शुक्रवार 3 अप्रैल 2026 की दैनिक मुरली

03-04-2026 praatahmurli om shanti "baapdaada"' madhuban

“meethe bachche - baap samaan merciful ban anekon ko raasta bataao, jo bachche din raat service mein lage rehte hain - vahi bahaadur hain''

prashn:- oonchi takdeer ka mukhya aadhaar kis baat par hai?

uttar:- yaad ki yaatra par। jitna jo yaad karta hai utni oonchi takdeer banaata hai। shareer nirvaah arth karma karte baap aur varse ko yaad karte raho to takdeer oonchi banti jaayegi।

geet:- takdeer jagaakar aai hoon…

om shanti। bachche jab paida hote hain to apne saath karmon anusaar takdeer le aate hain। koi saahookaar paas, koi gareeb ke paas janma lete hain। baap bhi samajhte hain ki vaaris aaya hai। jaise-jaise daan punya kiya hai, us anusaar janma milta hai। ab tum meethe-meethe sikeeldhe bachchon ko kalpa baad phir se baap ne aakar samjhaaya hai। bachche bhi jaante hain ki ham apni takdeer le aaye hain। svarga ki baadshaahi ki takdeer le aaye hain, jinhonne achhi tarah se jaana hai aur baap ko yaad kar rahe hain। yaad ke saath takdeer ka connection hai। janma liya hai - to baap ki yaad bhi honi chaahiye। jitna yaad karenge utni takdeer oonchi rahegi। kitni sahaj baat hai। second mein jeevanmukti mil jaati hai। tum aaye ho sukhdhaam ki takdeer praapta karne। abhi har ek purushaartha kar rahe hain। har ek apne ko dekh rahe hain ki ham kaise purushaartha kar rahe hain। jaise mama baba aur serviceable bachche purushaartha karte hain unko follow karna chaahiye। sabko baap ka parichay dena chaahiye। baap ka parichay diya to rachna ke aadi-madhya-ant ka bhi aa jaayega। rishi, muni aadi koi bhi rachta aur rachna ke aadi-madhya-ant ka knowledge de nahin sakte। abhi tumhaari buddhi mein saara chakra smriti mein rehta hai। duniya mein koi bhi baap aur varse ko nahin jaante। tum bachche ab baap ko aur apni takdeer ko jaante ho। ab baap ko yaad karna hai। shareer nirvaah arth karma bhi karna hai। gharbaar bhi sambhaalna hai। koi nirbandhan hain to woh achhi service kar sakte hain। baal-bachche koi nahin to unko service karne ka achha chance hai। stri ko pati va bachchon ka bandhan hota hai। agar bachche nahin hain to bandhanmukta thahre na। woh jaise vaanaprasthi ho gaye। phir muktidhaam mein jaane ke liye sang chaahiye। bhakti maarga mein to sang milta hai - saadhuon aadi ka, nivritti maarga vaalon ka। woh nivritti maarga vaale pravritti maarga ka varsa dila na saken। tum bachche hi dila sakte ho। tumko baap ne raasta bataaya hai। bhaarat ki history-geography 84 janmon ki baith samjhaao। bhaaratvaasi hi 84 janma lete hain। ek ki baat nahin hai। sooryavanshi so phir chandravanshi, phir vaishyavanshi.... gharaane mein aate hain, nambarvaar to hote hain na। bhaarat ka pahla number prince hai shreekrishna, jisko jhoole mein jhulaate hain। doosre number ko jhulaate hi nahin hain kyonki kala kam ho gai। jo pahla number hai, pooja uski hoti hai। manushya samajhte nahin ki shreekrishna ek hai va do teen hain। shreekrishna ki dynasty chalti hai, yeh kisko bhi pata nahin hai। pooja sirf number one ki hoti hai। marks to nambarvaar hi milte hain। to purushaartha karna chaahiye ki kyon na ham pahle number mein aayen। mama baba ko follow karen, unki raajdhaani le leven। jo achhi service karenge woh achhe mahaaraaja ke ghar mein janma lenge। vahaan to hai hi mahaaraaja mahaaraani। us samay koi raaja-raani ka title nahin hota hai। woh baad mein shuru hota hai। dvaapar se jab patit bante hain to unmein badi property vaale ko mahaaraaja kaha jaata hai phir raaja ka lakab kam ho jaata hai। phir jab bhakti maarga hota hai to gareeb, saahookaar mein farka to rehta hai na। ab tum bachche hi shiv-baba ko yaad karte ho aur unse varsa le rahe ho। aur satsangon mein manushya baith katha sunaate hain, manushya, manushya ko bhakti sikhlaate hain। ve gyaan dekar sadgati nahin kar sakte। ved, shaastra aadi sab hain bhakti maarga ke। sadgati to gyaan se hoti hai। punarjanma ko bhi maante hain। beech mein to koi bhi vaapis ja na sake। ant mein hi baap aakar sabko le jaate hain। itni sab aatmaayen kahaan jaakar thahrengi? sab dharma vaalon ke section to alag-alag hain na। to yeh bhi samjhaana hai। yeh kisko pata nahin hai ki aatmaon ka bhi jhaad hai। tum bachchon ki buddhi mein saare jhaad ka gyaan rehta hai। aatmaon ka jhaad bhi hai, jeev aatmaon ka bhi jhaad hai। bachche jaante hain ki ham yeh puraana shareer chhodkar ghar ja rahe hain। “main aatma'' is shareer se alag hoon - yeh samajhna goya jeete ji marna। aap muye mar gai duniya। mitra, sambandhi aadi sabko chhod diya। pahle poori shiksha lekar, martabe ke adhikaari ban phir jaana hai। baap ko yaad karna to bahut sahaj hai। bhal koi beemaar ho, unko bhi kehte rehna chaahiye ki shivbaaba ko yaad karo to vikarma vinaash honge। jo pakke yogi hain unke liye jaldi marna (shareer chhodna) bhi achha nahin hai kyonki woh yog mein rahkar roohaani seva karte hain। mar jaayenge to seva kar nahin sakenge। seva karne se apna oonch pad banaate rahenge aur bhaai-bahinon ki seva bhi hogi। woh bhi baap se varsa pa lenge। ham aapas mein bhaai-bhaai hain, ek baap ke bachche hain।

baap kehte hain - mujhe yaad karo to vikarma vinaash honge। aage bhi aise kaha tha। kisko bhi samjha sakte ho, behen ji athva bhaai ji, tumhaari aatma tamopradhaan ban gai hai। jo satopradhaan thi ab phir tamopradhaan se satopradhaan ban satopradhaan duniya mein chalna hai। aatma ko satopradhaan banaana hai yaad ki yaatra se। yaad ka poora chart rakhna chaahiye। gyaan ka chart nahin rakh sakenge। baap to gyaan dete rehte hain। jaanch rakhni hai ki hamaare oopar jo vikarmon ka bojha hai, woh kaise utre isliye yaad ka chart rakha jaata hai। hamne kitna ghanta yaad kiya? mool vatan ko bhi yaad karte hain phir nai duniya ko bhi yaad karte hain। uthal-puthal honi hai। uski bhi taiyaari ho rahi hai। bombs aadi bhi bante jaayenge। ek taraph kehte hain ki ham aise-aise maut ke liye saamaan bana rahe hain। doosri taraph kehte maut ka saamaan nahin banaao। samudra ke neeche bhi maarne ka saamaan rakha hai, oopar aakar bombs chhod phir samudra mein chale jaayenge। aisi-aisi cheeze banaate rehte hain। yeh apne hi vinaash ke liye kar rahe hain। maut saamne khada hai। itne bade-bade mahal bana rahe hain। tum jaante ho yeh sab mitti mein mil jaayenge। kinki dabi rahi dhool mein... ladaai zaroor hogi। koshish kar pocket sabke khaali karenge। chor bhi kitne ghus padte hain। ladaai par kitna kharcha karte hain। yeh sab mitti mein mil jaana hai। makaan aadi sab girenge। bombs aadi girne se srishti ke 3 bhaag khalaas ho jaate hain। baaki ek bhaag bach jaata hai। bhaarat ek hisse mein hai na। baaki to sab baad mein aaye hue hain। abhi bhaaratkhanda ka hi bhaag bachega। maut to sabka hona hi hai to kyon na ham baap se poora varsa le leve isliye baap kehte hain laukik sambandhiyon se bhi tod nibhaana hai। baaki bandhan nahin hai to baba raay denge ki kyon nahin service par lag jaate ho। svatantra hain to bahuton ka bhala kar sakte hain। achha kahaan baahar na jaayen to apne mitra sambandhiyon par hi raham karna chaahiye। aage kehte the na ki baba raham karo। ab to tumko raasta mila hai to auron par bhi raham karna chaahiye, jaise baap raham karta hai। baap kehte hain mujhe yaad karo to vikarma vinaash honge। sannyaasi log to hathayog aadi ki kitni mehnat karte hain। yahaan to yeh kuchh nahin hai। sirf yaad karo to paap bhasma ho jaayenge, ismen koi takleeph nahin। sirf yaad ke yaatra ki baat hai। utho-baitho, karmendriyon se bhal karma bhi karo, sirf buddhi ka yog baap se lagaao। sachcha-sachcha aashik banna hai us maashook ka। khud kehte hain ki he aashikon, he bachchon! bhakti maarga mein to bahut yaad kiya। lekin ab mujh maashook ko yaad karo to tumhaare paap bhasma honge। main guarantee karta hoon। koi-koi baat shaastron mein aa gai hai। bhagwan dvaara geeta sunne se tum jeevanmukti paate ho। manushya dvaara geeta sunne se jeevanbandha mein aa gaye ho, seedhi utarte aaye ho। har ek baat mein vichaar saagar manthan karna hai। apni buddhi chalaani hai। yeh buddhi ki yaatra hai, jisse vikarma vinaash honge। ved, shaastra, yagya, tap aadi karne se paap naash nahin honge। neeche hi girte aaye। abhi tumko oopar jaana hai। sirf seedhi se koi samajh nahin sakenge, jab tak us par koi samjhaaye nahin। jaise chhote bachche ko chitra dikhaakar sikhaana padta hai - yeh haathi hai। jab haathi dekhenge to chitra bhi yaad aayega। jaise tumhaari buddhi mein aa gaya hai। chitra mein hamesha chhoti cheez dikhaai jaati hai। tum jaante ho ki vaikuntha to bada hoga na। badi raajdhaani hogi। vahaan heere javaahraaton ke mahal hote hain, woh phir praayahlop ho jaate hain। sab cheezen gaayab ho jaati hain। nahin to yeh bhaarat gareeb kaise bana? saahookaar se gareeb, gareeb se saahookaar banna hai। yeh drama bana-banaaya hai isliye seedhi par samjhaaya jaata hai, naye-naye aate hain unko samjhaane se practice hogi, mukh khul jaayega। service laayak bachchon ko banaaya jaata hai। kai centres par to bahut bachche ashaanti phailaate rehte hain। buddhiyog baahar bhatakta hai to nuksaan kar dete hain। vaayumandal kharaab kar dete hain। nambarvaar to hain na। phir baap kahega tumne padha nahin, to yeh haal apna dekho। din-pratidin jaasti saakshaatkaar hote rahenge। paap karne vaalon ko sazaayen bhi milti rahengi। phir kahenge - naahek hamne paap kiya। baap ko sunaakar praayashchit karne se kuchh kam ho sakta hai। nahin to vriddhi hoti rahegi। aisa hota rehta hai। khud bhi mahsoos karenge parantu phir kehte kya karen - hamaari yeh aadat mitti nahin, isse to ghar jaakar rahen। koi to achhi service karte hain। koi dis-service bhi karte hain। hamaari sena mein kaun-kaun bahaadur hain, yeh baap baith naam bataate hain। baaki ladaai aadi ki yahaan baat nahin hai। yeh hain behad ki baaten। achhe bachche honge to baap zaroor mahima bhi karenge। bachchon ko bahut merciful, kalyaankaari banna hai। andhon ki laathi banna hai। sabko raasta bataana hai ki baap ko yaad karo to vikarma vinaash honge। paap aatma aur punya aatma kehte hain na। aise thode hi ki andar paramatma hai va aatma koi paramatma ban jaati hai। yeh sab wrong hai। paramatma par thode hi paap lagta hai। uska to drama mein part hai service karne ka। manushya hi paapaatma, punyaatma bante hain। jo satopradhaan the vahi tamopradhaan bane hain। unke tan mein baap baith satopradhaan banaate hain to unki mat par chalna pade na।

abhi baap ne tum bachchon ko vishaalbuddhi banaaya hai। abhi tum jaante ho ki raajdhaani kaise sthaapan ho rahi hai। baap hi brahma tan mein aakar brahma mukh vanshaavli bachchon ko raajayog sikhaae devi devta banaate hain। phir punarjanma le seedhi utarte hain। ab phir sab repeat karna hai। baap phir brahma dvaara sthaapna kara rahe hain। yog bal se tum 5 vikaaron par jeet paakar jagatjeet bante ho। baaki ladaai aadi ki koi baat nahin hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) bandhanmukta ban baap ki service mein lag jaana hai, tab hi oonchi takdeer banengi। merciful ban anekon ko raasta bataana hai। andhon ki laathi banna hai।

2) is shareer se mamatva nikaal jeete ji marna hai kyonki ab vaapis ghar jaana hai। beemaari mein bhi ek baap ki yaad rahe to vikarma vinaash ho jaayenge।

vardaan:- kalyaan ki bhaavna dvaara har aatma ke sanskaaron ko parivartan karne vaale nishchaybuddhi bhav

jaise baap mein 100 pratishat nishchaybuddhi ho, koi kitna bhi dagmag karne ki koshish kare lekin ho nahin sakte, aise daivi parivaar va sansaari aatmaon dvaara bhal koi kaisa bhi paper le, krodhi ban saamna kare va koi insult kar de, gaali de - usmein bhi dagmag ho nahin sakte, ismen sirf har aatma prati kalyaan ki bhaavna ho, yeh bhaavna unke sanskaaron ko parivartan kar degi। ismen sirf adheerya nahin hona hai, samay pramaan phal avashya niklega - yeh drama ki noondh hai।

slogan:- pavitrata ki shakti se apne sankalpon ko shuddh, gyaan swaroop banaakar kamjoriyon ko samaapta karo।

ye avyakt ishaare - mahaan banne ke liye madhurta aur namrata ka gun dhaaran karo

vaacha mein sada satyata aur madhurta ho to vaani ki marks jama hoti rahengi। madhurta ka gun jeevan mein hai to har bol moti samaan honge। aise lagega jaise bol nahin rahe hain, motiyon ki varsha ho rahi hai। ve aisa bol bolenge jo sunne vaale sochenge ki aisa bol ham bhi bolen। sabko sunkar seekhne ki, follow karne ki prerna milegi। aise madhur bol ka vibration sarva ko svatah hi kheenchata hai।