शुक्रवार 10 जुलाई 2026 की दैनिक मुरली

10-07-2026 praatahmurli om shanti "baapdaada"' madhuban

“meethe bachche - baap aaye hain tum bachchon ki avinaashi gyaan ratnon se jholi bharne, yeh ek-ek gyaan ratna laakhon roopayon ka hai''

prashn:- gupta daan ka itna adhik mahatva kyon hai?

uttar:- kyonki baap tumhein abhi gupta gyaan ratnon ka daan dete hain, ise duniya nahin jaanti, phir tum bachche in gyaan ratnon ka daan karne se vishwa ki raajaai le lete ho। yeh bhi gupta hai na koi ladaai, na koi baarood aadi, na koi kharcha। gupta reeti se baap ne tumhein raajaai daan mein di, isliye gupta daan ka bahut mahatva hai।

double om shanti। ek shivbaaba kehte hain, ek brahma daada kehte hain। donon ka svadharma hai shant। donon hi shantidham mein rahne vaale hain। tum bachche bhi shantidham mein rahne vaale ho। niraakaar desh mein rahne vaale aaye ho saakaari desh mein part bajaane kyonki yeh drama hai na। bachchon ko drama ke aadi-madhya-ant ka gyaan buddhi mein bhara hua hai - oopar se lekar neeche tak। oonch te oonch bhagwan, unke saath bachche। in baaton ko achhi reeti samjho। tumhaare sivaae yeh gyaan koi mein hai nahin। tum padhte ho - khudaai school mein। bhagvaanuvaach, bhagwan to ek hi hai। koi 10-20 bhagwan nahin hain। jo bhi sab dharma vaale hain, unki jo bhi aatmaayen hain, sabka ek hi baap hai। phir baap srishti rachte hain to kaha jaata hai prajaapita brahma। shiv ko prajaapita nahin kahenge। praja to janma-maran mein aati hai। aatma sanskaar ke aadhaar se janma-maran mein aati hai। phir chaahiye prajaapita brahma। gaaya hua hai - parampita paramatma prajaapita brahma dvaara rachna rachte hain। unko bulaaya hi jaata hai - patit-paavan aao। jab duniya patit banti hai aur unka ant hota hai tab hi baap aate hain patit se paavan banaane। ab tum jaan gaye ho - baap aate bhi ek baar hain aur kab aate hi nahin। abhi tumko saari knowledge mili hai। tum drama ke actors ho na। drama ke actors ko sabki act ka zaroor pata hona chaahiye ki kya-kya part hai। woh hota hai chhota had ka part (drama), unka to sabko pata pad jaata hai। tum bhi dekhkar aate ho। chaaho to likh bhi sakte ho, yaad kar sakte ho। chhota sa hota hai। yeh to bahut bada behad ka drama hai, jisko tum satayug se lekar kaliyug ant tak jaante ho। abhi tum bachche jaante ho hamko behad ke baap se behad ka varsa milta hai। phir had ke baap se had ka varsa, had ki property milti hai। baba ne samjhaaya tha raajaayen jo bante hain woh agle janma mein daan-punya aadi karne se ek janma ke liye raaja bante hain। aise nahin ki woh doosre janma mein bhi banenge! tum jo satayug mein raajaayen, mahaaraajaayen the। aise mat samjho ki tumhaari raajaai koi gum ho jaati hai phir jab bhakti maarga hota hai tab bhi woh jaasti daan-punya karte hain, to woh bhi raajaai mein jaate hain। parantu woh phir ho jaate hain vikaari raajaayen। tum hi jo poojya the so phir pujaari bane ho। phir bhi sukh to rehta hai। duhkh to sirf abhi hota hai। abhi tamopradhaan mein bhi tumko sukh hai, koi ladaai-jhagde ki baat nahin। yeh to baad mein hota hai, jab laakhon ki andaaj mein ho jaate hain tab ladaai aadi shuru ho jaati hai। tum bachchon ko to satayug treta dvaapar mein bhi sukh hai। jab tamopradhaan shuru hota hai tab thoda duhkh hota hai। ab to hain hi tamopradhaan। baap samjhaate hain yeh hai hi tamopradhaan duniya। tum jaante ho yeh behad ka drama hai, inse koi bhi chhoot nahin sakta hai। manushya jab duhkh mein tang ho jaate hain tab kehte hain bhagwan ne aisa khel kyon racha hai। agar bhagwan rache hi nahin to duniya hi nahin hoti। kuchh nahin hota। rachta aur rachna to hai na। unki detail bhi hai, satayug se kaliyug ant tak baaki thode roz hain। tum bhi practical mein dekhenge। pahle se hi to nahin dikhaayenge। 5 hajaar varsha ka baaki thoda chakra hai। woh abhi thode hi dikha denge, jab hoga tab unko bhi saakshi ho dekhenge। jo hona hota hai, woh kalpa pahle muaaphik hoga। yeh to dekhte hi ho, taiyaariyaan ho rahi hain। vinaash to hoga zaroor। sabki taiyaari ho rahi hai। woh drama mein pahle se hi noondh hai। vinaash zaroor hoga। ab tum bachchon ko baap samjhaate hain - tumhaari aatma jo tamopradhaan bani hai unko bhi yahaan satopradhaan banaana hai। yeh tum abhi samajhte ho।

baap gupta aate hain, gupta hi tumko gyaan de rahe hain। duniya mein koi nahin jaante। gupta reeti tum vishwa ka raajya lete ho, koi bhi aavaaj nahin। bilkul hi gupta daan kaha jaata hai na। baap aakar bachchon ko avinaashi gyaan ratnon ka gupta daan dete hain। baap bhi kitna gupta hai, koi nahin jaante hain। yeh sab kahaan jaate hain, brahmaakumaar kumaariyaan kya karte hain, kuchh samajhte nahin। tum bachche jaante ho baba kitna gupta hai। tum bachchon ko gupta vishwa ka maalik banaate hain। na koi ladaai, na koi baarood, na koi kharcha। yahaan to ek chhota gaanv lene mein hi kitne jhagde, maaraamaari chal padti hai। to baap aakar gupta daan dete hain। avinaashi gyaan ratnon se tumhaari jholi bharte hain। kehte hain bhar do jholi, shiv bhola bhandaari।

tum jaante ho shivbaaba hamaari avinaashi gyaan ratnon se jholi bhar rahe hain। to ek-ek ratna laakhon roopayon ka hai। tum kitne ratna dete ho। phir tum kitne daani bante ho। woh bhi gupta hai। devtaaon ko kitne hathiyaar bhujaayen aadi de di hain। vaastav mein hai kuchh bhi nahin। satayug mein devtaaon ko itni bhujaayen aadi to hoti nahin। kaliyug mein kitne anek prakaar ke hathiyaar de diye hain। vinaash ke liye bombs hain to phir talvaar, baan aadi kya karenge। tum kehte ho gyaan khadag, gyaan talvaar to unhonne hathiyaar samajh liye hain। hai kuchh bhi nahin। tumko to gupta daan milta hai। tum phir sabko gupta daan dete ho। tum jaante ho baba hamko shreemat de rahe hain, shreemat hai hi bhagwan ki। tum jaante ho ham aate hain nar se naaraayan banne। unko sarvagun sampanna, 16 kala sampoorn daivi gundhaari kaha jaata hai। daivi gun sirf un devi-devtaaon mein hote hain, phir kalaayen kam hoti jaati hain। jaise sampoorn chandrama ki roshni achhi hoti hai phir kam hoti jaati hai। kam hote-hote baaki ekdam patli leek bach jaati hai। saara gum nahin hota। lakeer zaroor hoti hai jisko amaavas kehte hain। ab tumhaari hai behad ki baat। tum 16 kala sampoorn bante ho। dikhaate hain krishna ke mukh mein maataayen chandrama dekhti hain। yeh hai saakshaatkaar ki baaten, jiski samjhaani baap baith dete hain। ab tumko sampoorn banna hai। maaya ka sampoorn grahan laga hua hai। baaki jaakar lakeer bachti hai, seedhi utarte aaye hain। sabko seedhi utarni hai tab hi phir sabko vaapis jaana pade। tum to abhi thode ho। aahiste-aahiste vriddhi hogi। padhaai mein bahut nahin paas hote। tumhaare centres bhi dheere-dheere vriddhi ko paate rehte hain। samay najdeek aata jaayega phir samjhenge - inhon mein kya hai, din-pratidin vriddhi ko paate rehte hain। abhi kehte hain hamne samjha tha yeh kahaan tak chalenge, khatma ho jaayenge। shuru mein is dar se bahut bhaag gaye। pata nahin kya hoga! na yahaan ke, na vahaan ke rahenge, isse to bhaago। bhaag gaye phir unmein se aate rehte hain। baap kitna sahaj reeti se baith samjhaate hain। in ablaaon, ahilyaaon ko koi takleeph nahin dete hain। inhon ka bhi uddhaar to hona hai। kehte hain baba ham to kuchh padhi likhi nahin hain। baap kehte hain - kuchh nahin padhi ho to bahut achha hai। shaastra aadi jo bhi padhe ho woh sab bhool jaao। main kuchh jaasti padhaata nahin hoon। sirf kehta hoon - mujhko yaad karo to phir baadshaahi tumhaari hai। bas tumhaara beda paar ho jaayega। bachcha paida hua aur kahenge baba। bas varse ka hakdaar ban jaate hain। yahaan bhi tum hakdaar ban jaate ho। baapdaada ko yaad kiya aur raajdhaani tumhaari isliye gaaya hua hai - second mein jeevanmukti। saahookaar logon ka hai pichhaadi ka part। pahle gareebon ki baari hai। tumhaare paas aapehi aayenge। daliton ka bhi uddhaar hona hai। bheelni ka bhi gaayan hai। kehte hain raam ne bheelni ke ber khaaye। vaastav mein raam bhi nahin hai, shivbaaba bhi nahin hai। haan ho sakta hai is brahma ko khaana pade। bheelni aadi aayengi। samjho toli aadi le aayen to inkaar kaise kar sakte hain। bheelni, ganikaayen le aayengi to tum bhi khaayenge। shivbaaba kehte hain main to nahin khaaoonga, main to abhokta hoon। tumhaare paas aayenge sabhi। government bhi madad karegi ki inko uthaao। tumko bhi automatically prerna hogi। baba gareeb nivaaz hai to ham bhi gareebon ko samjhaayen। bheelniyon se bhi niklenge। itna bada jhaad hai, inmen ek bhi devi-devta dharma ka nahin raha aur sab dharmon mein convert ho gaye hain।

ab baap kehte hain jo bhakti karne vaale hain unko samjhaao। tum dekh rahe ho - sapling kaise lagta hai। brahman kaise bante hain। jo sooryavanshi, chandravanshi devta bante honge vahi aate jaayenge। ek baar bhi suna to svarga mein zaroor aayenge। baba ne kaashi kalvat ka bhi misaal sunaaya hai। shiv par jaakar bali chadhte the। unko bhi kuchh to milna chaahiye। tum bhi bali chadhte ho। purushaartha karte ho raajaai ke liye। bhakti maarga mein raajaai to hoti nahin। vaapis koi bhi ja nahin sakte। to kya hota hai, unke jo paap kiye hue hain unki saja bhog chuktu kar dete hain। phir naye sir janma hota hai। naye sir paap shuru hota hai। baaki rehna to sabko yahaan hi hai। number one mein tum hi ho। tum hi 84 janma bhogte ho। sabko sato rajo tamo mein aana hota hai। baap kehte hain is samay saari manushya srishti ka jhaad jadajdeebhoot ho gaya hai। manushya to bilkul ghor andhiyaare mein kumbhakran ki neend mein soye hue hain। ek kumbhakran nahin, anek hain। tum kitna bhi samjhaate ho, sunte hi nahin hain। jinka part hai woh purushaartha karte hain aur vahi maat-pita ke dil par chadhte hain। takhtansheen bhi vahi banenge। kitni bachchiyaan poochhti hain baba bachchon ko daantana padta hai। baap kehte hain - iska itna kuchh nahin hai। tum pukaarti ho ham patiton ko paavan banaao। baap bhi kehte hain - kaam mahaashatru hai। aise nahin kaha jaata krodh shatru hai। maataaon mein itna nahin hota hai, purush bahut ladaai karte hain। ab baap ne tum maataaon ko aage kiya hai। vande maatram। nahin to maataaon ko kehte hain - tumhaara pati guru eeshvar hai। unki mat par chalna hai। hathiyaala baandha phir phat se patit banen। yeh eeshvar mila unko! abhi raamraajya sthaapan hota hai, baaki sab marte jaayenge। baba ne samjhaaya hai - vinaash kaale vipreet buddhi। vinaash kaale preet buddhi। tumhaari parampita paramatma se preet buddhi hai। tumhaari aatma jaanti hai shivbaaba inmen aate hain, in dvaara ham sun rahe hain। itni chhoti bindu hai। shivbaaba ka yeh tempory rath hai, inke dvaara yeh roodra gyaan yagya racha hai, jo badhta hi jaayega, bachchon ki boond-boond se talaab bharta rehta hai। bachche apna saphal karte rehte hain kyonki jaante hain - yeh to sab kuchh mitti mein mil jaana hai। kuchh bhi rehna nahin hai। itna to saphal ho jaae। sudaama ka bhi misaal hai na। bachchiyaan baba ke paas chaaval mutthi va 6-8 roopaya bhej deti hain। vaah bachchi! baap to gareeb nivaaz hai na। yeh sab drama mein noondh hai, phir bhi hoga। baandheliyaan hain। baba kehte hain bhaagyashaali ho - shivbaaba ka haath to mila na। ek din aayega sab aarya samaaji aadi bhi aayenge। jaayenge kahaan? mukti-jeevanmukti ki hatti to ek hi hai। sajaayen khaakar sabko mukti mein jaana hai। yeh hai kayaamat ka samay। sab vaapis jaayenge। yeh hai saajan ki baraat। kaise baraat jaayegi, woh bhi saakshaatkaar hoga। tumhaare sivaae aur koi dekh na sake। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap dvaara gyaan ka jo gupta daan mila hai, uski value ko samajh apni jholi gyaan ratnon se bharpoor karni hai। sabko gupta daan dete jaana hai।

2) is kayaamat ke samay jabki vaapis jaana hai to apna sab kuchh saphal karna hai। preet buddhi banna hai। mukti aur jeevanmukti ka raasta sabko bataana hai।

vardaan:- bholepan ke saath almighty authority ban maaya ka saamna karne vaale shakti swaroop bhav

kabhi-kabhi bholaapan bahut bhaari nuksaan kar deta hai। saralta, bhola roop dhaaran kar leti hai। lekin aisa bhola nahin bano jo saamna nahin kar sako। saralta ke saath samaane aur sahan karne ki shakti chaahiye। jaise baap bholaanaath ke saath almighty authority hai, aise aap bhi bholepan ke saath-saath shakti swaroop bhi bano to maaya ka gola nahin lagega, maaya saamna karne ke bajaae namaskaar kar legi।

slogan:- apne dil mein yaad ka jhanda lahraao to pratyakshata ka jhanda lahra jaayega।

ye avyakt ishaare - jvaalaasvaroop sthiti mein rah shaktishaali yaad ka anubhav karo

vishesh yaad ki yaatra ko powerful banaao, gyaan-swaroop ke anubhvi bano। aap shreshtha aatmaon ki shubh vritti va kalyaan ki vritti aur shaktishaali vaataavran anek tadapti hui, bhatakti hui, pukaar karne vaali aatmaon ko aananda, shanti aur shakti ki anubhooti karaayegi।