बुधवार 30 अप्रैल 2025 की दैनिक मुरली

30-04-2025 praatahmurli om shanti "baapdaada"' madhuban

“meethe bachche - baap tumhein purooshottam banaane ke liye padha rahe hain, tum abhi kanishta se uttam puroosh bante ho, sabse uttam hain devtaayen''

prashn:- yahaan tum bachche kaun-si mehnat karte ho jo satayug mein nahin hogi?

uttar:- yahaan deh sahit deh ke sab sambandhon ko bhool aatma-abhimaani ho shareer chhodne mein bahut mehnat karni padti hai। satayug mein bina mehnat baithe-baithe shareer chhod denge। abhi yahi mehnat va abhyaas karte ho ki ham aatma hain, humein is puraani duniya puraane shareer ko chhodna hai, naya lena hai। satayug mein is abhyaas ki jaroorat nahin।

geet:- door desh ka rahne vaala…

om shanti। meethe-meethe roohaani bachche jaante hain ki phir se yaani kalpa-kalpa ke baad। isko kaha jaata hai phir se doordesh ka rahne vaala aaye hain desh paraaye। yeh sirf us ek ke liye hi gaayan hai, unko hi sab yaad karte hain, woh hai vichitra। unka koi chitra nahin। brahma, vishnu, shankar ko devta kaha jaata hai। shiv bhagvaanuvaach kaha jaata hai, woh rehte hain paramdham mein। unko sukh-dhaam mein kabhi bulaate nahin, duhkhadhaam mein hi bulaate hain। woh aate bhi hain sangamayug par। yeh to bachche jaante hain satayug mein saare vishwa par tum purooshottam rehte ho। madhyam, kanishta vahaan nahin hote। uttam te uttam puroosh yeh shri lakshmi-naaraayan hain na। inhon ko aisa banaane vaala shri-shri shivbaaba kahenge। shri-shri us shivbaaba ko hi kaha jaata hai। aajkal to sanyaasi aadi bhi apne ko shri-shri kah dete hain। to baap hi aakar is srishti ko purooshottam banaate hain। satayug mein saare srishti mein uttam te uttam puroosh rehte hain। uttam te uttam aur kanishta se kanishta ka farka is samay tum samajhte ho। kanishta manushya apni nichaai dikhaate hain। abhi tum samajhte ho ham kya the, ab phir se ham svargavaasi purooshottam ban rahe hain। yeh hai hi sangamayug। tumko khaatiri hai ki yeh puraani duniya nai banni hai। puraani so nai, nai so puraani zaroor banti hai। nai ko satayug, puraani ko kaliyug kaha jaata hai। baap hai hi sachcha sona, sach kahne vaala। unko truth kehte hain। sab kuchh satya bataate hain। yeh jo kehte hain eeshvar sarvavyaapi hai, yeh jhooth hai। ab baap kehte hain jhooth na suno। hear no evil, si no evil.... raaj-vidya ki baat alag hai। woh to hai hi alpakaal sukh ke liye। doosra janma liya phir naye sir padhna pade। woh hai alpakaal ka sukh। yeh hai 21 janma, 21 peedhi ke liye। peedhi budhaape ko kaha jaata hai। vahaan kabhi akaale mrityu nahin hota। yahaan to dekho kaise akaale mrityu hoti rehti hai। gyaan mein bhi mar jaate hain। tum abhi kaal par jeet pahan rahe ho। jaante ho woh hai amarlok, yeh hai mrityulok। vahaan to jab boodhe hote hain to saakshaatkaar hota hai - ham yeh shareer chhod jaae bachcha banenge। budhaapa poora hoga aur shareer chhod denge। naya shareer mile to woh achha hi hai na। baithe-baithe khushi se shareer chhod dete hain। yahaan to us avastha mein rehte shareer chhodne liye mehnat lagti hai। yahaan ki mehnat vahaan phir common ho jaati hai। yahaan deh sahit jo kuchh hai sabko bhool jaana hai। apne ko aatma samajhna hai, is puraani duniya ko chhodna hai। naya shareer lena hai। aatma satopradhaan thi to sundar shareer mila। phir kaam chita par baithne se kaale tamopradhaan ho gaye, to shareer bhi saanvara milta hai, sundar se shyaam ban gaye। krishna ka naam to krishna hi hai phir unko shyaam sundar kyon kehte hain? chitron mein bhi krishna ka chitra saanvara bana dete hain parantu arth nahin samajhte। abhi tum samajhte ho satopradhaan the to sundar the। abhi tamopradhaan shyaam bane hain। satopradhaan ko purooshottam kahenge, tamopradhaan ko kanishta kahenge। baap to ever pure hai। woh aate hi hain haseen banaane। musaaphir hai na। kalpa-kalpa aate hain, nahin to puraani duniya ko naya kaun banaayenge! yeh to patit chhi-chhi duniya hai। in baaton ko duniya mein koi nahin jaante। ab tum jaante ho baap hamko purooshottam banaane liye padha rahe hain। phir se devta banne liye ham so brahman bane hain। tum ho sangamayugi brahman। duniya yeh nahin jaanti ki ab sangamayug hai। shaastron mein laakhon varsha kalpa ki aayu likh di hai to samajhte hain kaliyug to abhi bachcha hai। abhi tum dil mein samajhte ho - ham yahaan aaye hain uttam te uttam, kaliyugi patit se satayugi paavan, manushya se devta banne liye। granth mein bhi mahima hai - moot paleeti kapad dhoe। parantu granth padhne vaale bhi arth nahin samajhte। is samay to baap aakar saari duniya ke manushya maatra ko saaph karte hain। tum us baap ke saamne baithe ho। baap hi bachchon ko samjhaate hain। yeh rachta aur rachna ki knowledge aur koi jaante hi nahin। baap hi gyaan ka saagar hai। woh sat hai, chaitanya hai, amar hai। punarjanma rahit hai। shanti ka saagar, sukh ka saagar, pavitrata ka saagar hai। unko hi bulaate hain ki aakar yeh varsa do। tumko abhi baap 21 janmon ke liye varsa de rahe hain। yeh hai avinaashi padhaai। padhaane vaala bhi avinaashi baap hai। aadhaakalpa tum raajya paate ho phir raavanraajya hota hai। aadhaakalpa hai raamraajya, aadhaakalpa hai raavanraajya।

praanon se pyaara ek baap hi hai kyonki vahi tum bachchon ko sab duhkhon se chhudaae apaar sukh mein le jaate hain। tum nishchay se kehte ho woh hamaara praanon se pyaara paarlaukik baap hai। praan aatma ko kaha jaata hai। sab manushya-maatra unko yaad karte hain kyonki aadhaakalpa ke liye duhkh se chhudaae shanti aur sukh dene vaala baap hi hai। to praanon se pyaara hua na। tum jaante ho satayug mein ham sada sukhi rehte hain। baaki sab shantidham mein chale jaayenge। phir raavanraajya mein duhkh shuru hota hai। duhkh aur sukh ka khel hai। manushya samajhte hain yahaan hi abhi-abhi sukh hai, abhi-abhi duhkh hai। parantu nahin, tum jaante ho svarga alag hai, narka alag hai। svarga ki sthaapna baap raam karte hain, narka ki sthaapna raavan karte hain, jisko varsha-varsha jalaate hain। parantu kyon jalaate hain? kya cheez hai? kuchh nahin jaante। kitna kharcha karte hain। kitni kahaaniyaan baith sunaate, raam ki seeta bhagavti ko raavan le gaya। manushya bhi samajhte hain aisa hua hoga।

abhi tum sabka occupation jaante ho। yeh tumhaari buddhi mein knowledge hai। saare world ki history-geography ko koi bhi manushya maatra nahin jaante honge। baap hi jaante hain। unko world ka rachayita bhi nahin kahenge। world to hai hi, baap sirf aakar knowledge dete hain ki yeh chakra kaise phirta hai। bhaarat mein in lakshmi-naaraayan ka raajya tha phir kya hua? devtaaon ne koi se ladaai ki kya? kuchh bhi nahin। aadhaakalpa baad raavan raajya shuru hone se devtaayen vaam maarga mein chale jaate hain। baaki aise nahin ki yuddha mein koi ne haraaya। lashkar aadi ki koi baat nahin। na ladaai se raajya lete hain, na ganvaate hain। yeh to yog mein rah pavitra ban pavitra raajya tum sthaapan karte ho। baaki haath mein koi cheez nahin। yeh hai double ahinsa। ek to pavitrata ki ahinsa, doosra tum kisko duhkh nahin dete। sabse kadi hinsa hai kaam kataari ki। jo hi aadi-madhya-ant duhkh deti hai। raavan ke raajya mein hi duhkh shuru hota hai। beemaariyaan shuru ho jaati hain। kitni dher beemaariyaan hain। anek prakaar ki davaaiyaan nikalti rehti hain। rogi ban pade hain na। tum is yog bal se 21 janmon ke liye nirogi bante ho। vahaan duhkh va beemaari ka naam-nishaan nahin rehta। uske liye tum padh rahe ho। bachche jaante hain bhagwan hamko padhaakar bhagwan bhagavti bana rahe hain। padhaai bhi kitni sahaj hai। aadha pauna ghante mein saare chakra ka knowledge samjha dete hain। 84 janma bhi kaun-kaun lete hain - yeh tum jaante ho।

bhagwan hamko padhaate hain, woh hai hi niraakaar। sachcha-sachcha unka naam hai shiv। kalyaankaari hai na। sarva ka kalyaankaari, sarva ka sadgati daata hai oonch te oonch baap। oonch te oonch manushya banaate hain। baap padhaakar hoshiyaar banaae ab kehte hain jaakar padhaao। in brahmaakumaar-kumaariyon ko padhaane vaala shivbaaba hai। brahma dvaara tumko adopt kiya hai। prajaapita brahma kahaan se aaya? is baat mein hi moonjhate hain। inko adopt kiya, kehte hain bahut janmon ke ant mein..... ab bahut janma kisne liye? in lakshmi-naaraayan ne hi poore 84 janma liye hain isliye krishna ke liye kah dete hain shyaam sundar। ham so sundar the phir 2 kala kam hui। kala kam hote-hote abhi no kala ho gaye hain। abhi tamopradhaan se phir satopradhaan kaise banen? baap kehte hain mujhe yaad karo to tum paavan ban jaayenge। yeh bhi jaante ho yeh roodra gyaan yagya hai। ab yagya mein chaahiye brahman। tum sachche brahman ho sachchi geeta sunaane vaale isliye tum likhte bhi ho sachchi geeta paathshaala। us geeta mein to naam hi badal diya hai। haan jinhonne jaise kalpa pahle varsa liya tha vahi aakar lenge। apni dil se poochho - ham poora varsa le sakenge? manushya shareer chhodte hain to haath khaali jaate hain, woh vinaashi kamaai to saath mein chalni nahin hai। tum shareer chhodenge to haath bhartu kyonki 21 janmon ke liye tum apni kamaai jama kar rahe ho। manushyon ki to saari kamaai mitti mein mil jaayegi। isse to ham kyon na transfer kar baba ko de deven। jo bahut daan karte hain woh to doosre janma mein saahookaar bante hain, transfer karte hain na। abhi tum 21 janmon ke liye nai duniya mein transfer karte ho। tumko return mein 21 janmon ke liye milta hai। woh to ek janma liye alpakaal ke liye transfer karte hain। tum to transfer karte ho 21 janmon ke liye। baap to hai hi daata। yeh drama mein noondh hai। jo jitna karte hain, woh paate hain। woh indirect daan-punya karte hain to alpa-kaal ke liye return milta hai। yeh hai direct। abhi sab kuchh nai duniya mein transfer karna hai। inko (brahma ko) dekha kitni bahaaduri ki। tum kehte ho sab-kuchh eeshvar ne diya hai। ab baap kehte hain yeh sab hamko do। ham tumko vishwa ki baadshaahi dete hain। baba ne to phat se de diya, socha nahin। full power de di। hamko vishwa ki baadshaahi milti hai, woh nasha chadh gaya। bachchon aadi ka kuchh bhi khyaal nahin kiya। dene vaala eeshvar hai to phir kisi ka responsible thode hi rahe। 21 janma ke liye transfer kaise karna hota hai - is baap ko (brahma baba ko) dekho, follow father। prajaapita brahma ne kiya na। eeshvar to daata hai। usne inse karaaya। tum bhi jaante ho ham aaye hain baap se baadshaahi lene। din-pratidin time thoda hota jaata hai। aaphten aisi aayengi baat mat poochho। vyaapaariyon ka saans to mutthi mein rehta hai। koi jamghat na aa jaae। sipaahi ka munh dekh manushya behosh ho jaate hain। aage chal bahut tang karenge। sona aadi kuchh bhi rakhne nahin denge। baaki tumhaare paas kya rahega! paise hi nahin rahenge jo kuchh khareed kar sako। note aadi bhi chal na saken। raajya badal jaata hai। pichhaadi mein bahut duhkhi ho marte hain। bahut duhkh ke baad phir sukh hoga। yeh hai khoone naahek khel। natural calamities bhi hongi। isse pahle baap se poora varsa to lena chaahiye। bhal ghoomo phiro, sirf baap ko yaad karte raho to paavan ban jaayenge। baaki aaphten bahut aayengi। bahut haay-haay karte rahenge। tum bachchon ko abhi aisi practice karni hai jo ant mein ek shivbaaba hi yaad rahe। uski yaad mein hi rahkar shareer chhoden aur koi mitra-sambandhi aadi yaad na aaye। yeh practice karni hai। baap ko hi yaad karna hai aur naaraayan banna hai। yeh practice bahut karni pade। nahin to bahut pachhtaana padega। aur koi ki yaad aai to naapaas hua। jo paas hote hain vahi vijay maala mein piroye jaayenge। apne se poochhna chaahiye baap ko kitna yaad karte hain? kuchh bhi haath mein hoga to woh antakaal yaad aayega। haath mein nahin hoga to yaad bhi nahin aayega। baap kehte hain hamaare paas to kuchh bhi nahin hai। yeh hamaari cheez nahin hai। us knowledge ke badle yeh lo to 21 janma ke liye varsa mil jaayega। nahin to svarga ki baadshaahi ganva denge। tum yahaan aate hi ho baap se varsa lene। paavan to zaroor banna pade। nahin to saja khaakar hisaab-kitaab chuktu kar jaayenge। pad kuchh nahin milega। shreemat par chalenge to krishna ko god mein lenge। kehte hain na krishna jaisa pati mile va bachcha mile। koi to achhi reeti samajhte hain, koi to phir ulta-sulta bol dete hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise brahma baba ne apna sab kuchh transfer kar full power baap ko de di, socha nahin, aise follow father kar 21 janmon ki praalabdha jama karni hai।

2) practice karni hai antakaal mein ek baap ke sivaae aur koi bhi cheez yaad na aaye। hamaara kuchh nahin, sab baba ka hai। alpha aur be, isi smriti se paas ho vijaymaala mein aana hai।

vardaan:- mansa par full attention dene vaale chadhti kala ke anubhvi vishwa parivartak bhav

ab last samay mein mansa dvaara hi vishwa parivartan ke nimitta banna hai isliye ab mansa ka ek sankalp bhi vyartha hua to bahut kuchh ganvaaya, ek sankalp ko bhi saadhaaran baat na samjho, vartamaan samay sankalp ki halchal bhi badi halchal gini jaati hai kyonki ab samay badal gaya, purooshaartha ki gati bhi badal gai to sankalp mein hi full stop chaahiye। jab mansa par itna attention ho tab chadhti kala dvaara vishwa parivartak ban sakenge।

slogan:- karma mein yog ka anubhav hona arthaat karmayogi banna।

avyakt ishaare - “combined roop ki smriti se sada vijayi bano''

“aap aur baap'' - is combined rup ka anubhav karte, sada shubh bhaavna, shreshtha kaamna, shreshtha vaani, shreshtha drishti, shreshtha karma dvaara vishwa kalyaankaari svarup ka anubhav karo to second mein sarva samasyaaon ka samaadhaan kar sakenge। sada ek slogaan yaad rakhna - “na samasya banenge na samasya ko dekh dagmag honge, svayan bhi samaadhaan svarup rahenge aur doosron ko bhi samaadhaan denge।'' yeh smriti saphalta swaroop bana degi।