बुधवार 1 अप्रैल 2026 की दैनिक मुरली

01-04-2026 praatahmurli om shanti "baapdaada"' madhuban

“meethe bachche - baap jo hai, jaisa hai, tum bachchon mein bhi nambarvaar pahchaante hain, agar sab pahchaan len to bahut bheed mach jaaye''

prashn:- chaaron or pratyakshata ka aavaaj kab phailega?

uttar:- jab manushyon ko pata padega ki svayan bhagwan is puraani duniya ka vinaash karaake nai duniya sthaapan karne aaye hain। 2- ham sabki sadgati karne vaala baap humein bhakti ka phal dene aaya hai। yeh nishchay ho to pratyakshata ho jaae। chaaron or halchal mach jaae।

geet:- jo piya ke saath hai…

om shanti। bachchon ne geet ki do line suni। jo piya ke saath hai, ab piya kaun hai! yeh duniya nahin jaanti। bhal dher bachche hain, unmein bhi bahut hain jo nahin jaante hain ki kis prakaar se baap ko yaad karna chaahiye। woh yaad karne nahin aata। ghadi-ghadi bhool jaate hain। baap samjhaate hain bachche apne ko aatma samjho, ham bindi hain। baap, gyaan ka saagar hai, unko hi yaad karna hai। yaad karne ki aisi practice pad jaae jo nirantar yaad thahar jaaye। pichhaadi mein yahi yaad rahe ki ham aatma hain, shareer to hai parantu yeh gyaan buddhi mein rakhna hai ki ham aatma hain। baap ka direction mila hua hai main jo hoon, us roop mein koi virla yaad karte hain। deh-abhimaan mein bachche bahut aa jaate hain। baap ne samjhaaya hai, koi ko bhi jab tak baap ka parichay nahin diya hai tab tak kuchh bhi samajh nahin sakenge। pahle to unhon ko yeh maaloom pade ki woh niraakaar hamaara baap, geeta ka bhagwan hai, vahi sarva ka sadgati daata hai। woh is samay sadgati karne ka part baja rahe hain। is point mein nishchaybuddhi ho jaaen to phir jo bhi itne saadhu-santa aadi hain sab ek second mein aa jaayen। bhaarat mein bada hangaama mach jaaye। abhi maaloom pad jaaye ki yeh duniya vinaash hone vaali hai। is baat ka nishchay ho jaae to bambai se lekar aabu tak queue lag jaaye। lekin itna jaldi koi ko nishchay nahin ho sakta। tum jaante ho vinaash hona hai, yeh sab ghor nidra mein soye hi rahne hain। phir ant samay tumhaara prabhaav niklega। maasi ka ghar nahin hai jo is baat mein nishchay ho jaae ki geeta ka bhagwan parampita paramatma shiv hai। yeh prasiddha ho jaae to saare bhaarat mein aavaaj ho jaaye। abhi to tum ek ko samjhaayenge to doosra kahega tumko jaadu lag gaya hai। yeh jhaad bahut dheere-dheere badhna hai। abhi thoda time hai phir bhi purushaartha karne mein harja nahin hai। tum bade-bade logon ko samjhaate ho, parantu ve kuchh bhi samajhte thode hi hain। bachchon mein bhi kai is knowledge ko samajhte nahin hain। baap ki yaad nahin to woh avastha nahin। baap jaante hain nishchay kisko kaha jaata hai। abhi to koi 1-2 percent bhi mushkil baap ko yaad karte hain। bhal yahaan baithe hain, baap ke saath woh lav nahin rehta। ismen lav chaahiye, takdeer chaahiye। baap se lav ho to samjhen, hamko kadam-kadam shreemat par chalna hai। ham vishwa ke maalik bante hain। aadhaakalpa ka deh-abhimaan baitha hua hai so ab dehi-abhimaani banne mein badi mehnat lagti hai। apne ko aatma samajh most beloved baap ko yaad karna maasi ka ghar nahin hai। unke chehre mein hi raunak aa jaae। kanya shaadi karti hai, jevar aadi pahanti hai to chehre mein ekdam khushi aa jaati hai। parantu yahaan to saajan ko yaad hi nahin karte to woh shakla murjhaai hui rehti hai। baat mat poochho। kanya shaadi karti hai to chehra khushnumah ho jaata hai। koi ki to shaadi ke baad bhi shakla murde jaisi rehti hai। kisam-kisam ke hote hain। koi to doosre ghar mein jaakar moonjh padti hain। to yahaan bhi aise hai। baap ko yaad karne ki mehnat hai। yeh gaayan ant ka hai ki ateendriy sukh gopi vallabh ke gop-gopiyon se poochho। apne ko gop-gopi samajhna aur nirantar baap ko yaad karna, woh avastha honi hai। baap ka parichay sabko dena hai। baap aaya hua hai vo varsa de rahe hain। ismen saari knowledge aa jaati hai। lakshmi-naaraayan ne jab 84 janma poore kiye tab baap ne ant mein aakar unhon ko raajayog sikhaakar raajaai di। lakshmi-naaraayan ka yeh chitra hai number one। tum jaante ho unhonne aage janma mein aise karma kiye hain, woh karma ab baap sikhla rahe hain। kehte hain manamnaabhav, pavitra raho। koi bhi paap mat karo kyonki tum abhi svarga ke maalik, punya aatma bante ho। aadhaakalpa maaya raavan paap karaati aai hai। ab apne se poochhna hai - hamse koi paap to nahin hota hai? punya ka kaam karte rehte hain? andhon ki laathi bane hain? baap kehte hain manamnaabhav। yeh bhi poochhna hota hai ki manamnaabhav kisne kaha? woh kahenge shreekrishna ne kaha। tum maante ho parampita paramatma shiv ne kaha। raat-din ka pharka hai। shiv jayanti ke saath hai geeta jayanti। geeta jayanti ke saath shreekrishna jayanti।

tum jaante ho ham bhavishya mein prince banenge। beggar tu prince banna hai। yeh em-object hi raajayog ki hai। tum siddha kar bataao ki geeta ka bhagwan shreekrishna nahin tha, woh to niraakaar tha। to sarvavyaapi ka gyaan ud jaae। sarva ka sadgati daata, patit-paavan baap hai। kehte bhi hain ki woh liberator hai, phir sarvavyaapi kah dete। jo kuchh bolte hain, samajhte nahin hain। dharma ke baare mein jo aata hai, bol dete hain। mukhya dharma hain teen। devi devta dharma to aadhaakalpa chalta hai। tum jaante ho baap brahman, devta, kshatriy dharma sthaapan karte hain। yeh duniya nahin jaanti। woh to satayug ko hi laakhon varsha kah dete hain। aadi sanaatan devi devta dharma hai sabse ooncha, parantu yeh apne dharma ko bhool irreligious ban pade hain। Christian log apne dharma ko nahin chhodte। woh jaante hain - Christ ne hamaara dharma sthaapan kiya tha। islaami, bauddhi, phir Christian, yeh hain mukhya dharma। baaki to chhote-chhote bahut hain। kahaan se vriddhi hui? yeh koi nahin jaanta। muhammad ko abhi thoda samay hua hai, islaami puraane hain। Christian bhi mashhoor hain। baaki to kitne dher hain। sabka apna-apna dharma hai। apna bhinna-bhinna dharma, bhinna-bhinna naam hain to moonjh gaye hain। yeh nahin jaante ki mukhya dharmashaastra hi 4 hain। ismen Deityism, Brahmanism bhi aa jaate hain। brahman so devta, devta so kshatriy, yeh kisko pata nahin। gaate hain brahman devtaae namah। parampita ne brahman, devta, kshatriy dharma ki sthaapna ki, akshar hain parantu padhte aise hain jaise tote।

yeh hai kaanton ka jangal। bhaarat garden oph flower tha, yeh bhi maante hain। parantu woh kab, kaise, kisne banaaya, paramatma kya cheez hai, yeh koi nahin jaante। to orphan ho gaye na isliye yeh ladaai-jhagde aadi hain। sirf bhakti mein khush hote rehte hain। ab baap aaye hain sojhra karne, second mein jeevanmukta bana dete hain। gyaan anjan satguru diya, agyaan andher vinaash। abhi tum jaante ho ham sojhre mein hain। baap ne teesra netra diya hai। bhal devtaaon ko teesra netra dikhaate hain parantu arth nahin jaante। vaastav mein teesra netra tumko hai। unhonne phir de diya hai devtaaon ko। geeta mein braahmanon ki koi baat nahin। usmein to phir kaurav, paandavon aadi ki ladaai, ghode-gaadi aadi likh di hai, kuchh bhi samajhte nahin। tum samjhaayenge to kahenge tum shaastron aadi ko nahin maante। tum kah sakte ho ham shaastron ko maante kyon nahin hain, jaante hain - yeh sab bhakti maarga ki saamagri hai। gaaya hua hai gyaan aur bhakti। jab raavan raajya hota hai tab bhakti shuru hoti hai। bhaaratvaasi vaam maarga mein jaakar dharma bhrashta aur karma bhrashta ban jaate hain isliye ab hindu kahla diya hai। patit ban gaye hain। patit kisne banaaya? raavan ne। raavan ko jalaate bhi hain, samajhte hain yeh parampara se chala aata hai। parantu satayug mein to raavan raajya hi nahin tha। kuchh bhi samajhte nahin। maaya bilkul hi pattharbuddhi bana deti hai। patthar se paaras baap hi banaate hain। jab iron ej mein aaye tab to aakar golden ej sthaapan kare। baap samjhaate hain phir bhi bada mushkil kiski buddhi mein baithta hai।

tum kumaariyon ki ab sagaai hoti hai। tumko patraani banaate hain। tumko bhagaaya arthaat tum aatmaon ko kehte hain - tum mere the phir tum mujhe bhool gaye ho। deh-abhimaani ban maaya ke ban gaye ho। baaki bhagaane aadi ki to baat nahin hai। maamekam yaad karo। yaad ki hi mehnat hai। bahut deh-abhimaan mein aakar vikarma karte hain। baap jaante hain yeh aatma mujhe yaad hi nahin karti hai। deh-abhimaan mein aakar bahut paap karte hain to paap ka ghada sauguna bhar jaata hai। auron ko raasta bataane ke badle khud hi bhool jaate hain। aur hi jaasti durgati ko pa lete hain। badi oonchi manzil hai। chadhe to chaakhe vaikuntha ras, gire to chaknaachoor। yeh raajaai sthaapan ho rahi hai। ismen farka dekho kitna pad jaata hai। koi to padhkar aasmaan mein chadh jaate hain, koi pat mein pad jaate hain। buddhi dull hoti hai to padh nahin sakte hain। koi-koi kehte hain baba ham kisko samjha nahin sakte hain। kehta hoon achha sirf apne ko aatma samjho, mujh baap ko yaad karo to main tumko sukh doonga। parantu yaad hi nahin karte hain। yaad karen to auron ko yaad dilaate rahen। baap ko yaad karen to paap nashta ho jaayen। unki yaad bigar tum sukhdhaam mein ja nahin sakte ho। 21 janmon ka varsa niraakaar baap se mil sakta hai। baaki to sab alpakaal ka sukh dene vaale hain। koi ko riddhi-siddhi se bachcha mil gaya va aasheervaad se lottery mil gai to bas vishvaas baith jaata hai। koi ko 2-4 karod phaayda ho jaayega bas bahut mahima karenge। parantu woh to hai alpakaal ke liye। 21 janmon ke liye health wealth to mil nahin sakti na। parantu manushya nahin jaante hain। dosh bhi nahin de sakte hain। alpakaal ke sukh mein hi khush ho jaate hain।

baap tum bachchon ko raajayog sikhlaakar svarga ki baadshaahi dete hain। kitna sahaj hai। koi to bilkul samjha nahin sakte। koi samajhte bhi hain parantu yog poora na hone ke kaaran koi ko teer nahin lagta hai। deh-abhimaan mein aane se kuchh na kuchh paap hote rehte hain। yog hi mukhya hai। tum yogbal se vishwa ke maalik bante ho। praacheen yog bhagwan ne sikhaaya tha, na ki shreekrishna ne। yaad ki yaatra badi achhi hai। tum drama dekhkar aao to buddhi mein saara saamne aa jaayega। koi ko bataane mein time lagega। yeh bhi aise hai। beej aur jhaad। yeh chakra bada clear hai। shantidham, sukhdhaam, duhkhadhaam....second ka kaam hai na। parantu yaad bhi rahe na। mukhya baat hai baap ka parichay। baap kehte hain - mere ko yaad karne se tum sab kuchh jaan jaayenge। achha।

shivbaaba tum bachchon ko yaad karte hain, brahma baba yaad nahin karte hain। shivbaaba jaante hain hamaare sapoot bachche kaun-kaun hain। serviceable sapoot bachchon ko to yaad karte hain। yeh thode hi kisko yaad karenge। inki aatma ko to direction hai maamekam yaad karo। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) takdeervaan banne ke liye ek baap se sachcha-sachcha lav rakhna hai। lav rakhna maana kadam-kadam ek ki hi shreemat par chalte rehna।

2) roz punya ka kaam avashya karna hai। sabse bada punya hai sabko baap ka parichay dena। baap ko yaad karna aur sabko baap ki yaad dilaana।

vardaan:- apni drishti aur vritti ke parivartan dvaara srishti ko badalne vaale saakshaatkaarmoorta bhav

apni vritti ke parivartan se drishti ko divya banaao to drishti dvaara anek aatmaayen apne yathaartha roop, yathaartha ghar tatha yathaartha raajdhaani dekhengi। aisa yathaartha saakshaatkaar karaane ke liye vritti mein jara bhi deh-abhimaan ki chanchalta na ho। to vritti ke sudhaar se drishti divya banaao tab yeh srishti parivartan hogi। dekhne vaale anubhav karenge ki yeh nain nahin lekin yeh ek jaadu ki dibbiya hain। yeh nain saakshaatkaar ke saadhan ban jaayenge।

slogan:- seva ke umang-utsaah ke saath, behad ki vairaagya vritti hi saphalta ka aadhaar hai।

ye avyakt ishaare - mahaan banne ke liye madhurta aur namrata ka gun dhaaran karo

madhurta ke gun ko dhaaran karne vaala yahaan bhi mahaan banta hai aur vahaan bhi martaba paata hai। madhurta vaalon ko sabhi mahaan roop se dekhte hain। to yeh madhurta ka vishesh gun har bachche mein hona chaahiye। madhurta ki madhu jinke saath hai unhein har kaarya mein saphalta hi saphalta hai। unke jeevan se asphalta mit jaayegi।