बुधवार 9 सितंबर 2026 की दैनिक मुरली

09-09-2026 praatahmurli om shanti "baapdaada"' madhuban

“meethe bachche - yogbal se hi tumhein apne vikarmon par jeet paakar vikarmaajeet banna hai''

prashn:- kaun sa khyaal purushaarthi bachchon ko bhi purushaartha heen bana deta hai?

uttar:- agar kisi purushaarthi ko yeh khyaal aaya ki abhi to bahut samay pada hai, peechhe gallop kar lenge। parantu baap samjhaate hain bachche maut ka samay nishchit thode hi hai, kal-kal karte mar jaayenge to kamaai kya hogi isliye jitna ho sake shreemat par apna aur doosron ka kalyaan karte raho। samay ka sochkar purushaartha-heen mat bano।

geet:- om namo shivaae…

om shanti। yeh to bachchon ko samjhaaya gaya hai ki niraakaar, saakaar bigar koi karma kar nahin sakte। part baja nahin sakte। roohaani baap aakar brahma dvaara roohaani bachchon ko samjhaate hain। yogbal se hi satopradhaan banna hai aur vishwa ka maalik banna hai। yeh bachchon ki buddhi mein hai ki kalpa-kalpa baap aakar raajayog sikhaate hain - brahma dvaara। aur aadi sanaatan devi-devta dharma ki sthaapna karte hain arthaat manushya ko devta banaate hain। manushya jo devi-devta the, paavan the so ab badal 84 janmon baad patit ban pade hain, bhaarat jab paaraspuri tha to pavitrata sukh-shanti sab tha। yeh 5 hajaar varsha ki baat hai। tithi taareekh sahit baap saara hisaab-kitaab samjhaate hain। inse oonch to koi hai nahin। srishti va jhaad jisko kalpa vriksha kehte hain, unke aadi-madhya-ant ka raaz bhi baap hi baith samjhaate hain। bhaarat ka jo devi-devta dharma tha, woh ab praayah lop ho gaya hai। sirf chitra zaroor hain। bhaaratvaasi jaante hain ki satayug mein lakshmi-naaraayan ka raajya tha। bhal shaastron mein bhool kar di hai, jo shreekrishna ko dvaapar mein le gaye hain। baap hi aakar bhoole hue ko raasta bataate hain। unko kehte hain mukti-jeevanmukti ka guide। sarva ko mukti-jeevanmukti dene vaala ek hi hai। bhaarat jab jeevanmukta hai to baaki sab aatmaayen muktidhaam mein hain, isliye unko kaha jaata hai mukti-jeevanmukti daata। rachayita ek hi hai। srishti bhi ek hi hai, world ki history-geography bhi ek hi hai, jo repeat hoti hai। satayug treta, dvaapar, kaliyug... phir hota hai sangamayug। kaliyug hai patit, satayug hai paavan। satayug hoga, to pahle zaroor kaliyug ka vinaash hoga। vinaash ke pahle sthaapna hogi। satayug mein sthaapna nahin hogi। bhagwan aayega tab jab patit duniya ko paavan banaana hai। ab baap sahaj yukti bataate hain ki deh sahit deh ke sab sambandh tod dehi-abhimaani ban baap ko yaad karo। baap hai bhakton ko phal dene vaala। bhakton ko gyaan dete hain - paavan banne ke liye। sabko paavan banaane vaala hai yog। gyaan saagar mukh se aakar gyaan sunaate hain। patiton ko paavan banaate hain। is samay sab aatmaayen patit bani hui hain isliye baap ko bulaate hain kyonki baap bigar to koi paavan bana na sake। agar patit-paavni ganga hai to phir patit-paavan seetaaraam kahkar kyon bulaate ho। buddhi kehti hai ki parampita paramatma zaroor phir nai duniya ki sthaapna aur puraani duniya ke vinaash ke liye aayega। kalpa vriksha ki aayu bhi hoti hai, jo cheez jad jadeebhoot ho jaati hai, unko hi tamopradhaan kehte hain। new world nahin kahenge, yeh hai iron aged world। yeh sab baaten buddhi mein bithaai jaati hain auron ko samjhaane ke liye। ghar-ghar sandesh dena hai। aise nahin kehna hai ki paramatma aaya hai। yukti se samjhaana hai, bolo do baap hain laukik aur paarlaukik। duhkh ke samay paarlaukik baap ko hi yaad kiya jaata hai। sukhdhaam mein koi paramatma ko yaad nahin karta। satayug, lakshmi-naaraayan ke raajya mein sukh shanti pavitrata sab kuchh tha। baap ka varsa mil gaya phir pukaaren kyon? vahaan sukh hi sukh hai। baap ne duhkh ke liye duniya nahin rachi। yeh bana banaaya khel hai, jinka part pichhaadi mein hai, 2-4 janma lete hain, baaki samay shantidham mein rahenge। baaki khel se koi nikal jaaye, yeh ho nahin sakta। ek do janma liya baaki samay jaise moksha hai, aatma paartadhaari hai। koi ka ooncha part hai, koi ka kam। gaaya hua hai eeshvar ka ant koi pa na sake। eeshvar hi aakar rachayita aur rachna ke aadi-madhya-ant ka raaz samjhaate hain। baap samjhaate hain main saadhaaran tan mein pravesh karta hoon। main jis tan mein pravesh karta hoon, yeh apne janmon ko nahin jaante hain, main inke 84 janmon ki kahaani sunaata hoon, koi bhi part change nahin ho sakta। yeh bana banaaya khel hai। yeh kiski buddhi mein baithta nahin। buddhi mein tab baithe jab pavitra hokar samjhen। achhi reeti samajhne ke liye 7 roz bhatthi mein pade। bhaagvat aadi bhi 7 roz rakhte hain। koi 7 din mein achhi reeti samajh lete hain, koi to kah dete hain ki hamaari buddhi mein kuchh bhi nahin baitha। oonch pad nahin paana hoga to buddhi mein kaise baithega। achha phir bhi kalyaan to hua na। praja to aise hi banti hai, baaki raajya bhaagya lene mein mehnat hai। baap ko yaad karne se hi vikarma vinaash honge। ab karo va na karo। parantu baap ka direction hai, pyaari vastu ko yaad kiya jaata hai na। bhakti maarga mein bhi kehte hain ki he patit-paavan aao। ab woh mila hai। kehte hain mujhe yaad karo to kat utar jaayegi। baadshaahi aise hi thode hi mil jaayegi। yaad mein hi thodi mehnat hai। bahut yaad karne vaale hi karmaateet avastha ko pa lete hain। poora yaad na karne se vikarma vinaash nahin honge। yogbal se hi vikarmaajeet banna hai। lakshmi-naaraayan itne pavitra kaise banen? jabki kaliyug ke ant mein koi bhi pavitra nahin hai। is samay geeta gyaan ka episode repeat ho raha hai। shiv bhagvaanuvaach, bhoolen to sabse hoti rehti hain। main aakar sabko abhul banaata hoon। bhaarat ke jo bhi shaastra hain, yeh sab hain bhakti maarga ke। baap kehte hain - maine jo kuchh kaha tha woh kisko bhi pata nahin hai। jinhonne mere dvaara suna, unhonne 21 janmon ki praalabdha paai phir gyaan praayah lop ho jaata hai। tum hi chakra lagaae phir yeh gyaan sun rahe ho।

tum jaante ho ham sapling laga rahe hain, manushya se devta banaane ka। yeh hai daivi jhaad ka sapling। ve log to un jhaadon ka kalam lagaate rehte hain। baap aakar contrast bataate hain। tum dikhaate bhi ho ki unhon ka kya plan hai, tumhaara kya plan hai। woh family planning karte hain ki duniya badhe nahin। baap to bahut achhi baat bataate hain ki anek dharma vinaash ho jaayenge aur devi-devta dharma ki family sthaapan ho jaayegi। satayug mein ek hi aadi sanaatan devi-devta dharma ki family thi aur anek family thi hi nahin। is samay bhaarat mein dekho kitni families hain। gujraati family, sikkha family.. vaastav mein bhaarat ki ek hi family honi chaahiye। bahut family hongi to zaroor khitpit hogi। phir civil war ho jaati hai। family mein bhi civil war ho jaati hai। jaise Christian ki aapas mein family hai to unhon mein bhi do bhaai aapas mein nahin milte। friction ho jaati hai। paani bhi baanta jaata hai। sikkha dharma vaale samajhte hain ham apne dharma ki family ko jaasti sukh deven। rag jaati hai na। maatha maarte rehte hain। jab ant ka samay aata hai tab aapas mein ladne lag padte hain। vinaash to hona hi hai। dher bombs banaate rehte hain। badi ladaai jab lagi thi to do bombs chhode the। abhi to dher banaaye hain। samajh ki baat hai na। tumko samjhaana hai ki yeh vahi mahaabhaarat ladaai hai। bade-bade log bhi kehte hain agar ladaai ko banda nahin kiya to saari duniya ko aag lag jaayegi। tum jaante ho aag to lagni hi hai।

baap aadi sanaatan devi devta dharma ki sthaapna karte hain। raajayog hai hi satayug ka। jo devta dharma praayahlop ho gaya hai woh phir sthaapan karte hain। ab kaliyug hai inke baad satayug chaahiye। ab kaliyug vinaash ke liye yeh mahaabhaari mahaabhaarat ladaai hai। yeh sab achhi reeti dhaaran kar samjhaana hai kyonki manushya hain aasuri sampradaay, isliye khabardaari rakhni hai। kalpa pahle muaaphik jo vighna padne honge woh padenge zaroor। yeh bana-banaaya drama hai। ham baandhe hue hain। yaad ki yaatra kabhi bhool nahin jaani chaahiye। geet hai na - raat ke raahi thak mat jaana.... inka arth koi samajh na sake। raat poori ho din aane vaala hai। aadhaakalpa poora hua, ab sukh shuru hoga। baap ne manamnaabhav ka arth bhi samjhaaya hai, sirf geeta mein shreekrishna ka naam daalne se woh taakat nahin rahi hai। shreekrishna ko kabhi sarvashaktimaan nahin kah sakte। woh to poore 84 janma lete hain isliye geeta mein woh taakat nahin rahi hai। ab ham sab manushya-maatra ka kalyaan kar rahe hain। kalyaankaari jo banega unko varsa milega। yaad ki yaatra bigar kalyaan ho na sake। is samay sab vipreet buddhi hain। kah dete hain paramatma sarvavyaapi hai। tumko samjhaana hai ki woh behad ka baap hai। behad ke baap se hi bhaaratvaasiyon ko behad ka varsa mila hai। bhaaratvaasiyon ne hi 84 janma liye hain। abhi tum practical mein dekhte ho ki gyaan to tum sunte hi rehte ho। din pratidin tumhaare paas bahut naye-naye aate rahenge। ab hi agar bade-bade log aa jaaen phir to deri na lage। jhat aavaaj nikal jaae। hangaama ho jaae isliye yukti se dheere-dheere chalta rehta hai। yeh hai hi gupta gyaan, kisko pata bhi nahin padta ki yeh kya kar rahe hain। bhakti mein hai duhkh, gyaan mein hai sukh। raavan ke saath tumhaari yuddha kaisi hai, yeh to tum hi jaano aur koi jaan na sake। bhagvaanuvaach, tamopradhaan se satopradhaan banna hai to mujhe yaad karo to paap vinaash ho jaayenge। pavitra bano to saath le jaayenge। mukti to sabko milni hai। sab raavanraajya se mukta ho jaayenge। tum kehte ho ki shiv shaktiyaan brahmaakumaar-kumaariyaan hi shreshthaachaari duniya sthaapan karenge। parampita paramatma ki shreemat par kalpa pahle muaaphik। 5 hajaar varsha pahle shreshthaachaari duniya thi, yeh buddhi mein bithaana chaahiye। mukhya points jab buddhi mein dhaaran hongi tab yaad ki yaatra mein rahenge। koi samajhte hain abhi time pada hai, peechhe purushaartha kar lenge। parantu maut ka niyam thode hi hai। kal mar jaayen to! isliye aise mat samjho ant mein gallop kar lenge। yeh khyaal aur hi gira dega। jitna ho sake purushaartha karte raho। shreemat par har ek ko apna kalyaan karna hai, apni jaanch karni hai ki kitna baap ko yaad karta hoon aur kitni baap ki service karta hoon। roohaani khudaai khidmatgaar tum ho na। tum roohon ko salvage karte ho। rooh patit se paavan kaise banen, uski yukti bataate hain। shreekrishna ko yaad karne se vikarma vinaash nahin honge। woh to prince tha, usne praalabdha bhogi, unki mahima ki bhi darkaar nahin hai। devtaaon ki mahima kya karenge! haan birth de to sab manaate hain। yeh common baat hai। baaki unhonne kya kiya, seedhi to utarte hi aate hain। achhe va bure manushya to hote hain। har ek ka part apna-apna hai। yeh hai behad ki baat। mukhya taal taaliyaan gini jaati hain। baaki patte to anek hain। unko kahaan tak tum ginti karte rahenge। baap samjhaate rehte hain, bachche mehnat karo, sabko baap ka parichay do to baap se buddhi yog jut jaae। baap kehte hain - sabhi ko kaho - pavitra bano to muktidhaam mein chale jaayenge। duniya ko thode hi pata hai ki mahaabhaarat ladaai se kya hoga। yeh yagya racha hai kyonki nai duniya chaahiye। hamaara yagya poora hoga to sab is yagya mein svaaha hona hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sachcha-sachcha khudaai khidmatgaar ban sabhi roohon ko salvage karne ki seva karni hai। sabka kalyaan karna hai। sabko baap ka parichay dena hai।

2) pyaare te pyaari vastu (baap) ko pyaar se yaad karna hai। bane-banaaye drama par atal rehna hai। vighnon se ghabraana nahin hai।

vardaan:- manamnaabhav ki vidhi dvaara manras ki sthiti ka anubhav karne aur karaane vaale sarva bandhanmukta bhav

jo bachche lohe ki janjeere aur maheen dhaagon ke bandhan ko tod bandhanmukta sthiti mein rehte hain ve kaliyugi sthool vastuon ki rasna va man ke lagaav se mukta ho jaate hain। unhein deh-abhimaan va deh ke puraani duniya ki koi bhi vastu jara bhi aakarshit nahin karti। jab koi bhi indriyon ke ras arthaat vinaashi ras ke taraph aakarshan na ho tab alaukik ateendriy sukh va manras sthiti ka anubhav hota hai। iske liye nirantar manamnaabhav ki sthiti chaahiye।

slogan:- sachchi seva woh hai jismen sarva ki duaaon ke saath khushi ki anubhooti ho।

ye avyakt ishaare - ab apne daata swaroop ko pratyaksha karo

duniya mein bhi daan ko punya samajhte hain, aap daata ke bachche sada daan karne vaali punya aatmaayen ho। aap kisi bhi aatma dvaara alpakaal ki praapti lene ki kaamna nahin kar sakte। yeh aatma kuchh de to main doon, va yeh bhi kuchh kare to main bhi karoon, aisi had ki kaamna nahin rakhna। daata ke bachche ban sabke prati sneh, sahayog, shakti dene vaale punya aatma bano।