गुरुवार 7 मई 2026 की दैनिक मुरली

07-05-2026 praatahmurli om shanti "baapdaada"' madhuban

“meethe bachche - tum brahma mukh vanshaavli brahman ho, tumhein hi baap dvaara gyaan ka teesra netra mila hai, tum abhi eeshvareey god mein ho''

prashn:- advait raajya, jahaan doosra koi dharma nahin, us raajya ki sthaapna ka aadhaar kya hai?

uttar:- yogbal। baahubal se kabhi bhi advait raajya ki sthaapna ho nahin sakti। vaise Christian ke paas itni shakti hai jo agar aapas mein mil jaaen to saare vishwa par raajya kar sakte hain, parantu yeh law nahin kehta। vishwa par ek raajya ki sthaapna karna baap ka hi kaam hai।

geet:- chhod bhi de aakaash sinhaasan…

om shanti। bachchon ko om shanti ka arth to bahut hi baar samjhaaya hai। om yaani main kaun? main aatma। yeh shareer hamaare organs hain। main aatma paramdham ki rahne vaali hoon। bhaaratvaasi pukaarte hain ki he door desh ke rahne vaale aao kyonki bhaarat mein abhi bahut dharma glaani, duhkh ho pada hai। aap phir se aakar geeta ka updesh sunaao। geeta ke liye hi kehte hain - shivbaaba aaiye kyonki woh sabka baap hai। kehte hain bhaaratvaasiyon par phir se parchhaaya pada hai, maaya roopi raavan ka, isliye sab duhkhi patit hain। pukaarte hain - roop badalkar aaiye arthaat manushya ke roop mein aaiye। to manushya roop mein aata hoon। mera aana divya alaukik hai। main garbha mein nahin aata hoon, main aata hi hoon saadhaaran boodhe tan mein।

tum bachche jaante ho - main kalpa-kalpa apna niraakaari roop badalkar aata hoon। gyaan ka saagar to parampita paramatma hi hai। shreekrishna ko kabhi bhi nahin kahenge। baap kehte hain main is saadhaaran tan mein aakar tumko phir se sahaj raajayog sikha raha hoon। jab duniya patit ban jaati hai tab mujhe aana padta hai। kaliyug se satayug banaane main aata hoon। brahma, vishnu, shankar ka chitra bhi hai। brahma dvaara sthaapna, shankar dvaara vinaash aur phir vishnu dvaara paalna। yeh lakshmi-naaraayan, vishnu ke do roop hain। yeh tum bachche jaante ho। baba phir se roop badalkar aaya hai। woh hamaara supreme baap bhi hai, supreme teacher bhi hai, supreme guru bhi hai aur guru logon ko supreme nahin kaha jaata hai। yeh to baap, teacher, guru teenon hain। laukik baap to bachche ki paalna kar phir unko school mein bhej dete hain। koi virla hoga jo baap teacher bhi hoga। yeh koi kah na sake। sab aatmaayen mujhe pukaarti hain, god father kehti hain to woh aatma ka father ho gaya। yeh geet bhi bhakti maarga ka hai। satayug mein to maaya hoti hi nahin, jo pukaarna pade। vahaan to sukh hi sukh hai। tum jaante ho 5 hajaar varsha ka chakra hai। aadhaakalpa satayug-treta din, aadhaakalpa dvaapar-kaliyug raat। tum brahma mukh vanshaavli brahman ho। brahma ka athva tum braahmanon ka hi raat-din gaaya jaata hai। din aur raat ka gyaan bhi tum bachchon ko hai। lakshmi-naaraayan ko yeh gyaan nahin। abhi tum sangam par ho, jaante ho abhi bhakti maarga poora ho, din uday hota hai। yeh gyaan abhi tumko baap dvaara mila hai। kaliyug mein va satayug mein yeh gyaan kisko bhi hota nahin, isliye gaaya jaata hai - brahma ka din, brahma ki raat। tum abhi sooryavanshi-chandravanshi raajya paane ka purushaartha kar rahe ho। phir aadhaakalpa ke baad tum raajya ganvaate ho। yeh gyaan tum braahmanon ke sivaae koi ko nahin hai। tum devtaayen ban jaayenge phir yeh gyaan rahega nahin। abhi hai raatri। shiv raatri bhi gaai jaati hai। shreekrishna ki bhi raatri kehte hain parantu uska arth nahin samajhte। shiv ki jayanti arthaat shiv ka reincarnation hota hai। aise baap ka divas kam se kam ek maas manaana chaahiye। jo saari srishti ko patit se paavan banaate hain, unka holy de bhi nahin manaate hain। baap kehte hain main sabka liberator hoon, guide ban sabko le jaata hoon।

abhi tum purushaartha karte ho - raajayog seekhne ka। baap tumko gyaan ka teesra netra de rahe hain। aatma ka roop kya hai - yeh bhi kisko pata nahin hai। baap kehte hain tum aatma na angushthe misal ho, na akhanda jyoti misal ho। tum to star ho, bindi misal। main bhi aatma bindi hoon, parantu main punarjanma mein nahin aata hoon। meri mahima hi alag hai, main supreme hone ke kaaran janma-maran ke chakra mein nahin aata hoon। tum aatmaayen shareer mein aati ho। to 84 janma leti ho, main is shareer mein pravesh karta hoon। yeh loan liya hua hai। baap samjhaate hain - tum bhi aatma ho। parantu tum apne ko realise nahin karte ho ki ham aatma hain, aatma hi baap ko yaad karti hai। duhkh mein hamesha yaad karte hain, he bhagwan, he merciful baba raham karo। raham maangate ho kyonki woh baap hi knowledgeful, blissful, purity full hai। gyaan mein bhi full hai। gyaan ka saagar hai। manushya ko yeh mahima de nahin sakte hain। saari duniya par bliss karna, yeh baap ka hi kaam hai। woh hai rachayita, baaki sab hain rachna। creator rachna ko create karte hain। pahle stri ko adopt karte hain, phir unke dvaara rachna rachte hain, phir unki paalna bhi karte hain, vinaash nahin karte। yeh behad ka baap aakar sthaapna-paalna-vinaash karaate hain। aadi sanaatan devi-devta dharma ki paalna karaate hain। satayug aadi mein phat se raajdhaani sthaapan ho jaati hai aur dharma vaale to sirf apna-apna dharma sthaapan karte hai phir jab laakhon, karodon ki andaaj mein vriddhi ho jaati hai, tab raajaai hoti hai। abhi tum raajdhaani sthaapan kar rahe ho। yogbal se tum saare vishwa ke maalik bante ho, baahubal se kabhi koi vishwa par raajaai kar nahin sakta। baba ne samjhaaya hai, Christian mein itni taakat hai, woh aapas mein mil jaaen to saare vishwa par raajya kar sakte hain। parantu baahubal se vishwa par raajya paayen, yeh law nahin kehta। drama mein yeh kaayda nahin hai, jo baahubal vaale vishwa ke maalik banen।

baap samjhaate hain - vishwa ki baadshaahi yogbal se mere dvaara hi mil sakti hai। vahaan koi partition nahin hai। dharti, aakaash sab tumhaare honge। tumko koi touch nahin kar sakta। unko kaha jaata hai advait raajya। yahaan hain anek raajya। baap samjhaate hain - 5 hajaar varsha baad tum bachchon ko yeh raajayog sikhaata hoon। shreekrishna ki aatma ab seekh rahi hai। shreekrishna pahla number prince tha। woh is samay 84 janma ke ant mein aakar brahma bane hain। yeh bachchon ko samjhaaya hai, srishti ka chakra kaise phirta hai। baap phir se svarga ki sthaapna kar rahe hain। anek dharma vinaash hone hain zaroor। ek dharma ki sthaapna ho jaayegi। bhaarat hi 100 percent solvent, dharma shreshtha tha। devtaaon ke karma bhi shreshtha the। unhon ki hi mahima gaai hui hai - sarvagun sampanna... pahle-pahle pavitra the, abhi patit bane hain phir baap aakar stri-purush donon ko pavitra banaate hain। rakshaabandhan ka utsav itna kyon manaate hain - yeh koi ko pata nahin hai। baap ne hi aakar pratigya li thi ki antim janma mein tum donon pavitra raho। sannyaasiyon ka to dharma hi alag hai। gyaan, bhakti aur vairaagya - yeh tumhaare liye hai। tumne dekha hoga - paadri log chalte hain to aankhen ek taraph rehti hain aur kisi ki taraph dekhte nahin। nuns hoti hain na। ab woh to Christ ko yaad karti hain। kehte hain - Christ god ka bachcha tha। tumhaara koi saphed kapde aadi se connection nahin hai। tum to aatma ho। none but one, ek ko hi yaad karna hai। sachchi nuns to tum ho, tumko varsa us baba se milna hai, unko yaad karenge tab hi vikarma vinaash honge isliye baap ka pharmaan hai - maamekam yaad karo। aatma ka nishchay na hone kaaran nuns phir Christ ko yaad karti hain। god kaun hai - yeh nahin jaante hain। bhaaratvaasi jo pahle-pahle aate hain, vahi nahin jaante hain। lakshmi-naaraayan ko yeh srishti ka gyaan thode hi hai, na woh trikaaldarshi hain। trikaaldarshi tum brahman bante ho। tumko kaudi se badal heere jaisa baap banaate hain। ab tum eeshvareey god mein ho। tumhaara yeh antim janma bahut amoolya hai। bhaarat ki khaas, duniya ki aam tum roohaani seva karte ho। baaki woh to hain jismaani social workers, tum ho roohaani। tumko sikhaane vaala supreme rooh hai। har ek aatma ko bolo - baap ko yaad karo। baap ko hi patit-paavan gaaya jaata hai। tumko girne mein 84 janma lagte hain, phir chadhne mein ek second lagta hai। yeh tumhaara is mrityulok ka antim janma hai, mrityulok murdaabaad, amarlok jindaabaad hona hai। isko amar katha kaha jaata hai। amar baba aakar tum amar aatmaon ko amar yug mein le chalne ke liye amar katha sunaate hain। baap kehte hain - achha aur baaten bhool jaate ho to sirf apne ko aatma nishchay kar mujh ek baap ko yaad karo। buddhi ka yog mere saath lagaao to tumhaare paap bhasma hon aur tum punya-aatma ban jaayenge। tum manushya se devta bante ho, yeh nai baat nahin hai। 5 hajaar varsha baad baap aakar tumko varsa dete hain, raavan phir shraap dete hain - yeh hai khel। bhaarat ki hi kahaani hai। yeh baaten baap hi samjhaate hain, koi bhi ved-shaastra aadi mein nahin hain isliye god father ko hi knowledgeful, peaceful, blissful kaha jaata hai। tumko bhi aap samaan banaate hain। tum bhi poojya the phir pujaari bante ho, aapehi poojya, aapehi pujaari। yeh bhagwan ke liye nahin hai। tum bhaaratvaasiyon ki baat hai, tum pahle sirf ek shiv ki bhakti karte the। avyabhichaari bhakti ki phir devtaaon ki bhakti shuru ki, phir neeche utarte aaye। ab phir se tum devi-devta ban rahe ho, jo thoda padhte hain woh praja mein chale jaayenge। jo achhi reeti padhte-padhaate hain, woh raajaai mein aayenge। praja to dher banti hai। ek mahaaraaja ki laakhon karodon ke andaaj mein praja hogi। tum purushaartha karte hi ho kalpa pahle muaaphik। purushaartha se pata pad jaata hai ki maala mein kaun-kaun aane vaale hain। praja mein bhi koi gareeb, koi saahookaar bante hain। bhakti maarga mein eeshvar arth daan karte hain। kyon eeshvar ke paas nahin hai kya? ya to kehte hain, shreekrishna arpanam। parantu vaastav mein hota hai eeshvar arpanam, manushya jo kuchh karte hain unka phal doosre janma mein milta hai। ek janma ke liye mil jaata hai। ab baap kehte hain - main aaya hoon, tumko 21 janma ka varsa dene। mere arth direct kuchh bhi karte ho to 21 janma ke liye uski praapti tumko ho jaati hai। indirect karte ho to ek janma ke liye alpakaal ka sukh mil jaata hai। baap samjhaate hain yeh tumhaara sab mitti mein mil jaana hai, isliye isko saphal kar lo। tum yeh roohaani hospital kam university kholte jaao, jahaan se sab ever healthy, ever wealthy banenge, inse bahut income hoti hai। yog se health aur chakra ko jaanne se wealth। to ghar-ghar mein aisi university kam hospital kholte jaao। bada aadmi hai to bada khole, jahaan bahut aa saken। board par likh do। jaise nature-cure vaale likhte hain। baap saari duniya ki nature badal pure bana dete hain। is samay sabhi impure hain। saari duniya ko ever healthy, ever wealthy banaane vaala baap hai, jo ab tum bachchon ko padha rahe hain। tum ho most sweet children। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni is amoolya jeevan ko roohaani seva mein lagaana hai। khaas bhaarat, aam saari duniya ki seva karni hai।

2) apna sab kuchh saphal karne ke liye direct eeshvar arth arpan karna hai। roohaani hospital aur university kholni hai।

vardaan:- ekras sthiti dvaara ateendriy sukh ki anubhooti karne vaale sarva aakarshanon se mukta bhav

jab indriyon ki aakarshan aur sambandhon ki aakarshan se mukta bano tab ateendriy sukh ki anubhooti kar sakenge। koi bhi karmandriy ke vash hone se jo bhinna-bhinna aakarshan hote hain woh ateendriy sukh va harsha dilaane mein bandhan daalte hain। lekin jab buddhi sarva aakarshanon se mukta ho ek thikaane par tik jaati hai, halchal samaapta ho jaati hai tak ekras avastha banne se ateendriy sukh ki anubhooti hoti hai।

slogan:- apne buddhi ki line sada clear rakho to ek do ke man ke bhaavon ko jaan lenge।

ye avyakt ishaare - sada achal, adol, ekras sthiti ka anubhav karo

kisi bhi prakaar ki halchal mein achal rehna, yahi shreshtha brahman aatmaon ki nishaani hai। duniya halchal mein ho lekin aap shreshtha aatmaayen halchal mein nahin aa sakti। kyon? drama ki har scene ko jaante ho। knowledgeful aatmaayen, power-full aatmaayen sada svatah hi achal rehti hain। to kabhi vaayumandal se ghabraao nahin, sada nirbhay raho।