शनिवार 28 फ़रवरी 2026 की दैनिक मुरली

28-02-2026 praatahmurli om shanti "baapdaada"' madhuban

“meethe bachche - tum eeshvareey sampradaay ho, tumhein gyaan soorya baap mila hai, abhi tum jaage ho to doosron ko bhi jagaao''

prashn:- anek prakaar ke takraav ka kaaran tatha uska nivaaran kya hai?

uttar:- jab deh-abhimaan mein aate ho to anek prakaar ke takraav hote hain। maaya ki grahchaari baithti hai। baba kehte dehi-abhimaani bano, service mein lag jaao। yaad ki yaatra mein raho to grahchaari mit jaayegi।

om shanti। roohaani bachchon ke paas baap aaye hain shreemat dene va samjhaane। yeh to bachche samajh gaye hain ki drama plan anusaar saara kaarya hona hai। baaki samay thoda raha hai। is bhaarat ko raavanpuri se phir vishnupuri banaana hai। ab baap bhi hai gupta। padhaai bhi gupta hai, centres to bahut hain, chhote-bade gaanv mein chhote-bade centres hain aur bachche bhi bahut hain। ab bachchon ne challenge to di hai aur likhna bhi hai, jab koi literature banaana hai to usmein likhna hai - ham is apni bhaarat bhoomi ko svarga banaakar chhodenge। tumko bhi apni bhaarat bhoomi bahut priy hai kyonki tum jaante ho yeh bhaarat hi svarga tha, inko 5 hazaar varsha hue hain। bhaarat bahut shaandaar tha, inko svarga kaha jaata hai। tum brahma mukh vanshaavli ko hi knowledge hai। is bhaarat ko shreemat par hamko svarga zaroor banaana hai। sabko raasta bataana hai, aur koi khitpit ki baat hi nahin। aapas mein baith raay karni chaahiye ki in pradarshani ke chitron dvaara ham aisi kya advertisement karen, jo akhbaar mein bhi chitra den, aapas mein is par seminar karna chaahiye। jaise government ke log aapas mein milte hain, raay karte hain ki bhaarat ko ham kaise sudhaaren? yeh jo itne matbhed ho gaye hain, unko aapas mein milkar theek karen aur bhaarat mein shanti sukh kaise sthaapan karen! us government ka bhi purushaartha chalta hai। tum bhi paandav government gaai hui ho। yeh badi eeshvareey government hai, inko vaastav mein kaha hi jaata hai paavan eeshvareey government, patit-paavan baap hi patit bachchon ko baith paavan duniya ka maalik banaate hain। yeh bachche hi jaante hain। mukhya hai hi bhaarat ka aadi sanaatan devi devta dharma। yeh bhi bachche jaante hain yeh hai roodra gyaan yagya। roodra kaha hi jaata hai eeshvar baap ko, shiv ko। gaaya hua hai barobar baap ne aakar roodra gyaan yagya racha tha। unhon ne to time lamba chauda de diya hai। agyaan neend mein soye hue hain। abhi tumko baap ne jagaaya hai, tumko phir auron ko jagaana hai। drama plan anusaar tum jagaate rehte ho। is samay tak jisne jaise-jaise, jitna-jitna purushaartha kiya hai, utna hi kalpa pahle bhi kiya tha। haan, yuddha ke maidaan mein utraav chadhaav to hota hi hai। kabhi maaya ka jor ho jaata hai, kabhi eeshvareey santaan ka jor ho jaata hai। kabhi-kabhi service badi achhi teji se chalti hai। kabhi kahaan-kahaan bachchon mein maaya ke vighna pad jaate hain। maaya ekdam behosh kar deti hai। ladaai ka maidaan to hai na। raavan maaya raam ki santaan ko behosh kar deti hai। lakshman ke liye bhi kahaani hai na।

tum kehte ho sab manushya kumbhakran ki neend mein soye hue hain। tum eeshvareey sampradaay hi aise kehte ho, jinko gyaan soorya mila hai aur jaag uthe hain, vahi samjhenge। ismen ek do ko kahne ki bhi koi baat nahin hai। tum jaante ho barobar ham eeshvareey sampradaay jaage hain। baaki doosre sab soye hue hain। woh yeh nahin jaante ki parampita paramatma aa gaya hai, bachchon ko varsa dene। yeh bilkul bhool gaye hain। baap bhaarat mein hi aate hain। aakar bhaarat ko svarga ka maalik banaate hain। bhaarat svarga ka maalik tha, ismen koi sanshay nahin। parampita paramatma ka janma bhi yahaan hi hota hai। shivjayanti manaate hain na। zaroor usne aakar kuchh to kiya hoga na। buddhi kehti hai zaroor aakar svarga ki sthaapna ki hogi। prerna se thode hi sthaapna hogi। yahaan to tum bachchon ko raajayog sikhaaya jaata hai। yaad ki yaatra samjhaai jaati hai। prerna se koi aavaaj hota hi nahin। samajhte hain shankar ki bhi prerna hoti hai tab woh yaadav moosal aadi banaate hain। parantu ismen prerna ki to koi baat hi nahin hai। tum samajh gaye ho unhon ka part hai drama mein yeh moosal aadi banaane ka। prerna ki baat nahin hai। drama anusaar vinaash to zaroor hona hi hai। gaaya hua hai - mahaabhaarat ladaai mein moosal kaam aaye। to jo past ho gaya hai woh phir repeat hoga।

tum guarantee karte ho ham bhaarat mein svarga sthaapan karenge, jahaan ek dharma hoga। tum aise nahin likhte ki anek dharma vinaash honge। woh to chitra mein likha hua hai - svarga ki sthaapna hoti hai to doosra koi dharma nahin hota। abhi tumko samajh mein aata hai। sabse bada part hai shiv ka, brahma ka aur vishnu ka। brahma so vishnu, vishnu so brahma - yeh to badi guhya baaten hain। vishnu se brahma kaise bante hain, brahma se phir vishnu kaise bante hain, yeh sensible bachchon ki buddhi mein jhat aa jaata hai। daivi sampradaay to bante hi hain। ek ki baat nahin hai। in baaton ko tum bachche samajhte ho। duniya mein ek bhi manushya nahin samajhta। bhal lakshmi-naaraayan va vishnu ki pooja bhi karte hain parantu unko yeh pata nahin hai ki vishnu ke hi do roop lakshmi-naaraayan hain, jo nai duniya mein raajya karte hain। baaki 4 bhuja vaala koi manushya nahin hota। yeh sookshm vatan mein em object dikhlaate hain pravritti maarga ka। yeh saare world ki history-geography kaise chakra lagaati hai, yeh koi nahin jaante। baap ko hi nahin jaante to baap ki rachna ko kaise jaan sakte। baap hi rachna ke aadi-madhya-ant ka knowledge bataate hain, rishi-muni bhi kehte the ham nahin jaante hain। baap ko jaan jaaen to rachna ke aadi-madhya-ant ko bhi jaan jaayen। baap kehte hain main ek hi baar aakar tum bachchon ko bhi saari knowledge samjhaata hoon phir aata hi nahin hoon। to rachta aur rachna ke aadi-madhya-ant ko jaanen hi kaise? baap svayan kehte hain - main sivaae sangamayug ke kabhi aata hi nahin hoon। mujhe bulaate bhi sangam par hain। paavan satayug ko kaha jaata hai, patit kaliyug ko kaha jaata hai। to zaroor main aaoonga patit duniya ke ant mein na। kaliyug ke ant mein aakar patit se paavan banaate hain। satayug aadi mein paavan hain, yeh to sahaj baat hai na। manushya kuchh bhi samajh nahin sakte ki patit-paavan baap kab aayenge। abhi to kaliyug ka ant kahenge। agar kehte hain kaliyug mein ajun 40 hazaar varsha pade hain to aur kitna patit banenge! kitna duhkh hoga! sukh to hoga hi nahin। kuchh bhi maaloom na hone kaaran bilkul hi ghor andhiyaare mein hain। tum samajh sakte ho। to bachchon ko aapas mein milna hai। chitron par achhi reeti samjhaana hota hai। yeh bhi drama anusaar chitra aadi sab nikaale hain। bachche samajhte hain jo samay paas hota hai, hoobhu drama chalta rehta hai। bachchon ki avasthaayen bhi kabhi neeche, kabhi oopar hoti rahengi। badi samajhne ki baaten hain। kabhi-kabhi grahchaari aakar baithti hai to unko mitaane ke liye kitne prayatna karte hain।

baba ghadi-ghadi kehte hain - bachche, tum deh-abhimaan mein aate ho isliye takkar hota hai, ismen dehi-abhimaani banna pade। bachchon me deh-abhimaan bahut hai। tum dehi-abhimaani bano to baap ki yaad rahegi aur service mein unnati karte rahenge। oonch pad jinko paana hai woh sadaiv service mein lage rahenge। takdeer mein nahin hai to phir tadbeer bhi nahin hogi। khud kehte hain baba hamko dhaarna nahin hoti। buddhi mein nahin baithta, jinko dhaarna hoti hai to khushi bhi bahut hoti hai। samajhte hain shivbaaba aaya hua hai, ab baap kehte hain bachche tum achhi reeti samajhkar phir auron ko samjhaao। koi to service mein hi lage rehte hain। purushaartha karte rehte hain। yeh bhi bachche jaante hain jo second guzarta hai, woh drama mein noondh hai phir aise hi repeat hoga। bachchon ko samjhaaya jaata hai, baahar bhaashan aadi par to anek prakaar ke naye aate hain, sunne ke liye। tum samajhte ho geeta ved shaastra aadi par kitne manushya bhaashan karte hain, unko koi yeh thode hi pata hai ki yahaan eeshvar apna aur apni rachna ke aadi-madhya-ant ka raaz samjhaate hain। rachayita hi aakar saara gyaan sunaate hain। trikaaldarshi banaana, yeh baap ka hi kaam hai। shaastron mein yeh baaten hain nahin। yeh nai baaten hain। baba baar-baar samjhaate hain kahaan bhi pahle-pahle yeh samjhaao ki geeta ka bhagwan kaun hai - shreekrishna ya niraakaar shiv? yeh baaten projector par tum samjha nahin sakenge। pradarshani mein chitra saamne rakha hai, us par samjhaakar tum poochh sakte ho। ab bataao geeta ka bhagwan kaun? gyaan saagar kaun hai? shreekrishna ko to kah nahin sakenge। pavitrata, sukh-shanti ka saagar, liberator, guide kaun hai? pahle-pahle to likhaana chaahiye, form bharaana chaahiye phir sabse sahi leni chaahiye।

(chidiyaaon ka aavaaz hua) dekho kitna jhagadti hain। is samay saari duniya mein ladaai-jhagda hi hai। manushya bhi aapas mein ladte rehte hain। manushya mein hi samajhne ki buddhi hai। 5 vikaar bhi manushya mein gaaye jaate hain। jaanavron ki to baat hi nahin। yeh hai vicious world। world manushyon ke liye hi kaha jaata hai। kaliyug mein hain aasuri sampradaay, satayug mein hain daivi sampadraay। abhi tumko is saare contrast ka pata hai। tum siddha kar bata sakte ho। seedhi mein bhi bada clear dikhaaya hua hai। neeche hain patit, oopar mein hain paavan। inmen bada clear hai। seedhi hi mukhya hai - utarti kala aur chadhti kala। ye seedhi badi achhi hai, inmen aisa kya daalen jo manushya bilkul achhi reeti samajh jaaen ki barobar yeh patit duniya hai, paavan duniya svarga thi। yahaan sab patit hain, paavan ek bhi ho nahin sakta। raat-din yeh khyaalaat chalna chaahiye। aatma prakaash bachcha likhta hai - baba yeh chitra banaayen, baba kehte hain bhal vichaar saagar manthan kar koi bhi chitra banaao, parantu seedhi badi achhi banni chaahiye। is par bahut samjha sakte hain। 84 janma poore kar phir pahla number janma liya hai phir utarti kala se chadhti kala mein jaana pade, ismen har ek ka vichaar chalna chaahiye। nahin to service kaise kar sakenge। chitron par samjhaana bahut sahaj hota hai। satayug ke baad seedhi utarni hoti hai। yeh bhi bachche jaante hain - ham paartadhaari actors hain। yahaan se transfer ho seedha satayug mein nahin jaate, pahle shantidham mein jaana hai। haan tumhaare mein bhi nambarvaar hain jo apne ko paartadhaari samajhte hain is drama mein। duniya mein aisa koi kah na sake ki ham paartadhaari hain। ham likhte bhi hain ki paartadhaari actors hote hue bhi drama ke creator, director, aadi-madhya-ant ko nahin jaan sakte to woh first class besmajh hain। yeh to bhagvaanuvaach hai। shiv bhagvaanuvaach brahma tan dvaara। gyaan saagar woh niraakaar hai, unko apna shareer hai nahin। badi samajhne ki yuktiyaan hain। tum bachchon ko bada nasha rehna chaahiye, ham kiski glaani thode hi karte hain। yeh to right baat hai na। jo bhi bade-bade hain un sabke chitra tum daal sakte ho। seedhi koi ko bhi dikhla sakte ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) bhaarat mein sukh-shanti ki sthaapna karne va bhaarat ko svarga banaane ke liye aapas mein seminar karna hai, shreemat par bhaarat ki aisi seva karni hai।

2) service mein unnati karne va service se oonch pad paane ke liye dehi-abhimaani rahne ki mehnat karni hai। gyaan ka vichaar saagar manthan karna hai।

vardaan:- pavitrata ke aadhaar par sukh-shanti ka anubhav karne vaale number one adhikaari bhav

jo bachche “pavitrata'' ki pratigya ko sada smriti mein rakhte hain, unhein sukh-shanti ki anubhooti svatah hoti hai। pavitrata ka adhikaar lene mein number one rehna arthaat sarva praaptiyon mein number one banna isliye pavitrata ke foundation ko kabhi kamjor nahin karna tab hi last so fast jaayenge, isi dharma mein sada sthit rehna - kuchh bhi ho jaae - chaahe vyakti, chaahe prakriti, chaahe paristhiti kitna bhi hilaaye, lekin dharat pariye dharma na chhodiye।

slogan:- vyartha se innocent bano to sachche-sachche saint ban jaayenge।

ye avyakt ishaare - ekta aur vishvaas ki visheshta dvaara saphalta sampanna bano

baapdaada chaahte hain ki har bachcha ekras shreshtha sthiti ke aasandhaari, ekaantavaasi, ashareeri, ekta sthaapak, eknaami, economy ka avtaar bane। ek do ke vichaaron ko samajh, sammaan de, ek do ko ishaara de, len-den kar aapas mein sangathan ki shakti ka swaroop pratyaksha karo kyonki aapke sangathan ke ekta ki shakti saare brahman parivaar ko sangathan mein laane ke nimitta banegi।