बुधवार 29 अप्रैल 2026 की दैनिक मुरली

29-04-2026 praatahmurli om shanti "baapdaada"' madhuban

“meethe bachche - patit jagat se naata tod ek baap se buddhiyog lagaao to maaya se haar nahin ho sakti''

prashn:- samartha baap saath hote hue bhi yagya mein anek vighna kyon padte hain? kaaran kya hai?

uttar:- yeh vighna to drama anusaar padne hi hain kyonki jab yagya mein asuron ke vighna paden tab to paap ka ghada bhare। ismen baap kuchh nahin kar sakte, yeh to drama mein noondh hai। vighna padne hi hain lekin vighnon se tumhein ghabraana nahin hai।

geet:- kaun hai maata, kaun pita hai…

om shanti। bachchon ne behad ke baap ka pharmaan suna। yeh jo is jagat ke mama-baba hain, yeh jo tumhaara naata hai, deh ke saath hai kyonki deh se pahle-pahle maata ki phir pita ki laagat hoti hai phir bhaai-bandhu aadi ki hoti hai। to behad ke baap ka kehna hai ki is jagat mein tumhaare jo maat-pita hain unse buddhi ka yog tod do। is jagat se naata nahin rakho kyonki yeh sab hain kaliyugi chhi-chhi naate। jagat arthaat duniya। is patit duniya se buddhi ka yog tod mujh ek se jodo aur phir naye jagat ke saath jodo, kyonki ab tumko mere paas aana hai। sirf naata jodne ki baat hai aur koi baat nahin aur koi takleeph nahin। naata jodenge woh jinko direction milta hai। satayug mein pahle naata achha hota hai, satopradhaan phir neeche utarte jaate hain। phir jo sukh ka naata hai woh aahiste-aahiste kam hota jaata hai। abhi to bilkul hi is puraani duniya se naata todna pade। baap kehte hain mere saath naata jodo। shreemat par chalo aur jo bhi deh ke naate hain woh sab chhod do। vinaash to hona hi hai। bachche jaante hain baap jisko parampita paramatma kaha jaata hai, woh bhi drama anusaar service karte hain। woh bhi drama ke bandhan mein bandhe hue hain। manushya to samajhte hain woh sarvashaktimaan hain। jaise shreekrishna ko bhi sarvashaktimaan maante hain, unko svadarshan chakra de diya hai। samajhte hain unse gala kaatte hain। parantu yeh nahin samajhte ki devtaayen hinsa ka kaam kaise karenge। woh to kar nahin sakte। devtaaon ke liye to kaha jaata hai - ahinsa parmo dharma tha। unhon mein hinsa kahaan se aai? jisko jo aaya woh baithkar likh diya hai। kitni dharma ki glaani ki hai। baap kehte hain in shaastron mein sach to bilkul aate mein namak misal hai। yeh bhi likha hua hai ki roodra gyaan yagya racha tha। usmein asur vighna daalte the। ablaaon par atyaachaar hote the। woh to theek likha hua hai। abhi tum samajhte ho - shaastron mein sach kya hai, jhooth kya hai। bhagwan khud kehte hain is roodra gyaan yagya mein vighna padenge zaroor। drama mein noondh hai। aise nahin ki paramatma saath hai to vighnon ko hata denge। ismen baap kya karenge! drama mein hone ka hi hai। yeh sab vighna daalen tab to paap ka ghada bhare na। baap samjhaate hain drama mein jo noondh hai vahi hona hai। asuron ke vighna zaroor padenge। apni raajdhaani jo sthaapan ho rahi hai। aadhaakalpa maaya ke raajya mein manushya kitna tamopradhaan buddhi, bhrashtaachaari ban jaate hain। phir unko shreshthaachaari banaana baap ka kaam hai na। aadhaakalpa lagta hai bhrashtaachaari banne mein। phir ek second mein baap shreshthaachaari banaate hain। nishchay hone mein deri thode hi lagti hai। aise bahut achhe bachche hain jinhon ko nishchay hota hai, jhat pratigya karte hain, parantu maaya bhi to pahalvaan hai na। kuchh na kuchh mansa mein toofaan laati hai। purushaartha kar karmana mein nahin aana hai। sab purushaartha kar rahe hain। karmaateet avastha to hui nahin hai। kuchh na kuchh karmendriyon se ho jaata hai। karmaateet avastha tak pahunchne mein beech mein vighna zaroor padenge। baap ne samjhaaya hai - purushaartha karte-karte ant mein jaakar karmaateet avastha hoti hai phir to is shareer ko rehna nahin hai, isliye time lagta hai। vighna kuchh na kuchh padte hain। kahaan maaya hara bhi deti hai। boxing hai na। chaahte hain baba ki yaad mein rahen, parantu rah nahin sakte। thoda bahut time jo pada hua hai, dheere-dheere woh avastha dhaaran karni hai। koi janmate hi raaja to nahin hota hai। chhota bachcha dheere-dheere bada hoga na, ismen bhi time lagta hai। ab to baaki thoda samay raha hai। saara madaar purushaartha ke oopar hai। attention dena hai, ham kaise bhi karke baap se varsa lenge zaroor। maaya ka saamna zaroor karenge isliye pratigya karte hain। maaya bhi kam nahin hai। halke se halke roop mein bhi aati hai। rustam ke saamne achha jor maarti hai। yeh baaten koi shaastron mein nahin hain। baap kehte hain ki tum bachchon ko abhi samjhaata hoon। baap dvaara tum sadgati ko pa lete ho। phir is gyaan ki darkaar hi nahin rehti। gyaan se sadgati ho jaati hai। sadgati kaha jaata hai satayug ko।

to meethe-meethe bachchon ko lakshya mila hai - yeh bhi samajhte hain drama anusaar jhaad badhne mein time to lagta hi hai। vighna to bahut padte hain। change hona padta hai। kaudi se heere jaisa banna padta hai। raat-din ka farka hai। devtaaon ke mandir abhi tak bhi banaate rehte hain। tum brahman abhi mandir nahin banaayenge kyonki woh hai bhakti maarga। duniya ko yeh pata hi nahin ki ab bhakti maarga khatma ho gyaan maarga jindaabaad hona hai। yeh sirf tum bachchon ko maaloom hai। manushya to samajhte hain kaliyug abhi bachcha hai। unhon ka saara madaar hai - shaastron par। tum bachchon ko to baap baith sabhi vedon shaastron ka raaz samjhaate hain। baap kehte hain - abhi tak tum jo padhe ho, woh sab bhool jaao। unse koi ki sadgati hoti nahin। bhal karke alpakaal ka sukh milta aaya hai। sada sukh hi sukh mile, aise ho nahin sakta। yeh hai kshan bhangur sukh। manushya duhkh mein rehte hain। manushya yeh nahin jaante ki satayug mein duhkh ka naam nishaan nahin hota hai। unhonne vahaan ke liye bhi aisi baaten bata di hain। vahaan krishnapuri mein kans tha, yeh tha..। shreekrishna ne jel mein janma liya। bahut baaten likh di hain। ab shreekrishna svarga ka pahla number prince, usne kya paap kiya? yeh hain danta kathaayen, so bhi tum abhi samajhte ho jabki baap ne sach bataaya hai। baap hi aakar sachkhanda sthaapan karte hain। sachkhanda mein kitna sukh tha, jhooth khanda mein kitna duhkh hai। yeh sab bhool gaye hain। tum jaante ho ham shreemat par sachkhanda sthaapan karke uske maalik banenge।

baap samjhaate hain, aise-aise shreemat par chalne se tum oonch pad pa sakenge। bachche yeh jaante hain hamko yeh padhaai padhkar sooryavanshi mahaaraaja mahaaraani banna hai। dil bhi sabki hoti hai oonch pad paane ki। sabka purushaartha chalta hai। achhe pakke bhakta jo hote hain woh chitra saath mein rakhte hain to ghadi-ghadi unki yaad rahegi। baba bhi kehte hain trimoorti ka chitra saath mein rakh do to ghadi-ghadi yaad aayegi। baap ko yaad karne se ham sooryavanshi gharaane mein aa jaayenge। kamre mein trimoorti ka chitra laga hua hoga to ghadi-ghadi nazar saamne padegi। baba dvaara ham is sooryavanshi gharaane mein jaayenge। savere uthte hi nazar us par jaayegi। yeh bhi ek purushaartha hai। baba raay dete hain - achhe-achhe bhagat bahut purushaartha karte hain। aankh kholne se hi shreekrishna yaad aa jaaye, isliye chitra saamne rakh dete hain। tumhaare liye to aur hi sahaj hai। agar sahaj yaad nahin aati, maaya hairaan karti hai to yeh chitra madad karenge। shivbaaba hamko brahma dvaara vishnupuri ka maalik banaate hain। ham baba se vishwa ka maalik ban rahe hain। is simran mein rahne se bhi madad bahut milegi। jo bachche samajhte hain yaad ghadi-ghadi bhool jaati hai to baba raay dete hain, chitra saamne rakh do to baap bhi aur varsa bhi yaad aayega। parantu brahma ko yaad nahin karna hai। sagaai karte hain to dalaal thode hi yaad aata hai। tum baba ko achhi reeti yaad karo to baba bhi tumko yaad karega। yaad se yaad milti hai। abhi maashuk ke occupation ka tumko pata hai। shiv ke kitne dher bhagat hain। shiv-shiv kehte rehte hain। parantu woh wrong hai - shivkaashi, vishvanaath phir ganga kah dete hain। paani ke kinaare jaakar baithte hain। yeh samajhte nahin ki gyaan ka saagar baap hai। banaaras mein bahut foreigners aadi jaate hain dekhne। bade-bade ghaat hain phir bhi sabhi ke baap ka mandir to kheenchata hai। sab unke paas jaate hain। mandir to kiske paas jaayega nahin। mandir ke devtaayen kheenchate hain। shivbaaba bhi kheenchate hain। number one hai shivbaaba phir second number mein yeh brahma, sarasvati so vishnu। vishnu so brahma। brahman so vishnupuri ke devtaayen। vishnupuri ke devtaayen so brahman। ab tumhaara dhandha yeh raha, ham so devta ban rahe hain to auron ko bhi raasta bataana hai। aur sab hain jangal mein le jaane vaale। tum jangal se nikaal bageeche mein le jaate ho। shivbaaba aakar kaanton ko phool banaate hain। tum bhi yeh dhandha karte ho। in baaton ko tum hi jaante ho। koi raaja-raani to hain nahin jinko tum samjhaao। gaaya hua hai paandavon ko 3 pair prithvi ke nahin milte the। baap samartha tha to unko vishwa ki baadshaahi de di। abhi bhi vahi part bajega na। baap hai gupta। shreekrishna ko to koi vighna pad na sake। ab baap aaye hain, baap se aakar varsa lena hai, iske liye mehnat karni hoti hai। din pratidin nai-nai points nikalti rehti hain। dekhne mein aata hai, pradarshani mein samjhaane se achha prabhaav padta hai। buddhi se kaam liya jaata hai ki pradarshani se achha prabhaav hota hai ya projector se? pradarshani mein samjhaane se chehra dekhkar samjhaaya ja sakta hai। samajhte ho geeta ka bhagwan baap hai, to baap se phir varsa lene ka purushaartha karna hai। 7 roz dena hai। likhkar do। nahin to baahar jaane se hi maaya bhula degi।

tumhaari buddhi mein aa gaya - hamne 84 ka chakra lagaaya hai, abhi jaana hai। tamopradhaan se satopradhaan banna hai। yeh chitra to saath mein hone hi chaahiye। bade achhe hain। bidla aadi bhi yeh nahin jaante ki in lakshmi-naaraayan ne yeh raajya-bhaagya kab aur kaise liya। tum jaante ho to tumko badi khushi honi chaahiye। lakshmi-naaraayan ka chitra le, jhat koi ko samjhaayenge। unhonne yeh pad kaise paaya? yeh baaten buddhi se samajhne aur samjhaane ki hain। manzil hai oonchi। jo jaisa teacher hai woh vaise hi service karte hain। dekhte hain - kaun-kaun centre sambhaal rahe hain, apni avastha anusaar। nasha to sabko hai। parantu vivek kehta hai samjhaane vaala jitna hoshiyaar hoga utna service achhi hogi। sab to hoshiyaar ho nahin sakte। sabko ek jaisa teacher mil nahin sakta। jaise kalpa pahle chala tha vaise hi chal raha hai। baap kehte hain apni avastha ko jamaate raho। kalpa-kalpa ki baaji hai। dekha ja raha hai - kalpa pahle muaaphik har ek ka purushaartha chal raha hai। jo kuchh hota hai - ham kah dete kalpa pahle bhi aise hua tha। phir khushi bhi rehti hai, shanti bhi rehti hai। baap kehte hain karma karte hue baap ko yaad karo। buddhi ka yog vahaan latka rahe to bahut kalyaan hoga, jo karega so paayega। achha karega achha paayega। maaya ki mat par sab bura hi karte aaye hain। ab milti hai shreemat। bhala karo to bhala ho। har ek apne liye mehnat karte hain। jaisa karenge vaisa paayenge। kyon na ham yog lagaate service karte rahen। yog se aayu badhegi। yaad ki yaatra se nirogi banna hai to kyon na ham baba ki yaad mein rahen! yathaartha baat hai to kyon na ham koshish karen। gyaan to bilkul sahaj hai। chhote bachche bhi samajh jaate hain aur samjhaate hain। parantu woh yogi to nahin thahre na। yeh to pakka karaana hai ki baap ko yaad karo। jo samajhte hain, ghadi-ghadi bhool jaata hai to chitra rakh den, to bhi achha hai। savere chitra ko dekhte hi yaad aa jaata hai। shivbaaba se ham vishnupuri ka varsa le rahe hain। yeh trimoorti ka chitra hi mukhya hai, jiska arth to tumne abhi samjha hai। duniya mein aise trimoorti ka chitra aur koi ke paas hai nahin। yeh to bilkul sahaj hai। ham likhen va na likhen। yeh to sabhi jaante hain brahma dvaara sthaapna, vishnu dvaara paalna। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) maaya ki boxing mein kabhi bhi haar na ho - iska dhyaan rakhna hai। kalpa pahle ki smriti se apni avastha ko jamaana hai। khushi aur shanti mein rehna hai।

2) apna bhala karne ke liye shreemat par chalna hai। is puraani duniya se naata tod dena hai। maaya ke toofaan se bachne ke liye chitron ko saamne rakh baap aur varse ko yaad karna hai।

vardaan:- manan dvaara baap ki property ko apni property banaane vaale divya buddhivaan bhav

baap dvaara jo bhi khajaana milta hai, use manan karo to andar samaata jaayega। property to sabko ek jaisi mili hui hai lekin jo manan karke use apna banaate hain, unhein uska nasha aur khushi rehti hai isliye kaha jaata hai - apni ghot to nasha chadhe। jo manan ki masti mein sada masta rehte hain unhein duniya ki koi bhi cheez, uljhan aakarshit nahin kar sakti। unhein divya buddhi ka vardaan svatah mil jaata hai।

slogan:- man ki uljhan ko samaapta karne ke liye nirnay shakti ko badhaao।

ye avyakt ishaare - mahaan banne ke liye madhurta aur namrata ka gun dhaaran karo

aise nahin samjho ki ham to sadaiv jhukte hi rehte hain lekin hamaara koi maan nahin, jo jhukte nahin va jhooth bolte hain unka hi maan hai - nahin। yeh alpakaal ka hai, lekin aap dooraadeshi buddhi rakho, yahaan jitnon ke aage jhukenge arthaat namrata ke gun ko dhaaran karenge, to saara kalpa hi sarva aatmaayen aage aage naman karengi। satayug treta mein raaja ke regard mein kaandh se nahin lekin man se jhukenge aur dvaapar kaliyug mein kaandh jhukaayenge।