शुक्रवार 1 अगस्त 2025 की दैनिक मुरली

01-08-2025 praatahmurli om shanti "baapdaada"' madhuban

“meethe bachche - baap ko tum bachche hi pyaare ho, baap tumhein hi sudhaarne ke liye shreemat dete hain, sada eeshvareey mat par chal svayan ko pavitra banaao''

prashn:- vishwa mein shanti ki sthaapna kab aur kis vidhi se hoti hai?

uttar:- tum jaante ho vishwa mein shanti to mahaabhaarat ladaai ke baad hi hoti hai। lekin uske liye tumhein pahle se hi taiyaar hona hai। apni karmaateet avastha banaane ki mehnat karni hai। srishti ke aadi-madhya-ant ka gyaan simran kar baap ki yaad se sampoorn paavan banna hai tab is srishti ka parivartan hoga।

geet:- aaj andhere mein hai insaan …

om shanti। yeh geet hai bhakti maarga ka gaaya hua। kehte hain ham andhere mein hain, ab gyaan ka teesra netra do। gyaan maangate hain gyaan saagar se। baaki hai agyaan। kaha jaata hai kaliyug mein sab agyaan ki aasuri neend mein soye hue kumbhakran hain। baap kehte hain gyaan to bahut hi simple hai। bhakti maarga mein kitne ved-shaastra aadi padhte hain, hathayog karte hain, guru aadi karte hain। ab un sabko chhodna padta hai kyonki woh kabhi raajayog sikhla na saken। baap hi to raajaai denge। manushya, manushya ko de na saken। parantu uske liye hi sannyaasi kehte hain kaag vishta samaan sukh hai kyonki khud gharbaar chhod bhaagte hain। yeh gyaan sivaae gyaan saagar baap ke aur koi de na sake। yeh raajayog bhagwan hi sikhlaate hain। manushya, manushya ko paavan bana na sake। patit-paavan ek hi baap hai। manushya bhakti maarga mein kitna phanse hue hain। janma-janmaantar se bhakti karte aaye hain। snaan karne jaate hain। aise bhi nahin sirf ganga mein snaan karte hain। jahaan bhi paani ka taalaab aadi dekhenge to usko bhi patit-paavan samajhte hain। yahaan bhi gaoomukh hai। jharne se paani aata hai। jaise kuen mein paani aata hai to unko patit-paavni ganga thode hi kahenge। manushya samajhte hain yeh bhi teertha hai। bahut manushya bhaavna se vahaan jaakar snaan aadi karte hain। tum bachchon ko abhi gyaan mila hai। tum batlaate ho to bhi maante nahin। apna deh-ahankaar bahut hai। ham itne shaastra padhe hain.....! baap kehte hain yeh padha hua sab bhoolo। ab in sab baaton ka manushyon ko kaise pata pade isliye baba kehte hain aisi-aisi points likhkar aeroplane dvaara giraao। jaise aaj-kal kehte hain - vishwa mein shanti kaise ho? koi ne raay di to unko inaam milta rehta hai। ab woh shanti ki sthaapna to kar na saken। shanti hai kahaan? jhoothi prize dete rehte hain।

ab tum jaante ho vishwa mein shanti to hoti hai ladaai ke baad। yeh ladaai to koi bhi samay lag sakti hai। aisi taiyaari hai। sirf tum bachchon ki hi deri hai। jab tum bachche karmaateet avastha ko paao, ismen hi mehnat hai। baap kehte hain maamekam yaad karo aur grihastha vyavhaar mein rehte kamal phool samaan pavitra bano aur srishti ke aadi-madhya-ant ka gyaan simran karte raho। tum likh bhi sakte ho - drama anusaar kalpa pahle muaaphik vishwa mein shanti sthaapan ho jaayegi। tum yeh bhi samjha sakte ho ki vishwa mein shanti to satayug mein hi hoti hai। yahaan zaroor ashaanti rahegi। parantu kai hain jo tumhaari baaton par vishvaas nahin karte kyonki unko svarga mein aana hi nahin hai to shreemat par chalenge nahin। yahaan bhi bahut hain jo shreemat par pavitra rah nahin sakte। oonch te oonch bhagwan ki tumko mat milti hai। koi ki chalan achhi nahin hoti hai to kehte hain na tumko eeshvar achhi mat de। abhi tumko eeshvareey mat par chalna chaahiye। baap kehte hain 63 janma tumne vishay saagar mein gote khaaye hain। bachchon se baat karte hain। bachchon ko hi baap sudhaarenge na। saari duniya ko kaise sudhaarenge। baahar vaalon ko kahenge bachchon se samjho। baap baahar vaalon se baat nahin kar sakte। baap ko bachche hi pyaare lagte hain। sautele bachche thode hi lagenge। laukik baap bhi sapoot bachchon ko dhan dete hain। sab bachche samaan to nahin honge। baap bhi kehte hain jo mere bante hain, unhon ko hi main varsa deta hoon। jo mere nahin bante hain, woh hazam nahin kar sakenge। shreemat par chal nahin sakenge। woh hain bhagat। baba ke bahut dekhe hue hain। koi bada sannyaasi aata hai to bahut unhon ke followers hote hain। fund (chanda) ikattha karte hain। apni-apni taakat anusaar funds nikaalte hain। yahaan baap to aise nahin kahenge - funds ikattha karo। nahin, yahaan to jo beej boyenge 21 janma uska phal paayenge। manushya daan karte hain to samajhte hain eeshvar arth ham karte hain। eeshvar samarpanam kehte hain va to kahenge shreekrishna samarpanam। shreekrishna ka naam kyon lete hain? kyonki geeta ka bhagwan samajhte hain। shri raadhe arpanam kabhi nahin kahenge। eeshvar ya shreekrishna arpanam kehte hain। jaante hain phal dene vaala eeshvar hi hai। koi saahookaar ke ghar mein janma lete hain to kehte hain na, aage janma mein bahut daan-punya kiye hain tab yeh bana hai। raaja bhi ban sakte hain। parantu woh hai alpakaal kaag vishta samaan sukh। raajaaon ko bhi sannyaasi log sannyaas karaate hain to unko kehte hain stri to sarpini hai, lekin dropdi ne to pukaara hai, duhshaasan mujhe nangan karte hain। ab bhi ablaayen kitna pukaarti hain - hamaari laaj rakho। baba yeh hamko bahut maarte hain। kehte hain vish do nahin to khoon karta hoon। baba in bandhanon se chhudaao। baap kehte hain bandhan to khalaas hone hi hain phir 21 janma kabhi nangan nahin honge। vahaan vikaar hota nahin। is mrityulok mein yeh antim janma hai। yeh hai hi vicious world।

doosri baat, baap samjhaate hain ki is samay manushya kitne besmajh ban gaye hain। jab koi marta hai to kehte hain svarga padhaara। lekin svarga hai kahaan। yeh to narka hai। svargavaasi hua to zaroor narka mein tha। parantu kisko seedha kaho - tum narkavaasi ho to krodh mein aakar bigad padenge। aise-aise ko tumko likhna chaahiye। phalaana svargavaasi hua to iska matlab tum narkavaasi ho na। ham tumko aisi yukti bataayen jo tum sach-sach svarga mein jaao। yeh puraani duniya to ab khatma honi hai। akhbaar mein nikaalo ki is ladaai ke baad vishwa mein shanti honi hai, 5 hazaar varsha pahle muaaphik। vahaan ek hi aadi sanaatan devi-devta dharma tha। vo log phir kehte vahaan bhi kans, jaraasandhi aadi asur the, treta mein raavan tha। ab unse maatha kaun maare। gyaan aur bhakti mein raat-din ka farka hai। itni sahaj baat bhi mushkil kiski buddhi mein baithti hai। to aise-aise slogans banaane chaahiye। is ladaai ke baad vishwa mein shanti honi hai drama anusaar। kalpa-kalpa vishwa mein shanti hoti hai phir kaliyug ant mein ashaanti hoti hai। satayug mein hi shanti hoti hai। yeh bhi tum likh sakte ho, geeta mein bhool karne se hi bhaarat ka yeh haal hua hai। poore 84 janma lene vaale shreekrishna ka naam daal diya hai। shri naaraayan ka bhi nahin daala hai। unke phir bhi 84 janmon mein se kuchh din kam kahenge na। shreekrishna ke poore 84 janma hote hain। shivbaaba aate hain bachchon ko heere jaisa banaane to unke liye phir dibbi bhi aisi sone ki chaahiye, jismen baap aakar pravesh kare। ab yeh sone ka kaise bane to phat se unko saakshaatkaar karaaya - tum to vishwa ke maalik bante ho। ab maamekam yaad karo, pavitra bano to jhat pavitra hone lag pade। pavitra banne bigar to gyaan ki dhaarna ho na sake। sherni ke doodh liye sone ka bartan chaahiye। yeh gyaan to hai - parampita paramatma ka। isko dhaaran karne ke liye bhi sone ka bartan chaahiye। pavitra chaahiye, tab dhaarna ho। pavitrata ki pratigya karke phir gir padte hain to yog ki yaatra hi khatma ho jaati hai। gyaan bhi khatma ho jaata hai। kisko kah na sake - bhagvaanuvaach, kaam mahaashatru hai। unka teer lagega nahin। woh phir kukkad gyaani ho padte। koi bhi vikaar na ho। roz potaamel rakho। jaise baap sarvashaktimaan hai vaise maaya bhi sarvashaktimaan hai। aadhaakalpa raavan ka raajya chalta hai। in par jeet baap bigar koi pahna na sake। drama anusaar raavan raajya bhi hona hi hai। bhaarat ki hi haar aur jeet par yeh drama bana hua hai। yeh baap tum bachchon ko hi samjhaate hain। mukhya hai pavitra hone ki baat। baap kehte hain main aata hi hoon patiton ko paavan banaane। baaki shaastron mein paandav aur kaurvon ki ladaai, jua aadi baith dikhaaye hain। aisi baat ho kaise sakti। raajayog ki padhaai aisi hoti hai kya? yuddha ke maidaan mein geeta paathshaala hoti hai kya? kahaan janma-maran rahit shivbaaba, kahaan poore 84 janma lene vaala shreekrishna। unke hi antim janma mein baap aakar pravesh karte hain। kitna clear hai। grihastha vyavhaar mein rehte pavitra bhi banna hai। sannyaasi to kehte hain - donon ikatthe rah pavitra nahin rah sakte। kaho tumko to koi praapti nahin, to kaise rahenge। yahaan to vishwa ki baadshaahi milti hai। baap kehte hain mere khaatir kul ki laaj rakho। shivbaaba kehte hain inke daadhi ki laaj rakho। yeh ek antim janma pavitra raho to svarga ke maalik banenge। apne liye hi mehnat karte hain। doosra koi svarga mein aa nahin sakta। yeh tumhaari raajdhaani sthaapan ho rahi hai। ismen sab chaahiye na। vahaan vajeer to hote nahin। raajaaon ko raay ki darkaar nahin। patit raajaaon ko bhi ek vajeer hota hai। yahaan to dekho kitne ministers hain। aapas mein ladte rehte hain। baap sabhi jhanjhaton se chhuda dete hain। 3 hazaar varsha phir koi ladaai nahin hogi। jel aadi nahin rahega। court aadi kuchh nahin hoga। vahaan to sukh hi sukh hai। iske liye purushaartha karna hai। maut sir par khada hai। yaad ki yaatra se vikarmaajeet banna hai। tum hi messengers ho jo sabko baap ka message dete ho ki manamnaabhav। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan ki dhaarna karne ke liye pavitra ban buddhi roopi bartan ko svachchha banaana hai। sirf kukkad gyaani nahin banna hai।

2) direct baap ke aage apna sab kuchh arpan kar shreemat par chalkar 21 janmon ke liye raajaai pad lena hai।

vardaan:- har shakti ko kaarya mein lagaakar vriddhi karne vaale shreshtha dhanvaan va samajhdaar bhav

samajhdaar bachche har shakti ko kaarya mein lagaane ki vidhi jaante hain। jo jitna shaktiyon ko kaarya mein lagaate hain utna unki woh shaktiyaan vriddhi ko praapta hoti hain। to aisa eeshvareey budget banaao jo vishwa ki har aatma aap dvaara kuchh na kuchh praapti karke aapke gungaan kare। sabhi ko kuchh na kuchh dena hi hai। chaahe mukti do, chaahe jeevanmukti do। eeshvareey budget banaakar sarva shaktiyon ki bachat kar jama karo aur jama hui shakti dvaara sarva aatmaon ko bhikhaareepan se, duhkh ashaanti se mukta karo।

slogan:- shuddh sankalpon ko apne jeevan ka anmol khajaana bana lo to maalaamaal ban jaayenge।

maateshvari ji ke anmol mahaavaakya - “ab vikarma banaane ki competition nahin karni hai''

pahle-pahle to apne paas yeh em avashya rakhni hai ki hamko kis bhi reeti se apne vikaaron ko vash karna hai, tab hi eeshvareey sukh shanti mein rah sakte hain। apna mukhya purushaartha hai khud shanti mein rahkar auron ko shanti mein laana, ismen sahanshakti zaroor chaahiye। saara apne oopar madaar hai, aisa nahin koi ne kuchh kaha to ashaanti mein aa jaana chaahiye, nahin। gyaan ka pahla gun hai sahanshakti dhaaran karna। dekho agyaankaal mein kehte hain bhal koi kitni bhi gaali deve, aise samjho ki mujhe kahaan lagi? bhal jisne gaali di vo khud to ashaanti mein aa gaya, unhon ka hisaab-kitaab apna bana। lekin ham bhi ashaanti mein aae, kuchh kah diya to phir hamaara vikarma banega, to vikarma banaane ki competition nahin karni hai। apne ko to vikarmon ko bhasma karna hai, na ki banaana hai, aise vikarma to janma janmaantar banaate aaye aur duhkh uthaate aaye। ab to knowledge mil rahi hai in paanch vikaaron ko jeeto। vikaaron ka bhi bada prastaav (vistaar) hai, bahut sookshm reeti se aate hain। kab eershya aa jaati hai to sochte hain isne aisa kiya to main kyon na karoon? yeh hai badi bhool। apne ko to abhul banaana hai, agar koi ne kuchh kaha to aise samjho yeh bhi meri pareeksha hai, kitne tak mere andar sahanshakti hai? agar koi kahe mainne bahut sahan kiya, ek baari bhi josh aa gaya to aakhreen fail ho gaya। jisne kaha usne apna bigaada parantu apne ko to banaana hai, na ki bigaadna hai isliye achha purushaartha kar janma janmaantar ke liye achhi praalabdha banaani hai। baaki jo vikaaron ke vash hai goya unhon mein bhoot pravesh hai, bhooton ki bhaasha hi aise nikalti hai parantu jo daivi souls hain, unki bhaasha daivi hi niklegi। to apne ko daivi banaana hai na ki aasuri। achha-om shanti।

avyakt ishaare - sahajyogi banna hai to parmaatma pyaar ke anubhvi bano

parmaatma-pyaar ke anubhvi bano to isi anubhav se sahajyogi ban udte rahenge। parmaatma-pyaar udaane ka saadhan hai। udne vaale kabhi dharni ki aakarshan mein aa nahin sakte। maaya ka kitna bhi aakarshit roop ho lekin woh aakarshan udti kala vaalon ke paas pahunch nahin sakti।