सोमवार 10 नवंबर 2025 की दैनिक मुरली

10-11-2025 praatahmurli om shanti "baapdaada"' madhuban

meethe bachche - “tan-man-dhan athva mansa-vaacha-karmana aisi service karo jo 21 janmon ka baap se evza mile parantu service mein kabhi aapas mein anabni nahin honi chaahiye''

prashn:- drama anusaar baba jo service kara rahe hain usmein aur teevrata laane ki vidhi kya hai?

uttar:- aapas mein ekmat ho, kabhi koi khit-khit na ho। agar khit-khit hogi to service kya karenge isliye aapas mein milkar sangathan banaae raay karo, ek do ke madadgaar bano। baba to madadgaar hai hi parantu “himmate bachche madde baap…'' iske arth ko yathaartha samajhkar bade kaarya mein madadgaar bano।

om shanti। meethe-meethe bachche yahaan aate hain roohaani baap ke paas refresh hone। jab refresh hokar vaapis jaate hain to zaroor jaakar kuchh karke dikhlaana hai। ek-ek bachche ko service ka saboot dena hai। jaise koi-koi bachche kehte hain hamaari centre kholne ki dil hai। gaanvadon mein bhi service karte hain na। to bachchon ko sadaiv yeh khyaal rehna chaahiye ki ham mansa-vaacha-karmana, tan-man-dhan se aisi service karen jo bhavishya 21 janmon ka evza baap se mile। yahi ona hai। ham kuchh karte hain? koi ko gyaan dete hain? saara din yeh khyaalaat aane chaahiye। bhal centre kholen parantu ghar mein stri-purush ki anabni nahin honi chaahiye। koi ghamsaan nahin chaahiye। sannyaasi log ghar ke ghamsaan se nikal jaate hain। don't care kar chale jaate hain। phir government unko rokti hai kya? woh to sirf purush hi nikalte hain। abhi koi-koi maataayen nikalti hain, jinka koi dhani-dhoni nahin hota ya vairaagya aa jaata hai, unhon ko bhi vo sannyaasi purush log baith sikhlaate hain। un dvaara apna dhandha karte hain। paise aadi saare unke paas rehte hain। vaastav mein gharbaar chhoda to phir paise rakhne ki darkaar nahin rehti। to ab baap tum bachchon ko samjha rahe hain। har ek ki buddhi mein aana chaahiye - hamko baap ka parichay dena hai। manushya to kuchh nahin jaante, besmajh hain। tum bachchon ke liye baap ka pharmaan hai - meethe-meethe bachchon, tum apne ko aatma samjho, sirf pandit nahin banna hai। apna bhi kalyaan karna hai। yaad se satopradhaan banna hai। bahut purushaartha karna hai। nahin to bahut pachhtaana padega। kehte hain baba ham ghadi-ghadi bhool jaate hain। sankalp aa jaate hain। baba kehte hain woh to aayenge hi। tumko baap ki yaad mein rah satopradhaan banna hai। aatma jo apvitra hai, unko parampita paramatma ko hi yaad kar pavitra banna hai। baap hi bachchon ko direction dete hain - he pharmaanbardaar bachchon - tumko pharmaan karta hoon, mujhe yaad karo to tumhaare paap katenge। pahli-pahli baat hi yeh sunaao ki niraakaar shivbaaba kehte hain mujhe yaad karo - main patit-paavan hoon। meri yaad se hi vikarma vinaash honge aur koi upaay nahin। na koi bata sakte hain। dher ke dher sannyaasi aadi hain, nimantran dete hain - yog conference mein aakar shaamil ho। ab unke hathayog se kiska kalyaan to hona nahin hai। dher yog aashram hain jinko is raajayog ka bilkul pata hi nahin hai। baap ko hi nahin jaante। behad ka baap hi aakar sachcha-sachcha yog sikhlaate hain। baap tum bachchon ko aapasmaan banaate hain। jaise main niraakaar hoon। temporary is tan mein aaya hoon। bhaagyashaali rath to zaroor manushya ka hoga। bail ko to nahin kahenge। baaki koi ghodegaadi aadi ki baat nahin hai। na ladaai ki koi baat hai। tum jaante ho hamko maaya se hi ladaai karni hai। gaaya bhi jaata hai maaya te haare haar.... tum bahut achhi reeti samjha sakte ho - parantu ab seekh rahe ho। koi seekhte-seekhte bhi ekdam dharni par gir jaate hain। koi khitkhit ho padti hai। do bahnon ki bhi aapas mein nahin banti, loonpaani ho jaate hain। tumhaari aapas mein koi bhi khit-khit nahin honi chaahiye। khit-khit hogi to baap kahenge yeh kya service karenge। bahut achhe-achhe ka bhi aisa haal ho jaata hai। abhi maala banaai jaae to kahenge defected maala hai। inmen ajun yeh-yeh avgun hain। drama plan anusaar baba service bhi karaate rehte hain। direction dete rehte hain। dehli mein chaaron or seva ka gheraav daalo। yeh sirf ek ko thode hi karna hai, aapas mein milkar raay karni hai। sab ek mat hone chaahiye। baba ek hai parantu madadgaar bachchon bigar kaam thode hi karenge। tum centres kholte ho, mat lete ho। baba poochhte hain madad karne vaale ho? kehte hain - haan baba, agar madad dene vaale nahin honge to kuchh kar nahin sakenge। ghar mein bhi mitra-sambandhi aadi aate hain na। bhal gaali den, woh tumko kaatte rahenge। tumhein uski parvaah nahin karni hai।

tum bachchon ko aapas mein baithkar raay karni chaahiye। jaise centres kholte hain to bhi sab milkar likhte hain - baba ham braahmani ki raay se yeh kaam karte hain। sindhi bhaasha mein kehte hain - ba ta baara (ek ke saath 2 milne se 12 ho jaate) 12 honge to aur hi achhi raay niklegi। kahaan-kahaan ek-do se raay nahin lete hain। ab aise koi kaam ho sakta hai kya? baba kahenge jab tak tumhaara aapas mein sangathan hi nahin to tum itna bada kaarya kaise kar sakenge। chhoti dukaan, badi dukaan bhi hoti hai na। aapas mein milkar sangathan karte hain। aise koi nahin kehte baba aap madad karo। pahle to madadgaar banaane chaahiye। phir baba kehte hain - himmate bachche madde baap। pahle to apne madadgaar banaao। baba ham itna karte hain baaki aap madad do। aise nahin, pahle aap madad karo। himmate marda...... unka bhi arth nahin samajhte। pahle to bachchon ki himmat chaahiye। kaun-kaun kya madad dete hain? potaamel saara likhenge - phalaane-phalaane yeh madad dete hain। kaaydesir likhkar denge। baaki aise thode hi ek-ek kahenge ham centre kholte hain madad do। aise to baba nahin khol sakta hai kya? lekin aise to ho nahin sakta। committee ko aapas mein milna hota hai। tumhaare mein bhi nambarvaar hain na। koi to bilkul kuchh bhi nahin samajhte। koi bahut harshit hote rehte hain। baba to samajhte hain is gyaan mein bahut khushi rahni chaahiye। ek hi baap, teacher, guru milta hai to khushi honi chaahiye na। duniya mein yeh baaten koi nahin jaante। shivbaaba hi gyaan saagar, patit-paavan, sarva ka sadgati daata hai। sabka father bhi ek hai। yeh aur koi ki buddhi mein nahin hai। abhi tum bachche jaante ho vahi knowledgeful, liberator, guide hai। to baap ki mat par chalna pade। aapas mein milkar raay karni hai। kharcha karna hai। ek ki mat par to nahin chal sakte। madadgaar sab chaahiye। yeh bhi buddhi chaahiye na। tum bachchon ko ghar-ghar mein message dena hai। poochhte hain - shaadi mein nimantran milta hai, jaayen? baba kehte hain - kyon nahin, jaao, jaakar apni service karo। bahuton ka kalyaan karo। bhaashan bhi kar sakte ho। maut saamne khada hai, baap kehte hain maamekam yaad karo। yahaan sab paap aatmaayen hain। baap ko hi gaali dete rehte hain। baap se tumko bemukh kar dete hain। gaayan bhi hai vinaash kaale vipreet buddhi। kisne kaha? baap ne khud kaha hai - mere se preet buddhi nahin hain। vinaash kaale vipreet buddhi hain। mujhe jaante hi nahin। jinki preet buddhi hai, jo mujhe yaad karte hain, vahi vijay paayenge। bhal preet hai parantu yaad nahin karte hain to bhi kam pad pa lenge। baap bachchon ko direction dete hain। mool baat sabko message dena hai। baap ko yaad karo to paavan ban, paavan duniya ka maalik bano। drama anusaar baba ko lena bhi boodha shareer padta hai। vaanaprastha mein pravesh karte hain। manushya vaanaprastha avastha mein hi bhagwan se milne ke liye mehnat karte hain। bhakti mein to samajhte hain - jap-tap aadi karna yeh sab bhagwan se milne ke raaste hain। kab milega woh kuchh pata nahin। janma-janmaantar bhakti karte aaye hain। bhagwan to koi ko milta hi nahin। yeh nahin samajhte baba aayenge hi tab, jab puraani duniya ko naya banaana hoga। rachayita baap hi hai, chitra to hain parantu trimoorti mein shiv ko nahin dikhaate hain। shivbaaba bigar brahma-vishnu-shankar dikhaaye hain, jaise gala kata hua hai। baap ke bigar nidhanke ban padte hain। baap kehte hain main aakar tumko dhanka banaata hoon। 21 janma tum dhanke ban jaate ho। koi takleeph nahin rehti। tum bhi kahenge - jab tak baap nahin mila hai, to ham bhi bilkul nidhanke tuchchha buddhi the। patit-paavan kehte hain - parantu woh kab aayenge, yeh nahin jaante। paavan duniya hai hi nai duniya। baap kitna simple samjhaate hain। tumko bhi samajh mein aata hai, ham baap ke bane hain, svarga ke maalik zaroor banenge। shivbaaba hai behad ka maalik। baap ne hi aakar sukh-shanti ka varsa diya tha। satayug mein sukh tha - baaki sab aatmaayen shantidham mein thi। abhi in baaton ko tum samajhte ho। shivbaaba kyon aaya hoga? zaroor nai duniya rachne। patit ko paavan banaane aaye honge। oonch kaarya kiya hoga, manushya bilkul ghor andhiyaare mein hain। baap kehte hain yeh bhi drama mein noondh hai। tum bachchon ko baap baith jagaate hain। tumko ab is saare drama ka pata hai - kaise nai duniya phir puraani hoti hai। baap kehte hain aur sab kuchh chhod ek baap ko yaad karo। hamko koi se naphrat nahin aati। yeh samjhaana padta hai। drama anusaar maaya ka raajya bhi hona hai। ab phir baap kehte hain - meethe-meethe bachchon, ab yeh chakra poora hota hai। ab tumko eeshvareey mat milti hai, us par chalna hai। ab 5 vikaaron ki mat par nahin chalna hai। aadhaakalpa tum maaya ki mat par chal tamopradhaan bane ho। ab main tumko satopradhaan banaane aaya hoon। satopradhaan, tamopradhaan ka yeh khel hai। glaani ki koi baat nahin। kehte hain bhagwan ne yeh aavaagman ka naatak hi kyon racha? kyon ka savaal hi nahin uthta। yeh to drama ka chakra hai, jo phir repeat hota rehta hai। drama anaadi hai। abhi hai kaliyug, satayug past ho gaya hai। ab phir baap aaye hain। baba-baba kehte raho to kalyaan hota rahega। baap kehte hain yeh ati guhya ramneek baaten hain। kehte hain sherni ke doodh liye sone ka bartan chaahiye। sone ki buddhi kaise banegi? aatma mein hi buddhi hai na। aatma kehti hai - meri buddhi ab baba taraph hai। main baba ko bahut yaad karta hoon। baithe-baithe buddhi aur taraph chali jaati hai na। buddhi mein dhandhaadhori yaad aata rahega। to tumhaari baat jaise sunenge nahin। mehnat hai। jitna-jitna maut nazdeek aata jaayega - tum yaad mein bahut rahenge। marne samay sab kehte hain bhagwan ko yaad karo। ab baap khud kehte hain mujhe yaad karo। tum sabki vaanaprastha avastha hai। vaapis jaana hai isliye ab mujhe yaad karo। doosri koi baat nahin suno। janma-janmaantar ke paapon ka bojha tumhaare sir par hai। shivbaaba kehte hain is samay sab ajaamil hain। mool baat hai yaad ki yaatra jisse tum paavan banenge phir aapas mein prem bhi hona chaahiye। ek-do se raay leni chaahiye। baap prem ka saagar hai na। to tum bhi aapas mein bahut pyaare hone chaahiye। dehi-abhimaani ban baap ko yaad karna hai। behen-bhaai ka sambandh bhi todna padta hai। bhaai-behen se bhi yog nahin rakho। ek baap se hi yog rakho। baap aatmaon ko kehte hain - mujhe yaad karo to tumhaari vikaari drishti khalaas ho jaae। karmendriyon se koi vikarma nahin karna chaahiye। mansa mein toofaan zaroor aayenge। yeh badi manzil hai। baba kehte hain dekho karmendriyaan dhokha deti hain to khabardaar ho jaao। agar ulta kaam kar liya to khalaas। chadhe to chaakhe vaikuntha ka maalik.... mehnat ke sivaae thode hi kuchh hota hai। bahut mehnat hai। deh sahit deh ke.... koi-koi ko to bandhan nahin hai to bhi phanse rehte hain। baap ki shreemat par nahin chalte hain। laakh do hain, bhal bada kutumba hai to bhi baba kahenge jaasti dhandhe aadi mein nahin phanso। vaanaprasthi ban jaao। kharcha aadi kam kar lo। gareeb log kitna saadhaaran chalte hain। abhi kya-kya cheejen nikli hain, baat mat poochho। kharcha hi kharcha saahookaaron ka chalta hai। nahin to pet ko kya chaahiye? ek paav aata। bas। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) aapas mein bahut-bahut pyaare banna hai lekin bhaai-behen se yog nahin rakhna hai। karmendriyon se koi bhi vikarma nahin karna hai

2) ek eeshvareey mat par chalkar satopradhaan banna hai। maaya ki mat chhod deni hai। aapas mein sangathan majboot karna hai, ek-do ke madadgaar banna hai।

vardaan:- lakshya ke pramaan lakshan ke balance ki kala dvaara chadhti kala ka anubhav karne vaale baap samaan sampanna bhav

bachchon mein vishwa kalyaan ki kaamna bhi hai to baap samaan banne ki shreshtha ichchha bhi hai, lekin lakshya ke pramaan jo lakshan svayan ko va sarva ko dikhaai den usmein antar hai isliye balance karne ki kala ab chadhti kala mein laakar is antar ko mitaao। sankalp hai lekin dridhta sampanna sankalp ho to baap samaan sampanna banne ka vardaan praapta ho jaayega। abhi jo svadarshan aur pardarshan donon chakra ghoomte hain, vyartha baaton ke jo trikaaldarshi ban jaate ho - iska parivartan kar svachintak svadarshan chakradhaari bano।

slogan:- seva ka bhaagya praapta hona hi sabse bada bhaagya hai।

avyakt ishaare - ashareeri va videhi sthiti ka abhyaas badhaao

abhyaas karo - deh aur deh ke desh ko bhool ashareeri paramdham nivaasi ban jaao, phir paramdham nivaasi se avyakt sthiti mein sthit ho jaao, phir seva ke prati aavaaz mein aao, seva karte hue bhi apne swaroop ki smriti mein raho, apni buddhi ko jahaan chaaho vahaan ek second se bhi kam samay mein laga lo tab paas with honour banenge।