बुधवार 23 सितंबर 2026 की दैनिक मुरली

23-09-2026 praatahmurli om shanti "baapdaada"' madhuban

“meethe bachche - tum roohaani baap se nai-nai roohaani baaten sun rahe ho, tum jaante ho jaise ham aatmaayen apna roop badalkar aaye hain, vaise baap bhi aaye hain''

prashn:- chhote-chhote bachche baap ki samjhaani par achhi reeti dhyaan den, to kaun sa title le sakte hain?

uttar:- spiritual leader ka। chhote bachche agar koi himmat ka kaam karke dikhaayen, baap se jo sunte hain us par dhyaan den aur doosron ko samjhaayen to unhein sab bahut pyaar karenge। baap ka naam bhi baala ho jaayega।

geet:- chhod bhi de aakaash sinhaasan…

om shanti। bachchon ne bulaaya, baap ne respond kiya - practical mein bachche kya kehte hain ki baba aap phir se raavan raajya mein aa jaao। akshar bhi hai na - phir se maaya ka parchhaaya pada hai। maaya kaha jaata hai raavan ko। to pukaarte hain - raavan raajya aa gaya hai isliye ab phir se aa jaao। raavan ke raajya mein yahaan bahut duhkh hai। ham bahut duhkhi, paap-aatma ban pade hain। abhi baap practical mein hai। bachche jaante hain phir se vahi mahaabhaarat ladaai bhi khadi hai। baap gyaan aur raajayog sikhla rahe hain। bulaate bhi hai he niraakaar parampita paramatma, niraakaar se aakar saakaari roop lo, roop badlo। baap samjhaate hain tum bhi vahaan ke rahne vaale ho - brahm mahtatva va niraakaari duniya mein। tumne bhi roop badla hai। yeh koi nahin jaante hain। jo aatma niraakaar hai, vahi aakar saakaar shareer dhaaran karti hai। woh hai niraakaari world। yeh hai saakaari duniya aur woh hai subtle world (aakaari duniya)। woh alag hai। tumhaari buddhi mein hai ham shanti-dhaam va nirvaandhaam se aate hain। baap ko jab pahle-pahle nai rachna rachni hoti hai to sookshm vatan ko hi rachenge। sookshm vatan mein abhi tum ja sakte ho phir kabhi jaane ka nahin hota। pahle-pahle tum via sookshm vatan se nahin aate ho। seedhe aate ho। abhi tum sookshm vatan mein aa-ja sakte ho। paidal aadi jaane ki baat nahin hai। yeh saakshaatkaar hota hai, tum bachchon ko। mool vatan ka bhi saakshaatkaar ho sakta hai, parantu ja nahin sakte। vaikuntha ka bhi saakshaatkaar ho sakta hai, ja nahin sakte hain। jab tak sampoorn pavitra nahin bane hain। tum aise nahin kah sakte ki ham sookshm vatan mein ja sakte hain। tum saakshaatkaar kar sakte ho। shivbaaba aur daada aur tum bachche ho। tum bachche kaise nai-nai roohaani baaten sunte ho। yeh baaten duniya mein koi nahin jaante। bhal kehte hain incorporeal world parantu yeh pata nahin hai ki woh kaisi hoti hai। pahle to aatma ko hi nahin jaante to niraakaari duniya ko phir kya jaanenge! baap pahle-pahle aakar aatma ka realisation karaate hain। tum aatma ho phir roop badla hai arthaat niraakaar se saakaar mein aaye ho।

abhi tum samajhte ho hamaari aatma 84 janma kaise bhogti hai। woh saara part aatma mein record muaaphik bhara hua hai। pahle yeh baaten sunaate the। baap kehte hain - abhi tumko guhya ramneek baaten sunaata hoon। jo tum aage nahin jaante the, woh abhi jaante ho। nai-nai points buddhi mein aati-jaati hain isliye doosron ko bhi jhat samjha sakte ho। din-pratidin yeh braahmanon ka jhaad badhta jaata hai। yahi phir daivi jhaad banna hai, brahman hi vriddhi ko paayenge। dekhne mein kaise chhote aate hain। jaise world ke nakshe mein india dekhte hain to kitni chhoti dikhaai padti hai। vaastav mein india hai kitni badi। vaise hi gyaan ke liye kaha jaata hai - manamnaabhav arthaat alpha ko yaad karo। beej kitna chhota hota hai। jhaad kitna bada nikalta hai। to yeh brahman kul bhi chhota hai, vriddhi ko paata jaata hai। tumhaari buddhi mein hai ki ham is samay brahman hain phir devta banenge। 84 janmon ki seedhi to bahut achhi hai। bachche samjha sakte hain jo 84 janma lete hain vahi aakar samajhte hain phir koi 84, koi 80 bhi lete honge। yeh to samajhte hain ham is daivi kul ke hain। ham sooryavanshi gharaane ke banenge। agar naapaas honge to phir deri se aayenge। sabhi ikatthe to nahin aayenge। bhal bahut gyaan lete rehte hain parantu ikatthe to nahin aayenge na। jaayenge ikatthe, aayenge thode-thode yeh to samajh ki baat hai na। sab kaise ikatthe 84 janma lenge। baap ko bulaate hi hain, baba phir se aakar geeta ka gyaan sunaao। to siddha hota hai, jab mahaabhaarat ladaai hoti hai, us samay hi aakar geeta ka gyaan sunaate hain। unko hi raajayog kaha jaata hai। abhi tum raajayog seekh rahe ho। kalpa-kalpa, 5 hajaar varsha baad baba hamko aakar gyaan dete hain। satya naaraayan ki katha sunte hain na। yeh kahaan se aaye, phir kahaan gaye! jaante nahin hain। baap samjhaate hain bachche yeh raavan ki parchhaaya jo padi hai, ab drama anusaar raavanraajya khatma hona hai। satayug mein hai raamraajya aur is samay hai raavanraajya।

abhi tum samajhte ho hamaare mein jo gyaan aaya hai woh is duniya mein kisko hai nahin। hamaari yeh nai padhaai hai, nai duniya ke liye। geeta mein shreekrishna ka naam likha hai, woh to puraani baat hui na। tum abhi nai baaten sun rahe ho। kahenge yeh to kabhi nahin suna, shiv bhagvaanuvaach ham to shreekrishna bhagvaanuvaach sunte aaye the। tum nai duniya ke liye everything new sunte ho। yeh sab jaante hain ki bhaarat praacheen hai। parantu kab tha, in lakshmi-naaraayan ka raajya kaise chala, inhonne kaise raajya paaya phir kahaan chala gaya, yeh kiski bhi buddhi mein nahin aata। kya hua jo inhon ka raajya khatma ho gaya। kisne jeet paai, kuchh bhi samajhte nahin vo log to satayug ko laakhon varsha de dete hain, yeh ho nahin sakta ki lakshmi-naaraayan ne laakhon varsha raajya kiya hoga। phir to sooryavanshi raajaayen dher hon। kiska bhi to naam hai nahin। 1250 varsha ka kisko pata nahin hai phir lakshmi-naaraayan ka raajya kahaan tak chala, yeh bhi kisko pata nahin to phir laakhon varsha ka pata kisko kaise pad sakta। kiski bhi buddhi kaam nahin karti। abhi tum chhote-chhote jhat samjha sakte ho। yeh hai bahut sahaj। bhaarat ki kahaani hai, saari stori hai। satayug treta mein bhi bhaaratvaasi raajaayen the। alag-alag chitra bhi hain। yahaan to hajaaron varsha kah dete hain, baap kehte hain - yeh hai hi 5 hajaar varsha ki kahaani। aaj se 5 hajaar varsha pahle lakshmi-naaraayan ka raajya tha, dynasty thi phir punarjanma lena pade। chhoti-chhoti bachchiyaan itna thoda bhi baith samjhaayen to samjhenge yeh to bahut achhi knowledge padhi hui hain। yeh spiritual knowledge sivaae spiritual father ke aur koi ke paas hai nahin। tum kahenge hamko bhi spiritual father ne aakar bataaya hai। aatma shareer dvaara sunti hai। aatma hi kahegi ki ham phalaana bante hain। self ko manushya realise nahin karte hain। hamko baap ne realise karaaya hai। ham aatma 84 janma poore lete hain। aisi-aisi baaten baith samjhaayen to kahenge inko to bahut achhi knowledge hai। god knowledgeful hai na। gaate bhi hain god is knowledgeful, blissful, liberator, guide parantu kahaan le jaane vaala hai, yeh koi nahin jaante hain। yeh bachche samjha sakte hain। spiritual father knowledgeful hai, isko blissful kaha jaata hai। liberate tab aakar karte hain jab manushya bahut duhkhi hote hain। ek raavan ka raajya hota hai। heavenly god father kaha jaata hai। hell ko raavanraajya kaha jaata hai। yeh knowledge kisko baith sunaao, jhat kahenge yeh sabko chalkar sunaao। parantu dhaarna bahut achhi chaahiye। pradarshani ke chitron ki magazine bhi hai aur bhi samjhenge to is par bahut service kar sakte hain।

yeh bachchi bhi (jayanti behen) London mein vahaan apni teacher ko samjha sakti hai। vahaan London mein yeh service kar sakte hain। duniya mein thagi bahut hai na। raavan ne ekdam sabko thag bana diya hai। bachche saare world ki history-geography samjha sakte hain। lakshmi-naaraayan ka raajya kitna samay chala phir phalaane sanvat se islaami, bauddhi, Christian aate hain। vriddhi hote-hote variety dharmon ka jhaad kitna bada ho jaata hai। aadhaakalpa baad aur dharma aate hain। aisi-aisi baaten yeh baith sunaaye to sunne vaale inko kahenge yeh to spiritual leader hai, inmen spiritual knowledge hai। yeh phir kahengi - yeh knowledge to india mein mil rahi hai। spiritual god father de rahe hain। woh hai beejroop। yeh ulta jhaad hai। beej hai knowledgeful। beej ko jhaad ki knowledge hogi na। yeh variety religion ka jhaad hai। bhaarat ka deity religion inko kaha jaata hai। pahle lakshmi-naaraayan ka raajya, phir hota hai raam-seeta ka raajya। aadhaakalpa yeh chalta hai phir baad mein aate hain islaami... jhaad vriddhi ko paata rehta hai। aise jaakar yeh bachchi bhaashan kare aur samjhaaye ki yeh vriksha kaise emerge hota hai। yeh srishti chakra kaise phirta hai, ham samjha sakte hain। vilaayat mein to aur koi hai nahin। yeh bachchi jaakar samjhaaye ki abhi iron ej ka ant hai, golden ej aane vaala hai to ve log bahut khush honge। baba yukti batlaate rehte hain, is par dhyaan dena chaahiye। chhote bachchon ko maan bahut mile। chhota koi himmat ka kaam karte hain to unko bahut pyaar karte hain। baap ko yeh hota hai ki aise-aise bachche ismen attention den to spiritual leader ban jaayen। spiritual god father hi baith knowledge dete hain। shreekrishna ko god father kehna bhool hai। god to hai niraakaar। ham sab aatmaayen brothers hain, woh baap hai। sab iron ej mein jab duhkhi hote hain tab baap aate hain। jab phir iron ej hota hai to baap ko golden ej sthaapan karne aana hota hai। bhaarat praacheen sukhdhaam tha, heaven tha। bahut thode manushya the। baaki itni sab aatmaayen kahaan thi। shantidham mein thi na। to aise samjhaana chaahiye। ismen darne ki baat nahin, yeh to kahaani hai। kahaani khushi se bataai jaati hai। world ki history-geography kaise repeat hoti hai, unko kahaani bhi kah sakte hain। knowledge bhi kah sakte hain। tumko to yeh pakki yaad honi chaahiye। baap kehte hain - meri aatma mein saare jhaad ka gyaan hai jo main repeat karta hoon। knowledgeful baap bachchon ko knowledge de rahe hain। yeh jaakar knowledge dengi to kahenge aap auron ko bhi bulaao। bolo haan bula sakte hain kyonki vo log jaanna chaahte hain ki bhaarat ka praacheen raajayog kya tha! jisse bhaarat heaven bana - woh koi samjhaaye। ab sannyaasi kya sunaayenge? spiritual gyaan sirf geeta mein hai। to woh jaakar geeta hi sunaate hain। geeta kitni padhte hain, kantha karte rehte hain। kya yeh spiritual knowledge hai? yeh to banaai hai manushya ke naam par। spiritual knowledge to manushya de na saken। tum abhi farka samajhte ho - us geeta mein aur jo baba sunaate hain usmein raat-din ka pharka hai। diya father ne aur naam daal diya hai shreekrishna ka। satayug mein shreekrishna ko yeh knowledge hai nahi। knowledgeful hai hi father। kitni atapti baaten hain। shreekrishna ki aatma jab satayug mein thi tab to knowledge hai nahin। kitna soot moonjha hua hai। yeh sab vilaayat mein jaakar naam nikaal sakte hain। bhaashan kar sakte hain। bolo, world ki history-geography ki knowledge ham aapko de sakte hain। god heaven sthaapan kaise karte hain, woh heaven se phir hell kaise banta hai, so ham aapko samjhaate hain। yeh baith likhen phir dekhen ham koi point bhoole to nahin hain। phir yaad karke likhen। aise practice karne se bahut achha likhenge, bahut achha samjhaayenge to naam baala ho jaayega। yahaan se bhi baba koi ko baahar bhej sakte hain। yeh jaakar samjhaayen to bhi bahut achha hai। 7 din mein bhi bahut hoshiyaar ho sakte hain। buddhi mein dhaaran karna hai, beej aur jhaad, detail samjhaani hai। chitron par bahut achhi reeti samjha sakte hain। service ka shauk hona chaahiye। bahut oonch martaba ho jaayega। knowledge badi sahaj hai। yeh hai puraani chhi-chhi duniya। svarga ke aage yeh puraani duniya jaise gobar misal hai, inse baans aati hai। woh hai sone ki duniya, yeh hai gobar ki duniya। tum bachche jaante ho abhi ham yeh shareer chhod jaakar prince-princess banenge। aise school mein padhne jaayenge। vahaan aise vimaan honge, full proof honge। yeh khushi bachchon ko andar rahe to kabhi bhi koi baat mein rona nahin aaye। tum samajhte ho na ki ham prince-princess banenge। to tumko kyon nahin andar mein khushi honi chaahiye। bhavishya mein aise school mein jaayenge, yeh-yeh karenge। bachchon ko pata nahin kyon bhool jaata hai। bahut nasha chadhna chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is puraani chhi-chhi gobar misal duniya ko buddhi se bhool satayugi duniya ko yaad kar apaar khushi va nashe mein rehna hai। kabhi bhi rona nahin hai।

2) baap jo guhya ramneek baaten sunaate hain unhein dhaaran kar sabko samjhaana hai। spiritual leader ka title lena hai।

vardaan:- svamaan mein sthit rah deh-abhimaan ko samaapta karne vaale saphaltaamoorta bhav

jo bachche svamaan mein sthit rehte hain vahi baap ke har pharmaan ka sahaj hi paalan kar sakte hain। svamaan bhinna-bhinna prakaar ke deh-abhimaan ko samaapta kar deta hai। lekin jab svamaan se sva shabd bhool jaata hai aur maan-shaan mein aa jaate ho to ek shabd ki galti se anek galtiyaan hone lagti hain isliye mehnat jyaada aur pratyakshaphal kam milta hai। lekin sada svamaan mein sthit raho to purshaartha va seva mein sahaj hi saphalta-moorta ban jaayenge।

slogan:- tapasya karni hai to samay ko bachaao, bahaana nahin do।

ye avyakt ishaare - ab apne daata swaroop ko pratyaksha karo

jitna daata bante ho utna bharta jaata hai। bhandaara bharpoor hai to kyon nahin daata bano, isko hi kaha jaata hai nirantar roohaani sevaadhaari। vishwa mahaaraajan banne ke liye sirf gyaan daata nahin banna hai। iske liye sneh aur sahayog bhi dena hai। agar yeh high jump de diya to sabhi baaton mein shreshtha sahaj hi ban jaayenge।