रविवार 28 दिसंबर 2025 की दैनिक मुरली

28-12-25 praatahmurli om shanti ''avyakt-baapdaada'' revise 18-03-08 madhuban

kaaran shabd ko nivaaran mein parivartan kar master muktidaata bano, sabko baap ke sang ka rang lagaakar samaan banne ki holi manaao

aaj sarva khajaanon ke maalik baapdaada apne chaaron or ke khajaane sampanna bachchon ko dekh rahe hain। har ek bachche ke khajaane mein kitne khajaane jama hue hain, yeh dekh harshit ho rahe hain। khajaane to sabhi ko ek hi samay ek hi jaise mile hain phir bhi jama ka khaata sabhi bachchon ka alag-alag hai lekin samay pramaan abhi baapdaada sabhi bachchon ko sarva khajaanon se sampanna dekhne chaahte hain, kyonki yeh khajaane sirf abhi ek janma ke liye nahin hain, yeh avinaashi khajaane anek janma saath chalne vaale hain। is samay ke khajaanon ko to sabhi bachche jaante hi ho। baapdaada ne kya-kya khajaane diye hain woh kahne se hi sabke saamne aa gaye hain। sabke saamne khajaanon ki list emerge ho gai hai na! kyonki baapdaada ne pahle bhi bataaya hai ki khajaane to mile lekin jama karne ki vidhi kya hai? jo jitna nimitta aur nirmaan banta hai utna hi khajaane jama hote hain। to check karo - nimitta aur nirmaan banne ki vidhi se hamaare khaate mein kitne khajaane jama hue hain। jitne khajaane jama honge, utna woh bharpoor hoga। unke chalan aur chehre se bharpoor aatma ka roohaani nasha svatah hi dikhaai deta hai। uske chehre par sada roohaani nasha va fakhur chamakta hai aur jitna hi roohaani fakhur hoga utna hi bephikra baadshaah hoga। roohaani fakhur arthaat roohaani nasha bephikra baadshaah ki nishaani hai। to apne ko check karo ki meri chalan aur chehre par bephikra baadshaah ka nishchay aur nasha hai? darpan to sabko mili hui hai na! to dil ke darpan mein apna chehra check karo। kisi bhi prakaar ka phikra to nahin hai? kya hoga! kaise hoga! yeh to nahin hoga! koi bhi sankalp rah to nahin gaya hai? bephikra baadshaah ka sankalp yahi hoga jo ho raha hai woh bahut achha aur jo hone vaala hai woh aur hi achhe te achha hoga। isko kaha jaata hai fakhur, roohaani fakhur arthaat svamaandhaari aatma। vinaashi dhan vaale jitna kamaate utna samay pramaan phikar mein rehte। aapko apne eeshvareey khajaanon ke liye phikar hai? bephikra ho na! kyonki jo khajaanon ke maalik aur parmaatma baalak hain woh sada hi svapna mein bhi bephikra baadshaah hain, kyonki usko nishchay hai ki yeh eeshvareey khajaane is janma mein to kya lekin anek janma saath hain, saath rahenge iseelie woh nishchaybuddhi nishchint hain।

to aaj baapdaada chaaron or ke bachchon ka jama ka khaata dekh rahe the। pahle bhi sunaaya hai ki vishesh teen prakaar ke khaate jama kiye hain aur kar sakte hain। ek hai - apne purushaartha pramaan khajaane jama karna। yeh ek khaata hai। doosra khaata hai - duaaon ka khaata। duaaon ka khaata jama hone ka saadhan hai sada sambandh-samparka aur seva mein rehte hue sankalp, bol aur karma mein, teenon mein svayan bhi svayan se santushta aur doosre bhi sarva aur sada santushta hon। santushtata duaaon ka khaata badhaati hai। aur teesra khaata hai - punya ka khaata। punya ke khaate ka saadhan hai - jo bhi seva karte hain, chaahe man se, chaahe vaani se, chaahe karma se, chaahe sambandh mein, samparka mein aate sada nihsvaartha aur behad ki vritti, svabhaav, bhaav aur bhaavna se seva karna, isse punya ka khaata svatah hi jama ho jaata hai। to check karo - check karna aata hai na! aata hai? jisko nahin aata ho woh haath uthaao। jisko nahin aata hai, koi nahin hai maana sabhi ko aata hai। to check kiya hai? ki sva purushaartha ka khaata, duaaon ka khaata, punya ka khaata teenon kitni percent mein jama hua hai? check kiya hai? jo check karta hai woh haath uthaao। check karte ho? pahli line nahin karti hai? check nahin karte? kya kehte hain? karte hain na! kyonki baapdaada ne suna diya hai, ishaara de diya hai ki abhi samay ki sameepta teevragti se aage badh rahi hai isliye apni checking baar-baar karni hai kyonki baapdaada har bachche ko raajayogi so raaja bachcha dekhne chaahte hain। yahi parmaatma baap ko roohaani nasha hai ki ek-ek bachcha raaja bachcha hai। svaraajya adhikaari so vishwa raajya adhikaari parmaatma bachcha hai।

khajaane to baapdaada dvaara milte hi rehte hain। in khajaanon ko jama karne ki bahut sahaj vidhi hai - vidhi kaho ya chaabi kaho, woh jaante ho na! jama karne ki chaabi kya hai? jaante ho? teen bindiyaan। hai na sabhi ke paas chaabi? teen bindiyaan lagaao aur khajaane jama hote jaayenge। maataaon ko chaabi lagaane aati hain na, maataayen chaabi sambhaalne mein hoshiyaar hoti hain na! to sabhi maataaon ne yeh teen bindiyon ki chaabi sambhaalkar rakhi hai? lagaai hai? bolo, maataayen chaabi hai? jiske paas hai woh haath uthaao। chaabi chori to nahin ho jaati hai? vaise ghar ke har cheez ki chaabi maataaon ko sambhaalne bahut achhi aati hai। to yeh chaabi bhi sada saath mein rehti hai na!

to vartamaan samay baapdaada yahi chaahte hain - abhi samay sameep hone ke naate se baapdaada ek shabd sabhi bachchon ke andar se, sankalp se, bol se aur practical karma se change karna dekhne chaahte hain। himmat hai? ek shabd yahi baapdaada har bachche ka parivartan karaana chaahte hain, jo ek hi shabd baar-baar teevra purushaartha se albela purushaarthi bana deta hai aur abhi samay anusaar kaun sa purushaartha chaahiye? teevra purushaartha aur sab chaahte bhi hain ki teevra purushaarthiyon ki line mein aayen lekin ek shabd albela kar deta hai। pata hai woh shabd kaun sa hai? parivartan karne ke liye taiyaar ho? hain taiyaar? haath uthaao, taiyaar hain? dekho, aapka photo T.vi. mein aa raha hai। taiyaar hain, achha mubaarak ho। achha - teevra purushaartha se parivartan karna hai ya kar lenge, dekh lenge… aise to nahin? ek shabd jaan to gaye honge, kyonki sab hoshiyaar hain, ek shabd woh hai ki ‘kaaran' shabd ko parivartan kar ‘nivaaran' shabd ko saamne laao। kaaran saamne aane se va kaaran sochne se nivaaran nahin hota hai। to baapdaada sirf bolne tak nahin lekin sankalp tak yeh ''kaaran'' shabd ko ''nivaaran'' mein parivartan karne chaahte hain kyonki kaaran bhinna-bhinna prakaar ke hote hain aur woh kaaran shabd sochne mein, bolne mein, karma mein aane mein teevra purushaartha ke aage bandhan ban jaata hai kyonki aap sabhi ka baapdaada se vaayda hai, sneh se vaayda hai ki ham sabhi bhi baap ke, vishwa parivartan ke kaarya mein saathi hain। baap ke saathi hain, baap akela nahin karta hai, bachchon ko saath laate hain। to vishwa parivartan ke kaarya mein aapka kya kaarya hai? sarva aatmaon ke kaarnon ko bhi nivaaran karna kyonki aajkal majority duhkhi aur ashaanta hone ke kaaran abhi mukti chaahte hain। duhkh ashaanti se, sarva bandhanon se mukti chaahte hain aur muktidaata kaun? baap ke saath aap bachche bhi muktidaata hain। aapke jad chitron se aaj tak kya maangate hain? abhi duhkh ashaanti badhte dekh sabhi majority aatmaayen aap muktidaata aatmaon ko yaad karti hain। man mein duhkhi hoke chillaate hain - he muktidaata mukti do। kya aapko aatmaon ke duhkh ashaanti ki pukaar sunne nahin aati? lekin muktidaata ban pahle is ‘kaaran' shabd ko mukta karo। to svatah hi mukti ka aavaaj aapke kaanon mein goonjega। pahle apne andar se is shabd se mukta honge to doosron ko bhi mukta kar sakenge। abhi to din-pratidin aapke aage muktidaata mukti do ki queue lagne vaali hai। lekin abhi tak apne purushaartha mein bhinna-bhinna kaaran shabd ke kaaran mukti ka darvaaja banda hai iseelie aaj baapdaada is shabd ke, iske saath aur bhi kamjor shabd aate hain। vishesh hai kaaran phir usmein aur bhi kamjoriyaan hoti hain, aise vaise, kaise, yeh bhi inke saathi shabd hain, jo darvaaje banda ke kaaran hain।

to aaj sab holi manaane aaye ho na। sab bhaag-bhaag karke aaye hain। sneh ke vimaan mein chadhke aaye hain। baap se sneh hai, to baap ke saath holi manaane pahunch gaye hain। mubaarak ho, bhale padhaare। baapdaada mubaarak dete hain। baapdaada dekh rahe hain, kursi par chalne vaale bhi, tabiyat thodi neeche oopar hote bhi himmat se pahunch gaye hain। baapdaada yeh drishya dekhte hain, yahaan class mein aate hain na। programme mein aate hain to cheyar par bhi chalke pande ko pakadkar aa jaate hain। to isko kya kaha jaayega? parmaatma pyaar। baapdaada bhi aise himmatvaan, dil ke snehi bachchon ko bahut-bahut dil ki duaayen, dil ka pyaar vishesh de rahe hain। himmat rakhke aaye hain, baap ki aur parivaar ki madad hai hi। sabhi ko sthaan theek mila hai? mila hai? jisko sthaan theek mila hai woh haath uthaao। foreigners ko theek mila hai? mela hai mela। vahaan mele mein to ret bhi chalti rehti hai, khaana bhi chalta rehta hai। aapko brahma bhojan achha mila, milta hai? achha haath hila rahe hain। sone ke liye teen pair prithvi mili? aisa milan phir 5 hajaar varsha ke baad sangam par hi hoga। phir nahin hoga।

to aaj baapdaada ko sankalp hai ki sab bachchon ke jama khaate ko dekhen। dekha bhi hai, aage bhi dekhenge kyonki baapdaada ne yeh pahle hi bachchon ko soochna de di hai ki jama ke khaate jama karne ka samay ab sangamayug hai। is sangamayug par ab jitna jama karne chaaho, saare kalpa ka khaata ab jama kar sakte ho। phir jama ke khaate ki bank hi banda ho jaayegi। phir kya karenge? isliye baapdaada ko bachchon se pyaar hai na। to baapdaada jaante hain ki bachche albelepan mein kabhi bhool jaate hain, ho jaayega, dekh lenge, kar to rahe hain, chal to rahe hain na। bade maje se kehte, aap dekh nahin rahe ho, ham kar rahe hain, haan chal to rahe hain aur kya karen? lekin chalna aur udna kitna farka hai? chal rahe ho mubaarak hai। lekin abhi chalne ka samay samaapta ho raha hai। abhi udne ka samay hai, tabhi manzil par pahunch sakenge। saadhaaran praja mein aana, bhagwan ka bachcha aur saadhaaran praja! shobhta hai?

aaj holi manaane aaye ho na to holi ka arth hai beeti so beeti, to aaj se baapdaada yahi chaahta hai ki beeti so beeti, koi bhi kaaran se agar koi bhi kamjori rahi hui hai to ab ghadi beeti so beeti kar apna chitra smriti mein laao, apna hi chitrakaar ban apna chitra nikaalo। pata hai - baapdaada abhi bhi ek-ek bachche ka kaun sa chitra saamne dekh raha hai? pata hai kaun sa chitra dekh rahe hain? abhi aap sabhi bhi apna chitra kheencho। aata hai chitra kheenchane, aata hai na! shreshtha sankalp ki kalam se apna chitra abhi-abhi saamne laao। pahle sabhi drill karo, mind drill। karmendriyon ki drill nahin, man ki drill karo। ready, drill karne ke liye ready hain! kaandh hilaao। dekho sabse shreshtha te shreshtha chitra hota hai - taaj, takhta, tilakdhaari ka। to apna chitra saamne laao aur sab sankalp kinaare kar dekho, aap sabhi baapdaada ke diltakhta nasheen hain। takhta hai na! aisa takhta to kahaan bhi nahin milega। to pahle yeh chitra nikaalo ki main vishesh aatma, svamaandhaari aatma, baapdaada ki pahli rachna shreshtha aatma, baapdaada ke diltakhtansheen hoon। takhtansheen ho gaye! saath mein parmaatma rachna is vriksha ke jad mein baithi hui poorvaj aur poojya aatma hoon, is smriti ka tilakdhaari hoon। smriti ka tilak lagaaya! saath mein bephikar baadshaah, saara phikar ka bojh baapdaada ko arpan kar double light ki taajdhaari hoon। to taaj, tilak aur takhtadhaari, aisi baap arthaat parmaatma pyaari aatma hoon।

to yeh chitra apna kheench liya। sada yeh double light ka taaj chalte phirte dhaaran kar sakte ho। kabhi bhi apna svamaan yaad karo to yeh taaj, tilak, takhtansheen aatma hoon, yeh apna chitra dridh sankalp dvaara saamne laao। yaad hai - shuru-shuru mein aap logon ka abhyaas baar-baar ek shabd ki smriti mein rehta tha, woh ek shabd tha - main kaun? yeh main kaun? yeh shabd baar-baar smriti mein laao aur apne bhinna-bhinna svamaan, title, bhagwan ke mile hue title। aajkal logon ko, manushya ko manushya se title milta to bhi kitna mahatva samajhte hain aur aap bachchon ko baap dvaara kitne title va svamaan mile hain? sada svamaan ki list apne buddhi mein manan karte raho। main kaun? list laao। isi nashe mein raho to kaaran jo hai na, woh shabd merge ho jaayega aur nivaaran, har karma mein dikhaai dega। jab nivaaran ka swaroop ban jaayenge to sarva aatmaon ko nirvaandhaam, muktidhaam mein sahaj jaane ka raasta bataae mukta kar lenge।

to dridh sankalp karo - aata hai dridh sankalp karna? jab dridhta hoti hai to dridhta saphalta ki chaabi hai। jara bhi dridh sankalp mein kami nahin laao kyonki maaya ka kaam hai haar khilaana aur aapka kaam kya hai? aapka kaam hai - baap ke gale ka haar banna, na maaya se haar khaana। to sabhi yeh sankalp karo main sada baap ke gale ki vijay maala hoon। gale ka haar hoon। gale ka haar vijayi haar hai।

to baapdaada haath uthvaate hain to aap kya banenge? sab kya uttar dete hain? ek hi uttar dete hain lakshmi-naaraayan banenge। raam-seeta nahin। to lakshmi-naaraayan banne vaale ham baapdaada ke vijayi maala ke manke hain, poojya aatmaayen hain। bhakta aapki maala ka manka japte-japte apni samasyaaon ko samaapta karte hain। aise shreshtha manke ho। to aaj baapdaada ko kya denge? holi ki koi to gift denge na! yeh kaaran shabd, yeh to to, aur kaaran, to to karenge to tota ban jaayenge na। to to bhi nahin, aise vaise bhi nahin, koi bhi prakaar ka kaaran nahin, nivaaran। achha।

baapdaada ek-ek bachche ko samaan banne ki, shreshtha sankalp karne ki padam padamguna mubaarak de rahe hain। mubaarak ho, mubaarak ho, mubaarak ho। nasha hai na - hamaare jitna padam-padam bhaagyavaan kaun? isi nashe mein raho। achha।

abhi ek second mein sabhi brahman apne raajayog ka abhyaas karte hue man ko ekaagra karne ka maalik ban man ko jahaan chaaho, jitna samay chaaho, jaise chaaho vaise abhi-abhi man ko ekaagra karo। kahaan bhi man yahaan-vahaan chanchal nahin ho। mera baba, meetha baba, pyaara baba is sneh ke sang ke rang ki, aadhyaatmik holi manaao। (drill) achha।

chaaron or ke shreshtha vishesh holi aur highest bachchon ko, sada svayan ko baap samaan sarva shaktiyon se sampanna master sarvashaktivaan anubhav karne vaale, sada har kamjoriyon se mukta ban anya aatmaon ko bhi mukti dilaane vaale muktidaata bachchon ko, sada svamaan ki seat par set rahne vaale, sada amar bhav ke vardaan ke anubhav swaroop rahne vaale, aise chaaron or ke, chaahe saamne baithne vaale, chaahe door baithe sneh mein samaaye hue bachchon ko yaadapyaar va apne umang-utsaah, purushaartha ke samaachaar dene vaalon ko baapdaada ka bahut-bahut dil ka yaadapyaar aur dil ki padam padamguna yaadapyaar sveekaar ho aur sabhi raajayogi so raajya adhikaari bachchon ko namaste।

vardaan:- almighty satta ke aadhaar par aatmaon ko maalaamaal banaane vaale punya aatma bhav

jaise daan punya ki satta vaale sakaami raajaaon mein satta ki full power thi, jis power ke aadhaar par chaahe kisi ko kya bhi bana den। aise aap mahaadaani punya aatmaon ko direct baap dvaara prakritijeet, maayaajeet ki vishesh satta mili hui hai। aap apne shuddh sankalp ke aadhaar se kisi bhi aatma ka baap se sambandh jodkar maalaamaal bana sakte ho। sirf is satta ko yathaartha reeti use karo।

slogan:- jab aap sampoornata ki badhaaeeyaan manaayenge tab samay, prakriti aur maaya vidaai legi।

avyakt ishaare - ab sampanna va karmaateet banne ki dhun lagaao

jab man-buddhi karma mein bahut busy ho, us samay direction do fullstop। karma ke bhi sankalp stop ho jaaen। yeh practice ek second ke liye bhi karo lekin abhyaas karte jaao, kyonki antim certificate ek second ke fullstop lagaane par hi milna hai। second mein vistaar ko sama lo, saar swaroop ban jaao, yahi abhyaas karmaateet banaayega।