बुधवार 24 जून 2026 की दैनिक मुरली

24-06-26 praatahmurli om shanti ''maateshvari'' madhuban

“is karmakshetra par karma anaadi cheez hai, tumhein karma chhodna nahin hai lekin karmayogi banna hai''

(jagdamba maa ke smriti divas par sunaane ke liye, unke dvaara uchchaare hue madhur mahaavaakya)

yeh srishti karma ka khet hai, jahaan harek manushya aatma apna-apna part play kar rahi hai, ismen paramatma ka bhi part hai lekin woh aatmaon ke sadrishya janma-maran mein nahin aate hain। aatmaon ke sadrishya unke karma ka khaata ulta nahin banta hai। woh kehte hain main to sirf tum aatmaon ko liberate karne aata hoon iseeliye mujhe liberator, bandhan se chhudaane vaala gati sadgati daata kehte hain।

aatma par maaya ka jo bandhan chadha hai, use utaarkar pure banaate hain aur kehte hain ki mera kaam hai aatmaon ko sarva bandhanon se chhuda karke vaapas le jaana, to srishti ke jo anaadi niyam aur kaayde hain unhein bhi samajhna hai, phir is manushya srishti ki vriddhi kis tarah se hoti hai, phir woh time bhi aata hai jab yeh kam hoti hai। aise nahin ki badhti hai to badhti hi jaati hai, nahin। kam bhi hoti hai। to srishti mein har cheez ka niyam hai। apne shareer ka bhi niyam hai, pahle baal, phir kishor, phir yuva, phir vriddha। to vriddha bhi jaldi nahin, vriddha hote-hote jadajdeebhoot ho jaate hain, to har baat ka badhna aur uska ant hona, yeh bhi niyam hai। isi tarah se srishti ki generations ka bhi niyam hai। ek jeevan ki bhi stages hain to phir janmon ki bhi stages hain, phir generations bhi jo chali uski bhi stages hain, isi tarah sabhi dharmon ki bhi stages hain। pahla jo dharma hai woh sabse taakat vaala hai, peechhe aahiste-aahiste jo aate hain, unki taakat kam hoti jaati hai। to dharmon ka bantana, dharmon ka chalna, harek baat niymon se chalti hai, in sab baaton ko bhi samajhna hai।

isi hisaab se baap bhi kehte hain mera bhi ismen part hai। main bhi ek soul hoon, main god koi doosri cheez nahin hoon। main bhi soul hi hoon parantu mera kaam bahut bada aur ooncha hai isliye mujhe god kehte hain। jaisi tum aatma ho main bhi vaisa hi hoon। jaise aapka bachcha hai vo bhi to manushya hai, aap bhi to manushya ho, usmein to koi pharka nahin hai na। to main bhi aatma hi hoon, aatma, aatma mein koi pharka nahin hai lekin kartavya mein bahut bhaari pharka hai iseeliye kehte hain mera jo kartavya hai woh sabse bhinna hai। main koi had ke ek dharma ka sthaapak nahin hoon, main to duniya ka creator hoon, vo ho gaye dharma ke creator। jaise vo aatmaayen apna kaam apne samay par karti hain, vaise main bhi apne samay par aata hoon। mera kartavya vishaal hai, mera kartavya mahaan hai aur sabse niraala hai isliye kehte hain tere kaam niraale। unko sarvashaktivaan bhi kehte hain, sabse shaktishaali kaam hai aatmaon ko maaya ke bandhanon se chhudaana aur nai duniya ka sapling lagaana isliye unko angreji mein kehte hain heavenly god father। jaise Christ ko kahenge Christianity ka father, unko heavenly god father nahin kahenge। heaven ka sthaapak paramatma hai। to heaven world ho gai na, heaven koi ek dharma nahin hai। to woh world ka sthaapak ho gaya aur us world mein ek dharma, ek raajya hoga, tatva aadi sab change ho jaayenge isliye unko kehte hain heavenly god father।

doosra, god is truth kehte hain, to truth kya cheez hai, kismen truth? yeh bhi samajhne ki baat hai। kai samajhte hain ki jo sach bolta hai vahi god hai। god koi aur cheez nahin hai, bas sach bolna chaahiye। parantu nahin, god is truth ka matlab hi hai ki god ne hi aa karke sabhi baaton ki sachchaai bataai hai, god is truth maana god hi truth batlaata hai, usmein hi sachchaai hai, tab to unko knowledgeful kehte hain। ocean oph knowledge, ocean oph bliss, god knows, (eeshvar jaanta hai)… to zaroor vishesh kuchh jaanne ki baat hai na! to woh kaunsi jaankaari hai? yeh nahin ki isne chori ki, god knows। bhale woh jaanta sabkuchh hai parantu uski mahima jo hai na, woh isi par hai ki hamaari duniya jo neeche giri hai woh oonchi kaise chadhe, is chakra ki baaton ko woh jaanta hai isliye kehte hain god knows। to paramatma ki mahima us tareeke se aati hai jo manushya se bhinna hai kyonki unka jaanna sabse bhinna hai। manushya ka jaanna had hai, kehte bhi hain manushya alpagya hai aur paramatma ke liye kehte hain woh sarvagya hai, jisko angreji mein knowledgeful kehte hain yaani sarva ka gyaata athva jaanne vaala hai। to jo sarvagya hai vahi truth ko jaan sakta hai, yathaartha baaton ki knowledge jiske paas hogi, zaroor woh sabko dega na। agar khud jaane, doosron ko na de to usse humein kya phaayda! jaanne do। parantu nahin। uske jaankaari se humein koi phaayda mila hai, tab to ham uski qualifications gaate hain। uske peechhe padte hain। kabhi kuchh bhi hota hai to kehte hain he bhagwan! ab tu yeh kar! khair kar, raham kar, mera duhkh door kar, to ham usse maangate hain na। usse kuchh sambandh hai na isliye us tareeke se yaad karte hain, jaise usne hamaare par koi ehsaan kiya hai। agar kabhi kiya hi nahin hota to ham kyon uske liye maathaakuti karte। jab koi museebat ke samay madad karta hai to dil mein aata hai ki isne badi museebat ke samay mujhe help ki thi। samay par meri raksha ki thi, to uske prati dil mein prem rehta hai। to paramatma ke prati bhi aisa hi prem aata hai ki usne hamaari samay par madad ki hai। parantu aise nahin ki kabhi koi manushya ka achha ho gaya to kahen yeh bhagwan ne kiya... bas bhagwan aisa hi karta hai। lekin uska bada kaam hai, world ka kaam hai, duniya ke sambandh ki baat hai। baaki aise nahin ki kisi ko thoda paisa mil gaya, yeh bhagwan ne kiya, yeh to ham bhi achhe karma karte hain, to us karma ka phal milta hai। achhe bure karmon ka hisaab chalta hai, uska bhi ham paate rehte hain lekin paramatma ne aa karke jo karma sikhaaya uska jo phal hai, woh alag hai। alpakaal ka sukh to buddhi ke aadhaar par bhi milta hai। parantu usne jo knowledge di usse ham sada sukh paate hain। to paramatma ka kaam bhinna ho gaya na, isliye kehte hain ki main hi aa karke karma ki jo yathaartha knowledge hai vo sikhaata hoon, jisko kaha hai karmayog shreshtha hai। ismen karma ko, ghar grihastha ko chhodne ki baat nahin hai। sirf tum apne karmon ko pavitra kaise banaao, uski knowledge main batlaata hoon। to karma ko pavitra banaana hai, karma chhodna nahin hai। karma to anaadi cheez hai। yeh karmakshetra bhi anaadi hai। manushya hai to karma bhi hai, parantu us karma ko tum shreshtha kaise banaao woh aa karke sikhaata hoon jisse phir tumhaare karma ka khaata akarma rehta hai। akarma ka matlab hai koi bura khaata nahin banta hai।

baap kehte hain main is chhote se sangamayug mein tumhaare desh, is corporeal duniya mein tumhaare liye hi aaya hoon, to kam se kam jitna time hai utna time to kuchh hamaara khyaal karo। baba ke bane ho to kam se kam itna time to shuddh raho। phir to tumhaari aisi praalabdha ban jaayegi jo tumhein us duniya mein mehnat nahin karni padegi। abhi thodi mehnat ki baat hai, abhi tum kaise bhi karke, mar mit karke bhi pavitra rahne ki pratigya karo। apni dridhta rakho, apni dhaarnaaon mein rahne ka poora prayatna karo। baap tumhein saaph-saaph batlaate hain tum sirf itne thode time ke liye yeh mehnat karo। main tumhein aur koi mehnat nahin karaata hoon, tumhein jitna milta hai uski bhent mein koi mehnat hi nahin hai।

aise nahin sirf kehte raho ki main yeh karoonga, woh karoonga...., duniya kya kahegi, woh kya kahenge.. are duniya kya kahegi... chhod do ise। abhi yeh duniya hi jaane vaali hai। ab to maut saamne khada hai। tum itna lamba-chauda jo banaakar baithe ho yeh sab wastage kar rahe ho। abhi baap kehte hain us wastage ko bachaao। is shareer nirvaah ke liye jitna chaahiye utna bhale karo, jitna tumhaara creation ke saath hisaab-kitaab hai, utna karo, main kahaan sambhaaloonga। ise tumko hi sambhaalna hai। jo zaroori hai woh to tumko free karta hoon, lekin abhi yeh jo extra rach rahe ho uske liye mana karta hoon kyonki abhi woh to girna hi hai kyon apna phaaltu samay ganva rahe ho। in phaaltu ke jhanjhaton se hi tum duhkhi hue ho, un jhanjhaton se tum kaise chhooto, vahi to tumhein batlaata hoon। phir bhi baith karke anek bahaane lagaana, yeh kahaan ki reeti hai? phir baap bhi kehte hain ki dekh lena, abhi agar mujhe seedhi anguli nahin dete ho, haath nahin dete ho, to phir main aise naak pakadke le chaloonga। naak pakdega to phir dam ghutega, phir duhkh hoga, sazaayen khaani padengi na! isliye kehte hain abhi haath mein haath dekar seedha chalne ka time aa gaya hai। agar seedhi tarah se nahin chalenge to phir mere haath mein tumhaara naak bhi to aayega, phir dekh lena। phir us samay kuchh nahin ho sakega, na kuchh kar sakenge isliye baap kehte hain bachche, ab tum mere ho karke, mere paas aa karke, meri baaton ko sun karke, agar phir bhi kuchh nahin kiya to unke liye bahut kadi sazaayen hain, isliye jin bichaaron ko pata nahin uski to baat alag hai। baaki jinhon ko pata hai, jo baithke, sunke phir inheen baaton mein gaphlat ki to unki to khair nahin। jaise 10 guna phaayda, vaise 10 guna nuksaan hoga। tab kehte hain apne nuksaan ko, ghaate ko.. achhi tarah se samjho। achhi tarah se kuchh to apni buddhi kholo। abhi baap se buddhiyog lagaayenge to taakat milegi। to in sabhi baaton ko samjho, bhoolo mat।

abhi yeh jo samay chal raha hai, ise pahchaano, jara aankhe kholo, buddhi kholo aur samay ka poora phaayda lo। apni poori takdeer jagaao। kehte bhi hain jaisa sang vaisa rang hota hai, isliye jismen abhi yeh dhaarna poori nahin hogi to maaya ke sang ka rang lag jaayega, tab to kehte hain hear no evil, si no evil, talk no evil... kai aise evils hain jo yahaan bhi kaeeyon ko chhodte nahin hain, phir ek do ke sangadosh mein aa jaate hain। to kehte hain aise sangadosh se bache raho। aise mat samjho ki sangadosh baahar hai, yahaan nahin hai। nahin, yahaan bhi woh ghoomte rehte hain, kyonki unka raajya hai na, isliye baap kehte hain achhi tarah se kavach pahankar raho। kavach hoga to uski goli lagegi nahin। yog ka hi kavach hai, gyaan ki talvaar hai। in sabhi astra-shastron ko apne paas achhi tarah se sambhaalke rakho।

kehte bhi hain jo karta hai woh paata hai, yeh to bhavishya praalabdha banaane ki baaten hain। yahaan to praalabdha nahin bhogni hai na, yahaan to koi guru ban karke nahin baithna hai। ismen koi misunderstand na kare, isliye yeh sab samjhaaya jaata hai। to yeh sab baaten dhyaan mein rakh karke apne ko safe rakhna hai। yahaan koi kharche aadi ki baat nahin honi chaahiye। abhi yeh sab kharcha doosron ke kalyaanaartha hi use karna hai। ek ek paai bhi sab isi kaarya mein lagaana hai। achha।

aise baapdaada aur maa ke meethe-meethe bahut achhe, khabardaar rahne vaale bachchon ke prati yaadapyaar aur good morning। achha।

prashn:- mama ham chalte phirte yog ki oonchi avastha mein kaise sthit ho sakte hain?

uttar:- vaastav mein apni yeh life natural yog ki ho jaani chaahiye kyonki yog hai nishchay। to hardam nishchay ko kaayam rakh practical woh swaroop ban jaana hai। nishchay roop ban karmendriyon se karma karo, bhal sthool karmendriyaan koi bhi kaarya karti rahen magar khud ko us hi sukh swaroop avastha mein lavleen rehna hai। aapka chehra sada sukh swaroop ramneek dikhaai de। koi bhi ashuddha sankalp vikalpa na rahen। eeshvareey aanand mein aantarik magan avastha mein raho to phir koi bhi ashuddha sankalp vikalpa ki utpatti nahin hogi। shuddh pure dharni mein jo bhi sankalp utpanna hoga woh lok sangrah prati athva apni unnati prati hoga। yeh ati meethi sundar avastha hai jo samay par madad karti hai। aise eeshvareey alaukik meethi pure life banaane ka ab hi golden chance tumhein mila hua hai। to aisi avastha banaane ke liye thodi mehnat karo।

jab ham yog mein baithte hain to andar mein mantra pooja jap aadi kuchh bhi nahin karte hain, jaise bhaktimaarga mein koi koi andar hi andar praarthana karte hain, maala japte hain, moorti ko saamne rakh phool chadhaate hain, woh sabkuchh andar hi andar karte hain jisko mansa pooja kahenge। lekin hamaare yog mein ham sirf apne sva swaroop mein sthit ho sukh swaroop ban jaate hain। apne man sahit sabhi karmendriyon ko control kar ekaagrachit ban eeshvareey sukh swaroop ho jaate hain iske liye yog ka time personal mukrar hai। jahaan ek time par baithkar abhyaas karte hain। sirf vyakta baaton se naata todkar avyakt sambandh se naata jodkar rakhna hai to yaad sahaj ho jaayegi। achha। om shanti।

vardaan:- baap-daada ke saath dvaara maaya ko door se hi moorchhit karne vaale maayaajeet, jagatjeet bhav

jaise baap ke snehi bane ho aise baap ko saathi banaao to maaya door se hi moorchhit ho jaayegi। shuru-shuru ka jo vaayda hai tumheen se khaaoon, tumheen se baithoon, tumheen se rooh ko rijhaaoon...isi vaayde pramaan saari dincharya mein har kaarya baap ke saath karo to maaya disturb kar nahin sakti, uska destruction ho jaayega। to saathi ko sada saath rakho, saath ki shakti se va milan mein magan rahne se maayaajeet, jagatjeet ban jaayenge।

slogan:- apni oonchi vritti se pravritti ki paristhitiyon ko change karo।

ye avyakt ishaare - sada harshit rahne ke liye apni nature ko saral banaao, sahansheel bano।

avyakt sthiti roopi darpan ko saaph aur spashta karne ke liye saralta, shreshthata aur sahansheelta in teen baaton par dhyaan do। agar teenon mein se ek bhi baat ki kami hai to darpan par bhi kami ka daag dikhaai padega isliye jo bhi kaarya karte ho, usmein saadhaaranta dikhaai na de। saadhaaranpan ko shreshthata mein badli karo, har kaarya mein sahansheelta aur vaani mein saralta ko dhaaran karo tab service mein saphalta dikhaai degi।