सोमवार 11 मई 2026 की दैनिक मुरली

11-05-2026 praatahmurli om shanti "baapdaada"' madhuban

“meethe bachche - baba aaye hain, aap bachchon ko apne samaan mahima laayak banaane, baap ki jo mahima hai woh abhi tum dhaaran karte ho''

prashn:- bhaktimaarga mein paramatma maashook ko poora na jaante bhi kaun se shabd bahut pyaar se bolte aur yaad karte hain?

uttar:- bahut pyaar se kehte aur yaad karte hain he maashook tum jab aayenge to ham sirf aapko hi yaad karenge aur sabse buddhiyog tod aapke saath jodenge। ab baap kehte hain bachche, main aaya hua hoon to dehi-abhimaani bano। tumhaara pahla farja hai - pyaar se baap ko yaad karna।

om shanti। meethe-meethe jeev ki aatmaon ko, parampita paramatma (jisne ab shareer ka loan liya hai) baith samjhaate hain ki main saadhaaran boodhe tan mein aata hoon। aakar bahut bachchon ko padhaata hoon। brahma mukh vanshaavli brahman bachchon ko hi samjhaayenge। zaroor mukh dvaara hi samjhaayenge aur kisko samjhaayenge। kehte hain - bachche, tum mujhe bhakti maarga mein bulaate aaye ho - he patit-paavan, bhaarat khaas aur duniya mein aam sab bulaate hain। bhaarat hi paavan tha, baaki sab shantidham mein the। bachchon ko yeh smriti mein rakhna chaahiye ki satayug-treta kisko kaha jaata hai, dvaapar-kaliyug kisko kaha jaata hai। unmein kaun-kaun raajya karte the, tumhaari buddhi mein poori knowledge hai। jaise baap ko rachna ke aadi-madhya-ant ka gyaan hai, vaise tumhaari buddhi mein bhi hai। baap jo gyaan dete hain woh bachchon mein bhi zaroor hona chaahiye। baap aakar bachchon ko aap samaan banaate hain। jitni baap ki mahima hai utni bachchon ki hai। baap ne bachchon ko jaasti mahimaavaan banaaya hai। hamesha samjho ki shivbaaba in dvaara sikhaate hain। aatma hi ek-do se baat karti hai। parantu manushya deh-abhimaani hone ke kaaran samajhte hain, phalaana padhaata hai। vaastav mein karti sab kuchh aatma hai। aatma hi part bajaati hai। dehi-abhimaani banna hai। ghadi-ghadi apne ko aatma samajhna hai। jab tak apne ko aatma nahin samjhenge to baap ko bhi yaad nahin kar sakenge। bhool jaate hain। tumse poochha jaata hai - tum kiske bachche ho? to kehte ho ham shivbaaba ke bachche hain। visitor book mein bhi likha hua hai - tumhaara baap kaun hai? to jhat deh ke baap ka naam bataayenge। achha - ab dehi ke baap ka naam bataao। to koi shreekrishna ka, koi hanoomaan ka naam likhenge ya to likhenge - ham nahin jaante। are, tum laukik baap ko jaante ho aur paarlaukik baap jinko tum hamesha duhkh mein yaad karte ho, unko nahin jaante ho! kehte bhi hain, he bhagwan raham karo। he bhagwan ek bachcha do। maangate ho na। ab baap bilkul sahaj baat bataate hain। tum deh-abhimaan mein bahut rehte ho isliye baap ke varse ka nasha nahin chadhta hai। tumko to bahut nasha chadhna chaahiye। bhakti karte hi hain - bhagwan se milne ke liye। yagya, tap, daan-punya aadi karna yeh sab bhakti hai। sab ek bhagwan ko yaad karte hain। baap kehte hain - main tumhaara patiyon ka pati hoon, baapon ka baap hoon। sab baap bhagwan ko yaad zaroor karte hain। aatmaayen hi yaad karti hain। bhal kehte bhi hain, bhrakuti ke beech mein chamakta hai ajab sitaara… parantu yeh bigar samajh ke aise hi kah dete hain। rahasya ka kuchh bhi pata nahin। tum aatma ko hi nahin jaante ho to aatma ke baap ko kaise jaan sakenge। deedaar to hota hai bhakti maarga vaala। bhakti maarga mein pooja ke liye bada-bada ling rakh dete hain kyonki agar bindi ka roop dikhaayen to koi samajh na sake। yeh hai maheen baat। paramatma jisko akhanda jyoti swaroop kehte hain, manushya kehte hain unka koi bahut bada roop hai। brahm samaaji math vaale jyoti ko paramatma kehte hain। duniya mein yeh kisko pata nahin hai ki parampita paramatma bindi hai, to moonjh pade hain। bachche bhi kehte hain, baba kisko yaad karen। hamne to suna tha woh bada ling hai, unko yaad kiya jaata hai। ab bindi ko kaise yaad karen? are tum aatma bhi bindi ho, baap bhi bindi hai। aatma ko bulaate hain, woh zaroor yahaan hi aakar baithenge। bhakti maarga mein jo saakshaatkaar aadi hota hai, yeh hai sab bhakti। bhakti bhi ek ki nahin karte, bahuton ko bhagwan bana diya hai। bhagat jo bhakti karte rehte hain, unko bhagwan kaise kahenge। agar paramatma sarvavyaapi kehte hain to phir bhakti kiski karte hain। so bhi bhinna prakaar ki bhakti karte hain।

baap samjhaate hain - bachche, aise mat samjho ki hamko anek varsha jeena hai। abhi samay bahut najdeek hota jaata hai। nishchay rakhna hai, baba ko brahma dvaara sthaapna karaani hai। baap khud kehte hain - main is dvaara tumko srishti ke aadi-madhya-ant ka raaz bataata hoon। gaate bhi hain - brahma dvaara sthaapna। yeh nahin jaante ki nai duniya ko vishnupuri kaha jaata hai arthaat vishnu ke do roop raajya karte the। kisko pata nahin hai ki vishnu kaun hai। tum jaante ho ki yeh brahma-sarasvati hi phir vishnu ke do roop lakshmi-naaraayan ban paalna karte hain। brahma dvaara sthaapna, vishnupuri arthaat svarga ki phir paalna karenge। tumhaari buddhi mein aana chaahiye - baap gyaan ka saagar hai। manushya srishti ka beejroop hai। woh is drama ke aadi-madhya-ant ko jaante hain। vahi patit-paavan hai, jo baap ka dhandha hai, vahi tumhaara hai। tum bhi patit se paavan banaate ho। duniya mein ek baap ke 3-4 bachche honge, koi bachcha bahut ooncha chadha hua hoga, koi bilkul neeche hoga। yahaan tumko baap ek hi dhandha sikhaate hain ki tum patiton ko paavan banaao। sabko yeh lakshya do ki shivbaaba kehte hain - mujhe yaad karo। geeta mein shreekrishna bhagvaanuvaach likh diya hai। tumko samjhaana hai - bhagwan to niraakaar, punarjanma rahit hai। bas yahi bhool hai। abhi tum bachche shreekrishnapuri ke maalik ban rahe ho। koi raajdhaani mein aate hain, koi praja mein। shreekrishnapuri kaha jaata hai kyonki shreekrishna sabhi ko bahut hi pyaara hai। bachche pyaare lagte hain na। bachchon ka bhi maa-baap se pyaar ho jaata hai। pyaar saara bikhar jaata hai। ab baap samjhaate hain - tum apne ko shareer mat samjho। ghadi-ghadi apne ko aatma nishchay karo। aatma-abhimaani bano। baap bhi niraakaar hai। yahaan bhi shareer lena padta hai - samjhaane ke liye। bigar shareer to samjha nahin sakenge। tumko to apna shareer hai, baba phir loan lete hain। baaki ismen prerna aadi ki baat hi nahin। baap khud kehte hain - main yeh shareer dhaaran kar bachchon ko padhaata hoon kyonki tumhaari aatma jo abhi tamopradhaan ban gai hai, unko satopradhaan banaana hai। gaate bhi hain, patit-paavan aao, parantu arth nahin samajhte। abhi tum samajhte ho - baap kaise aakar paavan banaate hain। yeh bhi tum jaante ho। satayug mein sirf hamaara hi chhota jhaad hoga, tum svarga mein jaayenge। baaki jo itne khanda hain unka naam-nishaan nahin hoga। bhaarat khanda hi svarga hoga। parampita paramatma hi aakar heaven ki sthaapna karte hain। abhi hell hai। praacheen bhaarat khanda hi hai jahaan devtaaon ka raajya tha, ab nahin hai। unhon ke yahaan mandir hain, chitra hain। to bhaarat ki hi baat hui। yeh koi bhi bhaaratvaasi ki buddhi mein nahin aata ki bhaarat svarga tha, yeh lakshmi-naaraayan maalik the aur koi khanda nahin tha। ab to anek dharma aa gaye hain। bhaaratvaasi dharma-bhrashta, karma-bhrashta ban gaye hain। shreekrishna ko shyaam-sundar kah dete hain parantu arth nahin samajhte। barobar yeh saanvara tha na। kehte hain shreekrishna ko sarpa ne dasa to saanvara ho gaya। ab woh to satayug ka prince tha, kaise kaala ho gaya। abhi tum yeh baaten samajhte ho। shreekrishna ke maa-baap bhi abhi padh rahe hain। maa-baap se uttam shreekrishna gaaya hua hai। maa-baap ka koi naam nahin hai। nahin to jis maa-baap se aisa bachcha paida hua woh maa-baap bhi pyaare hone chaahiye। parantu nahin, mahima saari raadhe-krishna ki hai। maa-baap ki kuchh hai nahin। tumhaari buddhi mein gyaan hai। gyaan hai din, bhakti hai raat। andhiyaari raat mein thokren khaate rehte hain।

abhi tum bachchon ko samjhaaya jaata hai - ghar mein raho, yeh service bhi karte raho। koi ko bhi samjhaao tum aadhaakalpa ke aashik ho, ek maashook ke। bhakti maarga mein sabhi unko yaad karte hain to aashik thahre na। parantu maashook ko poora jaante nahin hain। yaad bahut pyaar se karte hain, he maashook tum jab aayenge to ham sirf aapko hi yaad karenge aur sabse buddhiyog tod aapke saath jodenge। aise to gaate the na, parantu baap se hamko kya varsa milta hai, yeh kisko bhi pata nahin hai। ab baap samjhaate hain - tum dehi-abhimaani bano। baap ko yaad karna tum bachchon ka pahla farja hai। bachcha hamesha baap ko, bachchi maa ko yaad karti hai। hamjinsa hain na। bachcha samajhta hai ham baap ka vaaris banenge। bachchi thode hi kahegi, woh to samajhti hai hamko piyarghar se sasurghar jaana hai। ab tumhaara niraakaar aur saakaar piyarghar hai। bulaate bhi hain, he parampita paramatma raham karo। duhkh haro sukh do, humein liberate karo, hamaara guide bano। parantu uska arth bade-bade vidvaan aachaarya bhi nahin jaante hain। baap to sarva ka liberator hai, vahi sabka kalyaankaari hai। baaki woh apna hi kalyaan nahin kar sakte to auron ka kya karenge। yahaan baap kehte hain - main gupta aata hoon, khuda-dosta ki kahaani suni hai na। ab yeh pul hai kaliyug aur satayug ke beech ka, us paar jaana hai। ab khuda to baap hai, dosta bhi hai। maata, pita, shikshak ka part bhi bajaate hain। yahaan tumko saakshaatkaar hota hai to jaadu-jaadu kah dete hain। saakshaatkaar to naudha bhakti vaalon ko bhi hote hain, bahut teekhe bhakta hote hain। darshan do nahin to ham gala kaatte hain, tab saakshaatkaar hota hai, unko naudha bhakti kaha jaata hai। yahaan naudha bhakti ki baat nahin। ghar mein baithe-baithe bhi bahuton ko saakshaatkaar hote rehte hain। divya drishti ki chaabi mere paas hai। arjun ko bhi mainne divya drishti di na। yeh vinaash dekho, apna raajya dekho। ab maamekam yaad karo to yeh banenge। abhi tum samajhte ho - vishnu kaun hai? mandir banaane vaale khud nahin jaante। vishnu dvaara paalna, 4 bhuja ka arth hi hai - 2 bhuja mel ki, 2 female ki। vishnu ke do roop lakshmi-naaraayan hain। parantu kuchh bhi samajhte nahin hain। kiska bhi gyaan nahin hai। na shivbaaba ka, na vishnu ka। pahle-pahle baba ka aakarshan tha, bahut aate the। shurooaat mein saara aangan bhar jaata tha। judge, magistrate sab aate the। phir vikaar ka jhagda shuru hua, kahne lage bachche nahin paida honge to srishti kaise chalegi। yeh to srishti badhne ka kaayda hai। geeta ki baat hi bhool gaye ki bhagvaanuvaach - kaam mahaashatru hai, us par jeet paani hai। kahne lage stri-purush donon ikatthe aayen to unko gyaan do। akele ko nahin do। ab donon bhi aayen to deven na। dekho donon ko ikattha bhi dete hain to bhi koi gyaan lete hain, koi nahin lete hain। takdeer mein nahin hoga to kya kar sakte hain। ek hans, ek bagula ban padte hain। yahaan tum brahman, devtaaon se bhi uttam ho। jaante ho - ham eeshvareey santaan hain, shivbaaba ke bachche hain। vahaan svarga mein tumko yeh gyaan nahin rahega, na jab niraakaari duniya muktidhaam mein honge tab yeh gyaan hoga। yeh gyaan shareer ke saath hi khatma ho jaata hai। abhi tumko gyaan hai, ek baba padha rahe hain। ab yeh khel poora hota hai, sab actors haajir hain। baba bhi aaya hai। rahi hui aatmaayen bhi aati rehti hain। jab sab aa jaayenge tab vinaash hoga phir sabko baap saath le jaayega। sabko jaana hai, is patit duniya ka vinaash hona hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) patit se paavan banaane ka dhandha jo baap ka hai, vahi dhandha karna hai। sabko lakshya dena hai ki baap ko yaad karo aur paavan bano।

2) yeh brahman jeevan devtaaon se bhi uttam jeevan hai, is nashe mein rehna hai। buddhi ka yog aur sabse tod ek maashook ko yaad karna hai।

vardaan:- tyaag aur sneh ki shakti dvaara seva mein saphalta praapta karne vaale snehi sahayogi bhav

jaise shuru mein knowledge ki shakti kam thi lekin tyaag aur sneh ke aadhaar par saphalta mili। buddhi mein din raat baba aur yagya taraph lagan rahi, jigar se nikalta tha baba aur yagya। isi sneh ne sabhi ko sahayog mein laaya। isi shakti se kendra banen। saakaar sneh se hi manmanaabhav banen, saakaar sneh ne hi sahayogi banaaya। abhi bhi tyaag aur sneh ki shakti se gheraav daalo to saphalta mil jaayegi।

slogan:- pharishta banna hai to vyartha bol va disturb karne vaale bol se mukta bano।

ye avyakt ishaare - sada achal, adol, ekras sthiti ka anubhav karo

koi bhi baat ho jaae chaahe prakriti ki, chaahe vyakti ki, donon achal sthiti ke aasan ko zara bhi hila na saken। itne pakke ho na! jaise dekho shareer aasan par nahin tik sakta to halchal karega na! aise man halchal to nahin karta? sada achal adol, zara bhi halchal nahin ho। agar kabhi halchal aur kabhi achal hai to sinhaasan bhi kabhi milega, kabhi nahin milega।