रविवार 2 अगस्त 2026 की दैनिक मुरली

02-08-26 praatahmurli om shanti ''avyakt-baapdaada'' revise 17-02-11 madhuban

“mansa seva dvaara aatmaon ko anchali dene ki seva karte, bahutkaal se teevra purushaartha kar ever ready raho to maala ka manka ban jaayenge''

aaj sneh ke saagar apne snehi bachchon se milne aaye hain। bachchon ne yaad kiya mere baba aa jaao to baap kehte hain mere snehi bachche, sneh mein aisa aakarshan hai jo har bachche ne baap ko apna banaaya aur baap ne har bachche ko mere bachche kehte apne mein samaaya। kamaal hai, bachchon ne kaha mere baba to mere shabd mein itna sneh bhara hua hai jo baap ne bhi kaha mere bachche, sneh kya se kya bana deta hai। har bachche ke mastak mein aaj sneh ki lahren lahra rahi hain, yeh dekh baapdaada harshit ho rahe hain। sneh hi dil ko apna banaane vaala saadhan hai। to har ek bachche ke andar aaj sneh ki lahren lahraati hui dekh-dekh baapdaada bhi khush ho rahe hain।

abhi-abhi 5 minute ke liye ek drill baapdaada sabko kara rahe hain। apne mansa shakti se srishti mein jo bhi aapke bhakta va anek duhkhi ashaanta aatmaayen aapko yaad kar rahi hain, he hamaare poorvaj humein thode samay ke liye bhi shanti de do, jara sa sukh ki anchali de do, bachaao aisi aatmaon ko yahaan baithe hue emerge karo, aavaaj sunne aa raha hai! bachaao, bachaao…, to aisi aatmaon ko apne mansa shakti dvaara sukh shanti ki kirnen pahunchaao। yeh mansa seva saare din mein baar-baar karte raho kyonki baap ke saath aap bachche bhi vishwa sevak ho। saara din vaani dvaara jaise seva ke nimitta bante ho, aise hi beech-beech mein mansa seva ka bhi abhyaas karte chalo। ismen aapka apna bhi phaayda hai kyonki agar aapka man sada seva mein busy rahega to aapke paas jo beech-beech mein maaya phaaltu sankalp va vyartha sankalp karti hai, usse bach jaayenge। mehnat nahin karni padegi। abhi baapdaada poochhte hain kaise ho? to kya javaab dete ho? purushaartha hai lekin kabhi kabhi...! sada ka purushaartha nahin chal raha hai। to baapdaada abhi sabhi bachchon ka yeh record dekhne chaahte hain, yeh kabhi-kabhi ka shabd samaapta ho jaae। kya yeh ho sakta hai, kabhi-kabhi samaapta ho jaaye? samay par taiyaar ho jaayenge? ho rahe hain, hona hi hai..., iske bajaae abhi ever ready ban sakte hain? kyon? ever ready rahne ka abhyaas maayaajeet, manjeet jagatjeet yeh sanskaar bhi bahut samay se banaayenge tab ant samay bhi yeh bahutkaal ka abhyaas vijayi banaakar aapko vishesh maala ka manka banaayega। paas with honour banenge। paas nahin, paas with honour। to bolo, yeh himmat hai na! paas with honour to hona hai na? jo dvaapar se leke ab tak poojya bante hain arthaat maala ke manke bante hain to apne ko maala ke manke banaane ka shuddh sankalp hai na!

baapdaada bhi roz amritvele apne maala ke mankon ko dekhte aur vishesh milan manaate hain। to aap sabhi apne ko maala ke mankon mein samajhte ho। hai to doosri maala bhi 16 hajaar ki, lekin phir bhi second maala ho gai। vishesh maala jo gaayan aur poojyaneey yogya banti hai, woh pahli maala hai। to aaj baapdaada un mankon ko dekh rahe the kyonki brahma baap ke saath vishesh raajya adhikaari saathi vahi bante hain। to aaj brahma baap apne ab ke teevra purushaarthi aur bhavishya ke raajya adhikaari, takhta par to do hi baithte hain lekin raajya ke saathi unhon ki pahli maala hai। to apne ko check kiya hai। baapdaada ke saath to chalenge kyonki abhi aap sabki return journey hai। jab jaana hi hai, baap ke saath jaana hai, akela nahin jaana hai। to saath jaane vaale najdeek ke manke kaun honge? jo bahutkaal ke teevra purushaarthi honge। purushaarthi nahin, kab-kab vaale nahin। bahutkaal ke baap samaan hi raajya adhikaari banenge। to kya samajhte ho? teevra purushaartha hai? jo samajhte hain main teevra purushaarthi ki line mein hoon, woh haath uthaayenge। teevra purushaarthi, bada haath uthaao, chhota haath uthaate hain। achha, bahut utha rahe hain। phir lamba haath uthaao, aise (chhota) nahin। achha।

baapdaada to roz bachchon ka chart dekhte hain। majority teevra purushaarthi bhi hain lekin kabhi-kabhi ka shabd bhi saath mein laga dete hain। lekin baap kyon kah rahe hain? attention please, sookshm sankalp mein bhi halchal nahin ho। achal, adol, shuddh sankalpadhaari bahut samay se banna hi hai। kai bachche bahut meethi-meethi roohrihaan karte hain, kehte hain baba ham taiyaar ho hi jaayenge kyonki samay jitna najdeek aayega, haalten halchal mein aayengi to vairaagya to automatically aa jaayega। lekin aapka teacher kaun hua? samay ya baap? samay to aapki rachna hai। to baap abhi ishaara de raha hai ki bahut samay ka teevra purushaartha ant mein paas with honour banaayega। paas to sabhi honge lekin paas with honour banne vaala bahut samay ka lagaataar teevra purushaartha karne vaala aavashyak hai isliye aaj ki taareekh note kar do, ab bhi kabhi-kabhi, something, ho jaayenge, kar hi lenge... yeh shabd aage bhi chalte na rahen। baap ka pyaar to sada hi hai। last daane par bhi baap ka pyaar hai। kyon? dil se mera baba to kaha, aaj ki badi-badi aatmaayen mera baba nahin kehti, lekin woh mera baba to maanta hai isliye baap ka pyaar to usse bhi hai। bachchon se pyaar to baap ka sada hi hai, last tak bhi hai, last vaale tak bhi hai। sneh ne hi aapko baap ka banaaya hai। baapdaada ne yeh bhi kaha hai ki sneh majority bachchon ka hai aur rahega lekin sirf sneh nahin, shakti bhi chaahiye। teevra purushaartha bhi chaahiye।

baapdaada ka to bachchon mein faith hai na। to abhi se hi padam padamguna aise bachchon ko mubaarak de rahe hain। vaah bachche vaah! himmat vaale hain। aapki himmat aur baap ki madad to hogi hi। abhi ek baat karna। jo apne man ko busy rakhne ke liye, jaise pahle baap ne kaha second mein stop, bindu hoon, bindu lagaana hai aur sabko bindu roop mein dekhna hai। jab dekhenge hi bindu to aur koi bhi sankalp nahin chalega। mansa seva ka attention rakhna, itni duhkhi aatmaayen jo chilla rahi hain, unhon ko kirnen dene ki seva mein extra man ko lagaana। mansa seva bahut shreshtha seva hai। duhkhiyon ka bhi phaayda aur aapka apna bhi phaayda। double phaayda hai। jaise vaacha se seva karte ho aur seva badhti bhi jaati hai, dil se karte ho, sankhya bhi badhti jaati hai, centre bhi badhte jaate hain, vaacha ki seva majority ki theek hai। sabhi ki nahin, majority ki। aise abhi man se vishesh aatmaon ko anchali dene ki seva bhi karte raho। man ko free nahin chhodo। koi na koi seva mein man se shaktiyaan dene ki, mukh se vaani ki seva, karma mein gunon se seva, sambandh-samparka mein khushi dene ki seva, is bhinna-bhinna sevaaon mein man ko busy rakho kyonki saare vishwa mein richest aatmaayen kaun si hain? aap hi ho na! kitne khajaane mile hain? to har khajaane se seva karo। khajaane ko jitna seva mein lagaayenge, utne khajaane badhte jaayenge isliye abhi jaise sva ki seva ka attention dete ho, aise duhkhi aatmaon ki, apne bhakton ki mansa dvaara kirnen dene ki seva bhi attention dekar saare din mein karo, bahut chillaate hain, aapko sunne nahin aata। majority har ghar mein koi na koi duhkh ka kaaran hai। aise duhkhiyon ko sukh dene vaala kaun? bolo, kaun hai? aap hi to ho। to is mansa seva ko saare din mein check karo - kitna samay ki? jaise sva ke prati dete ho, vaise mansa seva ke prati kitna samay diya? merciful ho na। to duhkhiyon par raham karo। aapka geet bhi hai na, O maa baap duhkhiyon par raham karo। baapdaada ko bahut aavaaj sunne padte hain। aap logon ko kam sunaai dete hain lekin abhi suno। kahaan jaayenge woh, aapke hi to bhaai behen hain। to apna bhi phaayda karo, man ko busy rakho aur duhkhiyon ka duhkh haran karo। chillaate hain, dil chillaati hai। baapdaada to sunte hain, to bachchon ko yaad karte hain O mere laadle bachche, sikeeldhe bachche ab merciful roop dhaaran karo। apne braahmanon mein bhi ek do ke sahayogi bano। chaahe kaisa bhi sanskaar hai, lekin aapka kaam kya hai? sanskaar se takkar khaana ya unko bhi sanskaar ke takkar se chhudaana। aapka bhi title hai na, duhkh harta sukh karta। baap ke saathi ho na। baap ke saathi kya sankalp kiya hai? is vishwa ko duhkh ashaanti se badal sukh shanti sthaapan karni hi hai। karni hai na! haath uthaao। karni hai? ki sirf dekhna hai, ho raha hai lekin abhi badalna hai। chaahe brahman aatma ho, dekhte nahin raho, yeh kar rahe hain lekin unhon ko bhi vaani aur mansa sankalp dvaara parivartan karo, karna nahin chaahiye! baapdaada sunta rehta hai, baapdaada tak baat de di, jab baat de di to khud baap ke direction par chalo, jimmevaar baapdaada aur unke saathi murabbi bachche, nimitta bane hue bachche hain। to sada apne man ko vyartha sankalpon ke bajaae ab duhkhi aatmaon ko, chaahe brahman hain ya koi bhi hain, disturb aatma ko sahayog do। sahayogi bano। achha।

naye-naye bachche jo pahli baar aaye hain unhein ek second mein 10 minute ka kaam karna hai। samay ko jara bhi vyartha nahin karna, attention dena। apna purushaartha teevra kar jitna aage badhne chaaho utna badh sakte ho। yeh aap sabhi ko sabhi braahmanon ki taraph se, baap ki taraph se shubh bhaavna, shubh kaamna hai। achha। (sabhi madhuban vaale utho)

madhuban vaale agar nahin hote to aapki mehmaan nivaazi kaun karta। aaraam se aate ho, khaate ho, peete ho, refresh hote ho to madhuban vaalon ke liye taali bajaao। baapdaada jaante hain ki jagah kam hone ke kaaran madhuban vaalon ko thoda door baithkar sunna padta hai। yeh bhi seva hai, madhuban vaalon ki yeh bhi seva hai। doosron ko sukh dena, sukhdaata ho gaye na। to madhuban vaalon ka kaam hai sukh dena aur sukh lena kyonki jo bhi aate hain unhon ke anubhvon se aap anubhav sunaate ho, us anubhav se ek do ko phaayda ho jaata hai। kai phaayde hote hain lekin time kam hone ke kaaran sunaate kam hain। lekin madhuban vaalon ka title kya hua? sukh dena aur sukh lena। sukhdaata ke bachche follow father karne vaale hain। achha

is baari jo aaye hain usmein murli regular jo sunte hain, koi hain jo murli nahin sunte, woh haath uthaao। koi nahin। achha। woh utho jo nahin padhte ya sunte hain। thode hain। koi baat nahin lekin abhi baaki jo bhi samay mila hai usmein baap ke mahaavaakya zaroor sunna ya padhna। paramdham se baapdaada aata hai, sookshm vatan se brahma baba aata hai, aur aake mahaavaakya uchchaaran karte hain isliye murli kabhi bhi ek din bhi miss nahin karna। miss karenge to apna baapdaada ka diltakhta chhoot jaayega isliye jo bhi murli miss karte hain woh samjhen ham teen takhta ke maalik nahin, do takhta ke maalik bhi yathaashakti banenge isliye murli, murli, murli kyonki murli mein roz ke direction hote hain, chaar hi subject ke direction hote hain, to roz ke direction lene hain na। to jo bhi miss karta ho, kaarne-akaarne woh apna programme banaave ki kaise murli sunen। koi na koi salvation banaayen। aajkal science ke saadhan aapke liye nikle hain। brahma baap mein praveshta ke 100 saal pahle yeh science nikli hai, aapke kaam mein bhi aani hai isliye usko use karo, phaayda uthaao। achha - saamne baithe hue ya kahaan bhi sunne vaale bachchon ko baapdaada ki dil va jaan sik va prem se yaadapyaar aur namaste।

seva ka tarna-yu.pi.banaaras ka hai:- yu.pi. se brahma baap ka, jagat amba ka bahut pyaar raha hai। jitna brahma baba yu.pi. mein aaye hain itna baambe mein bhi aaye hain, lekin yu.pi. mein bhi aaye hain। to jis jagah brahma baap ke paanv pade woh sthaan kitna bhaagyavaan hai। lakhnau aur kaanpur donon hi is bhaagya ke adhikaari bane hain। baambe bhi bana hai lekin abhi yu.pi. ka tarna hai। direct maa aur baap ke shiksha ki boonde yu.pi. mein padi hain। abhi yu.pi. ko aage kya karna hai? vaani dvaara melon mein seva to karte ho lekin abhi ke samay anusaar jo baapdaada kehta aaya hai pahle bhi ki vaaris aur naameegraami mike, naameegraami ka arth yeh hai ki unke kahne ka prabhaav sunne vaalon par padne vaala ho, aise mike taiyaar karo। aise vaarison ka group har centre par ho। kitne centre hain yu.pi. mein, bahut hain na! to itne vaaris nikaalne chaahiye। hisaab karna kitne centre hain aur kitne vaaris bane hain? aur jitne banne chaahiye utne bane hain ya banaane hain? agar banaane hain to samay par koi bharosa nahin hai, jaldi se jaldi vaaris aur mike nikaalo, jinki aavaaj se anek aatmaon ke bhaagya ki rekha khul jaae kyonki aapne to bahut seva ki, jo puraane hain unhonne to bahut seva ki। abhi seva karaao। karne vaale taiyaar karo। kar sakte hain na! haath uthaao teachers। achha। teachers bhi bahut hain। to itne hi taiyaar karo। har ek centre chaahe chhota chaahe bada, centre ki list mein hai unko zaroor apna saboot dena hai kyonki samay par koi bharosa nahin hai। kab bhi kya bhi ho sakta hai isliye baapdaada sabhi jo bhi zone aate hain, nahin bhi aaye hain, sabhi zone ko yahi kehte hain ki abhi aage badho। classes to chalte rehte hain, sankhya bhi badhti rehti hai lekin abhi nimitta banne vaale banaao aur banaane ke liye baapdaada ne dekha hai, har zone mein aisi aatmaayen hain jo nimitta ban sakti hain। to yu.pi. ek to bhakton ka kalyaan karo, bhakta kahlaane vaale bhale thode hain, lekin bhakta bhi hain। unhon ko bhakti ka phal dilaao। bahut mehnat karte hain। baapdaada ne dekha ki har ek apne purushaartha mein badh bhi rahe hain lekin abhi bhi badhne ki margin hain। kar rahe ho, aise nahin, nahin kar rahe ho। kar bhi rahe ho lekin thodi aur speed badhaao। achhe ho aur achhi seva karte ho। sabhi daadiyaan bhi aap logon ko mubaarak deti hain। paandav bhi kitne aate hain। paandav bhi kam nahin hain। kai aisi sevaayen hain jo paandav hi kar sakte hainislie paandavon ko bhi baapdaada aur sarva madhuban nivaasi mubaarak de rahe hain। achha।

vardaan:- buddhi roopi paanv maryaada ki lakeer ke andar rakhne vaale sarva praapti sampanna shaktishaali bhav

jo bachche buddhi roopi paanv jara bhi maryaada ki lakeer se baahar nahin nikaalte ve lucky aur lovely ban jaate hain। unhein kabhi koi bhi vighna athva toofaan, pareshaani, udaasi aa nahin sakti। yadi aati hai to samajhna chaahiye ki zaroor buddhi roopi paanv maryaada ki lakeer se baahar nikaala hai। lakeer se baahar nikalna arthaat phakeer banna isliye kabhi phakeer arthaat maangane vaale nahin, sarva praapti sampanna shaktishaali bano।

slogan:- jo sada nyaare aur baap ke pyaare hain woh safe rehte hain।

ye avyakt ishaare - apvitrata ke beej ko bhi samaapta kar sampoorn svachchha (pavitra) bano

dridhta saphalta ki chaabi hai। saphalta aap bachchon ka janma siddha adhikaar hai, isliye dridhta ko use karo, albele nahin bano, ho jaayega, kar lenge.. yeh nahin socho। dridh sankalp se man ke vyartha sankalpon ko samaapta kar vijayi bano।