बुधवार 12 फ़रवरी 2025 की दैनिक मुरली

12-02-2025 praatahmurli om shanti "baapdaada"' madhuban

“meethe bachche - tum bahut bade jauhri ho, tumhein avinaashi gyaan ratnon roopi javaahraat dekar sabko saahookaar banaana hai''

prashn:- apne jeevan ko heere jaisa banaane ke liye kis baat ki bahut-bahut sambhaal chaahiye?

uttar:- sang ki। bachchon ko sang unka karna chaahiye jo achha baraste hain। jo baraste nahin, unka sang rakhne se phaayda hi kya! sang ka dosh bahut lagta hai, koi kiske sang se heere jaisa ban jaate hain, koi phir kiske sang se thikkar ban jaate hain। jo gyaanvaan honge woh aapasmaan zaroor banaayenge। sang se apni sambhaal rakhenge।

om shanti। meethe-meethe roohaani bachchon ko saari srishti, saara drama achhi reeti buddhi mein yaad hai। contrast bhi buddhi mein hai। yeh saara buddhi mein pakka rehna chaahiye ki satayug mein sab shreshthaachaari, nirvikaari, paavan, solvent the। abhi to duniya bhrashtaachaari, vikaari, patit insolvent hai। abhi tum bachche sangamayug par ho। tum us paar ja rahe ho। jaise nadi aur saagar ka jahaan mel hota hai, unko sangam kehte hain। ek taraph meetha paani, ek taraph khaara paani hota hai। ab yeh bhi hai sangam। tum jaante ho barobar satayug mein lakshmi-naaraayan ka raajya tha phir aise chakra phira। abhi hai sangam। kaliyug ke ant mein sab duhkhi hain, isko jangal kaha jaata hai। satayug ko bageecha kaha jaata। abhi tum kaanton se phool ban rahe ho। yeh smriti tum bachchon ko honi chaahiye। ham behad ke baap se varsa le rahe hain। yeh buddhi mein yaad rakhna hai। 84 janmon ki kahaani to bilkul common hai। samajhte ho - ab 84 janma poore hue। tumhaari buddhi mein taraavat hai ki ham abhi satayugi bageeche mein ja rahe hain। ab hamaara janma is mrityulok mein nahin hoga। hamaara janma hoga amarlok mein। shivbaaba ko amarnaath bhi kehte hain। woh hamko amar kahaani suna rahe hain, vahaan ham shareer mein hote bhi amar rahenge। apni khushi se time par shareer chhodenge, usko mrityulok nahin kaha jaata। tum kisko bhi samjhaayenge to samjhenge - barobar inmen to poora gyaan hai। srishti ka aadi aur ant to hai na। chhota bachcha bhi javaan aur vriddha hota hai phir ant aa jaata hai, phir bachcha banta hai। srishti bhi nai banti phir quarter puraani, aadhi puraani phir saari puraani hoti hai। phir nai hogi। yeh sab baaten aur koi ek-do ko suna nahin sakte। aisi charcha koi kar nahin sakte। sivaae tum braahmanon ke aur koi ko roohaani knowledge mil na sake। brahman varna mein aayen tab sunen। sirf brahman hi jaanen। braahmanon mein bhi nambarvaar hain। koi yathaartha reeti suna sakte hain, koi nahin suna sakte hain to unhon ko kuchh milta nahin hai। jauhriyon mein bhi dekhenge koi ke paas to karodon ka maal rehta hai, koi ke paas to 10 hazaar ka bhi maal nahin hoga। tumhaare mein bhi aise hain। jaise dekho yeh janak hai, yeh achha jauhri hai। inke paas valuable javaahraat hain। kisko dekar achha saahookaar bana sakti hai। koi chhota jauhri hai, jaasti de nahin sakte to unka pad bhi kam ho jaata hai। tum sab jauhri ho, yeh avinaashi gyaan ratnon ke javaahraat hain। jiske paas achhe ratna honge woh saahookaar banenge, auron ko bhi banaayenge। aise to nahin, sab achhe jauhri honge। achhe-achhe jauhri bade-bade centres par bhej dete hain। bade aadmiyon ko achhi javaahraat di jaati hai। bade-bade dukaanon par expert rehte hain। baba ko bhi kaha jaata hai - saudaagar-ratnaagar। ratnon ka sauda karte hain phir jaadoogar bhi hai kyonki unke paas hi divya drishti ki chaabi hai। koi naudha bhakti karte hain to unko saakshaatkaar ho jaata hai। yahaan woh baat nahin hai। yahaan to anaayaas ghar baithe bhi bahuton ko saakshaatkaar hota hai। din-pratidin sahaj hota jaayega। kaiyon ko brahma ka aur shreekrishna ka bhi saakshaatkaar hota hai। unko kehte hain brahma ke paas jaao। jaakar unke paas prince banne ki padhaai padho। yeh pavitra prince-princess chale aate hain na। prince ko pavitra bhi kah sakte hain। pavitrata se janma hota hai na। patit ko bhrashtaachaari kahenge। patit se paavan banna hai, yeh buddhi mein rehna chaahiye। jo kisko samjha bhi sako। manushya samajhte hain, yeh to bade sensible hain। bolo - hamaare paas koi shaastron aadi ki knowledge nahin hai। yeh hai roohaani knowledge, jo roohaani baap samjhaate hain। yeh hai trimoorti brahma, vishnu, shankar। yeh bhi rachna hain। rachayita ek baap hai, woh hote hain had ke creator, yeh hai behad ka baap, behad ka creator। baap baithkar padhaate hain, mehnat karni hoti hai। baap gul-gul (phool) banaate hain। tum ho eeshvareey kul ke, tumko baap pavitra banaate hain। phir agar apvitra bante hain to kul kalankit bante hain। baap to jaante hain na। phir dharmaraaj dvaara bahut saja dilaayenge। baap ke saath dharmaraaj bhi hai। dharmaraaj ki duty bhi abhi poori hoti hai। satayug mein to hogi hi nahin। phir shuru hoti hai dvaapar se। baap baith karma, akarma, vikarma ki gati samjhaate hain। kehte hain na - isne aage janma mein aise karma kiye hain, jiski yeh bhogna hai। satayug mein aise nahin kahenge। bure karmon ka vahaan naam nahin hota। yahaan to bure-achhe donon hain। sukh-duhkh donon hain। parantu sukh bahut thoda hai। vahaan phir duhkh ka naam nahin। satayug mein duhkh kahaan se aaya! tum baap se nai duniya ka varsa lete ho। baap hai hi duhkh harta sukh karta। duhkh kab se shuru hota hai, yeh bhi tum jaante ho। shaastron mein to kalpa ki aayu hi lambi-chaudi likh di hai। abhi tum jaante ho aadhaakalpa ke liye hamaare duhkh har jaayenge aur ham sukh paayenge। yeh srishti ka chakra kaise phirta hai, is par samjhaana bada sahaj hai। yeh sab baaten tumhaare sivaae aur koi ki buddhi mein ho na saken। laakhon varsha kah dene se sab baaten buddhi se nikal jaati hain।

abhi tum jaante ho -yeh chakra 5 hazaar varsha ka hai। kal ki baat hai jabki in sooryavanshi-chandravanshiyon ka raajya tha। kehte bhi hain braahmanon ka din, aise nahin shivbaaba ka din kahenge। braahmanon ka din phir braahmanon ki raat। brahman phir bhakti maarga mein bhi chale aate hain। abhi hai sangam। na din hai, na raat hai। tum jaante ho ham brahman phir devta banenge phir treta mein kshatriy banenge। yeh to buddhi mein pakka yaad kar lo। in baaton ko aur koi nahin jaante hain। woh to kahenge shaastron mein itni aayu likhi hai, tumne phir yeh hisaab kahaan se laaya hai? yeh anaadi drama bana-banaaya hai, yeh koi nahin jaante। tum bachchon ki buddhi mein hai, aadhaakalpa hai satayug-treta phir aadha se bhakti shuru hoti hai। woh ho jaata hai treta aur dvaapar ka sangam। dvaapar mein bhi yeh shaastra aadi aahiste-aahiste bante hain। bhakti maarga ki saamagri badi lambi-chaudi hai। jaise jhaad kitna lamba-chauda hai। iska beej hai baba। yeh ulta jhaad hai। pahle-pahle aadi sanaatan devi-devta dharma hai। yeh baaten jo baap sunaate hain, yeh hain bilkul nai। is devi-devta dharma ke sthaapak ko koi nahin jaante। shreekrishna to bachcha hai। gyaan sunaane vaala hai baap। to baap ko udaae bachche ka naam daal diya hai। shreekrishna ke hi charitra aadi baith dikhaaye hain। baap kehte hain leela koi shreekrishna ki nahin hai। gaate bhi hain - he prabhu teri leela apram-apaar hai। leela ek ki hi hoti hai। shivbaaba ki mahima badi nyaari hai। woh to hai sada paavan rahne vaala, parantu woh paavan shareer mein to aa na sake। unko bulaate hi hain - patit duniya ko aakar paavan banaao। to baap kehte hain mujhe bhi patit duniya mein aana padta hai। inke bahut janmon ke ant mein aakar pravesh karta hoon। to baap kehte hain mukhya baat alpha ko yaad karo, baaki yeh saari hai rezgaari। woh sab to dhaaran kar na sake। jo dhaaran kar sakte hain, unhon ko samjhaata hoon। baaki to kah deta hoon manmanaabhav। nambarvaar buddhi to hoti hai na। baadal koi to khoob baraste hain, koi thoda baraskar chale jaate hain। tum bhi baadal ho na। koi to bilkul baraste hi nahin hain। gyaan ko kheenchane ki taakat nahin hai। mama-baba achhe baadal hain na। bachchon ko sang unka karna chaahiye jo achha baraste hain। jo baraste hi nahin unse sang rakhne se kya hoga? sang ka dosh bhi bahut lagta hai। koi to kiske sang se heere jaisa ban jaate hain, koi phir kiske sang se thikkar ban jaate hain। peeth pakadni chaahiye achhe ki। jo gyaanvaan hoga woh aapasmaan phool banaayega। sat baap se jo gyaanvaan aur yogi bane hain unka sang karna chaahiye। aise nahin samajhna hai ki ham phalaane ka poonchh pakadkar paar ho jaayenge। aise bahut kehte hain। parantu yahaan to woh baat nahin hai। student kiski poonchh pakadne se paas ho jaayenge kya! padhna pade na। baap bhi aakar knowledge dete hain। is samay woh jaante hain hamko gyaan dena hai। bhakti maarga mein unki buddhi mein yeh baaten nahin rehti ki hamko jaakar gyaan dena hai। yeh sab drama mein noondh hai। baba kuchh karte nahin hain। drama mein divya drishti milne ka part hai to saakshaatkaar ho jaata hai। baap kehte hain aise nahin ki main baith saakshaatkaar karaata hoon। yeh drama mein noondh hai। agar koi devi ka saakshaatkaar karna chaahte hain, devi to nahin karaayegi na। kehte hain - he bhagwan, hamko saakshaatkaar karaao। baap kehte hain drama mein noondh hogi to ho jaayega। main bhi drama mein baandha hua hoon।

baba kehte hain main is srishti mein aaya hua hoon। inke mukh se main bol raha hoon, inki aankhon se tumko dekh raha hoon। agar yeh shareer na ho to dekh kaise sakoonga? patit duniya mein hi mujhe aana padta hai। svarga mein to mujhe bulaate hi nahin hain। mujhe bulaate hi sangam par hain। jab sangamayug par aakar shareer leta hoon tab hi dekhta hoon। niraakaar roop mein to kuchh dekh nahin sakta hoon। organs bigar aatma kuchh bhi kar na sake। baba kehte hain main dekh kaise sakta, churpur kaise kar sakta, bigar shareer ke। yeh to andhashraddha hai, jo kehte hain eeshvar sab kuchh dekhta hai, sab kuchh woh karte hain। dekhega phir kaise? jab organs milen tab dekhe na। baap kehte hain - achha va bura kaam draamaanusaar har ek karte hain। noondh hai। main thode hi itne karodon manushyon ka baith hisaab rakhoonga, mujhe shareer hai tab sab kuchh karta hoon। karnakraavanhaar bhi tab kehte hain। nahin to kah na saken। main jab ismen aaoon tab aakar paavan banaaoon। oopar mein aatma kya karegi? shareer se hi part bajaayegi na। main bhi yahaan aakar part bajaata hoon। satayug mein mera part hai nahin। part bigar koi kuchh kar na sake। shareer bigar aatma kuchh kar nahin sakti। aatma ko bulaaya jaata hai, woh bhi shareer mein aakar bolegi na। organs bigar kuchh kar na sake। yeh hai detail ki samjhaani। mukhya baat to kaha jaata hai baap aur varse ko yaad karo। behad ka baap itna bada hai, unse varsa kab milta hoga - yeh koi jaante nahin। kehte hain aakar duhkh haro, sukh do, parantu kab? yeh kisko pata nahin hai। tum bachche abhi nai baaten sun rahe ho। tum jaante ho ham amar ban rahe hain, amarlok mein ja rahe hain। tum amarlok mein kitna baar gaye ho? anek baar। iska kabhi ant nahin hota। bahut kehte hain kya moksha nahin mil sakta? bolo - nahin, yeh anaadi avinaashi drama hai, yeh kabhi vinaash nahin ho sakta hai। yeh to anaadi chakra phirta hi rehta hai। tum bachche is samay sachche saaheb ko jaante ho। tum sannyaasi ho na। woh fakeer nahin। sannyaasiyon ko bhi fakeer kaha jaata hai। tum raajarishi ho, rishi ko sannyaasi kaha jaata hai। abhi phir tum ameer bante ho। bhaarat kitna ameer tha, abhi kaisa fakeer ban gaya hai। behad ka baap aakar behad ka varsa dete hain। geet bhi hai - baba aap jo dete ho so koi de na sake। aap hamko vishwa ka maalik banaate ho, jisko koi loot na sake। aise-aise geet banaane vaale arth nahin sochte। tum jaante ho vahaan partition aadi kuchh nahin hogi। yahaan to kitni partition hain। vahaan aakaash-dharti saari tumhaari rehti hai। to itni khushi bachchon ko rahni chaahiye na। hamesha samjho shivbaaba sunaate hain kyonki woh kabhi holy de nahin lete, kabhi beemaar nahin hote। yaad shiv-baba ki hi rahni chaahiye। inko kaha jaata hai nirhankaari। main yeh karta hoon, main yeh karta hoon, yeh ahankaar nahin aana chaahiye। service karna to farja hai, ismen ahankaar nahin aana chaahiye। ahankaar aaya aur gira। service karte raho, yeh hai roohaani seva। baaki sab hai jismaani। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap jo padhaate hain, uska return gul-gul (phool) bankar dikhaana hai। mehnat karni hai। kabhi bhi eeshvareey kul ka naam badnaam nahin karna hai, jo gyaanvaan aur yogi hain, unka hi sang karna hai।

2) main-pan ka tyaag kar nirhankaari ban roohaani seva karni hai, ise apna farja samajhna hai। ahankaar mein nahin aana hai।

vardaan:- vyartha ko bhi shubh bhaav aur shreshtha bhaavna dvaara parivartan karne vaale sachche marjeeva bhav

baapdaada ki shreemat hai bachche vyartha baaten na suno, na sunaao aur na socho। sada shubh bhaavna se socho, shubh bol bolo। vyartha ko bhi shubh bhaav se suno। shubh chintak ban bol ke bhaav ko parivartan kar do। sada bhaav aur bhaavna shreshtha rakho, svayan ko parivartan karo na ki anya ke parivartan ka socho। svayan ka parivartan hi anya ka parivartan hai, ismen pahle main - is marjeeva banne mein hi maja hai, isi ko hi mahaabli kaha jaata hai। ismen khushi se maro - yeh marna hi jeena hai, yahi sachcha jeeydaan hai।

slogan:- sankalpon ki ekaagrata shreshtha parivartan mein fast gati le aati hai।

avyakt-ishaare:- ekaantapriy bano ekta aur ekaagrata ko apnaao

sangathan ki shakti jo chaahe woh kar sakti hai। sangathan ki nishaani ka yaadgaar hai paanch paandav। ekta ki shakti, haan ji, haan ji, vichaar diya, phir ekta ke bandhan mein bandh gaye। yahi ekta saphalta ka saadhan hai।