शनिवार 18 अप्रैल 2026 की दैनिक मुरली

18-04-2026 praatahmurli om shanti "baapdaada"' madhuban

“meethe bachche - tum baap dvaara sammukh padh rahe ho, tumhein satayugi baadshaahi ka laayak banne ke liye paavan zaroor banna hai''

prashn:- baap ke kis occupation ko tum bachche hi jaante ho?

uttar:- tum jaante ho ki hamaara baap, baap bhi hai, teacher aur satguru bhi hai। baap kalpa ke sangamayug par aate hain, puraani duniya ko naya banaane, ek aadi sanaatan dharma ki sthaapna karne। baap abhi ham bachchon ko manushya se devta banaane ke liye padha rahe hain। yeh occupation ham bachchon ke sivaae aur koi nahin jaanta।

geet:- bholenaath se niraala…

om shanti। om shanti ka arth to bachchon ko baar-baar samjhaaya hai। om maana main aatma hoon aur mera yeh shareer hai। shareer bhi kah sakta hai ki meri yeh aatma hai। jaise shivbaaba kehte hain tum mere ho। bachche kehte hain baba aap hamaare ho। vaise aatma bhi kehti hai mera shareer। shareer kahega - meri aatma। abhi aatma jaanti hai - main avinaashi hoon। aatma bigar shareer kuchh kar na sake। shareer to hai, kehte hain meri aatma ko takleeph nahin dena। meri aatma paap aatma hai va meri aatma punya aatma hai। tum jaante ho meri aatma satayug mein punya aatma thi। aatma khud bhi kahegi - main satayug mein satopradhaan athva sachcha sona thi। sona hai nahin, yeh ek misaal diya jaata hai। hamaari aatma pavitra thi, golden aged thi। abhi to kehte hain impure hoon। duniya vaale yeh nahin jaante। tumko to shreemat milti hai। tum ab jaante ho hamaari aatma satopradhaan thi, ab tamopradhaan bani hai। har ek cheez aise hoti hai। baal, yuva, vriddha....har cheez naye se puraani zaroor hoti hai। duniya bhi pahle golden aged satopradhaan thi phir tamopradhaan iron aged hai, tab hi duhkhi hai। satopradhaan maana sudhri hui, tamopradhaan maana bigdi hui। geet mein bhi kehte hain, bigdi ko banaane vaale...puraani duniya bigdi hui hai kyonki raavan raajya hai aur sabhi patit hain। satayug mein sab paavan the, unko new viceless world kaha jaata hai। yeh hai old vicious world। ab kaliyug iron ez hai। yeh sab baaten koi school, college mein nahin padhaai jaati hain। bhagwan aakar padhaate hain aur raajayog sikhaate hain। geeta mein likha hua hai bhagvaanuvaach - shreemat bhagvat geeta। shreemat maana shreshtha mat। shreshtha te shreshtha oonch te oonch bhagwan hai। unka naam accurate shiv hai। roodra jayanti va roodra raatri kabhi nahin suna hoga। shivraatri kehte hain। shiv to niraakaar hai। ab niraakaar ki raatri va jayanti kaise manaai jaae। shreekrishna ki jayanti to theek hai। phalaane ka bachcha hai, unki tithi taareekh dikhaate hain। shiv ke liye to koi jaante nahin ki kab paida hua। yeh to jaanna chaahiye na। ab tumko samajh mili hai ki shreekrishna ne satayug aadi mein kaise janma liya। tum kahenge unko to 5 hajaar varsha hue। woh bhi kehte hain Christ se 3 hajaar varsha pahle bhaarat paradise tha। islaamiyon ke aage chandravanshi, unke aage sooryavanshi the। shaastron mein satayug ko laakhon varsha de diye hain। geeta hai mukhya। geeta se hi devi devta dharma sthaapan hua। woh satayug-treta tak chala arthaat geeta shaastra se aadi sanaatan devi devta dharma ki sthaapna, parampita paramatma ne ki। phir to aadhaakalpa na koi shaastra hua, na koi dharma sthaapak hua। baap ne aakar braahmanon ko devta-kshatriy banaaya। goya baap 3 dharma sthaapan karte hain। yeh hai leap dharma। inki aayu thodi rehti hai। to sarva shaastramai shiromni geeta bhagwan ne gaai hai। baap punarjanma mein nahin aate hain। janma hai, parantu baap kehte hain, main garbha mein nahin aata hoon। meri paalna nahin hoti। satayug mein bhi jo bachche hote hain woh garbha mahal mein rehte hain। raavanraajya mein garbhajel mein aana padta hai। paap jel mein bhoge jaate hain। garbha mein anjaam karte hain, ham paap nahin karenge, parantu yeh hai hi paap aatmaon ki duniya। baahar nikalne se phir paap karne lag padte hain। vahaan ki vahaan rahi... yahaan bhi bahut pratigya karte hain ham paap nahin karenge। ek do par kaam-kataari nahin chalaayenge kyonki yeh vikaar aadi-madhya-ant duhkh deta hai। satayug mein vish hai nahin। to manushya aadi-madhya-ant 21 janma duhkh bhogte nahin kyonki raamraajya hai। uski sthaapna ab baap phir se kar rahe hain। sangam par hi sthaapna hogi na। jo bhi dharma sthaapan karne aate hain unko koi bhi paap nahin karna hai। aadha samay hai punya aatma, phir aadha samay baad paap aatma bante hain। tum satayug treta mein punya aatma rehte ho, phir paap aatma bante ho। satopradhaan aatma jab oopar se aati hai to woh sajaayen kha nahin sakti। Christ ki aatma dharma sthaapan karne aai, unko koi saja mil na sake। kehte hain - Christ ko cross par chadhaaya parantu unki aatma ne koi vikarma aadi kiya hi nahin hai। woh jiske shareer mein pravesh karte hain unko duhkh hota hai। woh sahan karte hain। jaise ismen baba aate hain, woh to hai hi satopradhaan। koi bhi duhkh takleeph inki aatma ko hota hai, shivbaaba ko nahin hota hai। woh to sadaiv sukh-shanti mein rehte hain। ever satopradhaan hain। parantu aate to is puraane shareer mein hain na। vaise Christ ki aatma ne jismen pravesh kiya us shareer ko duhkh ho sakta hai, Christ ki aatma duhkh nahin bhog sakti kyonki sato-rajo-tamo mein aati hai। nayi-nayi aatmaayen aati bhi to hain na। unko pahle zaroor sukh bhogna pade, duhkh bhog nahin sakti। law nahin kehta। ismen baba baithe hain koi bhi takleeph inko (daada ko) hoti hai na ki shivbaaba ko। parantu yeh baaten tum jaante ho aur koi ko pata nahin hain।

yeh sab raaz abhi baap baith samjhaate hain। is sahaj raajayog se hi sthaapna hui thi phir bhakti maarga mein yahi baaten gaai jaati hain। is sangam par jo kuchh hota hai, woh gaaya jaata hai। bhakti maarga shuru hota hai to phir shivbaaba ki pooja hoti hai। pahle-pahle bhakti kaun karta hai, vahi lakshmi-naaraayan jab raajya karte the to poojya the phir vaam maarga mein aa jaate hain to phir poojya se pujaari ban jaate hain। baap samjhaate hain, tum bachchon ko pahle-pahle buddhi mein aana chaahiye ki niraakaar parampita paramatma is dvaara hamko padhaate hain। aisi aur koi jagah saare world mein ho na sake, jahaan aise samjhaate ho। baap hi aakar bhaarat ko phir se svarga ka varsa dete hain। trimoorti ke neeche likha hua hai - deity world sovereignty is your god fatherly birth right। shivbaaba aakar tum bachchon ko svarga ki baadshaahi ka varsa de rahe hain, laayak bana rahe hain। tum jaante ho baba hamko laayak bana rahe hain, ham patit the na। paavan ban jaayenge phir yeh shareer nahin rahega। raavan dvaara ham patit bane hain phir parampita paramatma paavan banaae paavan duniya ka maalik banaate hain। vahi gyaan ka saagar patit-paavan hai। yeh niraakaar baba hamko padha rahe hain। sab to ikattha nahin padh sakte। sammukh tum thode baithe ho baaki sab bachche jaante hain - abhi shivbaaba brahma ke tan mein baith srishti ke aadi-madhya-ant ka knowledge sunaate honge। woh murli likhat dvaara aayegi। aur satsangon mein aisa thode hi samjhenge। aajkal tape masheen bhi nikli hai isliye bharkar bhej dete hain। woh kahenge phalaane naam vaala guru sunaate hain, buddhi mein manushya hi rehta hai। yahaan to woh baat hai nahin। yeh to niraakaar baap knowledgeful hai। manushya ko knowledgeful nahin kaha jaata। gaate hain god father is knowledgeful, peaceful, blissful to unka varsa bhi chaahiye na। unmein jo gun hain woh bachchon ko milne chaahiye, abhi mil rahe hain। gunon ko dhaaran kar ham aise lakshmi-naaraayan ban rahe hain। sab to raaja-raani nahin banenge। gaaya jaata hai raaja-raani vajeer..vahaan vajeer bhi nahin rehta। mahaaraaja-mahaaraani mein power rehti hai। jab vikaari bante hain tab vajeer aadi hote hain। aage minister aadi bhi nahin the। vahaan to ek raaja-raani ka raajya chalta tha। unko vajeer ki kya darkaar, raay lene ki darkaar nahin, jabki khud maalik hain। yeh hai history-geography। parantu pahle-pahle to uthte-baithte yeh buddhi mein aana chaahiye ki hamko baap padhaate hain, yog sikhaate hain। yaad ki yaatra par rehna hai। abhi naatak poora hota hai, ham bilkul patit ban gaye hain kyonki vikaar mein jaate hain isliye paap aatma kaha jaata hai। satayug mein paap aatma nahin hote। vahaan hain punya aatmaayen। woh hai praalabdha, jiske liye tum abhi purushaartha kar rahe ho। tumhaari hai yaad ki yaatra, jisko bhaarat ka yog kehte hain। parantu arth to nahin samajhte hain yog arthaat yaad। jisse vikarma vinaash hote hain phir yeh shareer chhod ghar chale jaayenge, usko sweet hom kaha jaata hai। aatma kehti hai, ham us shantidham ke rahvaasi hain। ham vahaan se nange (ashareeri) aaye hain, yahaan part bajaane ke liye shareer liya hai। yeh bhi samjhaaya hai maaya 5 vikaaron ko kaha jaata hai। yeh paanch bhoot hain। kaam ka bhoot, krodh ka bhoot, number one hai deh-abhimaan ka bhoot।

baap samjhaate hain - satayug mein yeh vikaar hote nahin hain, usko nirvikaari duniya kaha jaata hai। vikaari duniya ko nirvikaari banaana, yeh to baap ka hi kaam hai। unko hi sarvashaktimaan gyaan ka saagar, patit-paavan kaha jaata hai। is samay sab bhrashtaachaar se paida hote hain। satayug mein hi viceless duniya hai। baap kehte hain ab tumko vicious se viceless banna hai। kehte hain is bigar bachche kaise paida honge। baap samjhaate hain abhi tumhaara yeh antim janma hai। mrityulok hi khatma hona hai phir iske baad vikaari log honge nahin isliye baap se pavitra banne ki pratigya karni hai। kehte hain baba ham aapse varsa avashya lenge। woh kasam uthaate hain jhootha। god jiske liye kasam uthaate hain, usko to jaante nahin। woh kab kaise aata hai unka naam roop desh kaal kya hai, kuchh bhi nahin jaante। baap aakar apna parichay dete hain। abhi tumko parichay mil raha hai। duniya bhar mein koi bhi god father ko nahin jaante। bulaate bhi hain, pooja bhi karte hain parantu occupation ko nahin jaante hain। abhi tum jaante ho - parampita paramatma hamaara baap, teacher, satguru hai। yeh baap ne khud parichay diya hai ki main tumhaara baap hoon। mainne is shareer mein pravesh kiya hai। prajaapita brahma dvaara sthaapna hoti hai। kiski? braahmanon ki। phir tum brahman padhkar devta bante ho। main aakar tumko shoodra se brahman banaata hoon। baap kehte hain main aata hi hoon - kalpa ke sangamayug par। kalpa 5 hajaar varsha ka hai। yeh srishti chakra to phirta rehta hai। main aata hoon, puraani duniya ko naya banaane। puraane dharmon ka vinaash karaane phir main aadi sanaatan devi devta dharma sthaapan karta hoon। bachchon ko padhaata hoon phir tum padhkar 21 janma ke liye manushya se devta ban jaate ho। devtaayen to sooryavanshi, chandravanshi, praja sab hain। baaki purushaartha anusaar oonch pad paayenge। abhi jo jitna purushaartha karenge vahi kalpa-kalpa chalega। samajhte hain, kalpa-kalpa aisa purushaartha karte hain, aisa hi pad jaakar paayenge। yeh tum bachchon ki buddhi mein hai ki hamko niraakaar bhagwan padhaate hain। unko yaad karne se hi vikarma vinaash honge। bigar yaad kiye vikarma vinaash ho nahin sakte। manushyon ko yeh bhi pata nahin ki ham kitne janma lete hain। shaastron mein koi ne gapoda laga diya hai - 84 laakh janma। abhi tum jaante ho 84 janma hain। yeh ant ka janma hai phir hamko svarga mein jaana hai। pahle mool vatan mein jaakar phir svarga mein aayenge। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap se jo pavitra banne ki pratigya ki hai us par pakka rehna hai। kaam, krodh aadi bhooton par vijay avashya praapta karni hai।

2) chalte-phirte har kaarya karte padhaane vaale baap ko yaad rakhna hai। ab naatak poora ho raha hai isliye is antim janma mein pavitra zaroor banna hai।

vardaan:- sarva khajaanon se bharpoor ban apne chehre dvaara seva karne vaale sachche sevaadhaari bhav

jo bachche sarva khajaanon se sada sampanna va bharpoor rehte hain unke naynon va mastak dvaara eeshvareey nasha dikhaai deta hai। unka chehra hi seva karta hai। jiske paas jaasti athva kam jama hota hai to woh bhi unke chehre se dikhaai deta hai। jaise koi oonch kul ka hota hai to unke chehre se woh jhalak aur phalak dikhaai deti hai। aise aapki soorat har sankalp har karma ko spashta kare tab kahenge sachche sevaadhaari।

slogan:- samay aur sankalp ke khajaane ki bachatkar jama ka khaata badhaao।

ye avyakt ishaare - mahaan banne ke liye madhurta aur namrata ka gun dhaaran karo

jab ek do ko meetha khilaate ho usmein mukh thode samay ke liye meetha hota hai lekin svayan hi meetha ban jaao, mukh mein sada hi madhur bol rahen। jaise meetha khaane aur khilaane se khush hote ho aise madhur bol svayan ko bhi khush karte, doosre ko bhi khush kar dete। isse sada sarva ka mukh meetha karte raho, sada meethi drishti, meetha bol, meethe karma ho।