शनिवार 4 अप्रैल 2026 की दैनिक मुरली

04-04-2026 praatahmurli om shanti "baapdaada"' madhuban

“meethe bachche - alpha aur be ko yaad karo to ramneek ban jaayenge, baap bhi ramneek hai to unke bachche bhi ramneek hone chaahiye''

prashn:- devtaaon ke chitron ki kashish sabhi ko kyon hoti hai? unmein kaun sa vishesh gun hai?

uttar:- devtaayen bahut ramneek aur pavitra hain। ramneekta ke kaaran unke chitron ki bhi kashish hoti hai। devtaaon mein pavitrata ka vishesh gun hai, jis gun ke kaaran hi apvitra manushya jhukte rehte hain। ramneek vahi bante jinmen sarva daivi gun hain, jo sada khush rehte hain।

om shanti। aatmaayen aur paramatma ka mela kitna wonderful hai। aise behad ke baap ke tum sab bachche ho to bachche bhi kitne ramneek hone chaahiye। devtaayen bhi ramneek hain na। parantu raajdhaani hai bahut badi। sab ekras ramneek ho nahin sakte। phir bhi koi-koi bachche bahut ramneek hain zaroor। ramneek kaun hote hain? jo sadaiv khushi mein rehte hain, jinmen daiveegun hain। yeh raadhe-krishna aadi ramneek hain na। unhon mein bahut-bahut kashish hai। kaun si kashish hai? pavitrata ki kyonki inhon ki aatma bhi pavitra hai to shareer bhi pavitra hai। to pavitra aatmaayen apvitra ko kashish karti hain। unhon ke charnon mein girti hain। kitni unmein taakat hai। bhal sannyaasi hain, parantu woh devtaaon ke aage zaroor jhukte hain। bhal koi-koi bahut ghamandi hote hain, phir bhi devtaaon ke aage athva shiv ke aage jhukenge zaroor। deviyon ke chitron ke aage bhi jhukte hain kyonki baap bhi ramneek hai to baap ke banaaye hue devi devtaayen bhi ramneek hain। unmein kashish hai pavitrata ki। woh kashish unhon ki abhi tak bhi chal rahi hai। to jitni inmen kashish hai utni tumhaare mein bhi kashish honi chaahiye, jo samajhte hain ham yeh lakshmi-naaraayan banenge। tumhaari is samay ki kashish phir avinaashi ho jaati hai। sabki nahin hoti। nambarvaar to hain na। bhavishya mein jo oonch pad paane vaale honge, unmein yahaan hi kashish hogi kyonki aatma pavitra ban jaati hai। tumhaare mein jaasti kashish unmein hai jo khaas yaad ki yaatra mein rehte hain। yaatra mein pavitrata zaroor rehti hai। pavitrata mein hi kashish hai। pavitrata ki kashish phir padhaai mein bhi kashish le aati hai। yeh tumko abhi pata pada hai। tum unke (lakshmi naaraayan ke) occupation ko jaante ho। unhonne bhi kitna baap ko yaad kiya hoga। yeh jo unhonne itni raajaai paai hai, woh zaroor raajayog se hi paai hai। is samay tum yeh pad paane ke liye aaye ho। baap baith tumko raajayog sikhaate hain। yeh to pakka nishchay kar yahaan aaye ho na। baap bhi vahi hai, padhaane vaala bhi vahi hai। saath bhi vahi le jaane vaala hai। to yeh gun sadaiv rahne chaahiye। sadaiv harshit mukh raho। sadaiv harshit tab rahenge jab baap alpha ki yaad mein rahenge। tab be ki bhi yaad rahegi aur isse ramneek bhi bahut honge। tum bachche jaante ho - ham yahaan ramneek ban phir bhavishya mein aisa ramneek banenge। yahaan ki padhaai hi amarpuri mein le jaati hai। yeh sachcha baba tumko sachchi kamaai kara rahe hain। yeh sachchi kamaai hi saath chalti hai - 21 janma ke liye। phir bhakti maarga mein jo kamaai karte ho woh to hai hi alpakaal sukh ke liye। woh koi sadaiv saath nahin deti। to is padhaai mein bachchon ko bada khabardaar rehna chaahiye। tum ho saadhaaran, tumko padhaane vaala bhi bilkul saadhaaran roop mein hai। to padhne vaale bhi saadhaaran hi rahenge। nahin to lajja aayegi। ham oonche kapde kaise pahnen। hamaare mama baba kitne saadhaaran hain to ham bhi saadhaaran hain। yeh kyon saadhaaran rehte hain? kyonki vanvaah mein hain na। abhi tumko jaana hai, yahaan koi shaadi nahin karni hai। vo log jab shaadi karte hain to kumaari vanvaah mein rehti hai। maile kapde pahanti, tel aadi lagaati hai kyonki sasurghar jaati hai। brahman dvaara sagaai hoti hai। tumko bhi jaana hai sasurghar। raavanpuri se raampuri athva vishnupuri mein jaana hai। to yeh vanvaah ka rivaaj isliye rakha hai ki koi bhi abhimaan deh ka va kapdon aadi ka na aaye। kisko halki saadi hai, doosre ko dekhte hain ki inke paas to oonchi saadi hai to khyaal chalta hai। sochte hain ki yeh to vanvaah mein hai nahin। lekin tum vanvaah mein aise saadhaaran rehte hue koi ko itna ooncha gyaan do, itna nasha chadha hua ho to use bhi teer lag jaae। bhal bartan maanjate raho va kapda saaph karte raho, tumhaare saamne koi aaye to tum jhat unko alpha ki yaad dilaao। tumko woh nasha chadha hua ho aur saade kapdo mein baith kisko knowledge denge to woh bhi wonder khaayenge, inmen kitna oonch gyaan hai! yeh gyaan to geeta ka hai aur bhagwan ka diya hua hai। raajayog to geeta ka gyaan hi hai। to aisa nasha chadhta hai? jaise baba apna misaal bataate hain। samjho ham bachchon ke saath koi khel kar raha hoon। koi jigyaasu saamne aa jaata hai to jhat unko baap ka parichay deta hoon। yog ki taakat, yogbal hone ke kaaran woh bhi vahaan hi khada ho jaayega to wonder khaayega ki yeh itna saadhaaran, ismen itni taakat! phir woh kuchh bhi bol nahin sakega। mukh se koi baat niklegi nahin। jaise tum vaani se pare ho vaise woh bhi vaani se pare ho jaayenge। yeh nasha andar mein hona chaahiye। koi bhi bhaai athva behen aaye to unko ekdam khada karke vishwa ka maalik banaane ki mat de sakte hain। andar mein itna nasha hona chaahiye। apni lagan mein khada ho jaana chaahiye। baba sadaiv kehte hain - tumhaare paas gyaan to hai parantu yog ka jauhar nahin hai। purity aur yaad mein rahne se hi jauhar aata hai। yaad ki yaatra se tum pavitra bante ho। taakat milti hai। gyaan to hai dhan ki baat। jaise school mein padhkar em.A., bi.A. aadi karte hain to itna phir paisa milta hai। yahaan ki doosri baat hai। bhaarat ka praacheen yog to mashhoor hai। yeh hai yaad। baap sarvashaktimaan hai to bachchon ko baap se shakti milti hai। bachchon ko andar mein rehna chaahiye - ham aatmaayen baba ki santaan hain, parantu baba jitne ham pavitra nahin hain। ab banna hai। abhi hai em-object। yog se hi tum pavitra bante ho। jo ananya bachche hain woh saara din yahi khyaalaat karte rahenge। koi bhi aaye to unko ham raasta bataayen, taras aana chaahiye, bichaare andhe hain। andhe ko laathi pakdaakar le jaate hain na। yeh sab andhe hain, gyaan chakshu hain nahin।

abhi tumhein gyaan ka teesra netra mila hai, to sab kuchh jaan gaye ho। saare srishti ke aadi-madhya-ant ko ham abhi jaante hain। yeh sab bhakti maarga ki baaten hain। tumko pahle bhi pata tha kya ki hear no evil, si no evil… yeh chitra kyon bana hai? duniya mein koi bhi inka arth nahin samajhte, tum abhi jaante ho। jaise baap knowledgeful hai, tum unke bachche bhi ab knowledgeful ban rahe ho, nambarvaar purushaartha anusaar। koi-koi ko to bahut nasha chadhta hai। vaah! baba ka bachcha bankar aur baba se poora varsa nahin liya to bachcha bankar hi kya kiya! roz raat ko apna potaamel dekhna hai। baba vyaapaari hai na। vyaapaariyon ko potaamel nikaalna sahaj hota hai। government servant ko potaamel nikaalna nahin aata hai, na woh saudaagar hote hain। vyaapaari log achha samjhenge। tum vyaapaari ho। tum apne naphe nuksaan ko samajhte ho, roz khaata dekho। muraadi sambhaalo। ghaata hai va phaayda hai? saudaagar ho na। gaayan hai na - baba saudaagar, ratnaagar hai। avinaashi gyaan ratnon ka sauda dete hain। yeh bhi tum jaante ho - nambarvaar purushaartha anusaar। sab koi shrewd buddhi nahin hain, ek kaan se sunte hain phir doosre se nikal jaata hai। jholi mein chhed se nikal jaata hai। jholi bharti nahin hai। baap kehte hain dhan diye dhan na khute। avinaashi gyaan ratna hain na। baap hai roop-basanta। aatma to hai, unmein gyaan hai। tum unke bachche bhi roop-basanta ho। aatma mein knowledge bhari jaati hai। unka roop hai, bhal aatma chhoti hai। roop to hai na। unko jaana jaata hai, paramatma ko bhi jaana jaata hai। somnaath ki bhakti karte hain to itne chhote star ki kya pooja karenge। pooja ke liye kitne ling banaate hain। shivling chhat jitna bada-bada bhi banaate hain। yoon to hai chhota parantu martaba to oonch hai na।

baap ne kalpa pahle bhi kaha tha ki in jap, tap aadi se koi praapti nahin hoti hai। yeh sab karte neeche hi girte jaate hain। seedhi neeche hi utarte hain। tumhaari to ab chadhti kala hai। tum brahman pahle number ke jinna ho। kahaani hai na - jinna ne kaha, hamko kaam nahin denge to kha jaayenge। to unko kaam diya - seedhi chadho aur utro। to unko kaam mil gaya। baba ne bhi kaha hai ki yeh behad ki seedhi tum utarte ho phir chadhte ho। tum hi full seedhi utarte aur chadhte ho। jinna tum ho। doosre koi full seedhi nahin chadhte hain। full seedhi ka gyaan paane se tum kitna oonch pad paate ho। phir utarte ho, chadhte ho। baap kehte hain - main tumhaara baap hoon। tum mujhe patit-paavan kehte ho na, main sarvashaktimaan almighty hoon kyonki meri aatma sadaiv 100 percent pavitra rehti hai। main bindi roop authority hoon। sab shaastron ka raaz jaanta hoon। yeh kitna wonder hai। yeh sab wonderful gyaan hai। aise kabhi suna nahin hoga ki aatma mein 84 janmon ka avinaashi part hai। woh kabhi ghista nahin hai। chalta hi aata hai। 84 janmon ka chakra phirta aata hai। 84 janmon ka record bhara hua hai। itni chhoti aatma mein itna gyaan hai। baba mein bhi hai to tum bachchon mein bhi hai। kitna part bajaate hain। yeh part kabhi mitne ka nahin hai। aatma in okhon se dekhne mein nahin aati hai। hai bindi, baba bhi kehte hain main aisa bindi hoon। yeh bhi tum bachche ab samajhte ho। tum ho behad ke tyaagi aur raajarishi। kitna nasha chadhna chaahiye। raajarishi bilkul pavitra rehte hain। raajarishi hote hain - sooryavanshi, chandravanshi, jo yahaan raajaai praapta karte hain। jaise ab tum kar rahe ho। yeh to bachche samajhte hain ki ham ja rahe hain। khivaiya ke steamer mein baithe hain। aur yeh bhi jaante hain yeh purushottam sangamayug hai। jaana bhi zaroor hai, puraani duniya se nai duniya mein, via shantidham। yeh sadaiv bachchon ki buddhi mein rehna chaahiye। jab ham satayug mein the to koi khanda nahin tha। hamaara hi raajya tha। ab phir se yogbal se apna raajya le rahe hain kyonki samjhaaya hai yogbal se hi vishwa ki raajaai pa sakte hain। baahubal se koi nahin pa sakte। yeh behad ka drama hai। khel bana hua hai। is khel ki samjhaani baap hi dete hain। shuru se lekar saari duniya ki history-geography sunaate hain। tum sookshm vatan, mool vatan ke raaz ko bhi achhi reeti jaante ho। sthool vatan mein inka raajya tha arthaat hamaara raajya tha। tum kaise seedhi utarte ho, woh bhi yaad aa gaya। seedhi chadhna aur utarna yeh khel bachchon ki buddhi mein baith gaya hai। ab buddhi mein hai ki kaise yeh world ki history-geography repeat hoti hai, ismen hamaara hero, heroine ka part hai। ham hi haar khaate hain aur phir jeet paate hain isliye naam rakha hai hero, heroine। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) abhi ham vanvaah mein hain - isliye bahut-bahut saadhaaran rehna hai। koi bhi abhimaan deh ka va kapdon aadi ka nahin rakhna hai। koi bhi karma karte baap ki yaad ka nasha chadha rahe।

2) ham behad ke tyaagi aur raajarishi hain - isi nashe mein rah pavitra banna hai। gyaan dhan se bharpoor ban daan karna hai। sachcha-sachcha saudaagar ban apna potaamel rakhna hai।

vardaan:- svayan ko sevaadhaari samajhkar jhukne aur sarva ko jhukaane vaale nimitta aur namrachit bhav

nimitta use kaha jaata - jo apne har sankalp va har karma ko baap ke aage arpan kar deta hai। nimitta banna arthaat arpan hona aur namrachit woh hai jo jhukta hai, jitna sanskaaron mein, sankalpon mein jhukenge utna vishwa aapke aage jhukegi। jhukna arthaat jhukaana। yeh sankalp bhi na ho ki doosre bhi hamaare aage kuchh to jhuken। jo sachche sevaadhaari hote hain - woh sadaiv jhukte hain। kabhi apna rob nahin dikhaate।

slogan:- ab samasya swaroop nahin, samaadhaan swaroop bano।

ye avyakt ishaare - mahaan banne ke liye madhurta aur namrata ka gun dhaaran karo

aap mahaan aatmaon ka har mansa sankalp har aatma ke prati madhur ho, mahaan ho। jaise baap ka svabhaav sada har aatma ke prati kalyaan va raham ki bhaavna ka hai, har ek ko ooncha uthaane ka, madhurta aur nirmaanta ka hai। aise apna svabhaav banaao। agar tez bolne ka, aavesh mein aane ka svabhaav hai to yeh bhi brahman jeevan mein bahut bada vighna hai। ab aise svabhaav ka parivartan karo।