सोमवार 17 फ़रवरी 2025 की दैनिक मुरली

17-02-2025 praatahmurli om shanti "baapdaada"' madhuban

“meethe bachche - baap tumhaara mehmaan bankar aaya hai to tumhein aadar karna hai, jaise prem se bulaaya hai aise aadar bhi karna hai, niraadar na ho''

prashn:- kaun-sa nasha tum bachchon ko sada chadha rehna chaahiye? yadi nasha nahin chadhta hai to kya kahenge?

uttar:- oonche te oonchi aasaami is patit duniya mein hamaara mehmaan bankar aaya hai, yeh nasha sada chadha rehna chaahiye। parantu nambarvaar yeh nasha chadhta hai। kai to baap ka bankar bhi sanshaybuddhi ban haath chhod jaate to kahenge inki takdeer।

om shanti, om shanti। do baari kehna pade। yeh to bachche jaante hain ki ek hai baba, doosra hai daada। donon ikatthe hain na। bhagwan ki mahima bhi kitni oonchi karte hain parantu akshar kitna simple hai - god father। sirf father nahin kahenge, god father woh hai oonch te oonch। unki mahima bhi bahut oonch hai। unko bulaate bhi patit duniya mein hain। khud aakar batlaate hain ki mujhe patit duniya mein hi bulaate hain parantu patit-paavan woh kaise hai, kab aate hain, yeh kisko bhi pata nahin। aadhaakalpa satayug-treta mein kiska raajya tha, kaise hua, kisko yeh pata nahin hai। patit-paavan baap aate bhi zaroor hain, unko koi patit-paavan kehte, koi liberator kehte hain। pukaarte hain ki svarga mein le chalo। sabse oonch te oonch hai na। unko patit duniya mein bulaate hain ki aakar ham bhaaratvaasiyon ko shreshtha banaao। unka position kitna bada hai। highest authority hai। unko bulaate hain, jabki raavan raajya hai। nahin to is raavan raajya se kaun chhudaave? yeh sab baaten tum bachche sunte ho to nasha bhi chadha rehna chaahiye। parantu itna nasha chadhta nahin hai। sharaab ka nasha sabhi ko chadh jaata hai, yeh nahin chadhta hai। ismen hai dhaarna ki baat, takdeer ki baat hai। to baap hai bahut badi aasaami। tumhaare mein bhi koi-koi ko poora nishchay rehta hai। nishchay agar sabko hota to sanshay mein aakar bhaagte kyon? baap ko bhool jaate hain। baap ke bane, phir baap ke liye koi sanshay buddhi nahin ho sakta। parantu yeh baap hai wonderful। gaayan bhi hai aashcharyavat baba ko jaananti, baba kahanti, gyaan sunanti, sunaavanti, aho maaya phir bhi sanshaybuddhi banaavanti। baap samjhaate hain in bhakti maarga ke shaastron mein koi saar nahin hai। baap kehte hain mujhe koi bhi jaante nahin। tum bachchon mein bhi mushkil koi thahar sakte hain। tum bhi feel karte ho ki woh yaad sthaai thaharti nahin hai। ham aatma bindi hain, baba bhi bindi hai, woh hamaara baap hai, unko apna shareer to hai nahin। kehte hain main is tan ka aadhaar leta hoon। mera naam shiv hai। mujh aatma ka naam kabhi badalta nahin hai। tumhaare shareer ke naam badalte hain। shareer par hi naam padte hain। shaadi hoti hai to naam badal jaata hai। phir woh naam pakka kar lete hain। to ab baap kehte hain tum yeh pakka kar lo ki ham aatma hain। yeh baap ne hi parichay diya hai ki jab-jab atyaachaar aur glaani hoti hai tab main aata hoon। koi aksharon ko bhi pakadna nahin hai। baap khud kehte hain mujhe patthar bhittar mein thok kitni glaani karte hain, yeh bhi nai baat nahin। kalpa-kalpa aise patit ban aur glaani karte hain, tab hi main aata hoon। kalpa-kalpa ka mera part hai। ismen adli-badli ho nahin sakti। drama mein noondh hai na। tumko kai kehte hain sirf bhaarat mein hi aata hai! kya bhaarat hi sirf svarga banega? haan। yeh to anaadi-avinaashi part ho gaya na। baap kitna oonch te oonch hai। patiton ko paavan banaane vaala baap kehte hain mujhe bulaate hi is patit duniya mein hain। main to sada paavan hoon। mujhe paavan duniya mein bulaana chaahiye na! parantu nahin, paavan duniya mein bulaane ki darkaar hi nahin। patit duniya mein hi bulaate hain ki aakar paavan banaao। main kitna bada mehmaan hoon। aadhaakalpa se mujhe yaad karte aaye ho। yahaan koi bade aadmi ko bulaayenge, karke ek-do varsha bulaayenge। phalaana is varsha nahin to doosre varsha aayega। inko to aadhaakalpa se yaad karte aaye ho। inke aane ka part to fix hua pada hai। yeh kisko bhi pata nahin hai। bahut oonch te oonch baap hai। manushya baap ko ek or to prem se bulaate hain, doosri or mahima mein daag laga dete hain। vaastav mein yeh bade te bada guest oph honour (badi mahima vaala mehmaan) hai, jiski honour (mahima) ko daag laga diya hai, kah dete hain woh patthar thikkar sabmen hain। kitni highest authority hai, bulaate bhi bahut prem se hain, parantu hain bilkul buddhu। main hi aakar apna parichay deta hoon ki main tumhaara father hoon। mujhe god father kehte hain। jab sab raavan ki kaid mein ho jaate hain tab hi baap ko aana hota hai kyonki sab hain bhaktiyaan athva brides - seetaayen। baap hai bridegroom - raam। ek seeta ki baat nahin hai, sab seetaaon ko raavan ki jel se chhudaate hain। yeh hai behad ki baat। yeh hai puraani patit duniya। iska puraana hona phir naya hona accurate hai, yeh shareer aadi to koi jaldi puraane ho jaate, koi jaasti time chalte hain। yeh drama mein accurate noondh hai। poore 5 hazaar varsha baad phir mujhe aana padta hai। main hi aakar apna parichay deta hoon aur srishti chakra ka raaz samjhaata hoon। kisko bhi na meri pahchaan hai, na brahma, vishnu, shankar ki, na lakshmi-naaraayan ki, na raam-seeta ki pahchaan hai। oonch te oonch actors drama ke andar to yahi hain। hai to manushya ki baat। koi 8-10 bhuja vaale manushya nahin hain। vishnu ko 4 bhuja kyon dikhaate hain? raavan ke 10 sheesh kya hain? yeh kisko bhi pata nahin hai। baap hi aakar saare world ke aadi-madhya-ant ka knowledge bataate hain। kehte hain main hoon bade te bada guest, parantu gupta। yeh bhi sirf tum hi jaante ho। parantu jaante hue bhi phir bhool jaate ho। unka kitna regard rakhna chaahiye, unhein yaad karna chaahiye। aatma bhi niraakaar, paramatma bhi niraakaar, ismen photo ki bhi baat nahin। tumko to aatma nishchay kar baap ko yaad karna hai, deh-abhimaan chhodna hai। tumhein sadaiv avinaashi cheez ko dekhna chaahiye। tum vinaashi deh ko kyon dekhte ho! dehi-abhimaani bano, ismen hi mehnat hai। jitna yaad mein rahenge utna karmaateet avastha ko paae oonch pad paayenge। baap bahut hi sahaj yog arthaat yaad sikhlaate hain। yog to anek prakaar ke hain। yaad akshar hi yathaartha hai। paramatma baap ko yaad karne mein hi mehnat hai। koi virla sach bataate hain ki ham itna samay yaad mein raha। yaad karte hi nahin hain to sunaane mein lajja aati hai। likhte hain saare din mein ek ghanta yaad mein rahe, to lajja aani chaahiye na। aisa baap jisko din-raat yaad karna chaahiye aur ham sirf ek ghanta yaad karte hain! ismen badi gupta mehnat hai। baap ko bulaate hain to door se aane vaala guest hua na। baap kehte hain main nai duniya ka guest nahin banta hoon। aata hi puraani duniya mein hoon। nai duniya ki sthaapna aakar karta hoon। yeh puraani duniya hai, yeh bhi koi yathaartha nahin jaante hain। nai duniya ki aayu hi nahin jaante। baap kehte hain yeh knowledge main hi aakar deta hoon phir drama anusaar yeh knowledge gum ho jaati hai। phir kalpa baad yeh part repeat hoga। mujhe bulaate hain, varsha-varsha shiv jayanti manaate hain। jo hokar jaate hain to unki varsha-varsha varshi manaate hain। shivbaaba ki bhi 12 maas baad jayanti manaate hain parantu kab se manaate aaye hain, yeh kisko bhi pata nahin hai। sirf kah dete hain ki laakhon varsha hue। kaliyug ki aayu hi laakhon varsha likh di hai। baap kehte hain - yeh hai 5 hazaar varsha ki baat। barobar in devtaaon ka bhaarat mein raajya tha na। to baap kehte hain - main bhaarat ka bahut bada mehmaan hoon, mujhe aadhaakalpa se bahut nimantran dete aaye ho। jab bahut duhkhi hote hain, to kehte hain he patit-paavan aao। main aaya bhi hoon patit duniya mein। rath to hamko chaahiye na। aatma hai akaalmoorta, unka yeh takhta hai। baap bhi akaalmoorta hai, is takhta par aakar viraajmaan hote hain। yeh badi ramneek baaten hain। aur koi sunen to chakrit ho jaae। ab baap kehte hain - bachche, meri mat par chalo। samjho shivbaaba mat dete hain, shivbaaba murli chalaate hain। yeh kehte hain main bhi unki murli sunkar bajaaoonga। sunaane vaala to woh hai na। yeh number one poojya so phir number one pujaari bana। abhi yeh purooshaarthi hai। bachchon ko hamesha samajhna chaahiye - hamko shivbaaba ki shreemat mili hai। agar koi ulti baat bhi hui to woh sulti kar denge। yeh atoot nishchay hai to responsible shivbaaba hai। yeh drama mein noondh hai। vighna to padne hi hain, bahut kade-kade vighna padte hain। apne bachchon ke bhi vighna padte hain। to hamesha samjho ki shivbaaba samjhaate hain, to yaad rahegi। kai bachche samajhte hain yeh brahma baba mat dete hain, parantu nahin। shivbaaba hi responsible hain। parantu deh-abhimaan hai to ghadi-ghadi inko hi dekhte rehte hain। shivbaaba kitna bada mehmaan hai to bhi railway aadi vaale thode hi jaante hain, niraakaar ko kaise pahchaanen va samjhen। woh to beemaar ho na sake। to beemaari aadi ka inka kaaran bataate hain। woh kya jaanen inmen kaun hai? tum bachche bhi nambarvaar jaante ho। woh sabhi aatmaon ka baap aur yeh phir prajaapita manushyon ka baap। to yeh donon (baapdaada) kitne bade guest ho gaye।

baap kehte hain jo kuchh hota hai drama mein noondh hai, main bhi drama ke bandhan mein baandha hua hoon। noondh bigar kuchh kar nahin sakta hoon। maaya bhi badi dushtar hai। raam aur raavan donon ka part hai। drama mein raavan chaitanya hota to kehta - main bhi drama anusaar aata hoon। yeh duhkh aur sukh ka khel hai। sukh hai nai duniya mein, duhkh hai puraani duniya mein। nai duniya mein thode manushya, puraani duniya mein kitne dher manushya hain। patit-paavan baap ko hi bulaate hain ki aakar paavan duniya banaao kyonki paavan duniya mein bahut sukh tha isliye hi kalpa-kalpa pukaarte hain। baap sabko sukh dekar jaate hain। abhi phir part repeat hota hai। duniya kabhi khalaas nahin hoti। khalaas hona impossible hai। samudra bhi duniya mein hai na। yeh third floor to hai na। kehte hain jalmai, paani-paani ho jaata hai phir bhi prithvi floor to hai na। paani bhi to hai na। prithvi floor koi vinaash nahin ho sakta। jal bhi is floor mein hota hai। second aur first floor, sookshm vatan aur mool vatan mein to jal hota nahin। yeh behad srishti ke 3 floor hain, jisko tum bachchon ke sivaae koi bhi nahin jaante। yeh khushi ki baat sabko khushi se sunaani hai। jo poore paas hote hain, unka hi ateendriy sukh gaaya hua hai। jo raat-din service par tatpar hain, service hi karte rehte hain unhein bahut khushi rehti hai। koi-koi aise din bhi aate hain jo manushya raat ko bhi jaagte hain parantu aatma thak jaati hai to sona hota hai। aatma ke sone se shareer bhi so jaata hai। aatma na soye to shareer bhi na soye। thakti aatma hai। aaj main thaka pada hoon - kisne kaha? aatma ne। tum bachchon ko aatma-abhimaani ho rehna hai, ismen hi mehnat hai। baap ko yaad nahin karte, dehi-abhimaani nahin rehte, to deh ke sambandhi aadi yaad aa jaate hain। baap kehte hain tum nange aaye the phir nange jaana hai। yeh deh ke sambandh aadi bhool jaao। is shareer mein rehte mujhe yaad karo to satopradhaan banenge। baap kitni badi authority hai। bachchon ke sivaae koi jaante hi nahin। baap kehte hain main hoon gareeb nivaaz, sabhi saadhaaran hain। patit-paavan baap aaya hai, yeh jaan len to pata nahin kitni bheed ho jaae। bade-bade aadmi aate hain to kitni bheed ho jaati hai। to drama mein inka part hi gupta rahne ka hai। aage chal aahiste-aahiste prabhaav niklega aur vinaash ho jaayega। sab thode hi mil sakte hain। yaad karte hain na to unko baap ka parichay mil jaayega। baaki pahunch nahin paayenge। jaise baandheli bachchiyaan mil nahin paati hain, kitne atyaachaar sahan karti hain। vikaar ko chhod nahin sakte hain। kehte hain srishti kaise chalegi? are, srishti ka bojh baap par hai ki tum par? baap ko jaan leven to phir aise prashn na poochhen। bolo, pahle baap ko to jaano phir tum sab kuchh jaan jaayenge। samjhaane ki bhi yukti chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada hi highest authority baap ki yaad mein rehna hai। vinaashi deh ko na dekh dehi-abhimaani banne ki mehnat karni hai। yaad ka sachcha-sachcha chart rakhna hai।

2) din-raat service mein tatpar rah apaar khushi mein rehna hai। teenon lokon ka raaz sabko khushi se samjhaana hai। shiv-baba jo shreemat dete hain usmein atoot nishchay rakhkar chalna hai, koi bhi vighna aaye to ghabraana nahin hai, responsible shivbaaba hai, isliye sanshay na aaye।

vardaan:- shreshtha vela ke aadhaar par sarva praaptiyon ke adhikaar ka anubhav karne vaale padmaapdam bhaagyashaali bhav

jo shreshtha vela mein janma lene vaale bhaagyashaali bachche hain, woh kalpa pahle ki touching ke aadhaar par janmate hi apne pan ka anubhav karte hain। woh janmate hi sarva property ke adhikaari hote hain। jaise beej mein saare vriksha ka saar samaaya hua hai aise number one vela vaali aatmaayen sarva swaroop ki praapti ke khajaane ke aate hi anubhvi ban jaate hain। ve kabhi aise nahin kahenge ki sukh ka anubhav hota, shanti ka nahin, shanti ka hota sukh ka va shakti ka nahin। sarva anubhvon se sampanna hote hain।

slogan:- apne prasannata ki chhaaya se sheetalta ka anubhav karaane ke liye nirmal aur nirmaan bano।

avyakt-ishaare:- ekaantapriy bano ekta aur ekaagrata ko apnaao

sarva sambandh, sarva rasnaayen ek se lene vaala hi ekaanta-priy ho sakta hai, jab ek dvaara sarva rasnaaen praapta ho sakti hain to anek taraph jaane ki aavashyakta hi kya hai? sirf ek shabd bhi yaad rakho to usmein saara gyaan aa jaata, smriti bhi aa jaati, sambandh bhi aa jaata, sthiti bhi aa jaati aur saath-saath jo praapti hoti hai woh bhi us ek shabd se spashta ho jaati। ek ki yaad, sthiti ekras aur gyaan bhi saara ek ki yaad ka hi milta hai। praapti bhi jo hoti hai woh bhi ekras rehti hai।