गुरुवार 31 जुलाई 2025 की दैनिक मुरली

31-07-2025 praatahmurli om shanti "baapdaada"' madhuban

meethe bachche - “tum savere-savere uthkar bahut pyaar se kaho baba good morning, is yaad se hi tum satopradhaan ban jaayenge''

prashn:- accurate yaad dvaara baap ki current lene ke liye mukhya kin gunon ki aavashyakta hai?

uttar:- bahut dhairyavat ho, samajh aur gambheerta se apne ko aatma samajh yaad karne se baap ki current milegi aur aatma satopradhaan banti jaayegi। tumhein abhi baap ki yaad sataani chaahiye kyonki baap se bahut bhaari varsa milta hai, tum kaanton se phool bante ho, sab daiveegun aa jaate hain।

om shanti। baap kehte hain meethe bachche tatvam arthaat tum aatmaayen bhi shant svarup ho। tum sarva aatmaon ka svadharma hai hi shanti। shantidham se phir yahaan aakar talkie bante ho। yeh karmendriyaan tumko milti hai part bajaane ke liye। aatma chhoti-badi nahin hoti hai, shareer chhota bada hota hai। baap kehte hain main to shareerdhaari nahin hoon। mujhe bachchon se sammukh milne aana hota hai। samjho jaise baap hai, unse bachche paida hote hain, to woh bachcha aise nahin kahega ki main paramdham se aakar janma le maat-pita se milne aaya hoon। bhal koi nai aatma aati hai kiske bhi shareer mein va koi puraani aatma kiske shareer mein pravesh karti hai to aise nahin kahenge ki maat-pita se milne aaya hoon। unko automatically maat-pita mil jaate hain। yahaan yeh hai nai baat। baap kehte hain main paramdham se aakar tum bachchon ke sammukh hua hoon। tumhein knowledge deta hoon kyonki main hoon knowledgeful, gyaan ka saagar, main aata hoon tum bachchon ko padhaane, raajayog sikhaane।

tum bachche abhi sangam par ho, phir jaana hai apne ghar isliye paavan to zaroor banna hai। andar mein bahut khushi honi chaahiye। oho! behad ka baap kehte hain meethe-meethe bachchon mujhe yaad karo to tum satopradhaan, vishwa ka maalik banenge। baap bachchon ko kitna pyaar karte hain। aise nahin ki sirf teacher ke roop mein padhaakar ghar chale jaate hain। yeh to baap bhi hai, teacher bhi hai। tumko padhaate hain। yaad ki yaatra bhi sikhlaate hain। to vishwa ka maalik banaane vaale, patit se paavan banaane vaale baap ke saath bahut lav hona chaahiye। savere-savere uthkar pahle-pahle shivbaaba se good morning karna chaahiye। bachchon ko apne dil se poochhna hai ki ham savere uthkar kitna behad ke baap ko yaad karte hain! savere uth baba se good morning karen, gyaan ke chintan mein rahen to khushi ka paara chadhe। mukhya hai hi yaad, isse bhavishya ke liye bahut bhaari kamaai hoti hai। kalpa-kalpaantar yeh kamaai kaam aayegi। tumhein bada dhairyavat ban, gambheerta aur samajh se yaad karna hai। mote hisaab mein to bhal kah dete hain ki ham baba ko bahut yaad karte hain parantu accurate yaad karne mein mehnat hai। jo baap ko jaasti yaad karte hain unko current jaasti milti hai kyonki yaad se yaad milti hai। yog aur gyaan do cheezen hain। yog ki bahut bhaari subject hai। yog se hi aatma satopradhaan banti hai। yaad bina satopradhaan hona asambhav hai। achhi reeti pyaar se baap ko yaad karenge to automatically current milegi। healthy ban jaayenge। current se aayu bhi badhti hai। bachche yaad karte hain to baba bhi searchlight dete hain।

meethe bachchon ko yeh pakka yaad rakhna hai। shivbaaba hamko padhaate hain। shivbaaba patit paavan bhi hain। sadgati daata bhi hain। sadgati maana svarga ki raajaai dete hain। baba kitna meetha hai। kitna pyaar se bachchon ko baith padhaate hain। baap, daada dvaara hamko padhaate hain। baba bachchon ko kitna pyaar karte hain, koi takleeph nahin dete। sirf kehte hain mujhe yaad karo aur chakra ko yaad karo। baap ki yaad mein dil ekdam thar jaani chaahiye। ek baap ki hi yaad sataani chaahiye kyonki baap se varsa kitna bhaari milta hai। apne ko dekhna chaahiye hamaara baap ke saath kitna lav hai। kahaan tak hamaare mein daivi gun hain! kyonki tum bachche ab kaanton se phool ban rahe ho। jitna-jitna yog mein rahenge utna kaanton se phool, satopradhaan bante jaayenge। jo bahut kaanton ko phool banaate hain unhein hi sachcha khushboodaar phool kahenge। woh kabhi kisko kaanta nahin lagaayenge। krodh bhi bada kaanta hai। bahuton ko duhkh dete hain। abhi tum bachche kaanton ki duniya se kinaare par aa gaye ho, tum ho sangam par। jaise maali phoolon ko alag pot (bartan) mein nikaal rakhte hain vaise hi tum phoolon ko bhi ab sangamayugi pot mein alag rakha hua hai। phir tum phool svarga mein chale jaayenge। kaliyugi kaanten bhasma ho jaayenge।

baap kehte hain meethe bachche jitna tum bahuton ka kalyaan karenge utna tumko hi oojoora milega। bahuton ko raasta bataayenge to bahuton ki aasheervaad milegi। gyaan ratnon se jholi bharkar phir daan karna hai। gyaan saagar tumko ratnon ki thaaliyaan bhar-bhar kar dete hain, jo uska daan karte hain vahi sabko pyaare lagte hain। bachchon ke andar mein kitni khushi honi chaahiye। sensible bachche jo honge woh to kahenge ham baba se poora hi varsa lenge। ekdam chatak padenge। baap se bahut lav rahega kyonki jaante hain praan dene vaala baap mila hai। knowledge ka vardaan aisa dete hain jisse ham kya se kya ban jaate hain, insolvent se solvent ban jaate hain। itna bhandaara bharpoor kar dete hain। jitna baap ko yaad karenge utna lav rahega, kashish hogi। sui saaph hoti hai to chumbak taraph khaich jaati hai na। baap ki yaad se kat nikalti jaayegi। ek baap ke sivaae aur koi yaad na aaye।

baap samjhaate hain meethe bachche, gaphlat mat karo। svadarshan chakradhaari bano, light house bano। svadarshan chakradhaari banne ki practice achhi ho jaayegi to phir tum jaise gyaan ka saagar ho jaayenge। jaise student padhkar teacher ban jaate hain na। tumhaara dhandha hi yeh hai। sabko svadarshan chakradhaari banaao tab hi chakravarti raaja-raani banenge। baap kehte hain bachche tumhaare bigar hamko bhi jaise beaaraami hoti hai। jab samay hota hai to beaaraami ho jaati hai। bas abhi ham jaaoon। bachche bahut pukaarte hain, bahut duhkhi hain। taras padta hai isliye main aata hoon tum bachchon ko sab duhkhon se chhudaane। abhi tum bachchon ko ghar chalna hai, phir vahaan se tum aapehi sukhdhaam chale jaayenge। vahaan main tumhaara saathi nahin banoonga। apni avastha anusaar tumhaari aatma chali jaayegi। achha।

meethe-meethe sikeeldhe bachchon prati maat-pita baapdaada ka yaadapyaar aur good morning। ruhaani baap ki ruhaani bachchon ko namaste।

dhaarna ke liye mukhya saar:-

1) baap ki current automatic lene ke liye bahut pyaar se baap ko yaad karna hai। yeh yaad hi healthy banaayegi। current lene se hi aayu badhegi। yaad se hi baap ki searchlight milegi।

2) gaphlat chhod svadarshan chakradhaari, light house banna hai, isse hi gyaan saagar ban chakravarti raaja raani ban jaayenge।

vardaan:- sabko khushkhabri sunaane vaale khushi ke khajaane se bharpoor bhandaar bhav

sada apne is swaroop ko saamne rakho ki ham khushi ke khajaane se bharpoor bhandaar hain। jo bhi anginat aur avinaashi khajaane mile hain un khajaanon ko smriti mein laao। khajaanon ko smriti mein laane se khushi hogi aur jahaan khushi hai vahaan sadaakaal ke liye duhkh door ho jaate hain। khajaanon ki smriti se aatma samartha ban jaati hai, vyartha samaapta ho jaata hai। bharpoor aatma kabhi halchal mein nahin aati, woh svayan bhi khush rehti aur doosron ko bhi khushkhabri sunaati hai।

slogan:- yogya banna hai to karma aur yog ka balance rakho।

avyakt ishaare - sankalpon ki shakti jama kar shreshtha seva ke nimitta bano

seva mein mukh dvaara sandesh dene mein samay bhi lagaate ho, sampatti bhi lagaate ho, halchal mein bhi aate ho, thakte bhi ho… lekin shreshtha sankalp ki seva mein yeh sab bach jaayega। to is sankalp shakti ko badhaao। dridhta sampanna sankalp karo to pratyakshata bhi jaldi hogi।

drama ke kuchh guhya rahasya (sandesh putriyon dvaara)

1) is viraat film (drama) mein har ek manushyaatma mein apni-apni position anusaar saare jeevan ka gyaan athva act pahle hi merge roop mein rehti hai। jeevaatma mein saare jeevan ki pahchaan merge hone kaaran samay par emerge hoti hai। har ek mein apni-apni sampoornata ki avastha anusaar jaankaari athva act jo merge hai, vahi samay par emerge hoti hai jisse tum harek jaani-jaananhaar ban jaate ho।

2) is viraat film ki second second ki act nai hone ke kaaran tumko aisa samajh mein aayega jaise ki abhi-abhi yahaan aai hoon। har second ki act alag hoti hai, karke kalpa aage vaali ghadi repeat hoti hai parantu jis samay practical life mein chalte ho, us samay nai mahsoos hoti hai। isi samajh se aage badhte chalo। aise koi kah nahin sakta ki mainne to gyaan praapta kar liya, ab main jaati hoon, nahin। jab tak vinaash ho tab tak saari act aur saara gyaan naya hai।

3) is viraat drama ki jo bhaavi bani hui hai..., woh nishchay se hi bani hui hai। bhaavi ko koi taalta hai ya banaata hai vo sab apne oopar hai। khud ka shatru aur khud ka mitra main hi hoon। abhi tumhein bahut ramneek, sweet banna aur banaana hai।

4) is viraat film mein yeh sahan karna bhi tumhaare liye kalpa pahle vaala ek meetha sapna hai kyonki tumhein phir bhi kuchh hota nahin hai, jinhonne bhi tumhein tang kiya hai vo bhi kahenge ki mainne inko itna tang kiya, duhkhi kiya, parantu yeh to phir bhi divine unity, supreme unity, vijayi paandav bankar rehte hain। is bani hui bhaavi ko koi taal nahin sakta।

5) is viraat film mein dekho kaisa wonder hai jo tum pratyaksha paandav bhi aae padhaare ho aur tumhaare puraane chitra aur nishaaniyaan bhi ab tak kaayam hain। jaise puraane kaagaj, puraane shaastra, geeta pustak aadi sambhaalkar rakhte hain। phir uska bahut maan hota hai। aisi puraani cheezen kaayam hote hue ab nai vastu invention hoti hai। puraani geeta practical mein hote, nai geeta invent hui hai। puraane ki ant tab hoti jab naye ki sthaapna ho। abhi tum practical mein gyaan ko jeevan mein pratyaksha dhaaran karne se durga, kaali aadi bani ho। phir puraane sthool jad chitron ka vinaash hota hai aur naye chaitanya swaroop ki sthaapna hoti hai।

6) is viraat film plan anusaar sangam ke sweet samay aap ananya daivi bachche hi vikaaron par vijay praapta kar vaikuntha ki sweet lottery paate ho। aapka yeh lalaat kitna lucky hai। is samay tum nar aur naari avinaashi gyaan se poojya yogya devta pad praapta karte ho, yahi hai is sangam ke suhaavne wonderful samay ki wonderful reeti।

7) eeshvar saakshi ho dekh raha hai ki mainne jin actors ko anek gahnon, bhooshnon se shrringaar kar is srishti roopi stage par dance karne arth bheja tha vo kaise act kar rahe hain। mainne apne daivi bachchon ko golden mani, silver mani dekar kaha tha ki yeh bhooshan, yeh gahne pahankar khushmizaaj hokar saakshi ban act bhi karna aur saakshi ho is khel ko bhi dekhna। phansana nahin lekin aadhaakalpa raajya bhaagya bhogkar phir aadhaakalpa apni hi rachi hui maaya mein phans gaye। ab phir main tumhein kehta hoon is maaya ko chhod do। is gyaan maarga mein vikaari kaarya se palat nirvikaari banne se aadi madhya ant duhkh se chhoot janma-janmaantar ke liye sukh praapta kar lenge।

8) apne se koi bhi oonch avastha vaale dvaara yadi koi saavdhaani milti hai to unko raazayukta uthaane mein hi kalyaan hai। unke bheetar ke raaz ko jaanna chaahiye ki ismen avashya koi kalyaan samaaya hua hai। yeh jo point mujhe inke dvaara mili woh bilkul yathaartha hai, use bahut khushi se sveekaar karna chaahiye kyonki agar mere dvaara kabhi koi bhool ho gai to woh point yaad aane se svayan ko correct kar lenge isliye koi bhi saavdhaani ho bahut vishaal buddhi se dhaaran karne se tum unnati ko praapta kar sakenge।

9) abhi tumhein nitya antarmukh hokar yog mein rehna hai kyonki antarmukh hone se svayan ko dekh sakenge। sirf dekhenge nahin, parivartan bhi kar sakenge। yahi hai sarvottam avastha। jab pata hai harek apni stage pramaan purushaarthi hai to koi bhi purushaarthi ke liye argue nahin chal sakti kyonki vo apni stage anusaar purushaarthi hai, unki stage ko dekh unse gun uthaao। agar gun nahin utha sakte to use chhod do।

10) tum sada apne sarvottam lakshya ko saamne dekh apne ko hi dekho। tum harek vyaktigat purushaarthi ho, tum apne taraph nazar rakh aage daudte raho, koi bhal kya bhi karta rahe parantu main apne swaroop mein sthit rahoon, anya kisi ko na dekhoon। apne buddhi yogbal se main uski avastha ko jaan loon। antarmukhta ki avastha se hi tum anek pareekshaaon se paas ho sakte ho। achha। om shanti।