mein kya takdeer banaayenge! tum bhavishya nai duniya mein devta banne ki takdeer bana rahe ho, jin devtaaon ko sabhi naman karte aaye hain। ham hi so devta poojya the phir ham hi pujaari bane hain। 21 janmon ka varsa baap se milta hai, jise 21 peedhi kaha jaata hai। peedhi vriddha avastha tak ko kaha jaata hai। baap 21 peedhi ka varsa dete hain kyonki yuva avastha mein va bachpan mein, beech mein akaale mrityu kabhi hota nahin isliye unko kaha jaata hai amarlok। yeh hai mrityulok, raavan raajya। yahaan har ek mein vikaaron ki praveshta hai, jismen koi ek bhi vikaar hai to kaante hue na। baap samjhenge maali royal khushboodaar phool banaana nahin jaante hain। maali achha hoga to achhe-achhe phool taiyaar karenge। vijay maala mein pirone laayak phool chaahiye। devtaaon ke paas achhe-achhe phool le jaate hain na। samjho queen Elizabeth aati hai to ekdam first class phoolon ki maala banaakar le jaayenge। yahaan ke manushya to hain tamopradhaan। shiv ke mandir mein bhi jaate hain, samajhte hain ye bhagwan hai। brahma, vishnu, shankar ko to devta kehte hain। shiv ko bhagwan kahenge। to woh oonch te ooncha hua na। ab shiv ke liye kehte dhatoora khaata tha, bhaang peeta tha। kitni glaani karte hain। phool bhi ak ke le jaate hain। ab aisa parampita paramatma unke paas le kya jaate hain! tamopradhaan kaanton ke paas to first class phool le jaate hain aur shiv ke mandir mein kya le jaate! doodh bhi kaisa chadhaate hain? 5 percent doodh baaki 95 percent paani। bhagwan ke paas doodh kaisa chadhaana chaahiye - jaante to kuchh bhi nahin। ab tum achhi reeti jaante ho। tumhaare mein bhi nambarvaar hain, jo achha jaante hain unko centre ka head banaaya jaata hai। sab to ek jaise nahin hote। bhal padhaai ek hi hai, manushya se devta banne ki hi em object hai parantu teacher to nambarvaar hain na। vijay maala mein aane ka mukhya aadhaar hai padhaai। padhaai to ek hi hoti hai, usmein paas to nambarvaar hote hain na। saara madaar padhaai par hai। koi to vijay maala ke 8 daanon mein aate hain, koi 108 mein, koi 16108 mein। sijra banaate hain na। jaise jhaad ka bhi sijra nikalta hai, pahle-pahle ek patta, do patte phir badhte jaate hain। yeh bhi jhaad hai। biraadri hoti hai, jaise kriplaani biraadri aadi-aadi, woh sab hain had ki biraadriyaan। yeh hai behad ki biraadri। inka pahle-pahle kaun hai? prajaapita brahma। unko kahenge great-great grand father। parantu yeh kisko pata nahin hai। manushya-maatra zara bhi nahin jaante ki srishti ka rachayita kaun hai? bilkul ahilya jaise pattharbuddhi hain। aise jab ban jaate hain tab hi baap aate hain।

tum yahaan aaye ho ahilya buddhi se paarasbuddhi banne। to knowledge bhi dhaaran karni chaahiye na। baap ko pahchaanna chaahiye aur padhaai ka khyaal karna chaahiye। samjho aaj aaye hain, kal achaanak shareer chhoot jaata hai phir kya pad pa sakenge। knowledge to kuchh bhi uthaai nahin, kuchh bhi seekhe nahin to kya pad paayenge! din-pratidin jo deri se shareer chhodte hain, unko time to thoda milta hai kyonki time to kam hota jaata hai, usmein janma le kya kar sakenge। haan, tumhaare se jo jaayenge to koi achhe ghar mein janma lenge। sanskaar le jaate hain to woh aatma jhat jaag jaayegi, shivbaaba ko yaad karne lagegi। sanskaar hi nahin pade hue honge to kuchh bhi nahin hoga। isko bahut maheenta se samajhna hota hai। maali achhe-achhe phoolon ko le aate hain to unki mahima bhi gaai jaati hai, phool banaana to maali ka kaam hai na। aise bahut bachche hain, jinko baap ko yaad karna aata hi nahin hai। takdeer ke oopar hai na। takdeer mein nahin hai to kuchh bhi samajhte nahin। takdeervaan bachche to baap ko yathaartha reeti pahchaan kar unhein poori reeti yaad karenge। baap ke saath-saath nai duniya ko bhi yaad karte rahenge। geet mein bhi kehte hain na - ham nai duniya ke liye nai takdeer banaane ke liye aaye hain। 21 janma liye baap se raajya-bhaagya lena hai। is nashe aur khushi mein rahe to aise-aise geet ka arth ishaare se samajh jaayen। school mein bhi koi ki takdeer mein nahin hota hai to fail ho padte hain। yeh to bahut bada imtahaan hai। bhagwan khud baith padhaate hain। yeh knowledge sabhi dharma vaalon ke liye hai। baap kehte hain apne ko aatma samajh mujh baap ko yaad karo। tum jaante ho kisi bhi dehdhaari manushya ko bhagwan kah nahin sakte। brahma-vishnu-shankar ko bhi bhagwan nahin kahenge। woh bhi sookshmavtanvaasi devtaayen hain। yahaan hain manushya। yahaan devtaayen nahin hain। yeh hai manushya lok। yeh lakshmi-naaraayan aadi daiveegun vaale manushya hain, jisko Deityism kaha jaata hai। satayug mein sabhi devi-devta hain, sookshm vatan mein hain hi brahma-vishnu-shankar। gaate bhi hain brahma devtaae namah, vishnu devtaae namah..... phir kahenge shiv parmaatmaae namah। shiv ko devta nahin kahenge। aur manushya ko phir bhagwan nahin kah sakte। teen floor hain na। ham hain third floor par। satayug ke jo daiveegun vaale manushya hain vahi phir aasuri gun vaale ban jaate hain। maaya ka grahan lagne se kaale ho jaate hain। jaise chandrama ko bhi grahan lagta hai na। woh hain had ki baaten, yeh hai behad ki baat। behad ka din aur behad ki raat hai। gaate bhi hain brahma ka din aur raat। tumko abhi ek baap se hi padhna hai baaki sab kuchh bhool jaana hai। baap dvaara padhne se tum nai duniya ke maalik bante ho। yeh sachchi-sachchi geeta paathshaala hai। paathshaala mein hamesha nahin rehte। manushya samajhte hain bhakti maarga bhagwan se milne ka maarga hai, jitna bahut bhakti karenge to bhagwan raazi hoga aur aakar phal dega। yeh sab baaten tum hi ab samajhte ho। bhagwan ek hai jo phal abhi de rahe hain। jo pahle-pahle sooryavanshi poojya the, unhon ne hi sabse jaasti bhakti ki hai, vahi yahaan aayenge। tumne hi pahle-pahle shivbaaba ki avyabhichaari bhakti ki hai to zaroor tum hi pahle-pahle bhakta thahre। phir girte-girte tamopradhaan ban jaate ho। aadhaakalpa tumne bhakti ki hai, isliye tumko hi pahle gyaan dete hain। tumhaare mein bhi nambarvaar hain।

tumhaari is padhaai mein yeh bahaana nahin chal sakta ki ham door rehte hain isliye roz nahin padh sakte। koi kehte hain ham 10 mile door rehte hain। are, baba ki yaad mein tum 10 mile bhi paidal karke jaao to kabhi thakaavat nahin hogi। kitna bada khajaana lene jaate ho। teertho par manushya darshan karne liye paidal jaate hain, kitna dhakka khaate hain। yeh to ek hi shahar ki baat hai। baap kehte hain main itna door se aaya hoon, tum kehte ho ghar 5 mile door hai.... vaah! khazaana lene ke liye to daudte aana chaahiye। amarnaath par sirf darshan karne ke liye kahaan-kahaan se jaate hain। yahaan to amarnaath baba svayan padhaane aaye hain। tumko vishwa ka maalik banaane aaya hoon। tum bahaana karte rehte ho। savere amritvele to koi bhi aa sakte hain। us samay koi dar nahin hai। koi tumko lootenge bhi nahin। agar koi cheez jevar aadi honge to chheenenge। choron ko chaahiye hi dhan, padaartha। parantu kiski takdeer mein nahin hai to phir bahaane bahut banaate hain। padhte nahin to apna pad ganvaate hain। baap aate bhi bhaarat mein hain। bhaarat ko hi svarga banaate hain। second mein jeevanmukti ka raasta bataate hain। parantu koi purooshaartha bhi kare na। kadam hi nahin uthaayenge to pahunch kaise sakenge।

tum bachche samajhte ho ki yeh hai aatmaon aur paramatma ka mela। baap ke paas aaye hain svarga ka varsa lene, nai duniya ki sthaapna ho rahi hai। sthaapna poori hui aur vinaash shuru ho jaayega। yeh vahi mahaabhaarat ki ladaai hai na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap jo gyaan ka khajaana de rahe hain, usko lene ke liye daud-daud kar aana hai, ismen kisi bhi prakaar ka bahaana nahin dena hai। baap ki yaad mein 10 mile bhi paidal chalne se thakaavat nahin hogi।

2) vijay maala mein aane ka aadhaar padhaai hai। padhaai par poora dhyaan dena hai। kaanton ko phool banaane ki seva karni hai। sweet hom aur sweet raajaai ko yaad karna hai।

vardaan:- sangamayug ke mahatva ko jaan ek ka anginat baar return praapta karne vaale sarva praapti sampanna bhav

sangamayug par baapdaada ka vaayda hai - ek do laakh lo। jaise sarva shreshtha samay, sarva shreshtha janma, sarva shreshtha title is samay ke hain vaise sarva praaptiyon ka anubhav abhi hi hota hai। abhi ek ka sirf laakh guna nahin milta lekin jab chaaho jaise chaaho, jo chaaho baap servant roop mein baandhe hue hain। ek ka anginat baar return mil jaata hai kyonki vartamaan samay vardaata hi aapka hai। jab beej aapke haath mein hai to beej dvaara jo chaaho woh second mein lekar sarva praaptiyon se sampanna ban sakte ho।

slogan:- kaisi bhi paristhiti ho, paristhiti chali jaae lekin khushi nahin jaae।

avyakt-ishaare:- ekaantapriy bano ekta aur ekaagrata ko apnaao

“ekta aur ekaagrata'' - yeh donon shreshtha bhujaayen hain, kaarya karne ke saphalta ki। ekaagrata arthaat sada niravyartha sankalp, nirvikalp। jahaan ekta aur ekaagrata hai, vahaan saphalta gale ka haar hai। vardaata ko ek shabd pyaara hai - ‘ekavrata', ek bal ek bharosa। saath-saath ekmat, na manmat na parmat, ekras, na aur koi vyakti, na vaibhav ka ras। aise hi ekta, ekaanta-priy।