शुक्रवार 17 अप्रैल 2026 की दैनिक मुरली

17-04-2026 praatahmurli om shanti "baapdaada"' madhuban

“meethe bachche - paavan bano to roohaani seva ke laayak banenge, dehi-abhimaani bachche roohaani yaatra par rahenge aur doosron ko bhi yahi yaatra karaayenge''

prashn:- sangam par tum bachche jo kamaai karte ho, yahi sachchi kamaai hai - kaise?

uttar:- abhi ki jo kamaai hai woh 21 janma tak chalti hai, iska kabhi bhi devaala nahin nikalta। gyaan sunna aur sunaana, yaad karna aur karaana - yahi hai sachchi-sachchi kamaai, jo sachcha-sachcha baap hi tumhein sikhlaata hai। aisi kamaai saare kalpa mein koi bhi kar na sake। doosri koi bhi kamaai saath nahin chalti।

geet:- humein un raahon par chalna hai…

om shanti। bhakti maarga mein to bachchon ne bahut thokren khaai hui hain। bhakti maarga mein bahut hi bhaavna se yaatra karne jaate hain, raamaayan aadi sunte hain। aise prem se baith kahaaniyaan sunte hain - jo rona bhi aa jaata hai। hamaare bhagwan ki seeta bhagavti ko raavan daaku le gaya। phir sunne samay baith rote hain। yeh hain sab danta kathaayen, jisse phaayda kuchh bhi nahin। pukaarte bhi hain - he patit-paavan aao, aakar ham duhkhi aatmaon ko sukhi banaao। yeh nahin samajhte ki aatma duhkhi hoti hai kyonki woh to aatma ko nirlep kah dete hain। samajhte hain aatma sukh duhkh se nyaari hai। yeh kyon kehte hain? kyonki samajhte hain - paramatma sukh duhkh se nyaara hai, to bachche phir sukh duhkh mein kaise aayenge? in sab baaton ko ab bachchon ne samjha hai। is gyaan maarga mein bhi kabhi grahchaari baithti hai, kabhi kuchh hota hai। kabhi praphullit rehte, kabhi murjhaaya hua chehra rehta hai। yeh hoti hai maaya se ladaai। maaya par hi jeet paani hai। jab behosh hote hain tab sanjeevni booti di jaati hai - manamnaabhav। bhakti maarga mein chahachta bahut hai। devtaaon ki moortiyon ko kitna shrringaarte hain, sachche jevar pahnaate hain। woh jevar to thaakur ki property hui। thaakur ki property so pujaari va trustee ki ho jaati hai। tum bachche jaante ho ki ham chaitanya mein bahut heere javaahron se saje hue the। phir jab pujaari bante hain to bhi bahut jevar pahante hain। ab kuchh bhi nahin hai। chaitanya roop mein bhi pahne phir jad roop mein bhi pahne। ab no jevar। bilkul saadhaaran hain। baap kehte hain main saadhaaran tan mein aata hoon। koi raajaai aadi ki thaath-baath nahin hai। sannyaasiyon ke bhi bahut thaath-baath hote hain। abhi tum samajh gaye ho barobar satayug mein kaise ham aatmaayen pavitra theen। shareer bhi hamaare pavitra the। unhon ka shrringaar bhi bahut achha rehta hai। koi khoobsoorat hote hain to unko shrringaar ka bhi shauk rehta hai। tum bhi khoobsoorat the to bahut achhe-achhe jevar pahante the। heeron ke bade haar aadi pahante the। yahaan har cheej saanvari hai। dekho, gaooyen bhi saanvari hoti gai hain। baba jab shreenaath dvaare gaya tha to bahut achhi gaooen thi। shreekrishna ki gaooyen bahut achhi dikhaate hain। yahaan to dekho koi kaise, koi kaise hain kyonki kaliyug hai। aisi gaooen vahaan hoti nahin। tum bachche vishwa ke maalik bante ho। tumhaari sajaavat bhi vahaan aisi sundar rehti hai। vichaar karo - gaooen to zaroor honi chaahiye। vahaan ki gaooon ka gobar bhi kaisa hota hoga। kitni taakat hogi। jameen ko khaad chaahiye na। khaad daali jaati hai to achha anaaj paida hota hai। vahaan sab cheezen achhi taakat vaali hoti hain। yahaan to koi cheez mein taakat nahin hai। har ek cheez bilkul hi powerless ho gai hai। bachchiyaan sookshm vatan mein jaati thi। kitne achhe-achhe bade phal khaati thi, shoobeeras aadi peeti thi। yeh sab saakshaatkaar karaate the। maali vahaan kaise phal aadi kaatkar dete hain। sookshm-vatan mein to phal aadi ho na saken। yeh saakshaatkaar hota hai। vaikuntha to phir bhi yahaan hoga na। manushya samajhte hain vaikuntha koi oopar mein hai। vaikuntha na sookshm vatan mein, na mool vatan mein hota hai। yahaan hi hota hai। yahaan jo bachchiyaan saakshaatkaar karti hain woh phir in okhon se dekhenge। jaisi position aisi saamagri bhi rehti hai। raajaaon ke mahal dekho kaise achhe-achhe hote hain। jaypur mein bahut achhe-achhe mahal bane hue hain। sirf mahal dekhne liye manushya jaate hain to bhi ticket rehti hai। khaas woh mahal dekhne liye rakhte hain। khud phir aur mahlon mein rehte hain। so bhi abhi kaliyug mein। yeh hai hi patit duniya। koi apne ko patit samajhte thode hi hain। tum abhi samajhte ho - ham to patit the। koi kaam ke nahin the phir ham gora banenge। woh duniya hi first class hogi। yahaan bhal America aadi mein first class mahal hain। parantu vahaan ki bhent mein yeh to kuchh nahin hain kyonki yeh to alpakaal ka sukh dene vaale hain। vahaan to first class mahal hote hain। first class gaooen hoti hain। vahaan gvaale bhi hote hain। shreekrishna ko gvaala kehte hain na। yahaan jo gaooon ko sambhaalne vaale hain, woh kehte hain ham goojar (gvaale) hain। shreekrishna ke vanshaavli hain। vaastav mein shreekrishna ke vanshaavli nahin kahenge। shreekrishna ki raajdhaani ke kahenge। saahookaaron ke paas gaooen hongi to goojar sambhaalne vaale bhi honge। yeh goojar naam satayug ka hai। kal ki baat hai। kal ham aadi sanaatan devi devta dharma ke the phir patit bane hain to apne ko hindu kahla dete hain। poochho, tum aadi sanaatan devi devta dharma ke ho va hindu dharma ke ho? aajkal sab hindu likh dete hain। hindu dharma kisne sthaapan kiya? devi devta dharma kisne sthaapan kiya? yeh bhi koi nahin jaante hain। baba yeh prashn poochhte hain bataao aadi sanaatan devi devta dharma kisne sthaapan kiya? shivbaaba brahma dvaara kar rahe hain। raam va shivbaaba ki shreemat par aadi sanaatan devi devta dharma sthaapan hua। phir raavan raajya hota hai, vikaaron mein jaate hain। bhakti maarga shuru ho jaata hai tab hindu kahlaane lagte hain। abhi apne ko koi devta kah na sake। raavan ne vicious banaaya, baap aakar viceless banaate hain। tum eeshvareey mat se devta bante ho। baap hi aakar tum braahmanon ko devta banaate hain। seedhi kaise utarte hain, yeh tum bachchon ki buddhi mein nambarvaar baithta hai। tum jaante ho aur sabhi manushya aasuri mat par chal rahe hain aur tum eeshvareey mat par chal rahe ho। raavan ki mat se seedhi utarte aaye ho। 84 janmon ke baad phir pahla number janma hoga। eeshvareey buddhi se tum saare srishti ke aadi-madhya-ant ko jaan jaate ho। yeh tumhaara jeevan bahut amoolya hai, inki bahaaduri hai। jabki baap aakar hamko itna paavan banaate hain। ham roohaani seva ke laayak bante hain। woh hai jismaani social worker, jo deh-abhimaan mein rehte hain। tum dehi-abhimaani ho। aatmaon ko roohaani yaatra par le jaate ho। baap samjhaate hain tum satopradhaan the, abhi tamopradhaan bane ho। satopradhaan ko paavan, tamopradhaan ko patit kaha jaata hai। aatma mein hi khaad padi hai। aatma ko hi satopradhaan banaana hai। jitna yaad mein rahenge utna pavitra banenge। nahin to kam pavitra banenge। paapon ka bojha sir par rah jaayega। aatmaayen to sabhi pavitra hoti hain phir har ek ka part alag hai। sabka ek jaisa part ho na sake। sabse oonch baba ka part phir brahma-sarasvati ka kitna part hai। jo sthaapna karta hai, vahi paalna bhi karta hai। bada part unka hai। pahle hai shivbaaba phir hai brahma-sarasvati, jo punarjanma mein aate hain। shankar to sirf sookshm roop dhaaran karte hain। aise nahin ki shankar koi shareer ka loan lete hain। shreekrishna ko apna shareer hai। yahaan sirf shivbaaba shareer ka loan lete hain। patit shareer, patit duniya mein aakar seva karte hain, mukti-jeevanmukti mein le jaane ki। pahle mukti mein jaana pade। knowledgeful ek hi baap patit-paavan hai, unko hi kehte hain shivbaaba। shankar ko baba kehte shobhta nahin hai। shivbaaba akshar bahut meetha hai। shiv ke oopar koi ak chadhaate hain, koi kya chadhaate hain। koi doodh bhi chadhaate hain।

baap bachchon ko anek prakaar ki samjhaani dete rehte hain। bachchon ke liye samjhaaya jaata hai, saara madaar yog par hai। yog se hi vikarma vinaash honge। yog vaale ko gyaan ki dhaarna bhi achhi hogi। apni dhaarna mein chalte rahenge kyonki phir sunaana bhi padta hai। yeh hai nai baat - bhagwan ne jinhon ko direct sunaaya, unhonne hi suna phir to yeh gyaan rehta hi nahin। abhi baap tumko jo sunaate hain woh abhi tum sunte ho। dhaarna hoti hai phir to praalabdha ka part bajaana hota hai। gyaan sunna, sunaana abhi hota hai। satayug mein yeh part nahin hoga। vahaan to hai hi praalabdha ka part। manushya bairistari padhte hain phir barrister ban kamaate hain। yeh kitni badi kamaai hai, inko duniya vaale nahin jaante। tum jaante ho sachcha baba hamko sachchi kamaai kara rahe hain। inka kabhi devaala nikal na sake। abhi tum sach ki kamaai karte ho। woh phir 21 janma saath rehti hai। woh kamaai saath nahin deti। yeh saath dene vaali hai to aisi kamaai ko saath dena chaahiye। yeh baaten tumhaare sivaae aur koi ki buddhi mein nahin hain। tumhaare mein bhi ghadi-ghadi koi bhool jaate hain। baap aur varse ko bhoolna nahin chaahiye। bas, baat ek hi hai। baap ko yaad karo। jis baap se 21 janma ka varsa milta hai, 21 janma nirogi kaaya rehti hai। budhaape tak akaale mrityu nahin hoti। bachchon ko kitni khushi honi chaahiye। baap ki yaad hai mukhya, ismen hi maaya vighna daalti hai। toofaan laati hai। anek prakaar ke toofaan aate hain। tum kahenge - baap ko yaad karoon, parantu kar nahin sakenge। yaad mein hi bahut fail hote hain। yog ki bahuton mein kami hai। jitna ho sake, yog mein majboot hona chaahiye। baaki beej aur jhaad ka gyaan koi badi baat nahin hai।

baap kehte hain mujhe yaad karo। mujhe yaad karne se, mujhe jaanne se tum sab kuchh jaan jaayenge। yaad mein hi sab kuchh bhara hua hai। sweet baba, shivbaaba ko yaad karna hai। oonch te oonch hai bhagwan। shreshtha te shreshtha woh hai। oonche se oonch varsa dete hain 21 janma ke liye। sada sukhi amar banaate hain। tum amarpuri ka maalik bante ho। to aise baap ko bahut yaad karna chaahiye। baap ko yaad nahin karenge to aur sab kuchh yaad aa jaayega। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yeh eeshvareey jeevan bahut-bahut amoolya hai, is jeevan mein aatma aur shareer donon ko paavan banaana hai। roohaani yaatra mein rahkar doosron ko yahi yaatra sikhaani hai।

2) jitna ho sake - sach ki kamaai mein lag jaana hai। nirogi banne ke liye yaad mein majboot hona hai।

vardaan:- shareer ko eeshvareey seva ke liye amaanat samajhkar kaarya mein lagaane vaale nashtomoha bhav

jaise koi ki amaanat hoti hai to amaanat mein apnaapan nahin hota, mamta bhi nahin hoti hai। to yeh shareer bhi eeshvareey seva ke liye ek amaanat hai। yeh amaanat roohaani baap ne di hai to zaroor roohaani baap ki yaad rahegi। amaanat samajhne se roohaaniyat aayegi, apne pan ki mamta nahin rahegi। yahi sahaj upaay hai nirantar yogi, nashtomoha banne ka। to ab roohaaniyat ki sthiti ko pratyaksha karo।

slogan:- vaanaprastha sthiti mein jaana hai to drishti-vritti mein bhi pavitrata ko underline karo।

ye avyakt ishaare - mahaan banne ke liye madhurta aur namrata ka gun dhaaran karo

aapka har bol mahaan ho। har mansa sankalp har aatma ke prati madhur ho। har ek ko ooncha uthaane ka svabhaav, madhurta ka svabhaav, nirmaanta ka svabhaav ho। mera svabhaav aisa hai, yeh kabhi nahin bolna। mera kahaan se aaya! mera tez bolne ka svabhaav hai, mera aavesh mein aane ka svabhaav hai। svabhaav ke vash hona yahi maaya hai। ab maayaajeet bano। abhimaan va dilshikasta hone ke, eershya va aavesh mein aane ke svabhaav ka parivartan karo।