मंगलवार 28 अप्रैल 2026 की दैनिक मुरली

28-04-2026 praatahmurli om shanti "baapdaada"' madhuban

“meethe bachche - baap samaan lovely banne ke liye apne ko aatma bindu samajh bindu baap ko yaad karo''

prashn:- yaad mein rahne ki gupta haddi mehnat har ek bachche ko karni hai - kyon?

uttar:- kyonki yaad ke bigar aatma, paap aatma se punya aatma nahin ban sakti। jab gupta yaad mein rahe, dehi-abhimaani banen, tab vikarma vinaash hon। dharmaraaj ki sajaaon se bachne ka saadhan bhi yaad hai। maaya ke toofaan yaad mein hi vighna daalte hain isliye yaad ki gupta mehnat karo tabhi lakshmi-naaraayan jaisa lovely ban sakenge।

geet:- om namo shivaae…

om shanti। yeh mahima hai sabke baap ki। yaad kiya jaata hai bhagwan arthaat baap ko, unhein maat-pita kehte hain na। god father bhi kaha jaata hai। aise nahin sab manushyon ko god father kahenge। baba to unko (laukik baap ko) bhi kehte hain। laukik baap jisko kehte hain woh bhi phir paarlaukik baap ko yaad karte hain। vaastav mein yaad karne vaali aatma hai, jo laukik baap ko bhi yaad karti hai। woh aatma apne roop ko, occupation ko nahin jaanti hai। aatma apne ko hi nahin jaanti to god father ko kaise jaanegi। apne laukik father ko to sab jaante hain, unse varsa milta hai। nahin to yaad kyon karen। paarlaukik baap se zaroor varsa milta hoga। kehte hain O god father। unse raham, kshama maagenge kyonki paap karte rehte hain। yeh bhi drama mein noondh hai। parantu aatma ko jaanna aur phir paramatma ko jaanna, yeh difficult subject hai। easy te easy aur difficult te difficult। bhal kitna bhi science aadi seekhte hain, jisse moon tak chale jaate hain। to bhi is knowledge ke aage woh tuchchha hai। apne ko aur baap ko jaanna bada mushkil hai। jo bhi bachche apne ko brahmaakumaar-kumaari kahlaate hain, woh bhi apne ko aatma nishchay karen। main aatma bindi hoon, hamaara baap bhi bindi hai - yeh bhool jaate hain। yeh hai difficult subject। apne ko aatma bhi bhool jaate to baap ko yaad karna bhi bhool jaate। dehi-abhimaani banne ka abhyaas nahin hai। aatma bindi hai, unmein hi 84 janmon ka part noondha hua hai। jo main aatma bhinna-bhinna shareer le part bajaati hoon, yeh ghadi-ghadi bhool jaata hai। mukhya baat yahi samajhne ki hai। aatma aur paramatma ko samajhne ke sivaae baaki knowledge to sabki buddhi mein aa jaata hai। ham 84 janma lete hain, sooryavanshi, chandravanshi ... bante hain। yeh chakra to bahut sahaj hai। samajh jaate hain। parantu sirf chakra ko jaanne se itna phaayda nahin hai, jitna apne ko aatma nishchay kar baap ko yaad karne mein phaayda hai। main aatma star hoon। phir baap bhi star ati sookshm hai। vahi sadgati daata hai। unko yaad karne se hi vikarma vinaash hone hain। is tareeke se koi bhi nirantar yaad nahin karte। dehi-abhimaani nahin bante hain। ghadi-ghadi yeh yaad rahe main aatma hoon। baap ka pharmaan hai mujhe yaad karo to vikarma vinaash honge। main bindi hoon। yahaan paartadhaari aakar bana hoon। mere mein 5 vikaaron ki kat chadhi hui hai। iron ez mein hain। ab golden ez mein jaana hai isliye baap ko bahut pyaar se yaad karna hai। is reeti baap ko yaad karenge tab kat nikal jaayegi। yeh hai mehnat। service ki labaar to bahut maarte hain। aaj yeh service ki, bahut prabhaavit hue parantu shivbaaba samajhte hain aatma aur paramatma ke gyaan par kuchh bhi prabhaavit nahin hua। bhaarat heaven aur hell kaise banta hai। 84 janma kaise lete hain, sato rajo tamo mein kaise aate hain। sirf yeh sunkar prabhaavit hote hain। paramatma niraakaar hai, yeh bhi samajh jaate hain। baaki main aatma hoon, mere mein 84 janmon ka part bhara hua hai। baap bhi bindi hai, unmein saara gyaan hai। unko yaad karna hai। yeh baaten koi bhi samajhte nahin। mukhya baat samajhte nahin hain। world ki history-geography ki knowledge baap hi dete hain। government bhi chaahti hai ki world ki history-geography honi chaahiye। yeh to unse bhi sookshm baaten hain। aatma kya hai, unmein kaise 84 janmon ka part hai। woh bhi avinaashi hai। yeh yaad karna, apne ko bindi samajhna aur baap ko yaad karna jisse vikarma vinaash hon - is yog mein koi bhi tatpar nahin rehte hain। is yaad mein rahen to bahut lovely ho jaaen। yeh lakshmi-naaraayan dekho kitne lovely hain। yahaan ke manushya to dekho kaise hain। khud bhi kehte hain hamaare mein koi gun naaheen। ham jaise malechchha hain, aap svachchha hain। jab apne ko aatma nishchay kar baap ko yaad karen tab saphalta mile। nahin to saphalta bahut thodi milti hai। samajhte hain hamaare mein bahut achha gyaan hai। world ki history-geography ham jaante hain। parantu yog ka chart nahin bataate hain। mushkil koi hain jo is avastha mein rehte hain arthaat apne ko aatma samajh baap ko yaad karte hain। bahuton ko abhyaas nahin hai। baba samajhte hain ki bachche sirf gyaan ka chakra buddhi mein phiraate hain। baaki main aatma hoon, baba se hamko yog lagaana hai, jisse iron ez se nikal golden ez mein jaayenge। mujh aatma ko baap ko jaanna hai, uski yaad mein hi rehna hai, yeh bahuton ka abhyaas kam hai। bahut aate bhi hain। achha-achha bhi kehte hain। baaki unko yeh pata nahin padta ki andar kitni kat lagi hui hai। sundar se shyaam ban gaye hain। phir sundar kaise bane? yeh koi bhi nahin jaante hain। sirf history-geography jaanne ka kaam nahin hai। paavan kaise banen? saja na khaane ka upaay hai - sirf yaad mein rehna। yog theek nahin hoga to dharmaraaj ki sazaayen khaayenge। yeh bahut badi subject hai, jisko koi utha nahin sakte। gyaan mein apne ko miyaan mitthu samajh baithte hain, ismen koi shak nahin। mool baat hai yog ki। yog mein bahut kachche hain isliye baap kehte hain khabardaar raho, sirf pandit nahin banna hai। main aatma hoon, mujhe baap ko yaad karna hai। baap ne pharmaan diya hai - manamnaabhav। yeh hai mahaamantra। apne ko star samajh baap ko bhi star samjho phir baap ko yaad karo। baap ka koi bada roop nahin saamne aata hai। to dehi-abhimaani banne mein hi mehnat hai। vishwa ke mahaaraaja mahaaraani ek bante hain, jinki laakhon praja banti hai। praja to bahut hai na। history-geography ko jaanna to sahaj hai parantu jab apne ko aatma samajh baap ko yaad karenge tab paavan banenge। yeh abhyaas bada difficult hai। yaad karne baithenge to bahut toofaan vighna daalenge। koi aadha ghanta bhi ekras ho baithe, bada mushkil hai। ghadi-ghadi bhool jaayenge। ismen sachchi-sachchi gupta mehnat hai। chakra ka raaz jaanna sahaj hai। baaki dehi-abhimaani ho baap ko yaad karna, yeh mushkil koi samajhte hain aur us act mein aate hain। baap ki yaad se hi tum paavan banenge। nirogi kaaya, badi aayu milegi। sirf world ki history-geography samjhaane se maala ka daana nahin ban sakte। daana banenge yaad se। yeh mehnat koi se pahunchti nahin hai। khud bhi samajhte hain ki ham yaad mein nahin rehte। achhe-achhe mahaarthi is baat mein dheele hain। mukhya baat samjhaana aata hi nahin hai। yeh baat hai bhi mushkil। kalpa ki aayu inhonne badi kar di hai। tum 5 hajaar varsha siddha karte ho। parantu aatma-paramatma ka raaz kuchh bhi nahin jaante hain, yaad hi nahin karte hain isliye avastha dagamgaati rehti hai। deh-abhimaan bahut hai। dehi-abhimaani banen tab maala ka daana ban saken। aise nahin world ki history-geography samjhaate hain isliye ham maala mein najdeek aa jaayenge, nahin। aatma itni chhoti hai, ismen 84 janmon ka part bhara hua hai। is baat ko pahle-pahle buddhi mein laana hai, phir chakra ko yaad karna hai। mool baat hai yog ki। yogi avastha chaahiye। paap aatma se punya aatma banna hai। aatma pavitra hogi yog se। yogbal vaale hi dharmaraaj ke dandon se bach sakte hain। yeh mehnat badi mushkil koi se hoti hai। maaya ke toofaan bhi bahut aayenge। yeh bahut haddi gupta mehnat hai। lakshmi-naaraayan banna maasi ka ghar nahin hai। yeh abhyaas ho jaae to chalte phirte baap ki yaad aati rahe, isko hi yog kaha jaata hai। baaki yeh gyaan ki baaten to chhote-chhote bachche bhi samajh jaayenge। chitron mein sab yug aadi lage hue hain। yeh to common hai। jab koi bhi kaarya shuru karte hain to svaastika lagaate hain। yeh nishaani hai satayug, treta... ki baaki oopar mein hai chhota-sa sangamayug। to pahle apne ko aatma samajh baap ko yaad karte rahenge tab hi woh shanti phail sakti। yog se vikarma vinaash honge। saari duniya is baat mein bhooli hui hai aatma aur paramatma ke baare mein, koi kehte paramatma hajaaron sooryon se tejomay hai, parantu yeh ho kaise sakta। jabki kehte hain - aatma so paramatma phir to donon ek hue na। chhote bade ka pharka nahin pad sakta। is par bhi samjhaana hai। aatma ka roop bindi hai। aatma so paramatma hai to paramatma bhi bindi thahra na। ismen pharka to ho na sake। sab paramatma ho jaaen to sab creator ho jaaen। sarva ki sadgati karne vaala to ek baap hai na। baaki to har ek ko apna part mila hua hai। yeh buddhi mein bithaana pade, samajh ki baat hai। baap kehte hain mujhe yaad karo to kat nikal jaayegi। yeh mehnat hai। ek to aadhaakalpa deh-abhimaani ho rahe ho। satayug mein dehi-abhimaani rehte bhi baap ko nahin jaante। gyaan ko nahin jaante। is samay jo tumko knowledge milti hai woh knowledge gum ho jaati hai। vahaan sirf itna jaante hain ki ham aatma ek shareer chhodkar doosra lete hain। part bajaate hain। ismen phikar ki kya baat hai। har ek ko apna-apna part bajaana hai। rone se kya hoga? yeh samjhaaya jaata hai agar kuchh samjhen to shanti aa jaae। khud samjhenge to auron ko bhi samjhaayenge। bujurga log samjhaate bhi hain, rone se kya vaapis thode hi aayenge। shareer chhod aatma nikal gai, ismen rone ki kya baat hai। agyaankaal mein bhi aise samajhte hain। parantu woh yeh thode hi jaante hain ki aatma aur paramatma kya cheez hai। aatma mein khaad padi hai, woh to samajhte aatma nirlep hai। to yeh bahut maheen baaten hain। baba jaante hain bahut bachche yaad mein rehte nahin hain। sirf samjhaane se kya hoga। bahut prabhaavit hua, parantu isse uska koi kalyaan thode hi hua। aatma-paramatma ki pahchaan mile tab samjhen barobar ham unke bachche hain। baap hi patit-paavan hai। hamko aakar duhkh se chhudaata hai। woh bhi bindi hai। to baap ko nirantar yaad karna pade। baaki history-geography jaanna koi badi baat nahin hai। bhal samajhne liye aate hain parantu is avastha mein tatpar rahe ki main aatma hoon, ismen hi mehnat hai। aatma paramatma ki baat to tumko bhi baap hi aakar samjhaate hain। srishti ka chakra to sahaj hai। jitna ho sake uthte baithte dehi-abhimaani banne ki mehnat karni hai। dehi-abhimaani bahut shant rehte hain। samajhte hain mujhe silence mein jaana hai। niraakaari duniya mein jaakar viraajmaan hona hai। hamaara part abhi poora hua। baap ka roop chhota bindi samjhenge। woh koi bada ling nahin hai। baba bahut chhota hai। vahi knowledgeful, sarva ke sadgati daata hain। main aatma bhi knowledgeful ban raha hoon। aisa chintan jab chale tab oonch pad pa saken। duniya bhar mein koi aatma aur paramatma ko nahin jaante।

tum braahmanon ne ab jaana hai। sannyaasi bhi nahin jaante। na aakar samjhenge। woh to sab apne-apne dharmon mein hi aane vaale hain। hisaab-kitaab chuktu kar chale jaayenge। tumko hi yeh mehnat karne se baap se varsa milega। ab phir dehi-abhimaani banna hai। dil to aatma mein hai na। aatma ko hi dil baap se lagaana hai। dil shareer mein nahin hai। shareer ke to sab sthool organs hain। dil ko lagaana yeh aatma ka kaam hai। apne ko aatma samajh phir paramatma baap se dil lagaani hai। aatma bahut sookshm hai। kitni chhoti sookshm aatma, part kitna bajaati hai। yeh hai kudrat। itni chhoti cheez mein kitna avinaashi part bhara hua hai। woh kabhi mitne vaala nahin hai। bahut sookshm hai। tum koshish karenge to bhi badi cheez yaad aa jaayegi। main aatma chhota star hoon to baap bhi chhota hai। tum bachchon ko pahle-pahle mehnat yeh karni hai। itni chhoti si aatma hi is samay patit bani hai। aatma ko paavan banaane ka pahle-pahle yeh upaay hai। padhaai padhni hai। baaki khelna, koodna to alag baat hai। khelne ka bhi ek hunar hai। padhaai se martaba milta hai। khel kood se martaba nahin milta hai। khel aadi ki department alag hoti hai। unse gyaan va yog ka connection nahin hai। yeh bhog aadi lagaana bhi khel hai। mukhya baat hai yaad ki। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dharmaraaj ki sajaaon se bachne ke liye yaad ki gupta mehnat karni hai। paavan banne ka upaay hai apne ko aatma bindi samajh bindu baap ko yaad karna।

2) gyaan mein apne aapko miya mitthu nahin samajhna hai, ekras avastha banaane ka abhyaas karna hai। baap ka jo pharmaan hai use paalan karna hai।

vardaan:- har karma karte hue kamal aasan par viraajmaan rahne vaale sahaj va nirantar yogi bhav

nirantar yogayukta rahne ke liye kamal pushpa ke aasan par sada viraajmaan raho lekin kamal aasan par vahi sthit rah sakte hain jo light hain। kisi bhi prakaar ka bojh arthaat bandhan na ho। man ke sankalpon ka bojh, sanskaaron ka bojh, duniya ke vinaashi cheezon ki aakarshan ka bojh, laukik sambandhiyon ki mamta ka bojh - jab yeh sab bojh khatma hon tab kamal aasan par viraajmaan nirantar yogi ban sakenge।

slogan:- sahansheelta ka gun dhaaran kar lo to asatyata ka sahaara nahin lena padega।

ye avyakt ishaare - mahaan banne ke liye madhurta aur namrata ka gun dhaaran karo

kiske sanskaar saral, madhur hote hain to woh sanskaar swaroop mein aate hain। jab sanskaar baapdaada ke samaan ban jaayenge to baapdaada ke swaroop sabhi ko dekhne mein aayenge। jaise baapdaada vaise hoobhu vahi gun, vahi kartavya, vahi bol, vahi sankalp anubhav honge। sabhi ke mukh se niklega yeh to vahi lagte hain।