शनिवार 10 जनवरी 2026 की दैनिक मुरली

10-01-2026 praatahmurli om shanti "baapdaada"' madhuban

“meethe bachche - tumhaari yaad ki yaatra bilkul hi gupta hai, tum bachche abhi muktidhaam mein jaane ki yaatra kar rahe ho''

prashn:- sthoolavtan vaasi se sookshm vatan vaasi pharishta banne ka purushaartha kya hai?

uttar:- sookshm vatan vaasi pharishta banna hai to roohaani service mein haddi-haddi svaaha karo। bina haddi svaaha kiye pharishta nahin ban sakte kyonki pharishte bigar haddi maas ke hote hain। is behad ki seva mein dadheechi rishi ki tarah haddi-haddi lagaani hai, tabhi vyakta se avyakt banenge।

geet:- dheeraj dhar manuva…

om shanti। bachchon ko is geet se ishaara mila ki dheeraj dharo। bachche jaante hain ham shreemat par purushaartha kar rahe hain aur jaante hain ki ham is gupta yog ki yaatra par hain। woh yaatra apne samay par poori honi hai। mukhya hai hi yeh yaatra, jisko tumhaare sivaae aur koi bhi nahin jaante hain। yaatra par jaana hai zaroor aur le jaane vaala panda bhi chaahiye। iska naam hi rakha hua hai paandav sena। ab yaatra par hain। sthool ladaai ki koi baat nahin hai। har ek baat gupta hai। yaatra bhi badi gupta hai। shaastron mein bhi hai - baap kehte hain mujhe yaad karo to mere paas aakar pahuchenge। yeh yaatra to hui na। baap sab shaastron ka saar bataate hain। practical mein act mein le aate hain। ham aatmaon ko yaatra par jaana hai apne nirvaandhaam। vichaar karo to samajh sakte hain। yeh hai muktidhaam ki sachchi yaatra। sab chaahte hain ham muktidhaam mein jaayen। yeh yaatra karne ke liye koi muktidhaam ka raasta bataaye। parantu baap to apne samay par aapehi aate hain, jis samay ko koi nahin jaante hain। baap aakar samjhaate hain to bachchon ko nishchay hota hai। barobar yeh sachchi yaatra hai jo gaai hui hai। bhagwan ne yeh yaatra sikhaai thi। manamnaabhav, madhyaaji bhav। yeh akshar bhi tumhaare kaam ke bahut hain। sirf kisne kaha? yeh bhool kar di hai। kehte hain deh sahit deh ke sambandhon ko bhool jaao। inko (brahma baba ko) bhi deh hai। inko bhi samjhaane vaala doosra hai, jisko apni deh nahin hai woh baap hai vichitra, unko koi chitra nahin hai, aur to sabke chitra hain। saari duniya chitrashaala hai। vichitra aur chitra arthaat jeev aur aatma ka yeh manushya svarup bana hua hai। to woh baap hai vichitra। samjhaate hain mujhe is chitra ka aadhaar lena padta hai। barobar shaastron mein hai bhagwan ne kaha tha jabki mahaabhaarat ladaai bhi lagi thi। raajayog sikhaate the, zaroor raajaai sthaapan hui thi। abhi to raajaai hai nahin। raajayog bhagwan ne sikhaaya tha, nai duniya ke liye kyonki vinaash saamne khada tha। samjhaaya jaata hai aisa hua tha jabki svarga ki sthaapna hui thi। woh lakshmi-naaraayan ka raajya sthaapan hua tha। abhi tumhaari buddhi mein hai - satayug tha, abhi kaliyug hai। phir baap vahi baaten samjhaate hain। aisa to koi kah na sake ki main paramdham se aaya hoon tumko vaapis le jaane। parampita paramatma hi kah sakte hain brahma dvaara, aur kiske dvaara bhi kah nahin sakte। sookshm vatan mein hain hi brahma-vishnu-shankar। brahma ke liye bhi samjhaaya hai ki woh hai avyakt brahma aur yeh hai vyakta। tum abhi pharishta bante ho। pharishte sthool vatan mein nahin hote। pharishton ko haddi maas nahin hota hai। yahaan is roohaani service mein haddi aadi sab khalaas kar dete hain, phir pharishte ban jaate hain। abhi to haddi hai na। yeh bhi likha hua hai - apni haddiyaan bhi service mein de di। goya apni haddiyaan khalaas karte hain। sthoolavtan se sookshmavtanvaasi banna hai। yahaan ham haddi dekar sookshm ban jaate hain। is service mein sab svaaha karna hai। yaad mein rehte-rehte ham pharishte ban jaayenge। yeh bhi gaaya hua hai - mirooa maut malooka shikaar, malook pharishte ko kaha jaata hai। tum manushya se pharishte bante ho। tumko devta nahin kah sakte। yahaan to tumko shareer hai na। sookshm vatan ka varnan abhi hota hai। yog mein rah phir pharishte ban jaate hain। pichhaadi mein tum pharishte ban jaayenge। tumko sab saakshaatkaar hoga aur khushi hogi। manushya to sab kaal ka shikaar ho jaayenge। tumhaare mein jo mahaaveer hain woh to adol rahenge। baaki kya-kya hota rahega! vinaash ki scene to honi hai na। arjun ko vinaash ka saakshaatkaar hua। ek arjun ki baat nahin hai। tum bachchon ko vinaash aur sthaapna ka saakshaatkaar hota hai। pahle-pahle baba ko bhi vinaash ka saakshaatkaar hua। us samay gyaan to kuchh tha nahin। dekha srishti ka vinaash ho raha hai। phir chaturbhuj ka saakshaatkaar hua। samajhne lage yeh to achha hai। vinaash ke baad ham vishwa ke maalik bante hain, to khushi aa gai। abhi yeh duniya nahin jaanti ki vinaash to achha hai na। pees ke liye prayatna karte hain parantu aakhreen vinaash to hona hai। yaad karte hain patit-paavan aao, to baap aayenge zaroor aakar paavan duniya sthaapan karenge, jismen ham raajaai karenge। yeh to achha hai na। patit-paavan ko kyon yaad karte hain? kyonki duhkh hai। paavan duniya mein devtaayen hain, patit duniya mein to devtaaon ke pair aa nahin sakte। to zaroor patit duniya ka vinaash hona chaahiye। gaaya hua bhi hai mahaavinaash hua। uske baad kya hota hai? ek dharma ki sthaapna so to aise hogi na। yahaan se raajayog seekhenge। vinaash hoga baaki bhaarat mein kaun bachega? jo raajayog seekhte hain, knowledge dete hain vahi bachenge। vinaash to sabka hona hai, ismen darne ki baat nahin। patit-paavan ko bulaate hain jabki woh aate hain to khushi honi chaahiye na। baap kehte hain vikaaron mein mat jaao। in vikaaron par jeet paao va daan de do to grahan chhoote। bhaarat ka grahan chhootta zaroor hai। kaale se gora banna hai। satayug mein pavitra devtaayen the, woh zaroor yahaan bane honge।

tum jaante ho ham shreemat se nirvikaari bante hain। bhagvaanuvaach, yeh hai gupta। shreemat par chalkar tum baadshaahi paate ho। baap kehte hain tumko nar se naaraayan banna hai। second mein raajaai mil sakti hai। shuru mein bachchiyaan 4-5 din bhi vaikuntha mein jaakar rehti thi। shivbaaba aakar bachchon ko vaikuntha ka bhi saakshaatkaar karaate the। devtaayen aate the - kitna maan-shaan se। to bachchon ko dil andar lagta hai barobar gupta vesh mein aane vaala baap hamko samjha rahe hain। brahma tan mein aate hain। brahma ka tan to yahaan chaahiye na। prajaapita brahma dvaara sthaapna। baba ne samjhaaya hai - koi bhi aate hain to unse poochho kiske paas aate ho? bi.ke. paas। achha brahma ka naam kabhi suna hai? prajaapita to hai na। ham sab unke aakar bane hain। zaroor aage bhi bane the। brahma dvaara sthaapna to saath mein brahman bhi chaahiye। baap brahma dvaara kisko samjhaate hain? shoodron ko to nahin samjhaayenge। yeh hai brahma mukh vanshaavli brahman, shivbaaba ne brahma dvaara hamko apna banaaya hai। brahmaakumaar-kumaariyaan kitne dher hain, kitne centres hain। sabmen brahmaakumaariyaan padhaati hain। yahaan hamko daade ka varsa milta hai। bhagvaanuvaach, tumko raajayog sikhaata hoon। woh niraakaar hone kaaran inke shareer ka aadhaar lekar hamko knowledge sunaate hain। prajaapita ke to sab bachche honge na! ham hain prajaapita brahmaakumaar-kumaariyaan। shivbaaba hai daada। unhonne adopt kiya hai। tum jaante ho ham daade se padh rahe hain brahma dvaara। yeh lakshmi-naaraayan donon svarga ke maalik hain na। bhagwan to ek oonch te oonch niraakaar hi hai। bachchon ko dhaarna badi achhi honi chaahiye। pahle-pahle samjhaao do baap hain bhakti maarga mein। svarga mein hai ek baap। paarlaukik baap dvaara baadshaahi mil gai phir yaad kyon karenge। duhkh hai hi nahin jo yaad karna pade। gaate hain duhkh harta sukh karta। woh abhi ki baat hai। jo past ho jaata hai uska gaayan hota hai। mahima hai ek ki। woh ek baap hi aakar patiton ko paavan banaate hain। manushya thode hi samajhte hain। woh to past ki katha baith likhte hain। tum abhi samajhte ho - barobar baap ne raajayog sikhaaya, jisse baadshaahi mili। 84 ka chakra lagaaya। abhi phir ham padh rahe hain, phir 21 janma raajya karenge। aisa devta banenge। aise kalpa pahle bane the। samajhte ho hamne poora 84 janmon ka chakra lagaaya। ab phir satayug-treta mein jaayenge tab to baap poochhte hain aage kitne baar mile ho? yeh practical baat hai na! naya bhi koi sune to samjhenge 84 ka chakra to zaroor hai। jo pahle vaale honge unka hi chakra poora hua hoga। buddhi se kaam lena hai। is makaan mein, is dress mein baba ham aapse anek baar milte hain aur milte rahenge। patit se paavan, paavan se patit hote hi aaye hain। koi cheez sadaiv nai hi rahe, yeh to ho nahin sakta। puraani zaroor banti hai। har cheez sato-rajo-tamo mein aati hai। abhi tum bachche jaante ho nai duniya aa rahi hai। usko svarga kaha jaata hai। yeh hai narka। woh hai paavan duniya। bahut pukaarte hain - he patit-paavan hamko aakar paavan banaao kyonki duhkh jaasti hota jaata hai na। parantu yeh samajhte nahin ki ham hi poojya the phir pujaari bane hain। dvaapar mein pujaari bane। anek dharma hote gaye। barobar patit se paavan, paavan se patit hote aaye hain। bhaarat ke oopar hi khel hai।

tum bachchon ko ab smriti aai hai, ab tum shiv jayanti manaate ho। baaki aur koi shiv ko to jaante hi nahin hain। ham jaante hain। barobar hamko raajayog sikhlaate hain। brahma dvaara svarga ki sthaapna ho rahi hai। zaroor jo yog seekhenge, sthaapna karenge vahi phir raajya-bhaagya paayenge। ham kehte hain barobar ham kalpa-kalpa baap se yeh raajayog seekhe hain। baba ne samjhaaya hai - abhi yeh 84 janmon ka chakra poora hota hai। phir naya chakra lagaana hai। chakra ko to jaanna chaahiye na। bhal yeh chitra na ho to bhi tum samjha sakte ho। yeh to bilkul sahaj baat hai। barobar bhaarat svarga tha, ab narka hai। sirf woh log samajhte hain kaliyug ajun bachcha hai। tum kehte ho - yeh to kaliyug ka ant hai। chakra poora hota hai। baap samjhaate hain main aata hoon patit duniya ko paavan banaane। tum jaante ho hamko paavan duniya mein jaana hai। tum mukti, jeevan muktidhaam, shantidham, sukhdhaam aur duhkhadhaam ko bhi samajhte ho। parantu takdeer mein nahin hai to phir yeh khyaal nahin karte ki kyon na ham sukhdhaam mein jaayen। barobar ham aatmaon ka ghar woh shantidham hai। vahaan aatma ko organs na hone kaaran kuchh bolti nahin hai। shanti vahaan sabko milti hai। satayug mein hai ek dharma। yeh anaadi, avinaashi world drama hai jo chakra lagaata hi rehta hai। aatma kabhi vinaash nahin hoti hai। shantidham mein bhi thoda samay thaharna hi pade। yeh bahut samajh ki baaten hain। kaliyug hai duhkhadhaam। kitne anek dharma hain, kitna hangaama hai। jab bilkul duhkhadhaam hota hai tab hi baap aate hain। duhkhadhaam ke baad hai full sukhdhaam। shantidham se ham aate hain sukhdhaam mein, phir duhkhadhaam banta hai। satayug mein sampoorn nirvikaari, yahaan hain sampoorn vikaari। yeh samjhaana to bahut sahaj hai na। himmat chaahiye। kahaan bhi jaakar samjhaao। yeh bhi likha hua hai - hanoomaan satsang mein peechhe juttiyon mein jaakar baithta tha। to mahaaveer jo honge woh kahaan bhi jaakar yukti se sunenge, dekhen kya bolte hain। tum dress badalkar kahaan bhi ja sakte ho, unka kalyaan karne। baba bhi gupta vesh mein tumhaara kalyaan kar rahe hain na। mandiron mein kahaan bhi nimantran milta hai to jaakar samjhaana hai। din-pratidin tum hoshiyaar hote jaate ho। sabko baap ka parichay to dena hi hai, trial karni hoti hai। yeh to gaaya hua hai, pichhaadi mein sannyaasi, raajaayen aadi aaye। raaja janak ko second mein jeevan-mukti mili। woh phir jaakar treta mein anujnak bana। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) antim vinaash ki scene dekhne ke liye apni sthiti mahaaveer jaisi nirbhay, adol banaani hai। gupta yaad ki yaatra mein rehna hai।

2) avyakt vatanvaasi pharishta banne ke liye behad seva mein dadheechi rishi ki tarah apni haddi-haddi svaaha karni hai।

vardaan:- pahli shreemat par vishesh attention de foundation ko majboot banaane vaale sahajyogi bhav

baapdaada ki number one shreemat hai ki apne ko aatma samajhkar baap ko yaad karo। yadi aatma ke bajaae apne ko saadhaaran shareerdhaari samajhte ho to yaad tik nahin sakti। vaise bhi koi do cheejon ko jab joda jaata hai to pahle samaan banaate hain, aise hi aatma samajhkar yaad karo to yaad sahaj ho jaayegi। yeh shreemat hi mukhya foundation hai। is baat par baar-baar attention do to sahajyogi ban jaayenge।

slogan:- karma aatma ka darshan karaane vaala darpan hai isliye karma dvaara shakti svarup ko pratyaksha karo।

avyakt ishaare - is avyakti maas mein bandhanmukta rah jeevanmukta sthiti ka anubhav karo

brahman so pharishta arthaat jeevanmukta, jeevan-bandh nahin। na deh ka bandhan, na deh ke sambandh ka bandhan, na deh ke padaarthon ka bandhan। agar apni deh ka lagaav khatma kiya to deh ke sambandh aur padaartha ka bandhan aape hi khatma ho jaayega। aise nahin koshish karenge। ‘koshish' shabd hi siddha karta hai ki puraani duniya ki kashish hai isliye ‘koshish' shabd samaapta karo। dehbhaan ko chhodo।