सोमवार 10 अगस्त 2026 की दैनिक मुरली

10-08-2026 praatahmurli om shanti "baapdaada"' madhuban

“meethe bachche - jaise baap apkaariyon par bhi upkaar karte hain aise tum bhi follow father karo, sukhdaai bano, is deh ko bhoolte jaao''

prashn:- dehi abhimaani rahne vaale bachchon ki mukhya nishaaniyaan kya hongi?

uttar:- 1- unka aapas mein bahut-bahut roohaani prem hoga। 2- ve kabhi ek do ki khaamiyon ka (kamiyon ka) varnan nahin karenge। 3- ve bahut-bahut sukhdaai honge। 4- unki khushi kabhi gaayab nahin hogi। sada apaar khushi mein rahenge। 5- kabhi matbhed mein nahin aayenge। 6- ham aatma bhaai-bhaai hain, is smriti se gunagraahi honge, unhein sabke gun hi dikhaai denge। ve khud bhi gunvaan honge aur doosron ko bhi gunvaan banaayenge। 7- unhein ek baap ke sivaae aur koi yaad nahin aayega।

om shanti। oonch te oonch behad ke baap ke sammukh tum sab bachche baithe ho। tum kitne bhaagyashaali ho jo aisa baap mila hai। tum gyaan saagar baap ke paas aaye ho gyaan ratnon se jholi bharne, kamaai karne। baap tum meethe-meethe bachchon ko kitna oonch le jaate hain। baap to sirf tum bachchon ko hi dekhte hain, unko to kisi ko yaad nahin karna hai। inki aatma ko to baap ko yaad karna hai। baap kehte hain ham donon tum bachchon ko hi dekhte hain। mujh aatma ko to saakshi ho nahin dekhna hai parantu baap ke sang mein main bhi aise dekhta hoon। baap ke saath rehta to hoon na। unka bachcha hoon to saath mein dekhta hoon। main vishwa ka maalik ban ghoomta hoon। jaise ki main hi yeh karta hoon। main drishti deta hoon। deh sahit sab kuchh bhoolna hota hai। baaki baap aur bachcha jaise ek ho jaate hain। to baap samjhaate hain meethe bachche khoob purushaartha karo। jaise baap apkaariyon par bhi upkaar karte hain aise tum bhi follow father karo, sukhdaai bano। aapas mein kabhi lado jhagdo nahin। apne ko aatma samajh is deh ko bhoolte jaao। sivaae ek baap ke aur koi yaad na aaye। yeh bhi jaise jeete ji maut ki avastha hai। is duniya se jaise mar gaye। kehte bhi hain aap muye mar gai duniya। yahaan tumko jeete ji marna hai, shareer ka bhaan udaate raho। ekaanta mein baith abhyaas karte raho। savere ekaanta mein baith apne saath baaten karo। bahut ukeer (umang) se baap ko yaad karo। baba bas abhi ham aapki god mein aaya ki aaya। bas ek ki yaad mein hi shareer ka ant ho… isko kaha jaata hai ekaanta। baap ko yaad karte-karte yeh shareer roopi chamdi chhoot jaayegi।

tum jaante ho yeh puraani duniya, puraani deh khalaas ho jaani hai। baaki purushaartha ke liye thoda sa sangam ka samay hai। bachche poochhte hain baba yeh padhaai kab tak chalegi? baba kehte jab tak daivi raajdhaani sthaapan ho jaae tab tak sunaate rahenge, phir transfer honge nai duniya mein। yeh puraana shareer hai, kuchh na kuchh karmabhog bhi chalta rehta hai, ismen baba madad kare - yeh ummeend nahin rakhni chaahiye। devaala nikla, beemaar hua - baap kahenge yeh tumhaara hisaab-kitaab hai। haan phir bhi yog se aayu badhegi। apni mehnat karo, kripa maango nahin। baap ko jitna yaad karenge ismen hi kalyaan hai, jitna ho sake yogbal se kaam lo। bhakti maarga mein gaate hain mujhe palkon mein chhipa lo... priy cheez ko noore ratna, praan pyaara kehte hain। yeh baap to bahut priy hai, parantu hai gupta। unke liye lav aisa hona chaahiye jo baat mat poochho। bachchon ko to baap apni palkon mein chhipaate hi hain। palken koi yeh aankhen nahin, yeh to buddhi ki baat hai। most beloved niraakaar baap humein padha rahe hain। woh gyaan ka saagar, sukh ka saagar, pyaar ka saagar hai। aise most beloved baap ke saath kitna pyaar hona chaahiye। bachchon ki kitni nishkaam seva karte hain। tum bachchon ko heere jaisa banaate hain। kitna meetha baba hai। kitna nirhankaari ban tum bachchon ki seva karte hain, to tum bachchon ko bhi itne pyaar se seva karni chaahiye। shreemat par chalna chaahiye। kahaan apni mat dikhaai to takdeer ko lakeer lag jaayegi।

tum bachchon ka aapas mein bahut-bahut roohaani prem hona chaahiye, parantu deh abhimaan mein aane ke kaaran woh pyaar ek do mein nahin rehta hai। ek do ki khaamiyaan hi nikaalte rehte hain, phalaana aisa hai, woh yeh karta hai... tum jab dehi-abhimaani the to kiski khaamiyaan nahin nikaalte the। aapas mein bahut pyaar tha, ab phir vahi avastha dhaaran karni hai। pahle tum kitne meethe the phir aisa meetha, sada sukhdaai bano। deh abhimaan mein aane se duhkhadaai banen to tumhaari roohaani khushi gaayab ho gai। life bhi chhoti ho gai। ab phir baap aaya hai tumhein satopradhaan banaakar sada sukhdaai banaane। tum jitna baap ko yaad karte rahenge utna khaamiyaan nikalti jaayengi। matbhed nikalta jaayega। yeh pakka yaad rahe ham bhaai-bhaai hain। aatma bhaai-bhaai ko dekhne se sadaiv gun hi dikhaai padenge। sabko gunvaan banaane ki koshish karo। avgunon ko chhod gunon ko dhaaran karo। kabhi kisi ki glaani nahin karo। koi-koi mein aisi khaamiyaan hain jo khud bhi samajh nahin sakte hain, woh to apne ko bahut achha samajhte hain parantu khaami hone ke kaaran kahaan na kahaan ulta bol nikal padta hai। satopradhaan avastha mein yeh baaten nahin hoti। apne aapko dekho ham kitne meethe bane hain? hamaara baap ke saath kitna lav hai? baap se lav aisa ho jo ekdam chatka rahe। baba aap hamko kitna oonch samajhdaar banaate ho, svarga ka maalik banaate ho। aise andar mein baap ki mahima kar gad-gad hona chaahiye। roohaani khushi mein rehna chaahiye। gaate bhi hain khushi jaisi khuraak nahin। baap ke milne ki bhi kitni khushi rahni chaahiye। sangam par hi tum bachchon ko 21 janmon ke liye sada khushi mein rahne ki khuraak mil jaati hai phir koi ko kisi baat ki chinta nahin rehti hai। abhi kitni chintaayen hain isliye uska asar shareer par bhi aata hai। tumko to koi baat ki chinta nahin। yeh khushi ki khuraak tum ek do ko khilaate raho। ek do ki yeh jabardasta khaatiri karni hai। aisi khaatiri manushya, manushya ki kar nahin sakte। tum baap ki shreemat par yeh khaatiri karte ho। khush khairaaphat bhi yeh hai - kisko baap ka parichay dena। yeh gyaan aur yog ki first class wonderful khuraak hai। yeh khuraak ek hi roohaani surgeon dvaara milti hai। manamnaabhav, madhyaaji bhav - bas do versions ki yeh khuraak hai। most beloved baap se vishwa ki baadshaahi milti hai, yeh koi kam baat thode hi hai। yeh do vachan hi naameegraami hain। in do vachnon se tum ever healthy, ever wealthy ban jaate ho। to tum bachchon ko in baaton ka simran kar harshit rehna chaahiye। godly student life is di best - yeh gaayan bhi abhi ka hai। jitna ho sake ek do ko yeh roohaani khuraak pahunchaao, ek do ki unnati karo, time vesta na karo। bade dheeraj se, gambheerta se, samajh se baap ko yaad karo, apni jeevan heere jaisi banaao।

meethe bachche, baap ki jo shreemat milti hai usmein gaphlat nahin karni chaahiye। baap ka sandesh sabhi ko pahunchaana hai। baap ka message sabhi ko milna to hai na। message bahut sahaj hai - sirf bolo apne ko aatma samajh baap ko yaad karo aur karmendriyon se mansa-vaacha-karmana koi bhi bura karma nahin karo। ek din tumhaare is silence bal ka aavaaj niklega। dinapratidin tumhaari unnati hoti jaayegi। tumhaara naam baala hota jaayega। sab samjhenge yeh achhi sanstha hai, achha kaam kar rahe hain, raasta bhi bahut sahaj bataate hain। yeh braahmanon ka jhaad bahut badhta jaayega, praja banti rahegi। centres bahut vriddhi ko paayenge। tumhaari pradarshani bhi gaanv-gaanv mein hogi। tum bachchon ko badi bhaari service karni hai। tumhaare naye-naye centres khulte jaayenge, jismen anek manushya aakar apni jeevan heere jaisi banaate rahenge। tumhein bahut pyaar se ek-ek ki sambhaal karni hai। kahaan kisi bichaare ke pair khisak na jaayen। jitne jaasti centres honge utna jaasti aakar jeeydaan paayenge। jab aap bachchon ka prabhaav niklega to bahut bulaayenge ki yahaan aakar hamko manushya se devta banaane ka raajayog sikhaao। aage chalkar bahut dhoomdhaam hogi ki vahi bhagwan aakar aabu mein padhaare hain।

tum bachche dekh rahe ho ki is samay puraani duniya mein anek international role hain। ab yeh sabhi role khatma hone hain, iski tumhein koi bhi phikraat nahin karni hai। tum sabko sunaao ki iski parvaah nahin karo, ab yeh puraani duniya gai ki gai, ismen moh nahin rakhna hai, agar moh hoga, hriday shuddh nahin hoga to apaar khushi bhi nahin rahegi। bachchon ko athaah gyaan dhan ka khajaana milta rehta hai to apaar khushi honi chaahiye। jitna hriday shuddh hoga utna auron ko bhi shuddh banaayenge। yog ki sthiti se hi hriday shuddh banta hai। tum bachchon ko yogi banne, banaane ka bhi shauk hona chaahiye। agar deh mein moh hai, deh abhimaan rehta hai to samjho hamaari avastha bahut kachchi hai। dehi abhimaani bachche hi sachcha diamond bante hain isliye jitna ho sake dehi abhimaani banne ka abhyaas karo। achha!

meethe-meethe sikeeldhe bachchon prati maat pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan nirhankaari ban bahut pyaar se sabki seva karni hai। shreemat par chalna hai। apni mat par chalkar takdeer ko lakeer nahin lagaani hai।

2) sangam par baap dvaara jo khushi ki khuraak mili hai, vahi khuraak khaate aur khilaate rehna hai। apna time vesta nahin karna hai। bade dheeraj se, gambheerta se, samajh se baap ko yaad kar apni jeevan heere jaisi banaani hai।

vardaan:- aasakti ko anaasakti mein parivartan karne vaale shakti swaroop bhav

shakti swaroop banne ke liye aasakti ko anaasakti mein badli karo। apni deh mein, sambandhon mein, koi bhi padaartha mein yadi kahaan bhi aasakti hai to maaya bhi aa sakti hai aur shakti roop nahin ban sakte, isliye pahle anaasakta bano tab maaya ke vighnon ka saamna kar sakenge। vighnon ke aane par chillaane va ghabraane ke bajaae shakti roop dhaaran kar lo to vighna-vinaashak ban jaayenge

slogan:- raham nihsvaartha aur lagaavmukta ho - svaartha vaala nahin।

maateshvari ji ke anmol mahaavaakya “jeevan ki aash poorn hone ka suhaavna samay''

ham sabhi aatmaon ki bahut samay se yeh aash thi ki jeevan mein sada sukh shanti mile, ab bahut janma ki aasha kab to poorn hogi। ab yeh hai hamaara antim janma, us ant ke janma ki bhi ant hai। aisa koi nahin samjhe main to abhi chhota hoon, chhote bade ko sukh to chaahiye na, parantu duhkh kis cheez se milta hai, uska bhi pahle gyaan chaahiye। ab tumko knowledge mili hai ki in paanch vikaaron mein phansane kaaran yeh jo karmabandhan bana hua hai, unko paramatma ki yaad agni se bhasma karna hai, yeh hai karmabandhan se chhootne ka sahaj upaay। is sarvashaktivaan baba ko chalte phirte shvaanson shvaans yaad karo। ab yeh upaay bataane ki sahaayta khud paramatma aakar karta hai, parantu ismen purushaartha to har ek aatma ko karna hai। paramatma to baap, teacher, guru roop mein aae humein varsa dete hain। to pahle us baap ka ho jaana hai, phir teacher se padhna hai jis padhaai se bhavishya janma-janmaantar sukh ki praalabdha banegi arthaat jeevanmukti pad mein purushaartha anusaar martaba milta hai। aur guru roop se pavitra banaae mukti dete hain। to is raaz ko samajh aisa purushaartha karna hai। yahi time hai puraana khaata khatma kar nai jeevan banaane ka, isi samay jitna purushaartha kar apni aatma ko pavitra banaayenge utna hi shuddh record bharega phir saara kalpa chalega। to saare kalpa ka madaar is samay ki kamaai par hai। dekho, is samay hi tumhein aadi-madhya-ant ka gyaan milta hai, hamko so devta banna hai aur apni chadhti kala hai phir vahaan jaake praalabdha bhogenge। vahaan devtaaon ko baad ka pata nahin padta ki ham girenge, agar yeh pata hota ki sukh bhogna phir girna hai to girne ki chinta mein sukh bhi bhog nahin sakenge। to yeh eeshvareey kaayda racha hua hai ki manushya sada chadhne ka purushaartha karta hai arthaat sukh ke liye kamaai karta hai। parantu drama mein aadha-aadha part bana pada hai, jis raaz ko ham jaante hain, parantu jis samay sukh ki baari hai to purushaartha kar sukh lena hai, yeh hai purushaartha ki khoobi। actor ka kaam hai act karne samay sampoorn khoobi se part bajaana, jo dekhne vaale hear hear (vaah vaah) karen, isliye hero heroine ka part devtaaon ko mila hai, jinhon ka yaadgaar chitra gaaya aur pooja jaata hai। nirvikaari pravritti mein rah kamal phool samaan avastha banaana, yahi devtaaon ki khoobi hai। is khoobi ko bhoolne se hi bhaarat ki aisi durdasha hui hai, ab phir se aisi jeevan banaane vaala khud paramatma aaya hua hai, ab unka haath pakadne se jeevan naeeya paar hogi। achha - om shanti।

ye avyakt ishaare - apvitrata ke beej ko bhi samaapta kar sampoorn svachchha (pavitra) bano

main sangamayugi brahman hoon, yeh vyartha sankalp, apvitrata ke sanskaar shoodra ke sanskaar va swaroop hain। aisa anubhav ho ki yeh apvitrata aur vismriti ke sanskaar, jo mere arthaat braahmanpan ke nahin lekin shoodrapan ke hain, unko mera samajhte ho to maaya ke vash hokar pareshaan hote ho।